Hajime no Ippo
S1, Epi 1-76 "Finale"
Fighting Spirit: Champion Road
من التعريفات الخالدة والأبدية للفن هو حتة أنه زيه زي الفلسفة بيتمحور حولين "السؤال" .. الفن زي الفلسفة والعلم بالظبط عبارة عن سؤال .. بس عكس الأتنين هو مش لازم دايماً يبقي سؤال كبير أو حتي سؤال عام .. مش لازم يبقي بيبحث عن حقيقة الوجود ولا بيتسأل حولين ظاهرة ما .. ممكن يكون مجرد سؤال ذاتي أو تساؤل عابر زي فكرة شاردة بتيجي في ذهن
الإنسان علي حين غفلة ثم بترحل في سلام
كذلك هو مش لازم المبدع يصل إلي إجابة ولا حل للمشكلة المطروحة .. ممكن يكون السؤال أو رحلة البحث عن الإجابة أو الفشل في الوصول لاجابة محددة هو لب الفكرة وهو ده الإبداع في حد ذاته
لما وصلت لنهاية هذة المرحلة من قصة المسلسل كنت محتار أبدأ أتكلم عنه أزاي .. اتكلم عنه من جانب إنساني ولا رياضي ولا فني .. لاقيته هو بنفسه في الحلقة الأخيرة بيفكرني "كيف بدأت هذة الرحلة" .. من البداية .. وهي بتدور حولين ايه
سؤال القوة .. ما معني أن تكون قوياً؟
ده السؤال المحوري في القصة وكل شخصية من شخصيات المسلسل هي مجرد بتحاول تجاوب علي هذا السؤال بطريقتها الخاصة
بيتشعب من السؤال ده عدة أسئلة تانية بتشكل بنية القصة وبيبقي ليها أثر كبير في تكوين الشخصيات ومسار القصة
ما أهمية القوة؟ ولماذا ولأي غرض عليك أن تكون قوياً؟ وما هي القوة الحقيقية؟! وما هو تعريفها؟!
---
ما بين الواقعية والخيال
يمكن المسلسل ده من الأعمال القليلة اللي عملت توازن عبقري بين تناوله للرياضة كنشاط إنساني واقعي قائم علي تراكم الجهد والعمل المثابر المنظم والقائم علي العلم والبحث والمنطق في جانب كبير منه .. التوازن كان مع هويته وشخصيته كعمل "شونين" قائم علي الإثارة والحماس والمفاجئات والمبالغات كمان اللي بعضها مش واقعي .. عادة الأعمال الكلاسيكية "كابتن ماجد كمثال" كانت بتقع في فخ الغرق في المبالغة والخيال لدرجة أنك لما بتشوفها وأنت كبير أو لما بتقارنها بالحقيقة بتكتشف قد أيه هي هزلية والتعاطي معاها بيكون صعب شوية مع مرور الزمن بالذات
لكن هنا المسلسل متوازن وواقعي لدرجة أني جربت كذا تمرين من اللي بيتدرب بيهم "أيبو" ولقيتهم فعالين جداً .. غير كمان التدريبات فالعمل رابط تطور الشخصيات الرئيسية بالذات والنجاح والاستمرارية بالجهد المبذول في التمرين القائم علي أسس علمية وعلي دراسة الخصوم وإتقان أساسيات الرياضة ومهاراتها الأساسية
حتي مفاهيم مهمة في الرياضة زي "الموهبة، الحظ، الخسارة" الرجل المؤلف حطهم في سياق واقعي تماماً مع الحفاظ علي روح الشونين اللي فيها المبالغة والمتعة والإثارة .. يعني في بعض الماتشات اللي لعبها أيبو أثناء مسار القصة كان الحظ بيخدمه بشكل أحياناً بيستفزني .. بس الجميل واللي خلاني أحب المسلسل هو أن حتي الحظ ليه أسس علمية وواقعية .. يعني هو كان بيتمرن ويجتهد ويتعلم ويعرق ويعمل اللي عليه ولذلك كان الحظ بيحالفه في أحيان كثيرة لكن حتي الحظ ده كان لازم عند مرحلة معينة قاطرته تتوقف وهو ما حدث في مواجهته مع "داتي" اللي بيتفوق عليه في حتة الخبرة والقوة .. هو بدون شك عمل اللي عليه وأجتهد بس الفوز ليه عوامل تانية غير الإجتهاد والأخذ بالأسباب وطبعاً الحظ
---
الخسارة كدافع
الجزئية بتاعة الخسارة دي كانت عظيمة لأكثر من سبب .. أولاً هو خلاني كمتلقي مستني اللحظة اللي البطل فيها ح يخسر .. هو من أول القصة بيبني الحدوتة علي أسس واقعية بينما البطل نجمه صاعد زي الصاروخ دون أي تراجع أو اهتزاز .. طيب ما ده مش واقعي .. أنا فضلت طول الوقت عمال مستني لحظة خسارته مش لأني بأكرهه بس عشان ما أكرهش القصة وما تتحولش لعمل هزلي بعد البناء العظيم ده كله
ثانياً حطها في سياقها الصح وهو أنها خطوة مهمة للنضج والتطور .. تقريباً ده أكتر هزيمة لبطل حبيتها بعد لوفي في "الحرب العظمي" و هزائم فريق "الصقور" في "سلام دانك" .. اللي هو انت مش ح تفضل تكسب طول الوقت ولازم تخسر عشان تبقي أفضل .. ثالثاً كانت منطقية زي ما قولنا نظراً للفوارق بينه وبين خصمه
كمان هو صاغها حلو .. الولد ما تقبلهاش بصدر رحب ولا تجاوزها بسرعة لا ده أكتئب وعملتله عقدة لكن عقدة إيجابية خلته طول الوقت بيحارب عشان ما يقعش في الفخ ده تاني ولا يعيش الحالة دي تاني
في حتة كمان كانت حلوة أوي في تناول فكرة "الهزيمة" أو "الخسارة" وهي أنه جابها من كذا وجهة نظر ومن كذا جانب عبر الشخصيات المختلفة الرئيسية والمؤثرة في القصة .. في البداية كانت الهزيمة حدث عرضي بيمر مرور الكرام في القصة لحد ما جت هزيمة "مياتا" في بطولة الناشئين وهنا القصة أتقلبت رأساً علي عقب
الهزيمة خرجت من نطاق أنها حدث عادي أو حاجة بتحصل مع الفشلة أو ناقصي الموهبة إلي كأس يجب أن يتجرعه الجميع في لحظة ما بغض النظر عن مدي موهبتهم وقوتهم .. للأمانة هو ده ظهر جانب منه قبلها بس لم يتبلور غير بداية من اللحظة دي
ثم بدأت القصة تطور والمفهوم يتبلور أكتر وياخد أبعاد جديدة ويظهر منه جوانب أخري تمهيداً للحظة اللي ح يتلقي ايبو فيها هزيمته الأولي .. قبل هزيمة أيبو الأولي يمكن في لحظتين في غاية الأهمية زي ما يكونوا بيجهزوه للحظة دي .. هزيمة الولدين اللي معاه في الصالة ونظرته ليهم وخوفه اللي كان باين في عينيه من التجربة دي .. ثم هزيمة "فولج" الروسي الثانية اللي بعدها أضطر يرجع لبلده
فعلاً القصة دي في رأيي هي الأكثر حزناً ما بين قصص المسلسل كلها .. أن في بعض الأحيان الموضوع ما بيبقاش مجرد هزيمة بسيطة لا ده ممكن يبقي فشل أو صدمة كبري تعطل مسيرتك .. في اللحظة دي انت لازم تقف للحظة وتعيد نظر فيما تفعل وفعلت واحياناً في جدوي ما تفعل من الأساس
رغم كل التمهيدات دي أيبو وقع في فخ الكأبة والاحباط بعد الهزيمة الأولي .. لأنه بكل بساطة بشر وشاب صغير وقليل الخبرات في الأول والأخر .. طبيعي ان ده يحصله
لكنه كان منطقي حتي في إحباطه ورجع شاف هو غلط في ايه وقرر يتجاوزه .. طبعاً بمساعدة كل اللي حوليه وعلي رأسهم مدربه .. وتحولت الهزيمة إلي دافع في النهاية
المشهد اللي بنشوف فيه ثمرة كل هذا البناء بيكون في المواجهة الأخيرة في الموسم اللي بتعتبر تتويج لكل البناء اللي حصل من بداية المسلسل والنهاية الايقونية لهذة الملحمة .. لما أيبو بيسقط وبيبقي علي وشك الانهيار فجأة بيفتكر شعوره بعد أخر هزيمة ودوامة الشك والكأبة اللي غرق فيها .. في اللحظة دي البطل بينتفض ويعود للمباراة .. الهزيمة تحولت من أزمة وعقبة إلي عامل محفز للمضي قدماً للأمام
---
كلهم أبطال بطرق مختلفة
من أجمل جوانب هذا المسلسل ويمكن هو العامل الرئيسي اللي جذبني ليه أن كل قصة فيها حتي لو جانبية ليها قيمة ولازمة وبتطرح تساؤل أو موضوع ما مهم للقصة .. وكل شخصية ليها جوانب مختلفة وخلفية وبتعيش صراع مختلف عن الشخصيات الأخري
في رأيي كل شخصية من شخصيات هذا المسلسل تصلح أنها تكون "البطل" أو الشخصية الرئيسية .. رغم أنه الأضواء كلها مسلطة علي أيبو لكن أنا بأشوف أن كل شخص وكل خصم قابله في رحلته حتي هذة المرحلة يصلح أنه يبقي بطل القصة أو يبقاله السلسلة الخاصة بيه .. بالذات شخصيات زي مياتا وسيندو وداتي .. بيتهيألي لو كل واحد منهم أتعمله Spin off ح يبقي عبقري أوي
يعني "سيندو" كمثال بيفكرني أوي بشخصية "إيتشيجو" من بليتش .. شخص عنده تروما طفولة ناجمة عن موت والده رجل الإطفاء بتنعكس علي حياته وطريقة تفكيره .. فبيقرر يرسخ حياته كلها لمساعدة الأخرين وإنقاذ المحتاجين وحماية من حوله ومحبيه .. هو شخصية إيتشيجو بس في مرحلة متقدمة من القصة .. في المرحلة اللي تحول فيها لشخصية معترف بيها من الجميع والكل بيعتمد عليه
كذلك "داتي" والدكتور اللي بيقابله أيبو في الفيلم الأول دول ينفع يبقي ليهم مسلسل لوحده .. الدكتور اللي بيحاول يجمع ما بين حلم أبوه وبين شغفه والصراع اللي جواه واللي بينعكس بشكل كبير علي أسلوبه .. كذلك داتي الل في رأيي تجسيد حي لأن الأحلام تغفوا ولكن لا تموت .. وأن الحلم ممكن ينتعش ويحي من جديد طول ما صاحبه حي وهمته وإرادته يقظة وبتقاتل حتي النهاية
النقطة اللي فعلاً القصة وصلت فيها لقمة تألقها في رأيي وبان قد أيه الكتابة في المسلسل ده عظيمة مش بس جيدة كانت في الفيلم التاني "كيمورا ضد ماشيبا" .. فعلاً فكرة انك تعمل فيلم أو خلينا نقول أرك بطولة شخصيتين ثانويتين الطبيعي في أي عمل أخر كان مكانهم الهامش وكانت دورهم تلاشي من القصة من بدري لكن هنا بنشوف تطورهم اللي دار في خلفية القصة والصدام القوي ما بين إرادتهم وأحلامهم اللي ما تختلفش كتير إرادة ولا حلم البطل نفسه
---
موهبة أم إجتهاد؟!
من الشخصيات الرئيسية في القصة واللي في ظني القصة ظلمتها ومخدتش المساحة اللي المفروض تتفردله كان "مياتا"
المفروض أن مياتا هو من المحركات الرئيسية للقصة ومنافسته مع البطل هي واحدة من الدوافع الرئيسية ليه للتقدم للأمام في مسيرته . بإختصار مياتا هو فيجيتا أو ساسكي بتاع القصة دي .. لكنه علي العكس منهم بيتواري عن الأنظار وتطوره ضمن سياق القصة بيغيب عن الشاشة لفترات طويلة لكننا بنلحظة ونلمسه في ظهوراته القليلة بين فصول القصة واللي بيجدد فيها روح منافسه مع البطل وبيؤكد علي حقيقة يمكن واضحة وهي أن منافسته مع إيبو هي جوهر القصة كلها ككل وخطها الرئيسي
علي الرغم من الغيابات وقلة الظهور تبقي قصة مياتا زيها زي معظم خيوط المسلسل متماسكة وقوية وبتطرح جدلية وتساؤل مهمين جداً يمكن مش في الرياضة فقط بل في الحياة عامة
هل الموهبة تكفي فقط لتحقيق النجاح؟ وهل الجهد يكفي فقط؟!
مياتا بعيداً عن دافعه الذاتي وهو رغبة تكملة مسيرة أبوه اللي أنتهت نهاية مأساوية وتحقيق حلمه فهو عنده عنصر مهم وهو الموهبة الفذة اللي جزء منها مولود بيها وجزء منها تأثر بحياته مع أبوه الملاكم السابق .. في مقابله بتقف شخصية إيبو .. اللي معندوش نفس الظروف المساعدة ولا نفس الموهبة الفذة ولا حتي مقومات الرياضي العادي حتي مش المتفوق "إيبو قصير وجسمه ضئيل وهي عوامل معطلة بالذات في حالة لاعب الفنون القتالية" .. لكن عبر الاجتهاد الذكي والعلمي وبمساعدة مدربه طبعاً قدر يتفوق بل ويبقي الأهم في مضماره
تفوق إيبو وتعثر مياتا عمل حالة خلل للثاني وخلاه مش متوازن لفترة وده بان في الفترة اللي لعب فيها برة اليابان .. خلل أنتهي لما وجد إجابته الذاتية علي سؤال: موهبة أم إجتهاد؟!
في رحلته مياتا بيكتشف أن كل مقاتل وليه طريقته الخاصة في تحقيق النجاح بناء علي ظروفه وشخصيته .. لكن يبقي ان في عوامل أساسية لا غني عنها في أي رحلة تعلم مش فقط نجاح .. وهي معرفة نقاط ضعفك ونقاط قوتك وكذلك ثغرات الآخرين وتطوير ذاتك من هذة الزاوية
مش لازم تبقي زي حد ومش لازم تبذل نفس مجهوده ولا تلعب بنفس طريقته .. أوجد شخصيتك الخاصة وطريقتك المناسبة لقدراتك وظروفك
كعادة كل الأسئلة في المسلسل فالاجابات عليها بتتساب مفتوحة .. مفيش إجابة محددة .. ويمكن ده جزء من عبقرية العمل أنه بيطرح جدل لكن مش جاي يدي موعظة .. كمان لأن القصة لسة ما خلصتش فحتي الإجابات اللي شخصيات بتوصلها في المرحلة دي من الأحداث ممكن تتغير في المستقبل وممكن تتبدل مع العثرات والصدمات اللي بيواجهوها في مسيرتهم وممكن تظهر شخصيات جديدة بإجابات جديدة ومختلفة وبرؤية أفضل للأمور
---
الرياضة كمنقذ من الضياع
يمكن قصة تاكامورا وسيندو وأكتر من شخصية تانية في سياق المسلسل تودينا لنقطة مهمة وخط خطير متعلق بشدة بسؤال القوة اللي بيدور حوليه العمل ككل .. النقطة هي دور الرياضة التهذيبي والتربوي
الشخصيات دي العامل المشترك ما بينهم هو الانحراف والانخراط في نمط حياة غير قويم وغير سوي .. عادة بيكون شغب وتنمر وأعمال إجرامية متعلقة بعنف الشباب وعصابات الطلاب المارقين والمتمردين
والعامل المشترك الأخر هو أن الملاكمة وظفت طاقاتهم اللي كانت مهدرة في العنف والبلطجة في سياق مفيد وساعدت في تهذيب سلوكهم .. حتي لو ما تحولوش للنموذج الأكثر إيجابية فهما علي الأقل وظفوا طاقاتهم فيما يفيد ذاتهم ومحيطهم ونبذوا فكرة العنف المفرط عديم الهدف والجدوي والفائدة وبعدوا عن سكة كانت ممكن تلقي بيهم إلي غياهب الهاوية الحقيقية
الجانب ده من القصة بيعيد سؤال القوة مرة تانية للواجهة .. ما معني أن تكون قوياً؟!
هل معناه انك تمتلك القوة فقط؟! ولا معناه انك تقدر تتحكم في نفسك؟! ولا تقدر تحمي من حولك؟! ولا قادر تفرض سيطرتك علي الأخرين؟! ولا قادر تحمي نفسك؟!
وأيه هو معني القوة من الأساس؟!
يمكن السؤال ده هو الأهم في القصة لأن لو بصينا علي المحور الأساسي للقصة "أيبو" هو شخص كانت بيتم التنمر عليه وإضطهاده لكنه قدر يتحول إلي شخص قادر يحمي نفسه ويسخر طاقته وسخطه الناجم عن إضطهاده إلي قوة وطاقة إيجابية غيرت مجري حياته تماماً
هل هو كدة يعتبر قوي؟!
ولا قوته بتتجلي في مساعدته لوالدته وقيامه بواجبه تجاه أسرته الصغيرة؟!
ولا القوي هو تاكامورا اللي كان بلطجي وتحول إلي بطل لا يقهر؟!
ولا سيندو اللي أتحول من مشاغب إلي بطل يلتف حوله الجميع؟!
ولا ماشيبا اللي قوته بتتجلي في قدرته علي مواجهة الظروف الاجتماعية الصعبة وحماية نفسه وأخته من عواصف القدر؟!
القصة بتتناول مفهوم القوة من كذا نظرة وفي سياق فيها حالات في غاية التناقض دون أن تنتصر إلي وجهة نظر بعينها.. والموضوع مع تقدم الأحداث في رأيي بيتجاوز نقطة القوة لمناطق أبعد .. أسئلة حول الحياة والوجود ورحلة الإنسان في هذا العالم
---
ختاماً أنا بجد مفيش عمل سحلني ولا شدني بالطريقة دي من مدة طويلة .. فعلاً المسلسل ده دخل مفضلاتي من الباب الواسع .. والحمدلله ان الرحلة لازالت مستمرة عشان انا مش عايز المتعة دي تنتهي
