S10, Epi 1-17 "The End"
رغم كل إنتقادات الواحد الحادة أوي للمسلسل من بعد الموسم السابع وقد أيه هو وصل لحالة من التفسخ لدرجة انت مش عارف و ايه لازمة اللي انت بتتفرج عليه ده والأحداث دي مستمرة ليه والعلاقات دي بتبدأ ليه وأنتهت كدة ليه .. لكن برضو علي ما وصلت للحلقة الأخيرة حسيت أني مش عايز المغامرة دي تخلص ومش عايز الشلة دي تتفركش ونفسي العالم ده يستمر للأبد
فعلاً زي ما كنت بأسمع كتير من الفانز المخلصين أوي لفريندز أنك في لحظة معينة ح تحس أن الشلة دي شلتك وأنك واحد منهم ولذلك فراقهم ح يبقي صعب عليك
الشعور ده يدل علي نجاح المسلسل في بناء جسر عاطفي ورابطة شعورية بينه وبين المشاهدين بالذات اللي الواقع بتاعهم خرة زي حالاتنا كدة والحياة بتاعتهم دي بتجسد حالة الواحد نفسه يعيشها لولا الظروف المحيطة بيه
_._._
نجاح مسلسل فريندز ممكن نرجعه لأسباب كتير منها الظرف الزمني أنه جه في المرحلة اللي عصر التلفزيون والبث المحلي في كان بينتهي وعصر الفضائيات والانترنت كان خلاص أبتدي وعلي وشك أنه ينفجر ويعمل الثورة المعلوماتية اللي حصلت في بداية الألفية .. العامل ده مع عامل الاستمرارية لمدة ١٠ سنين خلي المسلسل بالتعبير العصري "تريند" في لحظة الانفجار وبعدها بمدة طويلة .. اللي كان بيخش علي النت أو عنده ستالايت أو قنوات مشفرة كان بيلاقي فريندز ده جايله مع البيعة لدرجة أن التلفزيون المصري المحلي كان بيذيعه وقتها علي "نايل تي في" من كتر ما هو كان مشهور وذائع الصيط وقتها .. نهاية المسلسل أقترنت ببداية عصر اليوتيوب والقرصنة والتحميل أون لاين والتورنت فده أدي دفعة جديدة للمسلسل بالنسبة للأجيال اللي كانت صغيرة وقتها وما حصلت حصلتوش وهو بيتذاع أو حصلته بس مكنش مناسب ليها "زيي بالمناسبة"
ثم برضو في نفس الوقت ده كان في انفجار أخر ولكن فني وهو العصر الذهبي للدراما الأمريكية .. مسلسلات زي Lost و Prison Break و The Wire و The Sopranos اللي شكلت عصر النهضة بالنسبة للمسلسلات الأمريكية تصادف انا اتذاعت معاه او بعد إنتهاء مباشرة وكملت .. الزخم اللي عملته المسلسلات والحالة دي أدته فرصة أنه ينتشر أكتر وبشكل أوسع أسس للشعبية الأسطورية ليه حول العالم
إلي جانب ده في عامل تاني مهم أنا بأشوفه أحد أهم أسباب أن المسلسل راق للذائقة الأمريكية وهو أنه عمل معادلة كدة لذيذة وهي أنه كان بيسف في الأساس علي مسلسلات السوب أوبرا بشكل أساسي عن طريق أنه واخد نفس الشكل والقالب التفاصيل بتاعتها بس عاملها كوميدي وبأسلوب السيتكوم .. لدرجة أنه خلي جوي بطل سوب أوبرا ودي كان واحد من أكتر الخطوط العبقرية في القصة
المسلسل في الموسم الأول والتاني كان ملتزم أوي بأسلوب السيتكوم وجمالياته لكن كان بيبني في الخلفية شبكة خطوط دارمية معقدة شبه شغل السوب أوبرا .. الخطوط اللي فيها خيانات وصدام وصراعات عاطفية والأجواء بتاعة المسلسلات الدرامية دي .. وبعدين قام جاي في لحظة معينة تحديداً حلقة
We were on a break
وقام زاقق الخطوط دي كلها للواجهة وبقي المسلسل ميكس ما بين السيتكوم والسوب أوبرا بس الساخرة اللي بتسف علي أجواء السوب أوبرا
لذلك لما بأجي أشوف أكتر لحظات علقت معايا وباحبها في المسلسل بألاقي كتير منهم لحظات مش كوميدية بل درامية وبعضها حزين كمان زي لحظة إنفصال مونيكا وريتشارد و زي اللحظة فرح فيبي وارتباط ريتشيل وروس ولما جوي ساب الشقة .. وأظن مش أنا لوحدي بل في قطاع كبير من محبي فريندز الجانب الدرامي فيه هو أكتر جانب أتعلقوا بيه
_._._
يمكن قولت ده في المواسم الأولي بس حابب أعيد الكلام تاني بشكل مطول شوية .. فريندز هو في الأساس دراما إجتماعية كوميدية الكوميديا فيها خارجة من منابع كتير أهمها مسألة النقد الإجتماعي وتناول الواقع اليومي وحالة المجتمع بطريقة ساخرة .. وهو في السكة دي تطور لنمط مهم جداً في الكوميديا الإجتماعية وهو النمط اللي بيفكك النمط الكلاسيكي للكوميديا الإجتماعية وطرحها بشكل عصري أكتر.. تحديداً تفكيك حتة أن الكوميديا تكون مرتكزة علي وجود الأسرة وصراع الأجيال أو الصدام ما بين الأسرة والمجتمع اللي بيكون عادة قائم علي مرتكز قيمي زي في "فريش برنس أز بيل-إير" و"كوزبز"
فريندز أتولد في عالم فكرة الإستقلال عن الأسرة والحرية الفردية فيه كانت في قمة مجدها وكان في ثورة علي الشكل التقليدي للأسرة والعلاقات وأصبح إستقلال الشباب في سن مبكرة واتجاهم للعيشة مع نفسهم أو ضمن تجمعات شبابية بديلة للأسرة هو السائد وأصبح التوجه لحتة العلاقات المفتوحة والخارجة عن إطار الزواج وأنتشار أنماط زي زواج المثليين والأمهات العزباوات مش مجرد ظاهرة بل حقيقة واقعة ومنتشرة بالذات في المدن الاقتصادية الكبري زي نيويورك
الثورة دي كانت تراكم لنضالات وحراك إجتماعي أمتد لسنين طويلة أبرز محطاته حركة الحقوق المدنية في الستينيات .. وكانت ردة فعل مباشرة علي الهجمة اليمينية المحافظة في الثمانينيات اللي حاولت تقيد الحريات وترجع المجتمع للقوالب القديمة تحديداً في عهد ريجن
في الثمانينيات ظهر مسلسل Cheers
اللي بيتناول يوميات "بار" و رواده اللي بيمثله شرايح مختلفة من المجتمع .. ده يمكن كان أول مسلسل يطرح كوميديا بعيد عن جو الأسرة أو بمعني صح يطرح أسرة بديلة وشكل جديد للعلاقات الإنسانية مبنية علي الصداقة وتلاقي الأذواق .. كمل بعده المسيرة دي ساينفيلد وبلورها وأبتكر قالب جديد من الكوميديا قائم علي فكرة "الشلة" كبديل للأسرة والعلاقات الرومانسية وتناول عادات وتقاليد المجتمع بشكل كوميدي كبديل عن صراع الأجيال .. فضل الصراع مع المجتمع ونوعاً ما صراع الأجيال في الصورة بس تنحوا جانباً شوية في مقابل العلاقات
جه فريندز كتتويج للبناء ده كله وعشان يدشن عصر بحاله حتي يومنا هذا من محاولات تقليد القالب وتطوير هذا النمط بأشكال مختلفة بعضها نجح وبعضها لم ينجح
_._._
الموسم ده كان خاتمة لذيذة لهذة المغامرة الطويلة والجميلة .. لازلت عند رأيي وهو أن النهاية دي جت متأخرة ٣ سنين مثلاً علي الأقل وفي الفترة دي المسلسل في كمية متاهات وحواديت ملهاش لازمة كتير بلا داعي لدرجة أني في وقت من الأوقات بالذات في الموسم التاسع كنت بأسأل نفسي هو أيه اللي أنا بأتفرج عليه ده وايه اللي جابرني علي أني أكمل المسلسل ده بالتهلهل اللي وصله ده
بس أرجع أقول أن القصة في مرحلة ما بيني وبين المسلسل تحولت من مجرد تجربة فرجة لحياة بديلة كم تمنيت أن احياها
إلي هنا أعزائي المتابعين تنتهي رحلتنا .. لكن لن ينتهي الحديث عن فريندز أبداً
