العيوب سالفة الذكر تكررت بدون شك.. لأن دي جزء من هوية المؤلف في النهاية.. رغم الإضافات الجديدة اللي زودها عن أحداث المانجا واللي خلت الأحداث دسمة أكتر.. إلا إن العمل دار في ذات الفلك ولم يخرج عن نطاقه غير يمكن في لقطتين.
لقطة معركة يوهاباخ وأوريهيمي اللي في رأيي أقوى معارك الفصل ده إن لم يكن المسلسل كله على الإطلاق.. فعلاً لو كانت دي نهاية المسلسل كانت هتبقى جبارة ولكن كان ده هيعمل مشكلة كبيرة في القصة.. فكانت النهاية لازم تتغير وكمان كان هيبقى فيه مشكلة تانية وهي إن مجهودات البطل وتطوره كان هيبقى شيء ملوش معنى.. لذلك كان لازم المعركة تنتهي كما حدث.
اللقطة التانية هي المعركة الأخيرة.. فكرة إن الكل تعاون عشان يقضوا على الشرير الأقوى مسألة بتدي الشرير حقه كتهديد كبير وخطر محدق، وبتدي الأبطال من مختلف العوالم حقهم في إنهم ساهموا سوياً في إنقاذ العالم.
ثانياً أنا مبسوط بالتطور اللي وصلت له كل الشخصيات الرئيسية.. توشيرو وأوريهيمي وكينباتشي وجريمجو.
رغم إن عيوب الكتابة أهدرت حق البعض، وكذلك ضرورات القصة أزاحت شخصيات مهمة كتير من المشهد زي أونوهانا وأوكيتوكي.. لكن المستوى اللي انتهت عنده القصة كان مرضياً بالنسبة لي.
كذلك مستوى الرسم والتحريك كان عالي أوي ولم يهتز غير يمكن في حلقة أو اثنين.. لكن المجمل كان عظيم.
---
الحاجة الأخيرة اللي حابب أتكلم عنها بخصوص الفصل ده والمسلسل ككل هي فلسفة العمل اللي اتضحت أوي في آخر كلمة قالها يوهاباخ.
جملة يوهاباخ الأخيرة لإيتشيجو إنه أفشل وللأبد محاولة خلق عالم بلا موت وبلا حزن، ثم رد أيزن بأن عالم بلا موت هو عالم ظاهره إنه عالم بلا ألم وبلا حزن لكن في باطنه كابوس حقيقي بأنه عالم بلا معنى وبلا تحدي والناس فيه معندهمش دافع حقيقي للتقدم ولا عندهم أي أمل.. عالم غارق في اليأس.
المشهد ده عبقري أوي لأنه في رأيي فسر جانب مهم من فلسفة القصة.
الموت كان دايماً عامل أساسي في حياة إيتشيجو بطل القصة.. أبوه شينيجامي من العالم الآخر.. التروما الأكبر في حياته سببها كان موت أمه قصاده وهي بتدافع عنه.. والدافع الأساسي ليه طول الوقت كان إنه مش عايز يشوف مأساة أمه بتتكرر.. وكذلك كان هو مصدر قوته وقدرته اللي استطاع عبرها حماية ذويه.
من ناحية الموت هو عدو إيتشيجو اللدود، ومن ناحية هو مصدر قوته.. عشان تقدر تتجاوز عدوك الأساسي لازم تتصالح معاه.. معادلة فلسفية عميقة فيها روح الحكمة الشرقية.
"التمسك بالغضب كالإمساك بجمرة نار بقصد رميها على شخص آخر؛ أنت من يحترق أولاً"
- حكمة بوذية.
بليتش من البداية مشبع بالثقافة البوذية ومفاهيمها بشكل كبير.. ورحلة إيتشيجو من الطفل المشبع بالغضب والشعور بالذنب والرغبة في الانتقام إلى الإنسان الناضج المتجاوز لهذه المشاعر السلبية هي رحلة الإنسان في المنظور البوذي نحو الكمال أو النيرفانا.
إيتشيجو في القصة كان بيحمل قوى تؤهله لأنه يبقى ملك الأرواح الجديد أو بتعبير بسيط يبقى كائن إلهي.. ولذلك كان من الضروري والحتمي إنه يتصالح مع متناقضاته زي الهولو اللي جواه وزانجيتسو السيف بتاعه وقوى الكوينشي بتاعته، وكذلك إنه يتخلص من أي مشاعر كراهية بداخله.
لذلك كل أعدائه في الفصول السابقة تحولوا لحلفائه.. دي نقطة.. النقطة التانية هو تحركه ضد يوهاباخ كان بدافع حماية العالم اللي بينتمي إليه وليس بغرض الانتقام ولا الكراهية.
لذلك من عبقريات القصة هنا إن في البداية خالص إيتشيجو فشل في إنه يقضي على الهولو اللي قتل أمه وده كان طعنة قوية وقتها ليه، لكنه كان درس ضروري بغرض إنه ينضج ويقرب أكتر من الكمال.
حتى برضه من اللقطات اللطيفة إن لما أبوه قتل الهولو ده، كيسكي سأله حسيت بإيه قال له ولا حاجة.. لأن ببساطة الموضوع أكبر من مجرد انتقام.
الكمال الحقيقي جه لما إيتشيجو تصالح مع الموت.. عدوه الأساسي في القصة.. مش بس كده بل إنه قرر يدافع عنه وعن فكرة وجود عالم فيه موت وألم وفقدان لكنه في نفس الوقت زي ما قال أيزن هو عالم فيه أمل وتحدي وشجاعة.
هو العالم اللي إيتشيجو قابل فيه أصدقاءه وعاش وسط أهله وناسه وحارب طول الوقت عشان يحميه.. لذلك هو رفض تماماً فكرة تلاشيه تحت أي ظرف.
إيتشيجو بالاختيار ده والدرجة دي من النضج هو نقيض يوهاباخ تماماً.. هما الاثنين كائنات ذات قدرات إلهية وهما الاثنين اتولدوا من رحم المعجزة والمعاناة معاً، لكن كل واحد فيهم اختار طريق عكس الثاني.
يوهاباخ رغبته في الثأر والانتقام من أبوه ملك الأرواح ثم العالم اللي صنعه طغت على أي شيء تاني في وجدانه.. سخر وجوده كله وقدراته عشان بس يحطم هذا العالم ويبني عالم جديد على جثة العالم البائد.
في الميزان البوذي يوهاباخ هو "جاهل" والجهل في الثقافة البوذية هو المفهوم المقابل للجهل في الديانات السماوية.
"الغارق في المشاعر السلبية كمن يتجرع السم وينتظر موت خصمه".
عشان كده المواجهة بينه وبين إيتشيجو هي الشكل الأمثل لمعركة الخير والشر.. النور والظلام.. لذلك انتصار إيتشيجو عليه كان لازم يكون ملحمي ولذلك كان لازم يشترك فيه الجميع.
كنت أتمنى العالم الحقيقي يكون بمثالية عالم الخيال والخير ينتصر انتصار كاسح على الشر.. لكن أهو على الأقل الأعمال اللي زي بليتش بتدي الناس والأجيال الجديدة أمل لعل الخيال يتحول إلى واقع.
نهاية ملحمية عظيمة لعمل أعظم.. سأفتقده كثيراً كثيراً.
