Slam Dunk: 188-278.5 "End"

Slam Dunk
Ch 187-278.5 "End"

وها قد وصلنا لنهاية الرحلة .. الوداع يا فريق الصقور والوداع يا ملاعب كرة السلة

زي ما توقعت تماماً فالمرحلة اللي جت بعد الصعود للبطولة الوطنية كانت أرك تدريب .. وكالعادة البطل في المرحلة دي بيتلقي تدريب من نوع خاص علي يد المعلم بتاعه بيعمل طفرة في مهاراته وبينقله للمستوي اللي بعد كدة .. بس في الأرك ده حصل حاجة غريبة أو خليني أول أكتشفت حاجتين في غاية الأهمية في القصة كنت شاكك فيهم لحد ما بقوا واضحين بشكل كبير في المرحلة دي

الحاجة الأولي أن ساكوراجي/حسان مش هو بطل القصة أو بمعني أدق مش هو بطلها الوحيد.. تقريباً كل شخصية في الفريق بل في القصة تصلح تبقي شخصية رئيسية .. لأن كل شخص فيهم بيعبر عن شئ أو بيجسد معني .. الطموح، الإجتهاد، تحقيق الحلم بعد سنين من اليأس، تجاوز الحدود وتحدي الواقع، الصلاح والتغيير، الشغف لحد الجنون، الموهبة بأشكالها ... وده يودينا للحاجة التانية وهي أن كل فريق في القصة هو مجاز أو وجه أخر للقصة الرئيسية

يعني كمثال فريق "ريونان" هو إجابة علي سؤال ماذا لو كان فريق شوهوكو/الصقور فشل في التأهل للبطولة الوطنية .. فريق كاينان رمزية للطموح والقوة اللي بتصطدم بالواقع والواقع هنا أنهم فريق متفوق علي المستوي المحلي لكن علي مستوي القطر هو طموح لكنه في اللي أقوي وأشد منه .. سانوا هو وحش اللعبة اللي تجاوزه هو إنجاز في حد ذاته وهو برضو إجابة علي سؤال ماذا لو كان شوهوكو فريق متفوق أو ماذا لو كان في فريق بيجمع ما بين الإلتزام  والقوة وفيه كوكبة من المواهب .. فريق تويوتوما هو نقيض فريق الصقور تماماً مجموعة من النجرسيين اللي بيلعبوا لعب غير نظيف والعلاقة بينهم وبين مدربهم فيها كراهية وعدم إحترام

نيجي نخش علي مرحلة البطولة الوطنية فخليني أقول أنها لو كانت أنتهت أو أبتدت بشكل مختلف عن اللي حصل ده كنت ح أعتبر القصة دي عبيطة ولا تستحق الإستكمال أو القراءة حتي

واقعياً احنا قدام فرقة محلية محدودة محدش يعرفها برة الأقليم بتاعها بتروح للمنافسة الأكبر علي مستوي القطر لأول مرة بعد عنااااااء طوييييييل ومعركة مضنية .. فطبيعي أولاً في بدايته أنه يعاني من إستخفاف المنافسين بيه ويجد صعوبة بالغة في مجاراتهم لأنهم من مستوي تاني .. ثانياً طبيعي أنه يقع في مرحلة متقدمة من البطولة إن لم يكن من بدايتها .. لأنه ليه سقف في النهاية وكذلك لأن الحماس والتعاون لوحدهم لا يصنعوا النصر

لو رجعنا لحتة المجاز ح نشوف أن أختيار الفرقتين دول عشان يواجهوا الصقور أفادوا الدراما بشكل كبير .. الفرقة الأولي بتمثل الشر المطلق .. النموذج المضاد تماماً للقيم التي بني عليها فريق الصقور .. لكن مع مرور الوقت بنكتشف أن وراء هذا الشر حب وإخلاص ورغبة إثبات وجهة نظر معلمهم اللي بيدينوا له بكثير من الفضل .. حتي الشر هو خير لكن من وجهة نظر أخري .. فهو من ناحية أدي مساحة لمناقشة عقدة فلسفية وهي مسألة الشر ومن الناحية الدرامية أنتصر للقيم النبيلة اللي بني عليها الفريق

الفريق التاني "سانوا" هو البطولة الحقيقية لفريق الصقور .. فرقة الإنتصار عليها بطولة في حد ذاته .. ولذلك كان من العبقري إنهاء القصة بعد المباراة دي وأنها تبقي المباراة الأطول في القصة لأن التحديات فيها كانت كبيرة وعلي جميع المستويات.. التكتيكية والمهارية والبدنية والذهنية.. لا فعلاً ملحمة مش عايزة تخرج من ذهني شى فخم للغاية

نيجي لنهاية القصة واللي طبعاً عاملة جدل .. فرأيي هي دي مش النهاية الأصلية للعمل .. لأن مش معقول الرجل يبني العالم الواسع ده كله ويقدم الشخصيات دي كلها عشان في الأخر يقفل القصة قبل ما يدي حتي الشخصيات دي فرصة أنها تتحدث عن نفسها .. دي يا اما ضغوطات من الناشرين ودي مسألة معروفة في الصناعة أو زهق وكسل منه هو وهي مسألة متكررة ومفهومة بين المؤلفين والرسامين

بس خلينا نعطي قليل من الإنصاف للقصة ونهايتها ... هو الرجل بنهاية القصة قدر يعكس تجاربه الشخصية والذاتية مع الرياضة اللي حبها ومارسها في شبابه الأول .. من كل الجوانب حتي بما فيها المخاوف والإصابات والفشل .. هو أتكلم عن كل ده في خضم الرحلة القصيرة لفريق الصقور في البطولة الوطنية.. فهو عمل كل حاجة وقال اللي في نفسه .. بس في نظري القصة كانت محتاجة تتمد أكتر من كدة شوية .. القصة في قماشة حلوة لأجزاء وقصص كتير للأسف النهاية قطعتها

مشكلة العمل ده أنه ممتع وملحمي لدرجة تخليك يصعب عليك أنه أتقفل بدري بدري كدة .. كل شخصية فيه هي قصة وعالم في حد ذاته .. الصراع جواه مش صراع علي بطولة ولا مباراة علي قد ما هو صراع إرادات بين وجهات نظر مختلفة في الحياة مبنية علي تجارب قاسية وأحلام واسعة أثرت في حياة كل شخصية

انا أتكلمت كتير .. لأن العمل مهم وقوي الحقيقة وممتع للغاية .. لكن أن الأوان لأني أسيب المجال للاخرين للإستمتاع بهذة التجربة

Slam Dunk: 73-187

Slam Dunk

Ch 73-187

الأرك ده رغم أن زمنياٍ المفروض أن أحداثه مش كتير لكنه طويل وممتد بشكل ملحمي .. فيه قليل من الملل لكن كثير من المتعة والتفاصيل والفلاش باك والقصص الجانبية العميقة والمؤثرة اللي بتدي القصة ثقل كبير للغاية

بيفكرني بالمرحلة اللي بين عبور طاقم قبعة القش للجراندلاين ودخولهم للعالم الجديد .. لسببين .. أولهم أن المرحلة دي في القصتين بنستكشف فيها مدي قوة وصلاة قوام الفريق اللي تشكل بنهاية المرحلة الأولي وكذلك بنستكشف نقاط ضعفه وحدوده وعيوبه اللي ممكن نتقف عائق قصاد رغبته في إستكمال الرحلة .. ثانياً بوصوله لنهاية هذة المرحلة بيصطدم الفريق بطبيعة المرحلة القادمة اللي علي وشك أنه يدخلها .. خصوم أقوياء للغاية، مهارات أعلي، قدرات خرافية، تحديات من مستوي مختلف تماماً .. بناءً عليه أظن لازم الفريق يستعد جيداً لهذة المرحلة الجديدة ويفجر كل طاقة كامنة داخلة .. ده الطبيعي 

الأحداث بتبتدي من بعد إكتمال قوام الفريق الأساسي واللي مكمل معانا لنهاية القصة .. هدفهم الفوز في بطولة المنطقة عشان يتأهلوا للبطولة الكبيرة علي مستوي القطر .. رحلة شاقة وطويلة بيواجهوا فيها عدة خصوم ما بين اللي في مستواهم واللي أقل واللي أعلي بمراحل .. أحلي ٣ مراحل في الجزئية دي مرحلة التأهل ما قبل المجموعات لأنها كانت إختبار حقيقي لمدي جدية وقوة هذا الفريق ولأن الدراما فيها كانت عالية .. ثانياٍ مواجهتهم لفريق كاينان المتأهلين الدائم لبطولة القطر واللي مواجهتهم كانت تحدي عالي أوي بالنسبة لشوهوكو وكذلك كانت صفعة ضرورية درامياً عشان القصة ما تبقاش متوقعة وكذلك عشان تبقي منطقية لأن مش معقول فريق لسة باني نفسه من فترة قصيرة يغلب فريق متماسك وعناصره قوية ومتفوق تاريخياٍ بسهولة وعن طريق الروح فقط .. الهزيمة كانت ضرورية برضو عشان أبطال القصة يبتدوا يبقي عندهم دافع للتطور والفوز.. ضغط الهزيمة والموقف والحرج والأخطاء اللي أدت للموقف ده كلها دوافع قوية للفريق عشان يتقدم ويطور من أسلوبه 

زاد وغطي أنه ثالثاً خصمهم كان ريونان الفريق اللي غلبهم في المباراة التدريبية واللي برضو وقع في نفس موقفهم الحرج وبقت مواجهتهم مصيرية.. فريق واحد بس اللي ح يتأهل.. وهنا الدراما راحت لحتة تانية خالص .. فعلاً أحداث المباراة دي إلي جانب كونها طويلة فهي متعبة للأعصاب وموترة بشكل كبير .. من أول غياب مدرب شوهوكو بسبب مرضه المفاجئ للضغوط اللي حولين المباراة لحد أحداثها المشبعة بالدراما والمشاعر والمصالح والدوافع المتضاربة 

فعلاً الجزء ده كان زي ما يكون معركة حربية مش مجرد مباراة .. ودي حالة ساهمت فيها القصة إلي جانب الرسم الملحمي والمثير .. يمكن ده أكتر جانب مميز في القصة أنها مثيرة وحماسية كأنها معركة لكن في حلبة التنافس الرياضي 

طبعاً القصة فخمت من البطل أوي في بعض الأحيان بلا منطق بس تمام يعني بالنسبة لمانجا شونين .. لكن برضو علي الجانب الأخر القصة بتعظم من روح المنافسة وفكرة التدريب والمثابرة

العظيم بل والجميل في القصة أنها مش متمحورة حولين ساكوراجي/حسان بتاتاً ولا الفريق بتاعه .. كل شخصية في العمل مهمة حتي الفرق المنافسة وحتي أعضاء الفريق الأخرين والفرق الأخري .. لدرجة أن البطل بينزوي ويبتعد عن الصورة الرئيسية لمدة أثناء الأحداث لأن التركيز بيبقي منصب علي بعض الشخصيات التانية بما فيها حتي شخصيات فرعية وهامشية

المرحلة القادمة صعبة والتحدي رايح لمستويات تانية تماماً .. مكملين 

Slam Dunk: Ch 1-72

Slam Dunk
Ch 1-72

قبل الأسترسال في القراءة لابد من وقفة ونظرة

سلام دانك هو درة من درر التسعينيات التي يزيدها القدم بهاءً .. تقريباً مفيش طفل تابع سبيستون في بدايتها لم يتعلق بهذا العمل .. بس للأسف الحلو ما يكملش وللأسف هنا الحلو ما كملش بسبب ان المانجا وقت إذاعة المسلسل كانت لسة شغالة ولم تكتمل مما استدعي أنه يتم إيقاف المسلسل عند حد معين وفضلت ٢٠ سنة عايز أعرف هو فريق الصقور عمل ايه في الأخر؟ وهل كسب البطولة ولا لا ومين الفرق اللي قابلها؟! لذلك كان ولا بد اني أقرأ المانجا والأفضل لو من البداية وهو ما حدث

أحب بس مبدأياً أشيد بدبلجة مركز الزهرة للمسلسل لأنها بصراحة أنقذت الأطفال من صعوبة كبيرة في نطق أسامي الشخصيات والأماكن.. فعلاً التعريب كان حل مناسب للغاية للمسلسل ده

تقريباً سلام دانك هو القالب الكلاسيكي لشونين الرياضة .. مرتكز أولاً علي شخصية رئيسية بتخوض مغامرة جديدة مع رياضة لا تفقه فيها أي شئ .. غريمه نقيضه تماماً سواء في المهارة أو الدوافع لكن الأرضية المشتركة ما بينهم حب المنافسة والتحدي .. لو حد شاف "هايكيو" أو قرأ المانجا ح ياخد باله أن واخد نفس البداية بالظبط .. بس الفرق أن هيناتا كان عنده خلفية عن الرياضة قبل كدة .. وبالمناسبة هو ده قالب رسخه من قبلهم "كابتن تسوباسا/ماجد" .. الجديد في سلام دانك كان حتة أن البطل عديم الخبرة وبياخد المتلقي في رحلة لتعلم كورة السلة بمهاراتها وقوانينها.. هو يمكن واخد العنصر ده في القصة من الأكشن شونين ودي حاجة ح ارجعلها قدام شوية

ثانياً مرتكز علي حتة الروح الجماعية والحلم المشترك ودي تيمة متكررة في الشونين عامة بالذات لو بنتكلم علي عمل بيدور حولين رياضة جماعية زي كرة السلة هنا

ثالثاً هو عمل إجتماعي عن حياة الطلاب والشباب عامة .. مركز أوي علي الحياة العاطفية للطلبة في مرحلة الثانوي وجموح الشباب ومجموعات الأباضيات لدرجة أنه مخلي العنصرين هما منطلق المغامرة كلها

رابعاً وهي النقطة اللي أثرتها مسبقاً هو مسلسل أكشن .. لا فعلاً طريقة رسم التمرين والمباريات وحتي الخناقات بين الشخصيات فيها إثارة وتشويق وعنف يخليها زيها زي اي سلسلة قتالية .. يعني بيتهيألي لو الصانع كان قرر يعمل المسلسل عن الجودو كان ح يبقي جميل وملحمي زي سلام دانك.. وده باين أوي في فيجابوند

الرسم وتسلسل الأحداث حول كرة السلة ومبارياتها إلي حرب ومعركة ملحمية أنت بتاخد فيها صف فئة مقابل فئة وبتندهش وتفاجئ وبتبقي قاعد طول الوقت منتظر الشخصيات تكسر المألوف وتصدمك بحاجة برة الصندوق .. شخصية ساكوراجي/حسان تحديداً

لكن ده مش معناه ان السلسلة جادة أبداً هي كوميدية إلي درجة الهزل وفيها مبالغات ومواقف كوميدية مدية الحالة ككل روح مرحة

ولأن السلسلة أترسمت في التسعينيات فهي واخدة الأسلوب والشكل الفحولي الرجولي في رسم الشخصيات الرئيسية .. تحس الأبطال كلهم خارجين من فيلم أكشن .. كلهم بنيانهم قوي وشكلهم رجولي ودي كانت سمة الرسم وقتها علي عكس ما سبق وما تلي ذلك

مقدمة القصة أنتهت بإكتمال نصاب الفريق والمرحلة القادمة هي بداية الرحلة نحو الهدف الأساسي والرئيسي للقصة وهو بطولة الجمهورية.. مكملين