Ch 98 - 232 "End"
شينسومان من الأعمال اللي فيها حاجة غريبة جداً .. لاقيت ان انا وناس كتير أحداث السلسلة ساحت في دماغنا مع مرور الوقت .. ده عادي وبيحصل بس مع السلسلة دي بيحصل بسرعة بشكل مش لاقيله تفسير غير يمكن أن معلوماتها كتير شوية ومتشظية.. بمعني كل شخصية فلك لوحدها وحدوتة وكل أرك قصة لوحده ومفيش رابط ما بينهم غير العالم العبثي الغريب ده والملئ بالمفاجئات
يعني العالم ده رغم أن ليه شوية خطوط عريضة بس تحسه سايح كدة ومش منتظم وممكن بكل بساطة ينقلب علي قوانينه ويطلعلك مفاجأة من برة الصندوق غير متوقعة زي قصة الرجل المنشار المزيف أو حتة شيطان المجاعة اللي طلع شيطان الموت
وح نروح بعيد ليه .. زي نهاية المسلسل ككل
لحد الأن أنا مش عارف أتعافي من النهاية دي لأنها فعلياً برة الصندوق وعمري ما توقعتها
أنا حتي دلوقتي عمال أفكر طيب بعد النهاية دي أيه مصير العالم اللي كان عايش فيه المنشار وشيطانة الحرب؟!
يعني هل معني كدة أن شياطين الجحيم أستولوا علي العالم؟
طيب وصيادين الشياطين كان ايه موقفهم؟
وهل الفصل الأخير ده حصل فعلاً ولا دي خيالات الاحتضار و دينجي مات بجد خلاص هو و أسا؟
أنا مش فاهم حاجة بالذات ان النهاية فيها حاجة غريبة .. لا ماكيما ولا أكي ظهروا في "النهاية السعيدة" .. الرابط الأساسي بين الشخصيتين هو ان دينجي كان بيحبهم وقتلهم بإيديه الأتنين
مما يرجح في وجهة نظري انا النهاية دي وهم زرعوا بوتشيا في ذهن دينجي قبل ما يموتوا هما الأتنين .. شال منه كل التفاصيل السيئة والشخصيات المرتبطة بذكريات مريرة في ذهن دينجي وساب بس الشخصيات اللي بيحبها واللي كان نفسه يعيش معاهم الحياة السعيدة اللي كان طول عمره بيحلم بيها
في نظرية تانية منتشرة بتقول أن بوتشيا مكنش شيطان المناشير من الأساس لأن قوته وقدراته لا تتناسب مع فكرة الخوف من المنشار .. المعروف ان كل شيطان بيكتسب قوته من مدي خوف البشر من الفكرة أو الشئ المرتبط بيه .. لذلك شيطان الفراخ كان ضعيف .. بينما شياطين النار والموت والجوع والأسلحة النووية كانوا أقوي فشخ
لذلك فكرة ان شيطان المنشار يبقي قوي لدرجة ان الشيطان تخاف منه مش منطقية.. النظرية بتقول انه كان شيطان الخوف من الشياطين وده يفسر قوته وكذلك يفسر أنه لما قتل نفسه العالم تحول إلي عالم سعيد
بس النظرية دي فيها ثغرة خطيرة .. هو لما قتل نفسه الشياطين ما اختفوش .. بينما لما شياطين الأذن والأعضاء أختيار او أتاكلوا أعضاء البشر أختفت
محدش فاهم حاجة فعليًا وفي اتفاق بين يمكن كل القراء انها نهاية مختذلة ومتطلسقة ومش موضحة أي شئ .. حتي اللي بيدافعوا عنها كنهاية سعيدة بيقولوا أنها مش سعيدة للأخر وما كانت أفضل نهاية ممكنة
متوسطة .. وده رأيي أنا كمان
---
نيجي للجزء الأهم وهو تقييم الجزء ده ككل
يمكن ما أقدرش أنكر تفاوت المستوي بينه وبين الجزء الأول لكني ضد الهجوم عليه واتهامه بأنه أقل منه أو أنه جزء سئ
شخصياً بداية الجزء عجبتني .. شخصية أسا وفكرة أن بقي فيه بطل جديد للقصة ودينجي بقي شخصية ثانوية دي كانت جذابة أوي .. وهو الرجل في الفصول الأولي من الجزء فضل يوحي للقارئ أننا قصاد قصة جديدة فيها بطل جديد بشخصية متناقضة مع شخصية دينجي وصراع مختلف لكن بيتفق معاه في البيئة القاسية والظروف الصعبة للنشأة
وحتي أنا كانت عجباني أوي فكرة أن يبقي فيه بطلة عندها حتة شر والشيطان بتاعها شرير ومجرم عكس بوتشيا وعلاقته اللطيفة بدينجي
بس فجأة حسيت الرجل رجع في رأيه وخلي القصة ماشية مناصفة بين الأتنين .. وده برضو مكنش عندي أي أزمة معاه لأنه بيخدم علي القصة ولأني برضو عايز أشوف قصة دينجي ح تنتهي علي أيه .. انا أتعلقت بالقصة بسببه أساساً وحكايته البسيطة اللي تتلخص في أنه إنسان بدون أي أحلام كبري ولا أهداف رنانة
هو بطل Bleachy تماماً زيه زي إيتشيجو بالظبط عايز يعيش حياته بسيطة سعيدة وأثناء رحلته بيتعلم حاجات جديدة عن نفسه والحياة والانسان وبيتطور
المشكلة أن بعد كدة القصة دخلت في متاهات كتير وقصص فرعية وخطوط خلتني مش عارف أركز .. مرة قصة الشياطين الأربعة .. ومرة قصة المنشار المزيف .. مرة قصة الفوضي وعداء الناس للمنشار .. وأخيراً قصة بوابة الجحيم اللي خرج منها شياطين غريبة كلتهم .. وكلها قصص علي حد ملاحظتي بتدي إيحاء أنك داخل علي حاجة قوية وكبيرة أوي وفي الوسط تلاقيها بتنفجر وتتطور بشكل مثير للاهتمام .. بس في النهاية وده لاحظته عادة ما بتنتهيش بشكل اللي كنت متخيله ولا بنفس القوة اللي كنت متصورها
كمان نهاية القصة خلت أساساً كل الخطوط دي ولا ليها أي ستين لازمة وكلها بناء بلا داعي بما فيها العداء بين المنشار وشيطانة الحرب يورو
حسيت كأن الكاتب نفسه بيبقي متحمس لفكرة معينة ثم فجأة بيرجع في رأيه وده حتي فسره ناس كتير بأنه بيعاني من الاكتئاب وده خلاه يفقد شغفه بالقصة في مرحلة ما فلذلك كان بيقلب الأحداث وما يكملش خطوط ولا حتي يهتم يوضح تفاصيل ونقط في القصة ويسيبها لخيال وتأويل المتلقي
أجمل ما في الجزء ده ويمكن في السلسلة كلها مناقشة فكرة "الخوف" .. القصة كلها قايمة علي فكرة أن الخوف هو عدو الإنسانية الأول والأخطر وأنه رغم أنه شئ طبيعي وجزء أصيل من طبيعة الإنسان الا أنه ممكن يبقي سلاح ضده وممكن لو تغول يحول حياته إلي جحيم ويدمر كل أشكال الإنسانية في الحياة
الجزئية اللي كانت بتتكلم عن أن الحكومة اليابانية ضمن سياق القصة ح تضحي ب10000 طفل وتديهم لشيطان العجز عشان يضمنوا "الخلود" لأمتهم يمكن دي أقسي جزئية في القصة في رأيي .. وما قدرتش أشيل من دماغي حتة أنها مرتبطة بشكل أو بأخر بالأحداث اللي كانت دايرة وقتها في العالم تحديداً حرب الإبادة الجماعية في غزة وحسيت أن الكلام كان اسقاط عليها بشكل أو بأخر
هنا القصة مش بس بتتكلم عن الخوف لا دي بتبص للقصة من جانب أخر خفي .. إذا كان الخوف هو العنصر الأساسي المحرك للقصة أو اللي خلق هذا العالم بكل هذا الرعب والدموية .. فالخوف مصدره الأساسي هو الإنسان .. بس لما الواحد بيتعمق في القصة أكثر وبيربطها بالواقع بيلاقي أن الإنسان والإنسانية مش مجرد مصدر الخوف .. لا دول الرعب والإرهاب الحقيقي .. وهما شرير القصة الأساسي
في الجزء الأول والثاني من القصة بيطلع إنسان في النهاية مش شيطان .. لأن زي ما قولنا الشياطين خارجين من عباءة مخاوف ورغبات البشر
يعني الجزء الأول بيبتدي بعصابة بتحاول تستغل شاب صغير عشان تقدمه قربان لشيطان ثم الجزء بينتهي بنفس الحاجة مع مكيما بس بشكل أعمق .. كذلك الجزء الثاني بيبدأ بنفس الحاجة زميلة أسا بتقتلها ثم القصة في الأمتار الأخيرة من القصة بنكتشف أن صيادين الشياطين والحكومة والبشر أبشع بكتييييير من الشياطين وأن الخوف والكراهية والرغبة في الانتقام والطمع وغيرها من الدوافع الأنانية والمشاعر السلبية بتطلع أسوأ ما فيهم وبتكشف جانبهم الأكثر إظلامًا
لكن المؤلف لازال عنده بعض الإيمان بالبشر والجانب وده بيبان من خلال دينجي و أسا .. نشأة قاسية ومليئة بالصدمات والموسى.. ضحايا لحياة صعبة مفيهاش بصيص نور .. لذلك كانوا يستاهلوا في النهاية حياة سعيدة .. حتي لو وهمية
لازلت مصر علي أن النهاية دي وهم مش حقيقي ولو أن في ناس كتير بتقول العكس وعندهم نظريات لده .. لكن خلينا متفقين أن علي الأقل البطلين لاقوا أفضل نهاية ممكنة
لكن النهاية كنهاية للقصة دي والعالم ده مش مقنعة تماماَ .. علي الأقل بالنسبة لي
