The Shield
S1, Epi 1-13 “Finale”
من حوالي 15 سنة كنت قبل الأندرويد بقي والتليفونات الذكية كانت أحد أهم هواياتي تصفح العدد الأسبوعي لجريدة الدستور أيام الفريق الأصلي طبعاً .. كانت صفحة الفنون عندهم تقيلة الحقيقة وكلهم من الشباب المطلعين علي أحدث المنتجات الإعلامية برة وجوا وكان القسم صيحة جديدة وغير تقليدية ومبهرة أوي لشباب صغير زينا في العصر ده اللي كان فيه النت لسة بيقول يا هادي ع الأخر رغم أنه كان بقاله سنين شغال
من المقالات اللي مش ح أنساها أبداً واللي فضلت عالقة في ذاكرتي كتير مقالة بتتكلم عن مسلسل بيدور حولين فساد الشرطة في أمريكا وعن مجموعة بتمارس أعمال خارج إطار القانون عشان تحفظ الأمن وتسيطر ع الوضع .. الفكرة شدتني أوي وفضلت المقالة في ذهني لحد ما قررت من أسبوع أني أدور مسلسل جديد أتفرج عليه فأفتكرت الكلام اللي قرأته زمان وذهبت لأخوض رحلة جديدة مع عمل مميز وهو "شيلد/الدرع"
معلومة هامشية بس لازم أقولها .. فريق "شيلد" بتاع المصارعة (سيث رولينز، رومان رينز، دين أمبروز/جون موكسلي) أسمه كان متاخد من المسلسل ده وحتي كان جزء كبير من سيناريو الفريق-في البداية بالذات- كان متأثر أوي بفكرة وفلسفة مجموعة الإقتحام اللي هي محور المسلسل
الغريب والجميل في نفس الوقت أن المسلسل ده اتعرض في نفس وقت عرض "ذا واير" بالظبط .. بدء معاه في 2002 وأنتهي برضو في 2008 والأتنين ويا للعجب بيناقشوا نفس القضية بس مكانين مختلفين وبنظرتين مختلفتين .. الا وهي الجريمة كسلوك إجتماعي .. لكن يا تري الناس هنا نظرت للقضية أزاي؟
المؤلف هنا أختار مدينة لوس أنجلوس عشان تكون مسرح الأحداث .. مدينة مهمة في ولاية أهم أقتصادياً وسياحياً ده أولاً وثانياً مدينة فيها تعدد عرقي وأثني كبير جداً ما بين اللاتينين والبيض والأفروأمريكيين والأسيويين وغيرهم .. بيئة خصبة وجيدة لمناقشة القضايا الإجتماعية والإنسانية الشائكة ومهمة زي العنصرية والعنف وغيره
في مسلسل "ذا واير" السؤال الأساسي في المسلسل كان "كيف تنشئ الجريمة؟" والسؤال الثاني "ماذا يفعل الشرطي الصالح في منظومة معقدة وفاسدة؟" ... واير مختار الوجوه الأساسية اللي بتقود الأحداث تحديداً في جانب الشرطة وجوه طواقة للعدالة لكنها عاجزة أمام المنظومة بفسادها وروتينيتها وبيروقراطيتها وسياسيتها ذات الأهداف البعيدة كل البعد عن أهداف الأبطال ... هنا الموضوع العكس تماماً .. أولاً السؤال الأساسي في المسلسل هو "ماذا لو تحولت المنظومة لعصابة؟" .. وبناء عليه هو يضع الشرطة تحت دائرة الضوء والتركيز كله منصب علي الشخصيات الشرطية .. قليل حتي لما نلاقي أي شخصية مدنية عادية واخدة أهمية ضمن الأحداث وعادة لازم تبقي علي صلة ما بشخصية شرطية من الطاقم الأساسي للمسلسل
وبناء علي السؤال ده والبيئة دي بتيجي أحداث المسلسل وبيجي سردها علي طريقة المتاهة المليئة بالفخاخ اللي بيحاول أفراد الشرطة طوال الوقت تحسس طريقهم داخلها بحذر طوال الوقت للوصول إلي أهدافهم .. كل فرد من الأفراد بينشد العدالة .. لكن هي الفكرة أن كل واحد ليه طريقة الخاصة في الوصول إليها وتطبيقها وكذلك كل فرد فيهم ليه دافعه الخاص واسبابها اللي عشان بيسلك هذا الطريق
شخصية المحقق "ديتش" كمثال ده واخد عنده أزمة كبيرة في الثقة بالنفس عملاله مشاكل جمة ومتفاقمة في حياته الشخصية .. الرجل ده بيحاول عبر عمله أنه يثبت ثقته ويثبت لنفسه أنه مميز وقوي ويقدر يتفوق علي نفسه وعلي الأخرين ... في الظابط جوليان الأسمر اللي عنده أزمته ذاتيه طاحنة مع ميوله وهويته الجنسية واللي عنده طول الوقت أزمة وتناقض كبير ما بين كونه متدين وما بين ميوله .. ده بينعكس علي عمله وكأنه بيعوض اللي بيعمله في حياته الخاصة في عمله بأنه بيحاول يبقي جندي الرب الموكل بإقامة العدالة في الأرض
الشخصية أكثر جدلاً طبعاً هي "فيك" .. ما بين الأب الحنون والرجل الطيب وما بين كونه شرطي فاسد بيستخدم أساليب ملتوية لتحقيق العدالة .. الشخصية دي محيرة أوي بالنسبة لي وتناقضها صعب الإستيعاب بس أقدر أقول أنه نموذج للشخصية المزدوجة اللي عندها قدرة كبيرة علي التبرير لئاتها وإقناع نفسها بأن اللي بيعمله ده هو الصائب وكل افعاله حتي أكثرها قذارة وشراً بيصب في المصلحة العامة في النهاية
طبعاً الموسم كان فيه بعض الإرتباك في بعض النقط وبعض الخطوط اللي أتقطعت ولم تكتمل وحسيت أن المؤلف رجع في رأيه في بعض القصص بعدما كان أبتدي يبنيها .. بس كل ده عندي مبرر لأن ده الموسم الأول وقد يكون للأحداث والخطوط دي تكملة فيما بعد .. خلينا نشوف
تعليقات
إرسال تعليق