Attack on Titan S4 III - Epi 1&2 "The End"

Attack on Titan

S4, P3 – Epi I & II “End”

نهاية رحلة أخري لملحمة أخري أمتدت لعشر سنوات .. عشنا معها أمتع اللحظات والمفاجئات وبكينا كثيراً وكثيراً .. من اليوم الأول وحتي اللحظات الأخيرة

يمكن أنا أصريت أني ما أكتبش أي حاجة عن الفصل الأول من الجزء ده عشان لما الفصل الأخير ينزل أتفرج عليهم مرة واحدة وأعيش هذة الملحمة المكثفة .. وكان قرار صائب أوي الحقيقة خلاني أستمتعت بالتجربة أكثر فأكثر رغم علمي للأحداث وانتهائي من المانجا منذ 3 سنوات تقريباً

يمكن ح أكرر هنا اللي قولته بعد الإنتهاء من مشاهدة تجربة إيفانجيليون .. هجوم العمالقة في بينه وبين إيفانجيليون علاقة أقرب للبنوة والوراثة البيولوجية .. العملين متطابقين تقريباً في معظم التفاصيل الأساسية عادا فلسفة النهاية اللي نابعة من روح الكاتب نفسه وتأثره بروح المرحلة

كلام كبير .. بس سهل نشرحه

هايداكي أنو لم كتب نيون جينسيس في التسعينيات إلي جانب أنه حط فيها هواجسه وأفكاره وطبع عليها شخصيته أستخدم هامش الحرية الكبير اللي كانت بتتمتع بيه الحقبة وصنع للعمل واحدة من أكثر النهايات إثارة للجدل في التاريخ يمكن .. بأنه أفني البشرية كلها وصنع –زي ما بيقول عنوان المسلسل- تكوين أو خلق جديد من أدم وحواء جدد .. نهاية تليق بحقبة مرعبة مظلمة زي التسعينيات الجمهور فيها كان مزاجه العام بيتقبل هذا النوع من النهايات المتطرفة بصدر رحب

إيساما زي ما صرح قبل كدة كان المفترض في البداية أنه حاطط تصور مشابه لنهاية "أتاك" لكنه مع الوقت غير رأيه .. في تصوري أحد أسباب تغييره لرأيه كانت حتة أنه مش عايز يبقي مكرر وأنه كدة كان ح يبقي شبه ناسخ إيفانجيليون بالكربون .. كمان في ظني لأن الجمهور حالياً ذوقه أختلف بالذات أن المسلسل مصنف كشونين وده بيدخل شرائح أصغر سناً ضمن المحبين والمعجبين بيه

إيساما نفسه زي ما قال غير رأيه ورؤيته للعالم أتغيرت أثناء كتابة القصة ويمكن ده كان ليه تاثير مباشر علي تطور الشخصيات والسكة اللي خدتها مع الوقت .. قبل ما نتكلم علي النهاية لازم الأول نتكلم علي فلسفة إيساما اللي بتختلف بشكل جذري عن هايدكي أنو

أنه شخص بيعاني من إكتئاب مرضي عميق العالم بالنسبة له حيز مزعج وبيشوف أن الوحدة أحد حلول أزمة الإنسان في التعاطي مع الوجود لدرجة أنه لما بيحاول يدور عن بديل بيفني البشرية جمعاء وبينادي بفجر جديد للإنسانية .. إيساما علي الضفة الأخري إنسان عنده إلي جانب أزماته الداخلية يأس من العالم والإنسانية ناجم عن نفس طواقه للسلام والحرية أصطدمت بمدي بشاعة الواقع وصعوبة تغييره وإنهاء الصراعات اللي فيه .. إيساما علي عكس أنو حالم محبط بيعبر عن إحباطاته وإنتكاساته عبر القصة .. إيساما هو إيرين وأرمين زي ما قال في لقاء من اللقاءات .. طفل كان بيحلم بأنه يشوف العالم الجميل اللي بيحلم بيه لينتهي بيه الأمر يأساً بعد ما شاف وجهه القبيح .. لكنه حتي في النهاية مازال متمسك بخيط أمل

الأمل في أن البشرية تفهم قيمة السلام وبشاعة الصراعات لكن ده ما بيجيش غير بعد ما البشر بيدفعوا ثمن غالي أوي .. حتي الثمن الغالي ده تعبير غير مباشر عن إحباط إيساما

طبعاً إستديو مابا صنع هذة النهاية ملحمة لا تضاهي الحقيقة .. بالذات المعركة الأخيرة كان ملحمية بشكل كبير .. الصراحة مجهودهم خرافي الحقيقة رغم كامل رفضي لسياسات الاستوديو ضد الفنيين والعمال والضغوط الغير إنسانية اللي بيمارسها عليهم

التجربة ككل ممتعة للغاية .. كل ما بأفتكر كيف بدأت القصة وإلي أين ذهبت ثم وصلت في النهاية بأقدر هذا العمل اللي بأعتبره أيقونة الصناعة من ٢٠١٠ وحتي ٢٠٢٠

Attack on Titan S4 II - Epi 12

Attack on titan

S4’ P2, Epi 12 “Finale”

من أول ما بدأنا قصة الموسم الرابع دي وأنا بأقول مراراً وتكراراً أننا بنرجع لنقطة البداية ببطئ وهدوء .. لكن هذة المرة الأمور معكوسة

قبل ما اكتب الكلمتين دول شوفت بوست عبقري بيقارن النظرة الفزعة لجنود مارلي إثر رؤيتهم للعملاق المؤسس بالنظرة التي لا تقل عنها فزعاً اللي أرتسمت علي وجوه أطفال الجزيرة بعد لحظة إقتحام الأسوار وظهور العملاق الضخم .. وهي مش صدفة ولا فذلكة بل سردية مقصودة وبيتمحور حولها العمل من بداية منعطفه الأخير

القصة مش لكل فعل رد فعل علي قد ما هي في رأيي محاولة للنظر إلي مأساة البشرية والدمار وما اقترفته يد الإنسان من مختلف وجهات النظر .. لو حد خد باله مفيش حد في المسلسل كله بيقتل أو بيمارس أي نوع من أنواع الشر إعتباطاً أو عبثاً .. كل واحد عنده مبرر وكل واحد هو صاحب حق وضحية وسيف من سيوف الإنسانية في روايته .. تقريباً مفيش غير "كيني" هو الشخصية الوحيدة اللي الشر عنده غاية في حد ذاته .. وحتي كيني كان عنده بعض المبررات

في بعض اللحظات بأحس أن إيساما مؤلف القصة شخص عدمي يأس من البشر وشايف أن هلاكهم هو الحل وأي كلام عن أمل أو ثقة في البشرية هو بس بهرات تجارية عشان القصة تعدي والناشر يرضي أنه يمررهاله .. فعلاً القصة بشكل رمزي ذكي بتفضح طبيعة البشر وصراعاتهم البربرية وتبريرهم لجرائمهم .. حتي لو حد رجع للمقابلات اللي أتعملت مع المؤلف ح يلاقي أنه صرح قبل كدة بإن النهاية الاصلية للمسلسل كانت أن كل الأبطال ح يموتوا لكن لسبب ما هو تراجع عن الفكرة

النص الأول من الحلقة بيرصد التغيرات اللي حصلت لإيرين بعيون ميكاسا .. وهي صورة مش ح تكتمل غير في نهاية القصة .. سبب بكاء إيرين واسئلته والتغيرات اللي حصلتله .. ماذا رأي حتي يتحول بهذا الشكل

النصف الثاني هو في رأيي العظمة الحقيقية .. من رسم لتحريك لرمزية .. مشهد عجز البشرية بكل قوتها أمام العمالقة .. الفزع والرعب .. الشيطان الذي خلقتموه أتي لكي يرد الدين .. بجد التسلسل الأخير في الحلقة ده ملحمي وختام أسطوري للأرك ده في القصة .. مرحلة الدك العظيم

الأتي هو محاولة إنقاذ البشرية .. فهل ستنجح؟!

والله هو أنا كنت بأهب نفسي للإعلان عن الفيلم المكمل بس المفأجاة غير السارة جت بأنه الأحداث ح تستكمل في جزء ثالث .. عادي يعني كالعادة .. وهو قرار أنا مش فاهمه الحقيقة بس مصلحة خلي مبيعات المانجا تضرب في السما .. خلي كله ينبسط

وإلي اللقاء في الموسم القادم لعله يبقي الأخير إن شاء الله

#Anime

Attack on Titan S4 II - Epi 11

Attack on Titan

S4’ P2, Epi 11

من العوامل اللذيذة جداً في القصة اللي خدت بالي منها من البداية أنها بعد شغالة بتعزف علي كذا نغمة في نفس الوقت

بمعني أنها دراما وفي نفس الوقت أكشن مع كذا عامل أخر .. ولما عامل معين بياخد فسحة من الوقت ومدة طويلة علي الشاشة لازم عنج حتة معينة ياخد هدنة ويدي فرصة للعوامل الأخري أنها تتصدر المشهد ويريح هو شوية

يعني أحنا بقالنا حوالي شهر المسلسل حلقاته كلها درامية وبتدور حولين التحالف الجديد اللي تم بين مجموعة إقتحام الأسوار زمان والفيلق الإستكشافي .. والقصة كلها كانت دايرة حولين صنع أرضية مشتركة ما بينهم ومحاولة تجاوز الماضي وتحديد أهداف هذا التحالف ومواجهة العدو الأكبر اللي هو إيرين والعدو المباشر حالياً اللي هما مجموعة فولك .. والسرد كان معظمه إستحضار للماضي ومناقشات فلسفية وحضارية .. لكن غاب الأكشن لبرهة من الزمن

الحلقة اللي فاتت أبتدي الأكشن يرجع بس كانت الدراما هي اللي متسيدة المشهد .. النهاردة علي النقيض تماماً الأكشن كان هو سيد الموقف والدراما تراجعت حتي نهاية الحلقة .. وكان أكشن من أفخم وأجمل ما يكون .. تجاوز المانجا بسنين ضوئية .. لكن برضو الدراما كان ليها دور كبير ومؤثر وقوي

طبعاً ظهور عملاق فالكو –اللي لسة نموه ما أكتملش بالمناسبة- والتحول النوعي في الخطة كانوا من التطورات اللذيذة بس في أثناء المعركة دي حاجة جت في ذهني وما قدرتش ما أفكرش فيها

مدي تطور المستوي التقني والقتالي لسكان الجزيرة وصلهم لدرجة مفزعة بالنسبة لي .. لو حد خد باله راينر وأني شبه أنهزموا هزيمة ساحقة قصاد أفراد "عاديين" من جيش براديس تقريباً معظم أفراد كانوا أفراد سابقيين في الفيلق الإسكتشافي .. مقارنة أداءهم بأداء الفيلق في المواسم الأولي يوريك مدي التطور اللي وصله الجيش والفيلق علي مستوي التكتيك والأداء وطبعاً علي مستوي التقنية .. ودي نقطة عبقرية أوي من المؤلف .. أنه ما أهتمش بس بتطور الشخصيات الرئيسية لا كمان طور البني والوحدات اللي ليها دور أساسي في القصة واللي عدم تطورها يعمل ربكة وعدم منطقية في السرد

حاجة كمان جت في ذهني وهي مدي عبثية الوضعية .. مين كان يتخيل أن التطور القتالي والتقني اللي كان معمول لغرض حماية البشرية ده ح يبقي عامل مساعد في وقت ما في عملية إعاقة إنقاذ البشرية .. وأن دلوقتي الرعب ما بقاش من العمالقة بل بقي من البشر ذوي العاهات الفكرية .. يا للعبث يعني

التسلسل الأخير بتاع شاديس وثيو ده رايق أوي وكنت منتظره من يوم ما قرأت الحتة دي في المانجا .. الناس دي هي اللي علمت الشبان دول حمل السلاح وخوض المعارك والنتيجة كانت مؤسفة .. حسيت كأنهم قرروا ولو للحظة يكفروا عن خطاياهم وأنهم يعملوا شئ واحد مفيد لصالح البشرية .. مش أقسي مشهد بس من أعظم المشاهد الدرامية في المسلسل في رأيي .. كان محتاج له حلقة لوحده

كمان أسبوعين ح تتذاع الحلقة الأخيرة في المسلسل عامة .. وح يبقي لينا كلام كتير وقتها بإذن الله

Attack on Titan S4 II - Epi 10

Attack on Titan

S4’ P2, Epi 10

جزء من عبقرية "هجوم العمالقة" وإختلافه عما دونه أنه طول الوقت بيصعب مهمة التلقي علي المتابع .. علي طريقة كدة الناظر عاشور .. المسلسل ده للتأمل مش للعب .. فعلاً المشاهدة والتعاطي مع هذة المادة مهمة شاقة نفسياً للغاية بالذات علي الناس الحساسة واللي بتتفاعل مع الأبطال والشخصيات بشكل كبير

ح أحكي حاجة كدة برة السياق شوية وفيها حرق للي ما شافش "ون بيس"

لما وصلت في أرك المارينفورد للحتة بتاعة موت "أيس" فاكر كويس أني ما أتأثرتش .. أولاً لأنها كانت محروقالي وثانياً لأني كنت شايف أن موت أيس كان حاجة متوقعة ولابد منها في مرحلة ما .. يعني حتي لو أنا مكنتش عارف الأحداث كان لازم أعرف أنه ح يموت وغير كدة موته مكنش "إختبار صعب" بالنسبة لي لأني عارف أن "لوفي" البطل ح يجي عند نقطة معينة وح يتجاوز المأساة دي وح ينتصر .. لكن اللي كان أزمة بالنسبة و اللي مكنتش فاهمه هو ح يتجاوز أزاي ولذلك حزنه كان هو الشئ اللي أثر فيا أكتر

المؤلف بشكل عام لو محطش المشاهد في إختبار صعب وعصر مشاعره وخلي الإختيارات بالنسبة له ضيقة والموقف الدرامي أشبه بمكعب مغلق المتلقي محبوس جواه والتلقي أنه يحاول يخرج منه أو يتوقع أزاي البطل ممكن يخرج منه بأقل الخسائر .. من غير الشحذ والشحن الدرامي ده الدراما ح تتحول لشئ هزلي .. اللي وقع في الفخ ده زمان كان "دراجون بول" بأنه خلي مسألة موت الأبطال وعودتهم مسألة سهلة لدرجة أنها بقت مش مهمة ولا مؤثرة .. يعني مثلاً موت "اندرويد 16" كان مؤثر أكتر من موت "جوكو" بطل القصة في نفس الأرك لأن ده موته معناه إنتهاء دوره والتاني راجع راجع

الحلقة هنا رغم الأكشن والإنفجارات والخطب العصماء اللي كانت في بدايتها الا أن أهم جزء فيها وأعظم شئ فيها كان المواجهة ما بين أرمين وكوني ورفاقهم .. داز وصامويل

رغم أن أنا قرأت المانجا وعارف الأحداث ح تنتهي علي أيه بس تجربة مشاهدة الصراع ده بالذات في لحظاته الأخيرة كانت بالنسبة لي مؤلمة ومؤذية نفسياً ... اللي دار في ذهني طول الصراع هو فكرة أن الأتنين دول بقدراتهم المتوسطة أو خلينا نقول العادية قدروا أنهم يصمدوا الوقت ده كله وينجوا من مختلف المعارك اللي حصلت من بداية القصة للنقطة دي .. نجوا من غزو العمالقة بمراحله ومعركة مارلي والدك عشان في النهاية يلقوا حتفهم علي أيد رفاقهم

صامويل وهو بيفكر كوني بحلمهم القديم حولين أن أرضهم تتوسع وأنهم يأكلوا كميات لحمة أكبر .. طبعاً ذكر اللحمة جه عشان يفكرنا بساشا .. والحتة كلها كان تذكرة بالحلم القديم .. بالحرية اللي حلم بيها الشبان دول وهما أطفال وأنه أزاي بيتحول إلي كابوس بشع بالتدريج

التسلسل ده كله علي بعضه والإختيارات الصعبة اللي جواء والأمور اللي دايماً بتسلك سبيل الأسواء والأكثر إظلاماً كل ده بيرجعني لنقطة أن "هجوم العمالقة" عمل صادق ومختلف .. لأن كل لحظة وكل شخصية فيه ليها قيمة وبتمثل شئ وأن كل ده تمهيد للنهاية التي لا تقل قسوة عما ممرنا به .. وكذلك بيرجعنا للأجابة علي السؤال اللي طرحه أيروين في أول موسم .. من هو العدو؟ .. أظن الإجابة حالياً هي الإنسان 

ألسنا أصدقاء؟! .. نعم نحن أصدقاء .. علي أحد ما أن يفعلها .. علي أحد ما أن تطلخ يداه بالدماء

Attack on Titan S4 II - Epi 9

Attack on Titan

S4’P2, Epi 9

زي ما قولت الأسبوع اللي فات كل اللي فات كان كوم والحلقات الجاية كوم تاني

الحلقة دي مؤلمة وحزينة .. بالمناسبة ولو الذاكرة ما خانتنيش هي معمولة بنفس ترتيب أحداث المانجا .. فجأة فصل من الفصول بيظهر في جين في عالم موازي في حياة أمنة ثم وعلي حين غرة بيرجع لواقعه المدمر .. المشهد ده لخص تقريباً حالة مجموعة الفيلق كلها من بداية القصة ولحد النقطة دي .. الحلم الجميل اللي تحول إلي كابوس .. مجموعة من الإطفال عايشة في حلم الحرية ودون أن تدري مدي فظاعة الواقع .. إيرين في بداية إنضمامة للفيلق ثم تجربة الموت في أول معركة وتوالي الضحايا والخسارات

يمكن الديالوج اللي بين راينر وجين ده كان من أكتر الحاجات اللي كانت مخلياني مش حابب أشوف الحلقة .. لأنه وببساطة وجعني لما قراته في المانجا .. تجربة قاسية أوي .. بطبيعتي ما بأحبش الغدر وفكرة أن الواحد يطعن من ظهره أو يقتل دون ذنب .. مسألة مقتل ماركو دي من الحاجات اللي مخلياني مش عارف أتعاطف مع شخصية راينر بتاتاً رغم أنه كان شخصيتي المفضلة في الموسم الأول .. بس فعلياً مع الوقت فقدت تعاطفي معاه هو وبيرتولد وأني .. لأنها حركة قمة في الخسة والندالة وملهاش أي مبرر بشكل عام .. خسيسة يمكن أكتر من إقتحام الأسوار .. لا يوزايها في الخسة غير لما زيك حول سكان الريف كلهم لعمالقة غير واعية عشان يستخدمهم في المعركة

إعترافه بالجرم والمعركة الدامية اللي حصلت بينه وبين جين قاسية أوي بالنسبة لي ... جين علي العكس من راينر مكنتش بأحبه ولا بأهتم بوجوده أصلاً في بداية المسلسل .. بس كنت دايماً بأحس أنه شبهنا عامة .. الناس اللي بلا موهبة أو بلا ميزة في ظل مجموعة من المتفوقين لكن عندها الرغبة والعزيمة والإصرار علي فعل شئ ما .. لما وصلنا للموسم الرابع حصل تحول جذري في الشخصية وبقي من الشخصيات اللي جذبت إنتباهي .. حياة الرجل ده كلها مأسي .. فقد تقريباً كل أصدقاءه المقربين .. البنت اللي بيحبها لا تكترث لوجوده أساساً .. كل أحلامه عمالة تتحطم واحدة ورا التانية .. حطام إنسان حرفياً .. ومع كل هذة الصدمات ومع كل اليأس لازال عنده حتة المقاومة والإستمرار .. هو مش محدد هدف معين وهو كل الموضوع أنه عايز يعيش في سلام .. فلو كان السلام مش ح يجي غير بالصراع فمفيش مفر من خوض المعركة

طبعاً الحلقة في بدايتها رجعت لنقطة حلوة وهي أساس من أسس المسلسل بالذات من الموسم الثالث .. نحن وهم .. التاريخ والصراع كوجهات نظر .. الكل مذنب والكل مدان والكل ضحية .. مفيش حد أحسن من حد .. لكن في واقع ولازم التعاطي معاه

الـ 3 حلقات الجايين ح يموت فيهم مجموعة من الشخصيات المهمة فيهم شخصية فقدانها جابلي إكتئاب وفيهم شخصية لما ماتت أتبسط بصراحة .. أستعدوا

Attack on Titan S4 II - Epi 8

Attack on Titan

S4’P2, Epi 8

النهاردة كان تتويج للبناء الطويل لسردية "التاريخ يعيد نفسه" اللي ماشية بروية وهدوء من مطلع الموسم .. لم الشمل قد حدث .. وكل اللي جاي بعد كدة خزان أحزان يا أبن عمي

فعلاً كل الأحداث بداية من الحلقة الجاية وصولاً للنهاية كئيبة وبشعة وصادمة وتدمي القلب .. أظن أي حد قرأ المانجا فاهمني .. أما من لم يقرأ فأحب أقوله ما تستعجلش لأن اللي جاي تقطيع بمشرط حاد في جدار القلب

الحلقة النهاردة بتكمل في سردية أخري من السرديات اللي ماشي عليها الموسم الرابع وهي "تبادل الأدوار" .. من أول الموسم وأحنا بنري الأمور من الضفة الأخري .. الإيلديين اللي كانوا شوفناهم في زي المظلومين والمضطهدين بنشوفهم من اول الموسم مرة شياطين في رواية مارلي ومرات ومرات كمعتدين وغزاة وقتلة تحت شعار الثأر وإنتزاع الحرية وإعلان الحرب علي العالم المُضطهِد .. ماذا حدث عندما أمتلك الإيلديين القوة؟ .. الإجابة جت علي 4 أنماط .. النمط الأول فلوك وجماعته .. دول رد صارخ وصريح بيرد علي عداء العالم بعداء مضاد بيؤمن بأن تأديب البشرية وإبادتها هو الحل وإبادة كل من تعاون أو تهاون معها

النمط الثاني هو ليفاي .. دي المدرسة القديمة المخلصة لمبادئ وقيم الماضي ولرفاقها .. حماة البشرية والحرب من أجل البقاء وكرسوا قلوبكم .. هو الموضوع عند ليفاي شخصي شوية بس لو بصينا ليه هو وهانجي ح نلاقي أنهم متفقين علي مسألة الإخلاص لرفاقهم وإستعدادهم للتضحية بكل غالي ونفيس في سبيل قضيتهم اللي أمنوا بيها طول حياتهم وهي حماية البشرية

النمط الثالث هما شباب فيلق الإستكشاف .. ودول تلاميذ ليفاي وهانجي وإيروين ومؤمنين بنفس المبادئ لكن إيمانهم دخل إختبارات قاسية وعنيفة للغاية زي اللي حصلهم في غزو مارلي و زي قصة كوني اللي دار حوليها النص الأول من حلقة النهاردة .. كوني في لحظة لمجرد إندفاعه وراء مشاعره ورغبته لإستعادة أمه كاد أن يرتكب جرم يتنافي مع كل مبادئه .. الإختيارات محدودة وصعبة والإختبار قاسي والغربلة أسقطت ناس كتير في فخ الشر والإنجراف وراء المشاعر والرغبة في السيطرة والإنتقام .. ولم يبقي علي الدرب سوي قلة مرابطون

النمط الرابع هو إيرين .. وده قصة لوحده خليها لوقتها

النهاردة بيتلم الشمل إستعداداً لخوض المعركة الأخيرة والحاسمة .. لم شمل أنا كنت منتظرة من بداية الموسم .. لكن زي أي لم شمل لازم يكتنفه بعض التنغيص .. لكن هنا الموضوع أكبر بكتير من مجرد تنغيص .. هو كشف حساب ومحاكمة علي ما مضي لبناء أرضية واضحة ومشتركة بين جميع الأطراف للإنطلاق نحو معركة تحديد المستقبل

الحلقة الجاية قاسية للغاية .. منتظرون

Attack on Titan S4 II - Epi 7

Attack on Titan

S4’P2, Epi 7

رجعنا تاني لوضع الترقب وهدوء ما قبل العاصفة .. الحلقات الجاية هي عبارة عن طبخ علي نار هادية للإنفجار الدرامي القادم

ما أقدرش أقول أن الحلقة دي كانت هدنة لأنها رغم أن مفيهاش احداث كتير لكن كانت ساخنة جداً .. التطورات الحاصلة فيها مهمة وجذابة للغاية

الحلقة كانت جولة شاملة بترصد تطور كل خطوط القصة .. في خط أساسي تواري عن الأنظار حالياً لكن هو موجود وح يظل حاضر طوال الوقت الا وهو خط إيرين وزيك .. ده خلاص تواري بس أثره موجود وحاضر طول الوقت .. اللي هو الدك العظيم

نيجي بقي لباقي الخطوط .. أني العائدة بعد غياب 3 مواسم كاملين بتعود بقوة .. حلو أن أول حاجة تعملها أني بعد الرجوع هو أنها تحكي قصتها ودوافعها .. مش قولنا الأسبوع اللي فات أن القصة بترجع لنقطة الصفر تاني .. لو حد فاكر في إشارات تمت لخلفية أني في الموسم الأول .. أبوها ظهر في مشهد مقتضب كدة وهي بتفتكر .. ووقتها حتي وأنا بأتفرج كنت معتقد أن أبوها أتقتل في إقتحام الأسوار قبل طبعاً ما أكتشف الحقيقة الصدامة بأنها وريثة العملاق الأنثي .. الفكرة أن هنا أني بتكمل الحلقة المفقودة من الموسم الأول وهي دوافعها .. جزء من قصة أني عرفناه من ذكريات راينر لكن طوال الوقت ما سمعناش القصة من وجهة نظرها هي .. وها هي أمامنا .. مأساة أخري تضاف لعذابات شعب إيلديا وطفلة بتدفع ثمن وجودها بهذة الحيثية وسط هذة المأساة

الخطوط التانية هي خط كوني واللي ح يكون محور الحلقة الجاية كلها فخليه لوقتها .. ثم خط فلوك .. اللي بأعتبره أكتر خط مكتوب بشكل جيد في القصة .. فلوك رجل ولد من قلب الألم .. واحد شاف الفيلق بتاعه كله ورفاقه بيتعدموا زي الذباب قدام عينيه .. وده حوله لشخص ناقم علي البشر والإنسانية جمعاء .. لذلك نشوفه يوم معركة مارلي كان أشرس واحد في المعركة وقالها صراحة أنه جاي يرتكب تصفية جماعية إنتقاماً لنفسه ورفاقه .. هو حالياً أكتر واحد فرحان بالدك لأنه بيحقق له حلمه في الإنتقام .. ده مع الوقت حوله لشخص مهووس بالقتل والسيطرة بلا حاكم ولا ضابط وأصبح ألة قتل غير متزنة بتمارس عنفها الدموي علي الكل دون تمييز .. ولسة  كمان قدام جنونه ح يصل لمستويات غير متوقعة .. فعلاً تجسيد حي لما تفعله الحرب بالبشر

ظهور ليفاي ده معمول عشان يبقي الصدمة اللي ح تجر رجل المشاهد للحلقة الجاية .. بس كانت لقطة حلوة

الفكرة أن الحلقات الجاية ح تبقي تقريب للخطوط المتشظية وتجميع للفريق اللي تشتت في أول موسم .. الجبهة اللي ح تقود المعركة الأخيرة من أجل البشرية .. منتظرون

Attack on Titan S4 II - Epi 6

Attack on Titan

S4’P2, Epi 6

اللي داير في دماغي من بداية الحلقة دي أننا بنرجع لنقطة الصفر .. البداية لكن بشكل مختلف

مشهد رجوع أني وقبليه مشهد غابي وهي بتقتل العملاق –نيل مع الأسف- وقبلهم مشهد جين وأرمين وميكاسا ومعاهم شبان فيلق الإستكشاف وهما بيواجهوا العمالقة .. كلها مشاهد بترجعلي ذكريات الموسم الأول تاني .. بس بشكل مختلف

وهي مش صدفة أني أفتكر الموسم الأول تاني لأن المؤلف والصانع قاصدين عن عمد يفكرونا باللي حصل زمان ويربطوه باللي بيحصل دلوقتي .. الصراع بيرجع لأصله .. المشاهد بتتكرر بس مرة في ثوب البطولة ومرة في ثوب المأساة .. مشهد ميكاسا وهي بتنقذ البنت ومشهد غابي وهي بتنقذ أخت ساشا بالتبني الصانع بيكمل بيهم سردية بدأت منذ إنطلاق الموسم الرابع .. أن التاريخ بيعيد نفسه بس بوجوه ومشاعر مختلفة وحسابات مختلفة .. ولسة كمان قدام شوية القصة ح تطرح الفكرة دي بوضوح أكبر وفيلق الإستكشاف ح يعمل ما يشبه لم الشمل

طيب ليه المؤلف بيعمل كدة؟

السؤال ده ملوش إجابة واضحة في ذهني حالياً بس فحاجة هو كان بيؤكد عليها طوال الوقت .. أن التاريخ وجهات نظر ومصالح .. أحنا قعدنا 3 مواسم بننظر للعالم والتاريخ من علي ضفاف جزيرة براديس .. بينما في الموسم ده شوفنا العالم مرة من الضفة الأخري من عند مارلي ومرة من منظور العالم الواسع ومرة من منظور أطراف الصراع الخفية زي العائلة الملكية وييمير .. الحرية اللي كان بينادي بيها إيرين في بداية القصة والإنتقام اللي أعلنه حالياً أصبح كابوس مفزع .. العدو في بداية القصة كان العمالقة لكن حالياً أصبح البشر نفسهم بينما العمالقة هم مجرد ضحايا .. من ناحية إيرين بيحاول يحمي أهله وناسه ومن ناحية تانية هو بيدمر العالم كله أبرياءه وأشقياءه

القصة رجعت تاني للخندق الأول البشر ضد العمالقة بس المرة دي القضية أوعر والأثر أكبر والدمار أشمل

ولسة 

Attack on Titan S4 II - Epi 5

Attack on Titan

S4’ P2, Epi 5

الحلقة دي بتجسد بداية الرعب الحقيقي في المسلسل .. وهو للأمانة الفزع والرعب ما أنسحبوش من المشهد منذ البداية أبداً .. لكن درجتهم بتتصاعد كل مدي

لما أتاك أون تايتن ظهر من 10 سنين فاتوا وحقق النجاح الجماهيري الجارف سواء كمانجا أو كأنمي حصلت حاجة بديهية لكن ملفته للنظر وهي أن في بعض المسلسلات حاولت تنسخ الحالة دي وتعيد إنتاجها علي أمل أنها تطرقع وتستنسخ نفس حالة النجاح بتاعة أتاك .. لكن كلها فشلت في مرحلة أو أخري بدون مبالغة .. أشهرهم كان "بروميس نيفرلاند" بس ده لأن المانجا نهايته مكانتش قوية والمعالجة في الأنمي كانت قمة في السوء .. وكان في مسلسل تاني أتشهر فترة لكن تلاشي أسمه "كابانيري" كان تقريباً مستنسخ كل تفاصيل القصة بالملي لكنه أنتهي وفشل من أول موسم

طيب ليه الأعمال دي فشلت؟ وهل ده بيدل علي شئ؟ وأيه علاقة ده بالحلقة وفكرة الرعب؟

طبعاً أسباب الفشل متعددة ومختلفة .. بس أهمها في رأيي حاجة خاصة بطبيعة "هجوم العمالقة" نفسه وهي أنه مش مسلسل رعب ولا عنف في الأساس .. هو مسلسل عن الإنسان والتاريخ وفكرة العدالة .. المسلسل بيتراقص بخفة ويتلاعب بهذة الأفكار والقيم فيبرز جانبها المضئ مرة وجوانبها المظلمة المرعبة الدامية مرات ومرات .. يعني قيمة زي الحرية في أول موسم كانت بيشار إليها علي أنها حلم جميل بيرواد أبطال المسلسل .. لكن مع تقدم الأحداث شوفنا أن الحلم تحول إلي كابوس ومع كل مرحلة الموضوع بيزداد كارثية لدرجة أن البطل نفسه اللي كان بيحلم بالحرية وصل لمرحلة أنه قرر يبيد البشرية من أجل إقتناص الحرية أو خلينا نقولها صراحة يضمن الأمن والأمان لشعبه 

الرعب بيجي بأشكال كتير وعلي مراحل مختلفة .. مش شرط أني أجيبلك دم وفزع طول الوقت .. لكن يكفي أني أصدمك في تصوراتك الحالمة حول العالم والقيم والإنسانية وأوريك الجانب الأخر اللي مش عايز تشوفه طوال الوقت

قصة "يمير" في رأيي تجسيد مكثف لمدي بشاعة إستغلال الإنسان لأخوه الإنسان ولذلك كان لازم رد الفعل علي هذة المأساة يبقي مدمر زي ما حصل في نهاية الحلقة

زي ما قولت في الأول .. أعمال كتير حاولت تستنسخ شكل ونجاح "هجوم العمالقة" لكن محدش عرف يبني شئ أصيل ومختلف وذو رونق خاص بالشكل ده ولا قدر يقدم هذا المستوي من الصدمة من خلال عمل واحد بسيط

حلقة عظيمة

Attack on Titan S4 II - Epi 2

Attack on Titan

S4 ‘ P2, Epi 2

معدل الإثارة عمال يعلي بالتدريج .. وده جميل وعظيم للغاية

والجميل أكتر في قصة أتاك بشكل عام أنها بتهتم بتطور وتغير الشخصيات بشكل أساسي حتي أكتر من تطور وتقدم الأحداث .. ممكن تخلي حلقة بحالها بلا أحداث مهمة عشان بس تركز علي تطور شخصية 

هنا في وسط هذة المعركة الطاحنة والمثيرة بنشوف تطور مهم 3 جوانب من القصة .. جانب أصدقاء أيرين اللي العلاقة ما بينهم وبينه وصلت لمرحلة الحارة السد والدراما بتضعهم ما بين فكي كماشة .. أما أنهم يساعدوه أو أنهم ياخدوا موقف سلبي وينتظروا الهلاك في صمت .. لكن ده مكنش الدافع الوحيد ليهم .. هما كمان لازال عندهم أمل في إنقاذ صديقهم من التطور الغريب والمفزع اللي حصله .. طبعاً وميكاسا تحديداً لازالت بتكن له في ذاتها مشاعره كتير لا تستطيع الفكاك منها

الجانب التاني فالكو وغابي .. فعلاً الطفلين دول مثال حي أو خلينا نقول ملخص غير مخلص ومكثف للتطور اللي حصل للشخصيات الرئيسية في المسلسل علي مدي 4 مواسم .. غابي هي إيرين وراينر في قالب واحد .. الإنسان اللي عاش طول حياته مبرمج علي حقيقة معينة لكن بتجيله الفرصة لأن ينظر للجانب الأخر من الحقيقة ويشوف الواقع من منظور أخر .. ويستكشف الحقيقة بذاته وبدون أي توجيه ... فالكو هو ميكاسا وأرمين .. الشخص المحب المخلص المتفهم للواقع وبيحمل ذنب ومسئولية كبيرة علي كاهله أكبر من سنه ودوره .. فالكو ما بيكرهش حد طول الوقت وعنده إستعداد لتفهم الجميع .. وفي الحلقة دي بنستكشف حقيقة دوافعه عن قرب وبصراحة أكبر .. فالكو طول الوقت عنده شعور بالذنب لأنه ساعد إيرين دون قصد في معركة مارلي ووجوده ودوره اللي بيحاول يقوم بيه هو تكفير عن هذا الذنب .. وطبعاً محاولة لإنقاذ حبيبته اللي أعترفلها أخيراً

التطور الأخير هو تطور علاقة زيك بإيرين .. في أخر معركة شيغانشينا زيك وعد إيرين في أول لقاء بين أنه ح يرجع عشان ينقذه .. وفي الحلقة دي هو بينفذ وعده .. السرد طويل المدي شئ عظيم والربط ما بين الأحداث أعظم

لسة برضو المعركة في مرحلة التسخين .. مستمرون

Attack on Titan S4 II - Epi 3-4

Attack on Titan

S4’ P2, Epi 3-4

بيتهيألي الحلقتين دول أكتر حلقتين متكاملتين جم ورا بعض في المسلسل كله

من حيث عظمة وجودة الأحداث فدي مسألة معتادة لكن مسألة أن حلقتين يجيوا ورا بعض يكون فهيم كذا الكم من المفاجئات الدرامية الصادمة والصاعقة .. في رأيي دي حالة خاصة تستحق الإحتفاء

حلقة الأسبوع اللي فات كانت مشحونة أوي بالأكشن والمفاجئات والتويسات لكنها أيضاً لم تخلوا من الدراما واللحظات المفجعة واللي ح تتكرر كتير من هنا ورايح

يمكن من أكتر الحاجات اللي تعتبر بصمة مميزة لهجوم العمالقة هي أنه مرتكز أوي في البناء الدرامي بتاعه علي العلاقات الإنسانية وأزاي أنها ممكن تأثر في مسار التاريخ مش مجرد حياة فرد أو مجموعة .. الحلقة ناقشت بقسوة علاقة الأخوة عبر نماذج ثلاثة مؤثرة ومؤلمة للغاية .. علاقة بروكو وأخوه مارسيل القائمة علي التضحية والمثالية إلي حد كبير جداً .. ثم علاقة فالكو وأخوه الكبير الأكثر مثالية وعاطفية واللي مصيرها لم يكن أقل دموية ومأساة من العلاقة السابقة .. ثم تأتي علاقة إيرن بأخوه زيك واللي كانت علي النقيض تماماً من العلاقتين السابقتين .. فهي أقرب لصراع إرادات وفلسفات كل واحدة فيهم عايزة تزيح التانية ولذلك هي علاقة مشوهة وغير حقيقية بالمرة

في الحلقة الرابعة الإرتكاز كان علي علاقة الأبوة وتأثيرها وازاي أن أب واحد عبر معاملتين متناقضتين قدر يخلق شخصين علي النقيض تماماً لا يجمع بينهما سوا علاقة الدم 

طبعاً لأن الحلقة كانت مشحونة بالأحداث والمفاجئات والصدمات فيمكن ردود الأفعال معظمها مركزة علي الأحداث لكن الحقيقة خط الأبوة وخط إعادة النظر والتعلم من الأخطاء كانوا في غاية الأهمية ومن غيرهم كان ح يبقي للقصة شأن تاني خالص

وكأن الحلقتين بيكملوا بعضهم .. أحاديث مطولة ومشبعة بالدراما عن العلاقات الإنسانية .. ولسة كمان حلقة الأسبوع الجاي

#Anime

Attack on Titan S4 II - Epi 1

Attack on Titan

S4’ P2, Epi 1

يمكن لأني شغوف أوي ومستعجل أوي علي الأحداث الملتهبة والتحولات الدرامية العنيفة فحاسس أن الحلقة ما شعبتنيش ونهايتها ما كنتش أفضل حاجة .. لكنها حلقة رائعة الحقيقة

يكفي أنها عالجت أسوأ شئ في الجزء اللي فات بشكل واضح ومتقن وهو الرسم والتحريك .. السي جي أي في الحلقة دي في حتة تانية ويعتبر عوض المشاهدين عن سوء مستواه في الموسم اللي فات

علي مستوي الدراما فالحلقة دي مهمة أوي .. حرفياً الوضع بيتحط علي المحك والمشهد بيسود بالتدريج .. تقريباً كدة إيرين في اللحظة الحالية بيحارب دولة مارلي بكل جيشها وعتادها لوحده .. زيك لسة ما أنضمش للمعركة وأصدقاء إيرين وجيش براديس أصبحوا أمام خيارين أفضلها سئ .. الأول أنهم ينضموا لإيرين ويحاربوا تحت لواءه وفي الحالة دي لازم يخضعوا لخطة زيك في حالة الإنتصار اللي بتحكم علي الإيلديين بالإعدام بس بالبطئ .. أو ياخدوا موقف سلبي وفي الحالة جيش مارلي ح يبيدهم عن بكرة أبيهم دون أي رحمة 

يمكن دي من الحاجات اللي بأحترمها أوي في طريقة كتابة أتاك أون تايتن .. أن الدراما في قاسية ومليئة باللحظات الحرجة والخيارات الصعبة والمنعرجات اللي بتضع الجميع ومعهم المشاهد علي حافة الهاوية وبتصدمهم من حيث لا يحتبسوا .. وهو ده مكمن الإثارة في الموضوع .. زائد أن كل الإحتمالات واردة والنهايات مفتوحة وبكل بساطة ممكن الأسوأ يحصل ويتكرر كمان لو لزم الأمر

مسلسل عظيم وبداية عظيمة لموسم صاخب ودموي وملئ بالمفاجئات 

#Anime

Attack on Titan S4 I - Epi 16 "Finale"

Attack on Titan

S4 - P1, Epi 16 "Finale"

كما هو متوقع حلقة عظيمة في نهاية موسم ولا أروع

يمكن مش أجمد حلقة في الموسم ولا في المسلسل لكنها علي قدر عالي من الإثارة والتشويق ومعمول فيها مجهود خرافي بالذات علي مستوي الرسم وتحديداً في التسلسل الأخير 

رغم أن أحداثها بالنسبة لي معروفة بس تظل صادمه وممتعة .. بالذات لحظة الإنقضاض والهجوم كانت علي مستوي عالي من المفاجئة والإثارة وزاد عليهم أنها مرسومة بشكل متقن

للأمانة كنت أتمني الموسم يطول أكتر من كدة وأنه يغطي قدر أكبر من أحداث المعركة الأخيرة .. لكن رأي الصناع أن الوقوف عند هذة النقطة أفضل عشان الموسم الجاي يبقي كله عن المعركة .. وأمنيتي دي مش من فراغ لأن الفصل الجاي ده تقريباً هو الأعظم علي مستوي المسلسل وح تنفــجـــر فيه عدة مفاجئات ح تشقلب الدنيا

مقدمة الحلقة فيها أول ظهور رسمي لــ"يومير" أم العمالقة .. وأنه أمر لو تعلمون عظيم ..  ح تعرفوا بس مش دلوقتي

كل حاجة ظهرت في الحلقة دي هي تمهيد لما سيأتي في الجزء الثاني

كان موسم عظيم وعنــيــف من البداية للنهاية .. لا يعيبه سوي بعض اخطاء الرسم .. لكن غير كدة رائع للغاية الحقيقة

وإلي اللقاء في الموسم القادم 

Attack on Titan S4 I - Epi 15

Attack on Titan

S4, Epi 15

حد من الشباب كان بيتناقش معايا حولين شخصية "زيك" ووقتها قلتله أن زيك مسكين فوق ما يتصور وأن قصته كلها عبارة عن تطورات غير مباشرة للـ"دادي إيشوز"

يمكن ده كمان ح يبان أكتر لما الأحداث تستكمل سواء بقي عبر فيلم أو جزء تاني من الموسم .. ما علينا يعني خلينا في الحلقة دي

كالعادة يعني في براعة ملحوظة في كتابة ورسم حلقات الدراما التي لا تحتوي علي أي أكشن .. الحلقة دي في نظري تجسيد لأثر الفراشة .. أزاي أي تفاصيل ومشاكل صغيرة ممكن تؤدي إلي هزات كبيرة تغير العالم وتقلبه رأساً علي عقب .. لو كان زيك مثلاً تفوق وبقي من ورثة العملاق من صغره كان ولا أي حدث من احداث المسلسل حصل أساساً .. لو كان جريشا عامل أبنه كويس من صغره كانت القصة أختلفت تماماً وبقت عبارة عن صراع داخلي في قلب أمة مارلي والجزيرة كانت ح تأتي متأخرة شوية في الصراع .. مكنش ح يبقي دورها أساسي زي ما هي دلوقتي .. مكنش أصلاً إيرين ح يتولد ولا ح ندخل في الدوامة دي كلها

بعيد عن القصة كلها لو حد بص علي المانجا وشاف الحلقة ح يشوف مدي براعة الرسامين في إخراج الأحداث بأروع صورة ممكنة .. التركيز علي التعبيرات والتفاصيل البسيطة اللي يمكن مش كلها موجودة في المانجا .. القطع والإنتقالات من فترة لفترة ومن زمن لزمن .. طريقة رائعة للسرد

يمكن الحلقة مفيهاش كتير يتقال أكتر من كونها كاشفة ورائعة .. لكن لسة التقيل جاي ... الموسم أوشك علي النهاية ... أستعدوا

Attack on Titan S4 I - Epi 13

Attack on Titan

S4, Epi 13

الحلقة دي بتثبت قد أيه هجوم العمالقة عمل مكتوب إتقان شديد وبشكل يصنع المتعة والإثارة بأقل جهد ممكن

الحلقة مفيهاش لا معارك ولا أكشن غير يمكن مشهد ولا أتنين .. لكن فيها كم إثارة غير عادي صنعته الصورة أولاً اللي ركزت كل مجهودها علي تعبيرات الوجوه والإنفعالات اللي كانت مناسبة أوي لجو الإثارة والقلق اللي خيم علي الحلقة وأدي فرصة بالطريقة دي لصدم المشاهد بالعديد من المفاجأت والصواعق غير المتوقعة

ثانياً طريقة سير الأحداث وتنقلها السريع ما بين اللحظات السعيدة والمرحة وشعور الإنفراجه إلي لحظات القلق والخوف والعنف والترقب وفرد المساحة للدراما واللحظات اللي بتلعب بأعصاب المشاهد وبتخليه يطرح علي نفسه أسئلة ويتفاعل مع الأحداث أكتر

فعلاً حلقة عظيمة ومرهقة .. رغم أني عارف نهاية الأحداث بس فضلت متوتر طول الحلقة الصراحة كأني بأشوف الأحداث لأول مرة .. الفكرة أن أحداث الحلقة مش مجرد بتلقي بمشهد مثير للقلق إعتباطاً ولا هو مجرد كشف للحقيقة وتصادم وإلتقاء خطوط .. ده طرح لأسئلة كبيرة في مشهد ما خدش علي الشاشة دقايق معدودة .. فتح نقاش حولين القصاص والإنتقام والحرب .. حولين الإنسانية والحب والعنف وهل هو حل فعلاً ولا أزمة .. المناقشة اللي تمت جوا المطعم والصراع العنيف اللي تم بين عائلة ساشا والطفلين والطباخ من أجمل مشاهد المسلسل ككل .. يعني في رأيي يجي بعد كشف حقيقة راينر وبيرتولد ومشهد القبض علي أني وقبل مشهد الأختيار ما بين القائد أيروين وأرمين علي مين يعيش ويروث العملاق الضخم

لكن خلينا نقول أن علي الرغم من عظمة وحماسية الحلقة دي الا أن القادم أكثر إثارة وتشويق .. مستمرون

Attack on Titan S4 I - Epi 12

Attack on Titan

S4, Epi 12

هو ده العيب الرئيسي لقراءة المانجا قبل عرض المسلسل .. قتل الحماس .. لأنك بتبقي عارف الأحداث رايحة علي فين

الحلقة دي كلها قائمة علي الغموض والشك أساساً والمرحلة دي من القصة بترجعنا تاني للحالة اللي المسلسل بدأ بيها وهي ضبابية الرؤية وعدم الوضوح .. انت مش عارف مين مع مين ومين ضد مين ومين مخبي ومين ليه أغراض ومطامع .. بالنسبة لي كل اللي بيحصل في الحلقة دي واضح بنسبة كبيرة بس علي يبقي برضو في جزء غامض لسة مش فاهمة وح يتضح مع الوقت .. وده عيب أني قرأت المانجا الأول ومن مرحلة متقدمة أوي كمان حتي مخلياني مش فاهم بعض التفاصيل

الوضع العام دلوقتي ملخصه .. أولاً إيرين وزيك أصبحوا هما الجبهة اللي بتقود الصراع ضد المارلي ورؤيتهم هي الحاكمة للأمور .. ثانياً دولة إيلديا أو جزيرة باراديس رغم رفض كتير من قادتها لرؤية زيك وإيرين الا أنها تحت ضغط الظروف وحفظاً للدماء وعشان ما يدخلوش في إقتتال داخلي قررت ترضح لإيرين وزيك ضمن هذة الحرب الكبري الي بقت علي الأبواب .. ثالثاً خلاص رسمياً عملية إختراق مارلي للجزيرة بدأت فعلياً وظهرت "بيك" صاحبة عملاق العربة في أخر مشهد في الحلقة وده معناه أن المعركة أصبحت وشيكة

هي المرحلة دي من القصة غلسة الحقيقة بالذات أن كل الناس منتظره أكشن وعنف ومعارك طاحنة .. لكن الحقيقة هي المعركة مش خبط لزق .. لسة .. الموضوع بيتسوي علي نار هادية نظراً لأنه كبير ولأنها المعركة الكبري والأخيرة

الحلقة فيها أفكار وجسالات فكرية كالعادة تحديداً الفكرة اللي دايماً المؤلف بيصر عليها هي مدي تشابه إيلديا مع مارلي .. بالذات في وضعهم السياسي .. لكن ده لا يغفر في رأيي الرسم السئ اللي تحلت بيه الحلقة .. رجعوا للإسترخاص تاني وده شئ مش لطيف 

عموماً .. مستمرون

Attack on Titan S4 I - Epi 11

Attack on Titan

S4, Epi 11

كل ما بنقرب ع النهاية كل ما بنعيد النظر في البدايات وبناء علي ما وصلنا إليه .. دي هي خطة الصانع اللي قرر يستغل بيها المسافة الفاصلة ما بين معركة تدمير مارلي ومعركة إقتحام الأسوار الأخيرة

ح نلاحظ حاجة مهمة في الحلقة وهي أن أبطالها كلم مش من الشخصيات الرئيسية .. يمكن ما عدا غابي -بـنت الوسـخـة- والعزيز فالكو .. ح نلاقي الحلقة كلها متمحورة حولين شخصيات ثانوية مرتبط بشكل وثبق بحادثة أقتحام الأسوار الأولي وتابعتها اللي أتعرضت في أول 3 مواسم 

أبطال الحلقة كانوا البنت اللي أنقذتها ساشا وبنت كانت ضمن مجموعة الناس اللي أنقذتهم ميكاسا في الموسم الأول ثم أنضمت للفليق الإستكشافي وكذلك الناجي الوحيد من الكتيبة اللي كانت مع إيروين في شيغانشينا ووجوه أخري من المواسم السابقة بنشوفها علي عجالة

البنتين بذات كان ليهم تأثير كبير عليا أثناء المشاهدة وحكايتهم كان ثرية .. البنت التانية كانت ح تموت في هجوم العمالقة لولا تدخل ميكاسا وانقاذها .. البنت بتمثل وجهة نظر الشعب العادي اللي شاف في فيلق الإستكشاف أمل في سبيل نجاته وأنه يعيش بشكل مستقر .. البنت تجسيد غير مباشر لشخصية ميكاسا وإرمين وإيرين هما صغيرين وإنبهارهم بالفيلق الإسكتشافي ورغبتهم في الإنضمام ليه للمشاركة في معركة تحرير البشرية رغم كل المخاطر اللي بتحف هذا الأمر .. القصة دي بترجعنا تاني لفكرة أتسنت مع تدفق الأحداث وهي قد أيه الناس بتثق في الفيلق وبتعتبره رمز للأمل ومأمناه علي حياتها وسلامها .. وده بيمثل عبء ومسئولية كبيرة علي الفليق بالذات مع التطورات اللي حصلت لشخصياته الرئيسية ودوامة الخطط والمؤمرات اللي دخل فيها

القصة التانية دي اللي كانت مؤلمة وقاسية .. طبعاً أول ما البنت حكت قصة أمها أنا دماغي فوراً رجعت للحلقة وأحداثها .. المشهد بتاع موت أمها ده كان من أبشع المشاهد اللي شوفتها .. بس مكنتش وقتها متخيل أن المؤلف ح يوظفه درامياً بعدين بالشكل العبقري ده

المناقشة الحادة اللي دارت بين غابي وبين البنت كانت كاشفة وصادمة .. أولاً بتثبت أكتر قد فالكو شخصية متفهمة لطبيعة الصراع رغم صغر سنة وقلة معرفته وأنه واعي بمدي بشاعة الحرب والجريمة اللي أرتكبتها المارلي وأنه ضد أساساً الهلاك والمصير البشع المفروض علي الإيلديين وعلي غيرهم أنهم يفضلوا في دوامة لا نهائية من الموت والدمار ... وعلي الجانب التاني بنشوف غابي بغباءها وتفكيرها الضحل وهي بتردد زي البغبغان الكلام المتحفظ لها وأزاي أنها نموذج حي لمتلازمة ستوكهولم .. التوحد مع الجلاد .. وده بان أوي لما مكنتش عايزة تخلع الشارة اللي هي المفروض رمز للإستعباد والقمع .. فعلاً شخصية غبـية وقـميئة بشكل بشع .. حتي بعد ما وصلت لحارة سد وقناعتها أتهزت بعد كلام البنت فضلت برضو محتفظة بولاءها الكارتوني لمارلي وزعقت لفالكو لأنه كشف "أسرار" للعدو .. حاجة تقرف والله

برضو الحتة دي بترجعنا للمواسم الأولي ولفكرة كيف كان هؤلاء الناس في الماضي وكيف أصبحوا .. وأزاي أنتمائهم لفيلق الإسكتشاف زاد مع الوقت بالذات بعد ما عرفوا الحقيقة وأنهم شايفين في فيلق الإستكشاف درعهم الحامي وسيفهم البتار .. بس هل الفيلق قد الأمانة دي؟

حلقة مؤثرة وممتعة .. النهاية تقترب .. مستمرون

Attack on Titan S4 I - Epi 10

Attack on Titan

S4, Epi 10

تقريباً الحلقة دي إستراحة محارب .. علي جميع الأصعدة .. بالذات الرسم

تقريباً ده أسوأ رسم أتقدم في خلال العشر حلقات اللي أتعرضوا لحد دلوقتي .. رسمة إيرين وهو جوا الزنانة وتفاصيل الوجوه في جميع المشاهد كانت كارثية بصراحة .. تقريباً هي عشان الحلقة مفيهاش أي أكشن ولا أحداث تقريباً فالأستديو قرر يريح ويشتغل بأقل جهد وإتقان ممكنين

بالحديث عن الأحداث فحقيقي الحلقة ما قدمتش حاجة بالنسبة للأحداث الجارية غير يمكن تطورين تلاتة في غاية البساطة .. لكن أهمية واحد فيهم ح تبان بعدين

الحلقة أستهلكت معظم وقتها في الفلاش باك واللي كان مليان معلومات مهمة حولين فترة السنوات الأربع الفاصلة ما بين أحداث الموسم السابق والحالي وكذلك حولين تاريخ الجزيرة والإيلديين تحديداً عشيرة الأكرمان وعلاقتها بالعالم خارج الجزيرة .. كذلك شفنا منين جه التطور الكبير في تسليح والحضارة اللي حصل في الجزيرة واللي بان أوي في عملية مهاجمة أرض المارلي

وده ح يتكرر كتير في الحلقات الجاية .. مسألةالفلاش باك والتطور البطئ في الأحداث .. كل ده تسخين للأحداث علي نار هادية قبل ما بداية المعركة الكبري والأخيرة

يمكن أهم تطورين في الحلقة هما تطور إيرين وهيستوريا .. تطور هيستوريا مثير لكن مش مفهوم لحد الأن فح نركنه علي جنب مؤقتاً .. تطور إيرين هو اللي ملفت للنظر .. من شخص محب لذويه وعنده روح تضحية لشخصية غامضة ودموية وذات أهداف مش مفهومة

في الحلقات الجاية ح نفهم إيرين أكتر وح يبقي عنده فرصة يعري نفسه وأهدافه أمام رفاقه والمشاهدين .. ولحين حدوث ده سيظل التحول اللي حصل لإيرين غامض ومرعب

يعني حلقة عادية لكن فيها بعض التفاصيل المهمة

Attack on Titan S4 I - Epi 9

Attack on Titan

S4, Epi 9

صباح الخير .. الحلقة جامدة فـشششـخ

دلوقتي الواحد يقدر يحط رجل علي رجل ويتكلم براحته من غير ما يكتب "سبويلر/حرق" والجو ده لأن تقريباً خلاص كل شئ أتكشف وبان .. هي بس النقطة الوحيدة اللي ح يبقي فيها حرق اللي ح يحصل بعد كدة .. وده ما يهمناش دلوقتي فمش ح نتطرق له .. حالياً

حد خد باله من حاجة في الحلقة .. الحلقة مبنية علي منطق وهو "الإنسان هو الإنسان" .. يعني أيه؟ .. رغم الصراع اللي بين المارلي والإيلديين وحالة التضاد اللي هما فيها الا أن الأمتين بيستخدموا نفس الطرق والأساليب .. مشهد خبر إنتصار جيش الجزيرة في معركة المارلي ومشهد الرجل وهو بيدوس علي راس الطباخ وبيضطهده لأنه "مارلي" بيبرزوا الفكرة دي أوي

في المشهد الأول الدولة بتعمل غسيل مخ لشعبها وبتوهمهم بأنهم أنتصروا بشكل كاسح علي الأعداء .. حتي زيك كان ليه تعليق ظريف علي الجزء ده أن الجهل شئ مخيف .. فعلاً الجهل شئ مرعب لأنه بيخلي الناس زي العميان تساق كالقطعان إلي الهاوية دون أن تعي بذلك .. نفس اللي بتعملة مارلي مع الإيلديين هناك لما بتوهمهم بأنهم لو ضحوا بحياتهم في سبيلها وسبيل تمددها الإستعماري ده ح يصب في مصلحتهم وح يحررهم مع الوقت ويدي فكرة مختلفة للعالم .. وهي شئ طبعاً عاري من الصحة

في المشهد التاني بنشوف الأية مقلوبة .. الإيلديين لأنهم الأقوي والأكثرية بيضطهدوا المارلي وبيعاملوهم بقسوة رغم أنهم مدوا لهم يد العون وخرجوهم من بدائيتهم وطوروا قدراتهم بشكل كبير ... وده يرجعنا للي قولناه قبل كدة عن أن القصة هدفها متجاوز لمفهوم الخير والشر ومين يستحق التعاطف ومين معاه حق علي قد ما هي بتفكك الصراع من أساسه وفكرة الخير والشر وبتنظر للموضوع بشكل أبعد .. ليه أساساً الصراع بينشب بين البشر والجدوي منه .. ولذلك أظن نهاية المسلسل ح تكون "عدمية" بشكل كبير وصادمة للجميع

الحلقة هنا أكدت اللي كنت عامل أشرحه في البوستات والكومنتات من أول الموسم .. أن الخطة كلها قائمة علي الجمع ما بين العملاق المؤسس والدم الملكي والإرادة لفض عهد الملك .. حتي أنا أتبسط لما إيرين رجع بفلاش باك لأحداث الموسم التاني وجاب الحتة بتاعة مراة أبوه .. المشهد ده وقتها مكنش مفهوم لمعظم الناس وحتي أنا كنت شايفه "مبالغة" في قدرات إيرين عشان هو البطل .. لكنها وضحت مع الوقت .. الهجوم المزلزل .. هو ده مخطط زيك .. بس زيك ليه غرض وإيرين له غرض .. وفي ظني ولو النظرية اللي مؤمن بيها صح .. يومير اللي بتدير الليلة كلها من وراء الستار ليها غرض تاني خالص .. كله ح يبان

برضو من المشاهد الجميلة لما سألوا الولد الأسمر عن لون بشرته وفشرح بأنها "مشيئة الرب" وأتكلم عن أن الإختلاف والتمايز ما هو الا سنة الله في خلقه .. ثم أردف قائلاً .. أن ده ظن بعض الناس وأن من حق كل واحد يفكر زي ما هو عايز ... يمكن المشهد ده يبان عادي .. لكن في الحقيقة هو مش كدة خالص .. المشهد ده بيجسد برضو أساس مهم للقصة .. وهو أن مفيش حقيقة كاملة ولا مطلقة .. يمكن شوفنا ده في الموسم اللي فات وأزاي أن المارلي والإيلديين كل صف فيهم عنده روايته للتاريخ وحقيقة يومير وقوتها .. واللي بالمناسبة هي رؤي أبعد ما يكون عن الحقيقة زي ما ح يبان بعد كدة .. المسلسل لأنه طول الوقت بيطرح نفسه كسردية ما بعد حداثية طول الوقت عمال يفتت ويفكك الثوابت والإنطباعات والحقائق اللي بتستقر في ذهن المشاهد تأكيداً علي مبدأ أن مفيش حقيقة كاملة ولا مطلقة وأن الشك والنسبية هما حقيقة كل شئ .. ده كان جزء مهم جداً في الحلقة وفي الأحداث الجاية كلها

الحلقات الجاية مليئة بالتوتر والترقب لأن خلاص المعركة الأخيرة علي وشك البدء .. وأظن أن الموسم ح يخلص ببداية المعركة ومشهد غزو الجزيرة زي ما جه في الإعلان .. أتمني أن الحلقات الجاية تركز علي الفلاش باك بالذات بتاع زيك لأنه مهم جداً 

وأظن فكرة أن الموسم يقف عند بداية المعركة ده حلو ومفيد بالذات أن المانجا لسة قدمها بتاع شهرين أو 3 أشهر وتخلص فح يبقي في فرصة بقي قصاد المنتجين ينتجوا سواء جزء تاني للموسم أو يعملوا المعركة بالأحداث الأخيرة فيلم زي ما بعض الإشاعات بتقول

بشكل عام مستمرون ومنتظرون

Attack on Titan S4 I - Epi 8

Attack on Titan

S4, Epi 8 

+18 نظراً لأني ما قدرتش ما أشتمش غابي

__________

الحلقة دي متعبة ومؤلمة للغاية .. حتي معنديش نية أني أتفرج عليها تاني لأنها فعلاً محزنة بشكل كبير

وأنا بأتفرج علي الحلقة دار في ذهني حاجتين بشكل أساسي ..

أول حاجة هو قد أيه أبطال القصة كبروا ونضجوا بالذات لو قارنا ظهورهم في الفصول الأولي بشكلهم واسلوبهم وطريقة تفكيرهم في الموسم ده .. في الموسم الأول كانوا حرفياً أطفال حالمين ولازال عندهم بعض المشاكل لكن عندهم إصرار علي تحقيق حلمهم ... في الموسم ده حلمهم تبخر أساساً والحقائق أتقلبت بالنسبة لهم وده أدي أسس لتحولهم لشخصيات أكثر جدية ونضج وأحياناً قسوة ولم يبقي من الأطفال سوي بعض ما تبقي من الملامح .. قد أيه فعلاً الحرب دي شئ قاسي بيمحوا كل أثر للبراءة في وجدان الإنسان

تاني حاجة .. وكنت عايز أكتبها الأول كمان .. قد أيه شخصية "غابي"دي قميئة وبشـعـة ومـقـرفة وبتجسد كل شئ أنا كعلي بأكرهه في هذا العالم .. فعلاً ما بأكرهش أكتر من الشخصيات اللي عايشة الحياة علي أنها معركة أو دراما ملحمية ومتسحوين وراء أفكار أو معتقدات في ذهنهم ومتخيلين أنهم لما ح يضحوا في سبيلها ولا ح يدوها أغلي ما عندهم أنهم كدة ح يخلدوا في التاريخ .. وفعلاً كان أحسن عقاب لـبـنـت الـوسـخـة دي أنها تشوف بعينيها أنها وكل اللي زيها أتغفلوا وأتضحك عليهم وأتقتل منهم أعداد غفيرة في ظل خطة ولعبة سياسية وحربية مش أكتر .. فعلاً البنت دي ظهورها ع الشاشة بالنسبة لي مؤذي هي والواد الـعـرص بتاع العملاق الفك ... علي النقيض منهم تماماً يجي "فالكو" .. فعلاً الولد ده شخصية مميزة أوي ولسة كمان قدام ح يبان هو قد أيه متميز .. عقلية ناقدة لما بين يديها وبتنظر علي الأمور من أكثر من جهة وشخصية طيبة ومحبة ومخلصة .. فعلاً يستحق يبقي هو بطل الأحداث في الفصل ده

-.-.-

طيب عشان حبايبنا الحلوين اللي ممكن يكونوا مش فاهمين ايه اللي بيدور دلوقتي .. زي ما قولنا قبل كدة أزمة الإيلديين كانت أن العملاق الأساسي تحت سيطرة نسل الملك فريتز .. ودول ناس بتوع سلام وملهمش في الحرب ولا ح يدافعوا لا عن الإيلديين اللي في الجزيرة ولا اللي في العالم وده بان لما جريشا راح لهم بعد ما تم إقتحام الأسوار وتراجهم يتدخلوا عشان ينقذوا الموقف وهما رفضوا .... فكان الحل أن اللي يحصل علي العملاق الأساسي حد عنده الرغبة في الحرب .. وده بدء بإستيلاء جريشا علي العملاق 

بس في مشكلة .. العملاق الأساسي قواه ما بتتفعلش غير لما يكون المتحكم فيه عنده دم ملكي .. إيرين مش من نسل ملكي .. بينما أخوه زيك من نسلهم لأن أمه -اللي هي العملاق المبتسم اللي أكل أم إيرين- من الفرع بتاعهم بس اللي عاش في أرض المارلي .. حتي الحتة دي تم الإشارة ليها في الموسم التاني لم إيرين جه يضرب العملاق المبتسم فقامت قوي العملاق الأساسي أتفعلت وقدر يوجه ويتحكم في العمالقة للحظة

طيب ليه هو أستعان بزيك مش هيستوريا؟ .. في رأيي الأمر راجع لعهد الملك فريتز .. لو حد فاكر عهد الملك بينص علي أن العالم لو حاول يعتدي علي الإيلديين فالرد ح يكون بتفعيل قوي العملاق الأساسي والهجوم بالعمالقة اللي محبوسين جوا الأسوار علي العالم .. تقريباً زيك وإيرين بيحاولوا يحققوا الشرط ده الأول ..

بس كل واحد فيهم ماشي في الخطة دي لهدف مختلف عن التاني .. تماماً تماماً .. بس خلينا ما نحرقش لأن خلاص الموضوع ما بقاش بعيد عامة وده ح يبان علي الأقل في نهاية الموسم ده

حلقة مؤلمة وكئيبة للغاية .. بس معمولة بشكل رائع .. الحلقات الجاية ح يبقي فيها أكتر من فلاش باك منهم واحد بيحكي قصة زيك .. ده أنا منتظره بفارغ الصبر لأنه مهم أوي أوي أوي ... مستمرون