Friends: S9

Friends

S9, Epi 1-23 Finale

طيب جميل جداً .. أنا سأظل متمسكاً بوجهة نظري القائلة بأن فريندز كان لازم يخلص بنهاية الموسم السابع .. فعلاً في رأيي كل الأحداث اللي جت بعد زواج تشاندلر ومونيكا ما هي إلا مط وإعادة تدوير لخطوط درامية سبق إستهلاكها .. أكبر مثالين علي كدة الخط الخاص بحمل ريتشل وولادة إيما هو إعادة تدوير للفترة اللي فيبي كانت فيها حامل .. برضو قصة حب ريتشل و جوي هي هي قصتها مع روس بالملي مع إختلاف بسيط في التفاصيل

فعلاً المسلسل كان ممكن يضم الخطوط الباقية دي في موسم واحد والقصة تنتهي بسرعة فكان علي أقصي تقدير القصة تنتهي بنهاية الثامن .. ولكن

قطعاً المط راجع لأسباب جماهيرية ومادية في الأساس .. بس لو قولت كدة أبقي ظلمت جانب مهم في القصة وهو حتة إستكشاف جوانب جديدة في القصة واحتمالات لم تطرق بعد

بشكل عام اللي استوعبته مؤخراً أن كتابة الكوميديا تجريبية بطبيعتها .. فالكاتب لازم يبقي زي عالم الكيمياء القديم اللي كان بيحط مركب علي اخر وبيشوف ده ممكن ينتج منه ايه والمادة دي لو اتحطت في الظروف دي ممكن تتحول لأيه

القصة علي مدي المواسم اللي فاتت تقريباً جربت كل حاجة ولعبت مع أبطال المسلسل لعبة الكراسي الموسيقية فكانت ريتشل في البداية هي محور القصة وبعدين روس خد فترة طويلة هو محور العمل وبعدين تشاندلر وبعدين مونيكا ثم فيبي علي فترات ثم جوي علي فترات .. لكن هو الحقيقة جوي رغم أنه كان محور القصة في بعض المواسم لكن الجانب العاطفي من حياته مكنش ملموس بشكل كبير .. أه دخل في علاقات وكان ليه قصص مع أكتر من واحدة لكن ما شوفناش الجانب العاطفي المحب من جوي بشكل دقيق ومكثف زي ما حصل في الموسمية الثامن والتاسع .. كمان الدفع بريتشيل كان ذكي أوي نظراً للتباين الضخم بين شخصياتهم وطبيعة ريتشل الانتقائية اللي تخلي اي علاقة بينها وبين شخص زي جوي غريبة وكوميدية

كمان الموسم ده بعيد عن التكرار واستهلاك الوقت طرح كام فكرة في كذا حلقة ذكية ويمكن تطرق لمواضيع لم لم يتطرق إليها المسلسل من ذي قيل .. ويمكن ده بيجسد عامل التطور في عملية الكتابة .. ان الكتاب نفسهم بيكبروا وينضجوا أثناء عملية الكتابة بشكل بينعكس علي اراءهم وافكارهم اللي بيطرحوها عبر النصوص والأعمال .. يعني في أكتر من حلقة بتتكلم عن أزمات نهاية مرحلة الشباب وبداية مرحلة الكهولة زي الصراع ما بين الرغبة في الاستقرار والرغبة في الإنطلاق والعيش بحرية وكذلك مأسلة الوحدة وصعوبة إيجاد شريك مناسب مع تقدم العمر وقيمة الصداقة

كانت حلقات في منتهي الذكاء والروعة كسرت شوية ملل التكرار اللي أصيبت بيه الأحداث مع الوقت

يمكن أكتر لاين فيهم عجبني بس دمرني هي مثلث الحب اللي كان بين فيبي ومايك وديفيد .. قد أيه ديفيد ده صعب عليا .. إنسان الأقدار كلها بتحاربه وللأسف بيدفع ضريبة إختياره لشغفه وحياته العملية علي حساب حبه .. للأسف النهاية اللي وصلها واقعية بس ظالمة .. كنت أتمني أنه ينجح في الرجوع لفيبي لأنه لم يجرم بل أختار مستقبله .. ده حقه

أول مرة أحس اني كرهت فيبي بسبب اللي عملته فيه  بس للأمانة برضو مكنش ينفع تخدعه وتبني حياتهم علي كذبة

الموسم الأخير قادم بقوة .. أستعدوا 

IronHeart: S1

IronHeart
S1, Epi 1-6 "Finale"

المسلسل ده يمكن يختلف عن كتير من المسلسلات اللي أنتجتها مارفل في السنين الأخيرة .. لأنك داخله بحالة من عدم الإهتمام والاكتراث ومش حاطط عليه أمال كبيرة .. فلما بتيجي تتفرج تلاقي أن المسلسل جيد .. مش خطير ولكن جيد ولذيذ وأحداثه ممتعة ومشوقة ونهايته عظيمة جداً .. فبتقول والله طيب كويس أنه خيب ظني

أنا فعلياً لا كنت مهتم بشخصية ريري ولا عمرها شغلت بالي وحتي ظهورها في فيلم واكاندا فور أيفير مكنش خطير أوي بس كان حلو ومؤثر في الأحداث نوعاً ما بس لا كنت مهتم أعرف جذورها ولا أشوف تطورها رايح فين .. بس المسلسل نجح في أنه يخليني أهتم بده

أولاً جذور الشخصية حلوة فشخ لأنها مرتبطة بتروما واكتئاب ما بعد الصدمة والبطلة محور حياتها كله أنها عايزة تحقق حلم أبوها -جوز أمها- في أنه يخترع درع زي بتاع توني ستارك وهي مستعدة تعمل أي حاجة عشان تحقق الحلم ده .. لدرجة أنها ح تحط إيديها في أيد الشيطان حرفياً في أخر حلقة

كل أبطال المسلسل الحقيقة عندهم تروما مرتبطة بالماضي ومشاكل مع أباءهم والماضي بتاع كل شخصية أكثر إظلاماً من الأخري ويمكن ده بيخلي القصة مميزة .. حرفياً كل الشخصيات وعلي رأسهم البطلة مجرمين بطريقة أو بأخري وبعضهم بيحمل أسم ملوش يد فيه وبعضهم بيرتكب الشر لغرض مش شرير وبعضهم ضحية تحول إلي جاني .. حلو الجو ده اللي مفيهوش ثنائية الخير والشر التقليدية بل درجة أعقد شوية من التناقضات وصراع المصالح والإرادات

يمكن ده ما يغفرش حالة اللامنطقية اللي عايش فيها المسلسل بصراحة زي أن كل هذا الكم من الجريمة والرجال الخوارق والأليين ومع ذلك ولا حد أتحرك ضدهم ولا حد ولا فيه أي أكشن من مكافحة الأبطال الخوارق زي ما حصل في ميس مارفل مثلاً .. ماشي أحنا في شيكاغو مش في نيويورك بس برضو الوضع غير منطقي يا جدعان

اللي عاجبني في القصة جانبين .. حتة تسليط الضوء علي الذكاء الاصطناعي والمدي اللي ممكن يوصله في المدي غير البعيد .. فكرة تجسيد صاحبتها عن طريق الذكاء الاصطناعي دي عبقرية أوي تطبيقها ممكن يحصل في الواقع بي المستقبل القريب جداً .. اللي عاجبني كمان أن خلاص الذكاء الاصطناعي بقي جزء من الثقافة العامة وفكرة أن الشئ اللي مان خيال علمي يوم ما بقي وقاع ملموس في ايدينا وبنحاول نتخيل ح يوصل لحد فين

حتة صاحبتها دي توديني لحتة أن المسلسل ده كله شبه سرد عكسي لحياة توني ستارك .. اللي هو ايه اللي كان ممكن توني ستارك يعملوا لو كان ولد بنفس الذكاء بس في بيئة مختلفة .. فكرة ذكية أوي ولو حد ركز في تفاصيل القصة ح يلاحظ أنها هي هي قصة توني بس مقلوبة

الجانب التاني وهو المتعلق بأخر حلقة .. ظهور مافيستو وحتة الصفقة مع الشيطان والجو ده كان عبقري أوي والتمهيد ليه كان عظيم من أول كم الإشارات الخفية لقصة فاوست لمشهد الغواية وحتة أن الشيطان بيلعب علي ضعف الإنسان ورغباته المحبطة والدفينة عشان يقدر يسيطر عليه

ظهور ساشا بارون كوهين كان حلو أوي والمشهد من أول تفصيلة أن في مشهدين الغواية كانوا في مطعم وازاي أن الشيطان بيعرض علي الضحية مشاركته الطعام في إشارة مباشرة لقصة التفاحة والشجرة الملعونة والخروج من الجنة لحد أسلوب الغواية واللعب علي نقاط ضعف الإنسان المشهد كله عبقري

الخلاصة أن مش بس المسلسل حلو لا ده كمان يديك لمحة عن التحديات القوية والعظمة اللي المفروض تحصل في المستقبل

How I met your mother: S8

How I met your mother

S8, Epi 1-24 "Finale" 

هل ده الموسم الأقوي ضمن أحداث المسلسل كلها؟ يمكن .. يجوز لأني لحد الأن لم أعقد مقارنة بين مواسم المسلسل ككل لكن مبدأياً وحالياً وبكل أريحية أقدر أقول أن ده واحد من أجمد مواسم المسلسل .. لكن مهمة تحديد الأفضل دي خليها لبعدين 

طيب ليه وليه هو أجمد من الموسم اللي قبله تحديداً؟! 

أول حاجة وأهم حاجة في الموسم ده ان تيد رجع يبقي المحور الرئيسي للقصة .. أصل معلش مش منطقي أن راوي الأحداث يفضل لمدة موسمين برة دائرة الضوء .. حتي لو كانت حياته فاضية وقتها او بتطور ببطئ لازم علي الأقل يبقي مؤثر في الاحداث بشكل كبير .. تيد بعد قصته مع زوي خد هدنة طويلة كدة كانت مفيدة عشان تدي فرصة أفضل ومساحة أكبر للشخصيات التانية أنها تطور وتبقي محل التركيز لأن التطورات اللي ح تحصلها تطورات جوهرية وتغيرات ح تأثر علي حياة الشلة كلها وعلي رأسهم تيد 

تيد في موسم ده لم يتصدر المشهد لمجرد أنه البطل لا الموضوع كان أعمق من كدة .. منطق المسلسل ماشي كالتالي .. القصة بتبدأ في مرحلة ما بعد المراهقة ومرحلة يرعان الشباب وطول الأحداث المسلسل بيرصد قد أيه المرحلة دي مليئة بالحماقات والأخطاء الكارثية الناجمة عن قلة الخبرة والرعونة .. بتنتقل بعد كدة الشخصيات لمرحلة النضج ثم المسئولية .. أن خلاص أثار عيشة المراهقة بتتلاشي واحدة واحدة والأنسان بيبتدي يتجاوز مرحلة الشباب برعونتها وأخطاءها ويبتدي يركز في تحقيق ذاته وتأسيس حياته في سبيل المستقبل .. كان بديهي أوي أن أول شخصين يوصلوا للمرحلة دي هما مارشل ولي لي لأنهم من أول القصة بيتقدموا كنموذج للجدية والإخلاص والرغبة في تأسيس حياة مستقرة .. النموذج النقيض لبارني و روبين تحديداً اللي فضلوا غارقين في أزمات الطفولة بتاعتهم ومشاكلهم الذاتية العميقة لفترة طويلة .. علي عكس مارشل ولي لي فالثنائي بارني وروبين فضلوا محتفظين بمشاكلهم لكنهم تعلموا دروس الحياة القاسية وتصالحوا بشكل أو بأخر مع مشاكلهم وتطورا للدرجة اللي تخليهم يقدروا يبنوا حياة مستقرة ليهم 

تيد في المقابل أكتر واحد خد وقت علي ما نضج وأتطور لأسباب كتير منها أنه حالم زيادة عن اللزوم وأنه طول الوقت ده مكنش لاقي حب حقيقي وفوق ك،ة كان عنده تعلق مرضي بروبين .. يمكن إعترافه بالأزمة دي كان أكبر خطوة نحو النضج .. هو حقيقي أتطور كتير في الموسم ده بس برضو لسة عنده مشاكل كتير 

تاني حاجة تخلي الموسم ده واحد من أفضل المواسم هو أنه بيضرب بقوة وفي العمق .. يمكن أكتر حاجة بتخليني أحب المسلسل ده يمكن أكتر من ساينفيلد وفريندز هو أنه عميق أكثر في تناول النفس البشرية وتأثير النشأة وأزمات الطفولة والظروف المحيطة علي الحياة الشخصية والعاطفية للإنسان .. مناقشته للوحدة واكتئاب ما بعد الولادة وعقدة الإنكار كانت حلوة أوي .. مش طبعاً تحليل علمي صرف بس هو لمسها بشكل إنساني ولمس أسبابها وازاي أن الإنسان ممكن الظروف تحوله لمريض أو معقد دون أن يشعر .. الخوف الناجم عن تجارب سابقة والتروما اللي بتسببها تجارب سيئة في الماضي وبتستمر مع الإنسان للأبد .. بجد المسلسل عاجبني أوي في الحتة النفسية دي 

الجزء الأحب إلي قلبي واللي بشكل عام المسلسل هنا بيلعبه بفن علي مدي حلقاته هو حتة التلاعب بالسرد وطرح أفكار عميقة وذكية عن طريق حتة السرد الخطي للأحداث وتداخل الأزمنة وغيره .. يعني الحلقة اللي بيقابلوا فيها الكابتن دي هي تحطيم قوي لفكرة الحقيقة بالذات فيما يتعلق بالذكريات وسرد الماضي .. لكن تبقي الحلقة الأعظم بتاعة "أنت وحيد يا تيد" .. الحلقة دي فيها سرد ما بعد حداثي عظيم ومناقشة فلسفية غاية في العمق لثنائية الاختيار والقدر بل ونظرية أثر الفراشة وكذلك فكرة الخطوط الزمنية والاكوان المتوازية 

يوم ما ح ابقي اعيد مشاهدة الحلقة دي ونعملها استوديو تحليلي لوحدها لأنها بدون شك أعظم حلقة في المسلسل 

خلاص تيد أستوي وأصبح مستعد تماماً للتطور النوعي الأهم في حياته .. أنا منتظر نهاية هذا العمل بشغف غير طبيعي ❤

Seinfeld: S8

Seinfeld
S8, Epi 1-22 "Finale"

نظرية الموسم السابع لا تنطبق علي ساينفيلد .. يعني رغم أنه كان عدي ٨ سنين علي بداية المسلسل لكنه لم يفقد بريقه .. لأسباب كتير .. أهمها طريقة كتابته ومنطق كتابته

ساينفيلد بدء علي أنه مسلسل بيدور حول أحداث يوميه مفيش بينها ترابط كبير غير يمكن وجود الشخصيات الرئيسية ذاتها .. يعني في أول ٣ مواسم مكنش فيه تطور حقيقي للشخصيات أو تغير بيحصلهم غير تغير الشكل لكن الطباع ووجهات النظر كانت ثابتة إلي حد ما.. وحتي مكنش فيه شخصيات ظهورها بيتكرر كتير غير دايرة ضيقة جداً من الشخصيات الثانوية المرتبطة بيهم

الوضع ده أتغير بعد الموسم الرابع .. أول موسم مترابط وذو تراكم في المسلسل وليه سردية وخط درامي بيتطور .. بعدها بدأت فكرة التراكم تبقي جزء من أسلوب سرد المسلسل

يمكن عدم اعتماد لاري ديفيد وجيري ساينفيلد علي حتة التراكم دي راجعة للحقبة اللي أتكتب فيها المسلسل واللي كانت مسلسلات السيتكومز فيها تقريباً كلها بتتكتب بالشكل ده وكمان لأنهم خدوا وقت علي ما دخلوا ضمن الموجة الجديدة في السيتكومز اللي منطقها قائم علي فكرة أن السيتكوم هو معارضة فنية ساخرة للدراما الكلاسيكية ومسلسلات ال"Soap Opera" .. حتي دايماً في المسلسلات اللي جت بعد كدة زي فريندز تيمات زي الخيانة والهجر والتوترات العاطفية في العلاقات تلاقيها موجودة بقوة لا وفي دايماً تناول ساخر ليها وتهكم علي الأداء الدرامي المبالغ فيه للمثلين بت بتوع السوب أوبرا

محافظة ساينفيلد علي شكله وطبيعته مع تطوير أدوات وأسلوب المسلسل خلاه دايماً متجدد وغير مكرر وممكن يتعرض لمدة ٢٠ سنة حتي .. ولكن

رغم أن مستوي الكتابة ما وقعش بعد الموسم السابع زي كتير من المسلسلات المشهورة لكنه كان أهتز قبل كدة في بعض المواسم وده شئ عادي يعني بيحصل في أحسن العائلات .. لكن هي المشكلة الحقيقية اللي واجهت ساينفيلد كانت قدرية في رأيي

أولاً الممثلين بالذات في المواسم الأخيرة كان شكلهم كبر وأبتدت فكرة أنهم لسة بيدوروا علي علاقات صحية وأنهم شباب تبقي مش منطقية شوية بالذات أن في نفس الوقت ده كان بيتعرض مسلسلات تانية شبابية حقيقية الممثلين بتوعها أصغر سناً ومتصدقين أكتر وكمان الجمهور الصغير مرتبط بيهم أكتر

ثانياً وهي نقطة مرتبطة بالنقطة الأولي فكرة أن العصر كان تغير وذائقة الأجيال الجديدة أتغيرت والدنيا نوعاً ما أتطورت فده ناقوس إنذار بيقول أن المسلسل لازم يقف عند حد معين .. وهو الشئ اللي حصل في الموسم التاسع

حصل أزاي بقي والناس كان ردة فعلها ايه؟! .. ده سؤال ح نسيبه لنهاية المسلسل ونبقي نجاوب عليه ساعتها

How I met your mother: S7

How I met your mother
S7, Epi 1-24 Finale

زي ما في الثقافة اليهودية في حاجة أسمها "عقدة العقد الثامن" -مفيش دولة أو مملكة لليهود بتعيش أكتر من ثمانين سنة- كذلك أنت شخصياً بقيت أن في السيتكومز في حاجة أسمها عقدة "الموسم السابع".

في رأيي الشخصي المفروض مفيش أي سيتكوم يكمل بعد الموسم السابع .. يعني أنا بأحترم أوي الكوميديا الانجليزية في حتة أن عدد مواسم السيتكومز قليلة أحياناً بتبقي أتنين أو أربعة -في إستثناءات للقاعدة دي طبعاً- بينما مدة الحلقات بتبقي أطول .. لأن بمجرد ما مسلسل بيعدي الخمس سنين عرض تلقائياً بيبتدي يخش في مرحلة الترهل.

بمعني .. في العصر الحديث مع تقدم التكنولوجيا بالذات بقي تطور الوعي البشري وتقلب المزاج العام وتيرته أسرع .. وده بيخلي الحاجة اللي كانت تريند أو النمط اللي كان منتشر أو الناس كانت متعلقة بيه من خمس سنين صعب بل مستحيل يفضل زي ما هو بعد مرور خمس سنوات .. مش عاوز أقول أن في عصر الذكاء الاصطناعي وشبكات التواصل الإجتماعي الموضوع ممكن يبقي بالأيام والأسابيع كمان.

لذلك صعب أن عمل يفضل محافظ علي نجاحه أو علي مستواه طول المدة دي كلها الا لو بيغير طقم الكتاب بتوعه كل مدة وده بالمناسبة بيخلق كارثة تانية وهي أن العمل بيبقي مهلهل وغير مترابط لأن في أكتر من عقل وأكتر من وجهة نظر داخله في الموضوع ومحدش فيهم ملزم يكمل علي درب الأخر .. ده يودينا لحتة أن كمان من التحديات اللي بتواجه صناعة الدراما وبالذات الكوميديا أن في النهاية الكاتب ده بشر ووعيه محدود بحدود البشر لذلك هو مش ح يبقي مطلع علي كل ما هو جديد ومتناسب مع مزاج الناس طول الوقت وفي النهاية بيعمل الحاجة بتاعته هو من وجهة نظره هو.

لذلك ح نلاحظ دايماً إن في مرحلة معينة لازم يحصل صدام بين الجمهور وصناع الكوميديا.. تقريباً ده شئ حتمي .. لأن عادة المسلسل بيبدأ وياخد صيط وشعبيه مع نوعية وجيل من الجمهور لكن لما بيطول الجيل ده ما بيبقاش هو الجمهور الوحيد للعمل .. بيخش أجيال جديدة بمزاج وذائقة مختلفة ودول طبيعي ما يعجبهمش اللي عجب اللي أكبر منهم .. ده غير فخ التكرار اللي بتقع فيه أعمال كتير وبيدخلهم في مشكلة مع جمهورهم اللي بدء معاهم أساساً.

طيب كل ده أيه علاقته ب HIMYM والموسم السابع بتاعه؟!

الموسم ده وقع فيه في نفس الفخ اللي وقع فيه فريندز ومسلسلات تانية بس بشكل مختلف شوية.

أولاً الموسم ده إستنساخ للموسم الرابع والثامن من فريندز .. اللي هو الموسم كله متمحور حولين أفيهيات الحمل والنضج وحياة الكبار واننا لم نعد شباباً والقصة دي .. وبالمناسبة انا ما بأحبش فقرات الكوميديا بتاعة الحمل دي لسبب مش عارفه الحقيقة بس مش بأستلطفها خالص .. الاستنساخ عادي بس بالنسبة لي مكنش عادي.

ثانياً وبعيد عن الحتة دي الموسم ده شخصية تيد فيه بقت ثانوية بطريقة غريبة لدرجة أنه بقي مجرد معلق علي الأحداث تقريباً تماماً .. هي الحتة دي ليها مبرر نوعاً ما لأن تيد بيحكي قصة نضج شلته وأزاي ده أنعكس عليه وأداله دفعة عشان ينضج هو كمان أو يسعي لأنه يبقي ناضج .. بس أنا في رأيي كان ممكن ياخد مساحة أفضل من أنه يبقي هامشي تماماً بالشكل ده .. أنا شبه نسيته والله في بعض الحلقات من كتر ما وجوده مكنش تقيل ولا كان في أي جديد في حياته.

هي مرحلة تيد دي ناس كتير بتمر بيها .. مرحلة التحول من الشاب للرجل الناضج وساعات بيبقي فيها عطلان ومدد بلا جديد كتير .. بس مش كدة يا شباب والله.

كمان في بعض الحلقات في نص الموسم كدة واقعة علي مستوي الكتابة والكوميديا.. اللي هو المسلسل بقي مقاولة وهما صنايعية ولازم يملوا فراغ ال ٢٤ حلقة دول بأي هري .. المهم بس أن الأحداث الرئيسية في الموسم تتم في وقتها وإن تطور القصة ما يتأثرش .. لا بجد في حلقتين تقريباً كدة في النص من أسوأ ما يكون وفيهم كم إفلاس في الأفكار وعدم إتقان في الكتابة بشع لدرجة أنك والحلقة بتخلص تحس أن في حاجة غلط وإن في خطوط دارمية ملهاش لازمة وقصص تحسها مقصوصة من النص وأحداث هلامية كدة .. شئ بشع الحقيقة.

كمان لأن الكتاب كانوا عايزين يمدوا المسلسل موسمين كمان علي الأقل -وهو ما حدث- مطوا شوية في بعض الأحداث وخلوا رتم المسلسل بطئ شوية عشان الموسم ده يقفل عند مرحلة معينة من القصة ويبقي لسة في أحداث كتير محتاجة تتحكي .. أديها كمان موسمين يا كابتن .

تطور شخصية مارشل وليلي متوقع وعادي بس مارشل ده نموذج شنيع للرجولة الأمريكية وقد أيه هي ذكورة مبتورة مش مجرد مجروحة بس .. تكر بارني هو اللي عاجبني أوي أوي أوي .. بجد التحولات اللي بتحصله ببطئ وتطور شخصيته طبيعي ومنطقي ومقنع بشكل يتحب.

عاجبني أوي أنهم بطلوا يطلعوا روبين ضحية زي في المواسم اللي فاتت وبقي في توازن شوية في كتابة الشخصية .. ماشي هي ضحية لتربية سيئة ومسكينة لأن الظروف بتقف ضدها بشكل يعجز أي حد عن أنه يقاومة بس ده لا ينفي أنها بنت ستين كلب سامة ومؤذية ومتلاعبة وحقيرة بشكل غير طبيعي .. بجد من أكتر الشخصيات الرئيسية المقززة اللي قابلتها في الدراما الأجنبية حتي الأن .. أكتر من سكايلر وايت و ريتشل جرين.

Fuck Ted Mosby .. That's it.

Daredevil: Born Again - S1, Epi 9 "Finale"

Daredevil: Born Again
S1, Epi 9 "Finale"

لا أريد لهذة القصيدة أن تنتهي .. أه والله العظيم .. فكرة اني ح اقعد أستني سنة كمان عشان أكمل القصة مؤلمة الصراحة

خلينا بس ما نتكلم عن نهاية الموسم العظيم ده نقول كلمتين في حق السلسلة دي ككل من أيام نيتفليكس

بدون شك المنتوج الجيد بيفرض نفسه علي الواقع ولو بعد حين .. يمكن انا مش من محبي الجمل الرنانة اللي فيها جزم وحتمية لأن الدنيا ما بتمشيش كدة .. بس فعلاً الحاجة الجيدة مهما ادفنت بفعل الظروف بيجي يوم وتظهر وتلاقي اللي يقدرها

أنا فاكر كويس اني كنت حزين جداً لما تم إلغاء مسلسلات مارفل/ نيتفليكس لأن مصيرها كان متعلق في الهوا وكان في كلام كتير علي أن ح يعاد تقديمها بممثلين جداد وح يعاد هيكلة العمل بما يتناسب مع شخصية ديزني .. طبعاً زاد قلقي لما ديزني أبتدت تقدم مسلسلاتها وكمية القرف اللي قدموه ال٤ سنين اللي فاتوا كانوا كافيين أنهم يعيشوني في رعب من فكرة تقديم أي مسلسل من اللي بأحبهم بهذة الأيدي المسمومة

لكن الحمدلله .. لقد نجا .. ومش بس كدة لا ده فرض شخصيته عليهم

ليه ديرديفيل مسلسل ملحمي؟! ليه قد يكون أفضل مسلسل سوبرهيرو في التاريخ؟!

لأسباب كتير أهمها بالنسبة لي أنه عمل درامي إنساني في الأساس .. محبوك بشكل جيد وشخصياته عميقة ومتعددة الأبعاد.. ناس من لحم ودم زينا وزي اللي بنشوفهم كل يوم بيعيشوا نفس مشاكلنا النفسية والمادية والعاطفية ومروا بصدمات وبتواجهم عقبات زي أي حد فينا .. زيه زي سوبرانوز و ذا واير بيتكلم عن الحياة اللي بنعيشها بس من الزاوية بتاعته .. الزيادة بس أنه  بيضيف حتة القوي الخارقة ومحاربة الجريمة للخلطة

أنا فاكر كويس المشهد -كان في الموسم الثاني يمكن- اللي الأب في الكنيسة كان بيكلمه فيه عن الشر وعن أكتر شخص شرير قابله في حياته وحرب رواندا .. الحوار في المسلسل قوي وعميق بشكل خلاب الحقيقة

لذلك كان قرار عودة فريق العمل بتاع المواسم بتاعة نيتفليكس كان ممتاز .. شغل الفريق الأصلي مكنش وحش علي فكرة بس مكنش ح يدينا النتيجة اللي أي محب للسلسلة منتظرها

أسوأ حاجة في الموسم ده خلص الصراحة

لما المسلسل رجع أنا كنت ناسي كتير من تفاصيل القصة بصراحة .. بس نظراً لأن المسلسل فيه إستمرارية ودقة أفتكرتها مع الوقت

الرحلة اللي بيخوضها أبطال المسلسل هي زي بيقول الأسم "ميلاد جديد" .. مش فاكر قولت ده قبل كدة ولا لا بس لو ح نلاحظ الموسم ده لعب لعبة صايعة شوية .. هو أعاد تقديم الشخصيات الرئيسية كلها للجمهور اللي أول مرة يشوف المسلسل بينما بالنسبة للجمهور اللي علي قديمه هو أنعش ذاكرتهم وبعدين جه في أخر حلقتين قفز بالشخصيات قفزة نوعية قلبت المشهد تماماً

ويلسن فيسك في الموسم ده بيكمل اللي عمله قبل كدة .. فيسك لقي في السياسة ضالته اللي كانت تايهة منه طول السنين اللي فاتت .. هو طول الوقت كان مجرم بيحاول يرتدي قناع رجل المجتمع والشخصية العامة ولكن الموضوع في كل مرة كان بيفشل .. أنا المرة دي الأمر نجح مؤقتاً .. بس نجاح باهر

علي طريقة "فضل يتمسكن لحد ما أتحكم" فيسك وصل مش بس للسلطة لا ده وصل للنقطة اللي قدر بيها يتجاوز القانون ويبقي هو الحاكم والقانون في حد ذاته وهو اللي بيتحكم في كل شئ وبيصنف وبيدي أوامر وبيفرض أحكام وغيره وغيره

مشهد قتله البشع لمسؤول الشرطة عبقري للغاية لأسباب كتير أوي .. أولاً بيبن قد أيه هو بقي مسيطر علي مقاليد الأمور .. ثانياً أنه ما رجعش لطبيعته الحقيقية لا ده أتطور وبقي في مستوي تاني أخطر من أي وقت سابق .. فيسك أصبح ديكتاتور متسلح بالقانون ومتحكم في كل أجهزة السلطة وبيستخدمها لصالحه وأصبح بيملك الأتنين .. عالم الجريمة وعالم السياسة.. ديستوبيا زي ما الكتاب بيقول

في المقابل مات موردوك خاض رحلة عويصة في الموسم بتكمل رحلته في السلسلة كلها كمجمل .. مشكلة مات الأساسية هي غضبه .. الشيطان اللي ساكن جواه .. رغبته في ممارسة العنف .. غضبه وسخطه علي الظلم اللي بيعدي عليه كل يوم والمجتمع .. في المقابل تربيته الكاثوليكية ربت جواه حس إنساني عالي وحس أعلي بالعدالة وضرورة إرساء القانون

مات بعد موت فاجي بيقرر يعتزل كونه رجل خارق .. في البداية كنت باعتقد أن ده خوفاً من أنه يؤذي حد تاني قريب منه .. بس ثبت لي مع الوقت أنه خايف من ديرديفيل .. خايف أن القناع مع الغضب ينتج عنهم إنسان خارج عن السيطرة .. لذلك وهو حتي بيرجع بعد كدة للقناع رجوعه كان بحذر شديد و بنوع من الندم .. مات كان مقتنع أنه ممكن يصلح كل شئ بمجرد كونه محامي لكن الحقيقة ده ما حصلش .. لأن الوضع كان أصعب وأكثر فساداً من أنك تقدر تصلحه من قلب المنظومة نفسها

الحلقة الأخيرة نقدر نقول أنها فرشة أو تأسيس جيد جداً للموسم الجاي وللمرحلة كلها ككل

عودة فرانك كاسل و كارين بيدج للصورة بترجعنا لأجواء المواسم بتاعة نيتفليكس وبتهيئ الجو للمعركة القادمة

أينعم هو عودتهم للصورة بتبين قد ايه ان كل الشخصيات الثانوية والأدوار التانية في الموسم ده -بأستثناء بنت أخو وايت تايجر- مكنش ليهم أي لازمة أو بلفظ أحسن شوية مكنوش بالتأثير ولا المساحة ولا العمق اللي يخليهم عناصر مهمة تنقل القصة لقدام .. وده راجع لأن وجود الشخصيات دي كان اختيار فريق الكتابة القديم

علي حسب الإشاعات ما بتقول الفريق القديم كان عايز يقدم مسلسل قانوني علي طريقة Law & Order كدة بس جرعة الكوميديا ح تبقي أعلي فيه شوية .. كل يوم قضية وحلقة شكل .. لو حد خد باله المسلسل من الحلقة التالتة للحلقة السابعة كان ماشي علي الرتم ده .. حتي ظهور أبو كامالا خان و الوايت تايجر جه السياق ده .. كل يوم قضية شكل .. الفكرة مش بطالة بس كانت الطريقة اللي ح تتعمل بيها هي اللي بطالة ولذلك مارفل لما أعادت نظر في المسلسلات بتاعتها في فترة إضراب الكُتاب لقت أن المسلسل ح يبقي كارثة وح يفسل زي اللي قبله لذلك طردوا الفريق ده وجابوا الفريق القديم اللي كان شغال مع نيتفليكس إلي جانب آخرون من اللي أشتغلوا في مشاريع مشابهة ناجحة مع مارفل زي موون نايت

الكارثة الأكبر كانت أنهم ح يمسحوا كل الروابط اللي بين المسلسل والشغل القديم بتاع نيتفليكس لدرجة أن كان في كلام أن فاجي و كارين مكنش ح يبقي ليهم وجود وكان ح يغيروا الممثلة اللي عاملة دور فينيسا مرآة فيسك وكانوا ح يغيروا الممثل بتاع فرانك كاسل .. ده يفسر ليه مات ظهرله صديقة جديدة وسر وجود كم الشخصيات الثانوية الجديدة اللي دورهم مش كبير وليه فرانك وبايدج و بولز أي دورهم كان صغير في الموسم ده و ما رجعوش غير في نهاية الموسم .. لأن حسب ما فهمت أن بداية ونهاية الموسم ١٠٠% شغل الفريق الأصلي بتاع نيتفليكس بينما الحلقات اللي في النص شغل الفريق القديم اللي أتطرد

خلينا نقول الحمدلله أن النسخة القديمة دي ما أتعملتش وماتت قبل تظهر للنور

نرجع لعودة فرانك وبايدج وليه هي مهمة بالذات في سياق التطورات اللي حصلت في الحلقة الأخيرة

الحلقة الاخيرة هي الذروة الدرامية للأحداث والتطورات اللي عمالة تدور من أول الموسم .. زي ما قولنا فيسك بقي ديكتاتور بيحكم نيويورك بالقبضة الحديدية .. ميليشياته من رجال الشرطة الفاسدين بيمارسوا بتخرق القانون وتمارس شتي أنواع العنف والجريمة تحت مسمي القانون دون ضابط أو رابط .. إلي جانب سيطرته هو و مراته علي ميناء ريد هوك وإدراته وسيطرته علي عالم الجريمة بعيد عن أعين السلطات

في المقابل مات وصل لقناعتين أساسيتين ح يفرقوا أوي في الأحداث اللي جاية .. أول شئ أن الوضع بقي محتاج وجود ديرديفيل لأن الأمور خرجت عن السيطرة وأن خوفه من أنه ينجرف في تيار العنف زي فرانك ح يخلي الأمور أسوأ لأنه بقي مستهدف مباشرة وشخصياً ولأن الناس دي لغة القانون مش ح تاكل معاها

تاني شئ أن مات طول الموسم كان متخيل إنه ممكن ينقذ الموقف بنفسه لوحده .. لكن انفجار الأحداث كان اسرع من تخيله ووصل الأمر لنقطة عويصة بقي صعب معاها أنه يواجه هذا الكم من الاجرام بمفرده .. He needs a Team

الفكرة ان البداية زي ما شوفنا في أخر مشهد ح تبقي بمجموعة الشخصيات الثانوية اللي بيثق فيهم بس أظن الموضوع مش ح يقف عند كدة وأنه ح يضم عليه شخصيات تانية من عالم مارفل-نيتفليكس .. المدافعون

يمكن أنا متضايق من أن مفيش ولا واحد فيهم ظهر في الموسم ده بس أظن الموسم الجاي ح يبقي ليهم وجود كبير ضمن الاحداث .. جيسيكا جونز،  لوك كيدج، أيرون فيست .. ضيف معاهم إيكو و وايت تايجر وإحتمالية ظهور سبايدرمان اللي أترمي له أكتر من Hint في سياق الاحداث

أظن الموسم الجاي ح يبقي حاجة فخمة .. أتمني بجد

عايز أشيد قبل ما أقفل كلامي بالشغل اللي عمله فريق المسلسل علي المستوي الإخراجي .. بجد الناس دي مخلصة أوي واستغلوا فرصة عودتهم للمشروع في أنهم يطلعوا أحسن ما عندهم .. الكادرات لإستخدام الإضاءة.. يمكن المعارك هي اللي ألشت منهم شوية بس ظبطت في الأخر

الكتابة كانت جيدة بس التغيرات اللي حصلت في فريق العمل أثر سلباً في بعض التفاصيل بس الدنيا رجعت أستتبت في الأخر

أرجع وأقول أنا مبسوط بعودة المسلسل بهذا الشكل .. ومنتظر الموسم الثاني بشغف

Daredevil: Born Again - S1, Epi 8

Daredevil: Born Again

S1, Epi 8

• «قم بإزالة الاشياء جميعها التي ليست له صلة بالقصة. فإن ذكرت في الفصل الأول أن هناك بندقيةً معلقةُ على الحائط، حقًا يجب ان تستعمل البندقية إما في الفصل الثاني أو الثالث. يجب أن لا تبقى معلقةً هناك إذا لم يجري إطلاقها.» - أنطوان تشيخوف 

نظراً لأن مارفل من ساعة بدأت مرحلة المسلسلات دي من أربع سنين -واندا/فيجن ٢٠٢١- وهي في حالة تذتذب تصل إلي درجة الإنحدار والفشل فالواحد بقي مؤخراً ما بيركزش مع تفاصيل الأعمال والله واحياناً مع الأعمال في حد ذاتها فأنا مثلاً لا شوفت لوكي ٢ ولا شوفت أجاثا لحد الأن وغالباً مش ح أبقي مبسوط بتجربة أجاثا كما هو متوقع ولا ح تفرق معايا تجربة لوكي ٢ أوي لأن خلاص الخط الدرامي ده تم تفكيكه وسيستبدل بخط أخى جديد في في فيلم الأفنجرز الجاي .. فالخلاصة يعني انا بقيت بأتعامل مع أعمال مارفل دي كأنها أفلام مقاولات للمتعة المعلبة اللحظة لكن ما بأركزش مع تفاصيلها 

لكن هنا بصراحة لأن الناس جادة بدرجة كبيرة ومهتمين بأنهم يطلعوا منتوج يرقي إلي توقعات الجمهور اللي علي السقف أوي بناء علي المستوي العالي اللي قدمته سلسلة ديرديفيل علي نيتفليكس فكل تفصيلة ليها لازمة 

في أول حلقة لما تم القبض علي "Bullseye" أنا قولت هما كدة ركنوه إلي حين وغالباً مش ح يبقي ليه دور في القصة حالياً أو يمكن دي تكون طريقة لإخراجه من القصة تماماً وإلي الأبد .. لكن لأن الكاتب الشاطر لو بروز تفصيلة في بداية القصة لازم يستخدمها فيما بعد فالكتاب هنا أظهروه في البداية وخلقوا العداء الدامي اللي بينه وبين ديرديفيل وغذوا الموضوع علي مدي الحلقات كل ده كام تمهيداً لدوره المهم في القصة في المرحلة الفاصلة دي .. اللي هي بتنهي أحداث الموسم الأول وبتمهد الطريق نحو الموسم الثاني 

يمكن أنا هنا حابب أتراجع عن حاجة قولتها في الحلقة اللي فاتت أنه "ميوز" هو الشرير الرئيسي للموسم .. ميوز بناء علي أحداث الحلقة دي هو كان شخصية مرحلية مهمة لتطور القصة.. يعني بناء علي الفوضي اللي أحدثها أصبح دلوقتي "القوات الخاصة" بتاعة فيسك متصدرة المشهد وأصبح فيسك زي ما ظهر خلال أحداث الحلقة مسيطر أكثر علي نيويورك وقادر علي قمع الجميع وتضييق الخناق علي كل من يعارضه .. كذلك ميوز كان سبب لعودة ديرديفيل للحياة تاني وح يكون سبب لعودة النمر الأبيض بشكل أو بأخر .. فلذلك هو كان شخصية مهمة لتطور القصة علي جوانب كتير 

الشرير الرئيسي للقصة هو كينج بين وهو الموسم كله تمهيد للظهور الأكثر شراسة ليه وهو أنه مش ح يبقي مجرد رجل عصابات فقط بل هو تحول إلي سلطة بيمتلك سبل عالم جريمة في كف وبيسيطر عليه بقبضة من حديد وفي الكف التاني بيمسك بزمام القانون والسلطة بحيث يحكم قبضته علي كل شئ ويقدر يشرع خروج التابعين ليه عن القانون ويحكم قبضته ويهدد ويدهس كل من يتجرأ علي الوقوف أمامه .. معادلة مفزعة والمسلسل جسدها بطريقة وشكل أقرب لصعود الفاشية .. طبعاً مش جديدة أن السرديات اللي شبه دي هي محاكاة لصعود اليمين المتطرف في الغرب وتحديداً أمريكا وصعود مجرم زي ترامب إلي السدة الحكم وأنه يبقي في أيده كل هذا الكم من الصلاحيات اللي تسهله ممارسة جنونه بكل حرية 

الحلقة اللي فاتت لما قيل لفيسك أن ديرديفيل رجع أبتسم وابتهج بشكل أثار إستغراب اللي حوليه .. المعادلة أكتملت وغريمه الألد عاد للحياة مرة أخري .. فيسك شاف في عودة ديرديفيل تحدي مباشر ليه ورسالة لا تخطئها العين لذلك حب يردها له بقوة بدء يظهر نفسه بقوة ويبين له أن من حوله لازالوا في دائرة الخطر وأنهم قبضته يمكن أن تلتف حولهم بسهولة 

مش سهل برضو كينج بين .. لذلك هو من أشراري المفضلين في عالم مارفل السينمائي .. بناء الشخصية مبهر ويشدك وساعات بتلاقي نفسك بتتعاطف معاه .. لأنه شخصية إنسانية من لحم ودم .. هي دي الكتابة الجيدة فعلاً 

نرجع لBullseye .. يمكن في سؤالين دلوقتي أنا مش لاقيلهم إجابة .. هو كان عايز يقتل فيسك ليه وهو القوة الجديدة اللي أكتسبها دي عبارة عن ايه وحدودها واصلة لحد فين؟ لو طلع اللي في دماغي صح وإنه في نهاية الموسم التالت أتحقن ب X factor زي اللي عند ديدبول و ولفرين اللي بيديله قدرة خارقة علي التعافي وتجديد الخلايا .. فدي ح تبقي نقلة جامدة فشخ للقصة وممكن توديها لسكك كتير جديدة وبعيدة وغير متوقعة منها أن القصة المتحولين و الأكس مين ممكن تتداخل مع عالم الشوارع بتاع ديرديفيل و الديفيندرز في مرحلة ما .. أو أن فيه جهة ما ممكن تكون بتسعي لصنع أشرار بقدرات خارقة زي ما حصل مع أخو لوك كيدج في نهاية الموسم الأول 

وده يرجعني لظهور ابو كامالا خان في الموسم .. في شئ بيعد علي نار هادئة 

الحلقة دي كانت أكتر عن فيسك وبولز اي أكتر منها عن مات .. هروب بولز من السجن والفوضي اللي أحدثها وسيطرة فيسك وتهديده لكبار رجال الأعمال في المدينة للخضوع ليه وتمويل مشروعه خدوا جزء كبير من الحلقة 

الجزء اللي فاضل كان عن ضريبة عودة مات موردوك لشخصية ديرديفيل .. مات رجع للقناع لأسباب كتير منها رغبته في الإقتصاص الحقيقي لصديقه .. بس بص لقي أن الموضوع شبه بينفجر في وشه وأن الموضوع طلع أعقد مما كان يتخيل بل أن كمان في تفاصيل وخيوط كانت خافية عنه .. فوق كدة بيجي تهديد فيسك لحياته عشان يزيد من غضبه وتوتره فبيندفع لمواجهة فيسك و زوجته فينيسا بكل شراسة وتهور .. وضعية مات في القصة حالياً مش أفضل شئ .. الرجوع لحياة القناع لم تكن سهلة ولا كافية .. يبدوا أنه علي عتبات تطور أخر أخطر وأن الأحداث ح تاخد منحي أكثر عنفاً 

خلاص المعركة بدأت ويبدوا أن نهاية هذا الموضوع ستكون أكثر رعباً مما تخيلت .. منتظرون

Daredevil: Born Again - S1, Epi 7

Daredevil: Born Again
S1, Epi 7

هي مسألة مزعجة بالنسبة لي شوية حتة أن الشرير الرئيسي في الموسم أتحرق قبل الموسم ما يخلص وما خدش مساحة واسعة زي ما كنت متوقع .. بالذات أن طريقته وفلسفته عاجبني

بس خلينا متفقين أن القصة موضحة من الأول أن ده شرير ثانوي مؤقت بيمهد للشر الأكبر وهو ما حدث في نهاية الحلقة .. بنهاية الحلقة بدء فصل جديد في القصة وهو عصر سيطرة فيسك علي مدينة نيويورك في العلن وفي الخفاء بأساليب وطرق غير شرعية وبتدي حق التجاوز والقمع لمجموعات تحت شعار "الأمن والأمان" و "المصلحة العامة"

في الخفاء هو رجع لوضعه القديم ك"كينج بين" زعيم الجريمة بمساعدة زوجته وأعوانه بيقضي علي خصومه ويصفيهم وبيجبر العصابات علي الخضوع ليه .. في العلن بيستخدم القوة الخاصة اللي شكلها من أفراد شركة فاسدين للسيطرة علي الاوضاع والقضاء علي ظاهرة الأبطال اللي بيصدر للمجتمع أنها سبب "فساده" وأنها سبب إنتشار الرعب في كل حتة

بكدة يكون الفصل الأول من القصة أنتهي وبدأنا في الفصل التاني .. الفصل الأول كان مرحلة الشك والتردد والبحث عن ميلاد جديد لكل شخصياتنا وابطالنا .. كل شخصية مرت بمخاض صعب لحد ما وصلت للنقطة اللي بقت فيها حالياً .. رحلة روحية الطابع كل شخص فيها واجه ذاته وشبه حدد هو مين وعايز يعمل ايه

المرحلة الجديدة هي مرحلة الشدة والبقاء للأصلح .. المطاردة ح تبدأ ما بين الأبطال من جهة والشرطة من جهة تانية والعصابات من جهة ثالثة والعصابات من جهة رابعة .. ح تبقي حرب مرعبة الكل ح يبقي وضعه فيها علي المحك

البديهي اللي القصة بتجهزله أن ح يبقي في تحالف ما بين الأبطال وبعضهم البعض كما حدث في Defenders .. بس هو لحد الأن البطل الوحيد اللي دوره مؤثر في القصة هو مات ولازالت الشكوك والأزمات بتطارده بالذات أن الخطر لازال يحدق بمن حوله

أما البطل الأخر فهو فرانك كاسل وظهوره كان عابر وواضح أن الخلاف بينه وبينه مات بقي أوسع وكمان لسة دوره في القصة مبقاش فعال .. بقية أبطال العالم ده لازال مفيش أي اخبار عنهم .. فين جيسيكا جونز؟ فين لوك كيدج و داني راند وأصحابهم؟ هل ح يبقي في ظهور لنمر أبيض جديد؟ هل في أي بطل جديد وموجود فعلياً ح يبقي ليه ظهور؟ .. محدش عارف

اللي أنا متأكد منه أن الحلقتين الجايين ح يبقوا من أقوي ما يكون لأني واثق ان الجزء ده ح ينتهي بزلزال مدوي

Daredevil: Born Again - S1, Epi 5-6

Daredevil: Born Again

S1, Epi 5-6 

لا أخفيك سراً عزيزي القارئ أنني لست من محبي ميس مارفل وكابتن مارفل ولا العيلة دي كلها بتاعة مارفلز ولا جو النسوية ده بيجيلي علي سكة .. تمام ممكن قواهم بتعجبني ومش ح أنكر اني أستمتعت ببعض ظهوراتهم لكن الحقيقة هو استمتاع سرعان ما تلاشي مع إكتشاف حقيقة عدم جدوي ولا أهمية هذا الخط في عالم مارفل الواسع الفشيخ ... ولكن 

مهم جداً في المرحلة دي من قصة ديرديفيل ربط القصة بالعالم المحيط بيها .. يعني احنا الاسبوع اللي فات شوفنا أول ظهور لشخصية أخري من العالم السابق بتاع نيتفليكس وهو فرانك كاسل وأظنه لن يكون الظهور الأخير لشخصيات هذا العالم .. تحديداً جيسيكا جونز أظن أن ظهورها قد يكون قريب.. ممكن ما يكونش في الموسم ده بس ح تظهر لأن الأحداث جوها متماشي مع جو المسلسل بتاعها أوي 

في الحلقتين دول تم توثيق الرابط ما بين المسلسل وأعمال ديزني الأخري زي هوك أي اللي ظهر منه الفارس المقنع جوز أم كايت بيشوف .. لا وعرفنا كمان أنه أبتدي يحارب الجريمة بأسلوبه الخاص ... الظهور الأهم في رأيي كان ليوسف أبو كامالا خان .. لأسباب كتير 

علي اولاً ربط ديرديفيل زي ما قولنا ببقية عالم مارفل بالذات المسلسلات .. ثانياً كامالا أصلاً بطلة ليها نشاطات في الشارع زي سبايدرمان و ديرديفيل وإحتمالية لقاءهم كبيرة وأهميته أكبر فلذلك ده كان تمهيد جيد للعلاقة دي .. كمان أظن ديرديفيل ح يبقي ليه دور مهم في المستقبل لما نبتدي نخش في حتة الأكس مين وحتة المتحولين 

بنهاية مسلسل ميس مارفل عرفنا كامالا في التايم لاين ده بتعتبر من المتحولين يمكن عكس الكوميكس .. أربط ده بظهور قوات مكافحة الخوارق اللي ظهرت في شي هالك و ميس مارفل ونسختها الأعنف في مسلسل ديرديفيل اللي أطرحت في أخر حلقة "قوات مكافحة الأبطال" اللي كونها فيسك إلي جانب تاريخ المتحولين الحافل في الكوميكس ضد المجتمع والعنصرية ضدهم .. أظن وجود مات موردوك كمحامي مدافع عن حقوق ووجود الفئة دي من الناس ح يبقي مهم أوي في المراحل الجاية .. ولذلك برضو الرابط والتمهيد دول مهمين والحلقات الأولي من الموسم ده مهمة فشخ 

كمان ظهور أبوها عجبني في  الحلقة لأنه ظهر بعيد شوية عن القالب الكاريكاتيري بتاعه 

الحلقة الخامسة كيفتني أوي لأن ده الشكل القديم أساساً للمسلسلات السوبرهيروز .. كل يوم بتحصل حادثة أو كارثة وكل يوم البطل بينقذ الموقف بشكل مختلف أو بيتقاطع مع عالم الجريمة بطريقة أو بأخري وبيقدر يحل الموضوع وفي الوسط الشخصية بتطور والدراما بتتطور وتتقدم في الخلفية.. لو حد شاف  "لويز أند كلارك" زمان أو حتي الأنميشين بتاع باتمان ح يفهمني .. للأسف لأن مسلسلات ديزني جت في المرحلة اللي عالم مارفل أبتدي يتشعب فيها فتركزت مهمة معظم الأعمال علي تقديم البطل وربطه بعالم مارفل والتيمات بتاعته وده غيب عن معظم الأعمال حتة يوميات البطل ونظرة الناس ليه ودوره تجاه مجتمعه وأن يبقي كل حلقة في عقدة أو مشكلة جديدة وهو بيحلها بمهارته الخاصة .. ما فلتش من اللعنة دي غير موون نايت لأنه ما ربطش نفسه بعالم مارفل أساساً و ركز في قصته وجذور البطل ومغامراته 

الحلقة السادسة كان شبه تتويج لكل التمهيد اللي حصل خلال خمس حلقات اللي فاتوا .. المسلسل بدء بإنتكاسة كبيرة للبطل خلته خد قرار أنه يبتعد عن كونه محارب للجريمة ويرجع يمارس حياته كإنسان عادي نظراً لأنه حياة الظل بتاعته دي بتعرض كل من حوله لخطر داهم وقاتل .. لكنه بصعود فيسك الوضع أتغير .. كل يوم كان بيمر بشكل إختبار صعب لضمير مات موردوك ورغبته في أنه يتدخل لتحقيق العدالة اللي بدأت تتلاشي تماماً 

في التسلسل الأخير للحلقة بنشوف فيسك بيرجع تاني كينج بين الشرس المجرم وأنه قرر خلاص يقلع قناع السياسة ويعالج الامور كرجل عصابات.. علي الضفة الأخري يرتدي بطلنا رداءه الأحمر من جديد ويعود لسابق عهده .. بس المرة دي مات بيبقي أشرس .. أحداث بداية الموسم لازالت تلقي بظلالها علي حياته ويبدو أنه لن يتخلص من تأثير ما حدث بسهولة 

أنا مكيفاني أوي شخصية ميوز دي وطريقته وفلسفته عجباني .. شرير بيفكرني بمجرمين مسلسل هانيبال

Daredevil: Born Again - S1, Epi 4

Daredevil: Born Again
S1, Epi 4

أنا لم أكن مستعداً لأن تكون أول مواجهة بين مات موردوك و فرانك كاسل بهذة القسوة وهذا العمق

الحلقة مشيت علي خطين ع التوازي .. خط مات المحبط اللي زاد إحباطه أكتر مع مقتل هيكتور و رجع تاني لحتة الشعور بالذنب أو هو مكنش سابها أساساً لكنها تعمقت بزيادة .. أصلاً فكرة الشعور بالذنب موجودة عند مات من الأول نظراً لأنه كاثوليكي متدين وده كان واضح أوي في المواسم الأولي .. بداية تحركه تجاه المجتمع كانت نتيجة شعور بالذنب والمسئولية في نفس الوقت لذلك قرر تسخير قواه في سبيل الخير

الموضوع أنفجر لما قابل فرانك .. لحد الأن المسلسل ما فسرش سر إختفاء فرانك بس هو علي حسب كلامه بيراقب شخص ما .. يمكن قصده فيسك؟! مش متأكد

المواجهة ما بين الفلسفتين من أيام الكوميكس لا يمكن إلا أن أشعر بالانبهار أمامها .. فرانك كالعادة مؤمن بعجز العدالة وأن تصفية الجريمة واكتثاثها هول الحل بينما طبعاً مات مؤمن بالعكس وقد أيه أن العدالة هي الحل .. بس مات حالياً في موقف ضعف مش قادر يدافع عن فلسفتها لأنه كمان من جواه حاسس بالعجز .. العجز عن حماية من حوله وعجزه حتي القصاص ليهم بشكل ناجز .. جواه بركان لا يهدئ

نفس الوضع ينطبق علي فيسك لكن بحالة مختلفة .. فيسك حصله أقذر شئ ممكن يحصل لإنسان في الدنيا وهي حتة الخيانة الزوجية .. ضيف علي ده كونه زعيم مافيا و رجل بيحب مراته لدرجة الجنون فالموضوع برضو أشبه بالبركان اللي علي وشك الإنفجار

فيسك بيحاول طول الوقت يبقي سياسي ويطلع عباءة رجل العصابات لكن الموضوع شبه مستحيل .. لأنها غريزة رباها فيه أبوه وهو طفل وإنتزاعها موضوع مش سهل بالمرة .. زي ما هو قال أبوه علمه كل ما هو قاسي وجاد في الحياة لكن لم يعلمه الغفران ولا اللين .. فينسا حاولت تعمله ده ونجحت لبعض الوقت لكن مع الخيانة الأمور خرجت عن السيطرة

في أخر الحلقة الاتنين بيعودوا لزيارة ذواتهم القديمة .. أظن الصراع ح يرجع يحتدم من الحلقة القادمة بالذات مع ظهور الشرير الجديد وبرضو ظهور بنت أخو هيكتور اللي في الكوميكس بتورث منه قناع النمر الأبيض

الحلقة كيفتني وكيفني جرعة الدراما المكثفة اللي فيها .. وفي إنتظار القادم

Daredevil: Born Again - S1, Epi 3

Daredevil: Born Again
S1, Epi 3

يمكن إستخدام المجاز قوة الرمز والأفكار اللي بتتجلي مما بين السطور كانت ولازالت من أهم السمات المميزة لديرديفيل من وسط عاصفة الأعمال الدرامية اللي أولد ما بينها .. لما ظهر ديرديفيل كان في نفس الوقت مسلسلات سوبرهيروز كتير مالية المشهد بس مكنش فيه عمل ممتع وعميق ومتقن بنفس درجة المسلسل ده غير يمكن عملين من اللي أنتجتهم نيتفليكس وقتها وبعد كدة "ذا بويز" وبعض الأعمال الأخري اللي بالمناسبة تأثرت بشكل أو بأخر بالحالة اللي خلقها عالم نيتفليكس وقبله عالم مارفل

هنا في الحلقة بنستكمل السردية اللي بدأت في أول حلقتين .. الصراع

لازال الصراع داخل نفس مات موردوك متأجج كالبركان .. فيقوم المخرج عامل أيه عشان يعبر عن الصراع ده بشكل ذكي؟! .. يطرح ده علي هيئة محاكمة .. وكأنه بيحاكم ذاته

لو حد خد باله من المرافعتين بتوع مات وبتوع محامي الشرطة ح نشوف طرح واضح لوجهتي نظر متقابلتين فيما يخص السوبرهيرو .. مات مكنش فقط بيترافع عن موكله المتهم زوراً بقتل الشرطي واللي صادف أنه أحد هؤلاء الأبطال المقنعين.. لا ده زي ما يكون ذاته بتدافع عن نفسها قصاد المجتمع وقصاد الأنا الخاص بيه .. وكان ديرديفيل أنسلخ عن مات وأصبح ذاته أخري بتدافع عنه نفسها قصاد ذات موردوك اللي بتحاول تنفيها بكل قوة

مات لما حاول يدافع عن موكله فطرح علي الطاولة الجانب الأخر الخفي من حياته .. النمر الأبيض .. وطرح كيف رأه المجتمع والشرطة والإنسانية وأزاي هذا المتهم زوراً بكونه خارج عن القانون كان سبب في تحقيق العدالة ورفع راية الإنسانية في أكتر من مناسبة .. الكلام ده مش بيفكرنا بحاجة؟!

في المقابل محامي الخصم بيطرح وجهة نظر مقابلة بتري أن البطل الحقيقي مش محتاج أنه يرتدي قناع وأنك ممكن تساعد المجتمع بدون ما تخفي هويتك .. برضو الكلام مش بيفكرنا بحاجة؟!

الأفكار اللي بتدور في عقل مات طول الوقت .. مضاف إليها رؤية جانب من المجتمع للأبطال وأن البطل غير معصوم من الخطأ بل ممكن البطولة تدفعه دفعاً نحو هاوية الخطيئة

المحاكمة كانت ملحمة درامية ممتعة للغاية وعميقة بشكل كبير أوي

في المقابل فيسك لازال برضو الصراع بيتأجج داخله .. لكن في ظني علي نهاية الحلقة هو حسمه بشكل كبير .. لصالح المجرم طبعاً

ايه سر ظهور جمجمة "بانشر" في أكثر من مشهد وليه في أفراد شرطة عملينها تاتو؟! وايه سر المجرم اللي ظهر في أخر الحلقة ولابس درع بانشر اللي عليه الجمجمة؟!

يبدوا ان الحلقات الجاية ح يبقي فيها ظهور رايق لفرانك كاسل .. شخصيتي الأكثر تفضيلاً في عالم مارفل علي الإطلاق .. انا منتظر بشغف ❤

Dragon Ball Daima

Dragon Ball Daima
Epi 1-20 Finale

وأنا بأسمع المقدمة بتاعة المسلسل ده كنت بأحس أن دي الرسالة الأخيرة من أكيرا تورياما لينا كأبناءه وأصدقاءه اللي خاضوا معاه الرحلة علي مدي أكثر من ٤٠ سنة .. هو كان أشبه بالحاوي اللي العيال بتمشي وراه .. رحلة ممتدة لسنين وسنين ومشوار لم يوقفه سوي القدر .. وطول ما الحاوي ماشي بيضم عليه أطفال جداد والمسيرة بتستمر

حسيت في الأغنية أنه بيقولنا يا أبنائي الأعزاء يا من خضتم معي غمار هذة الرحلة الطويلة علي مدي هذة السنين .. هيا بنا في جولة أخيرة ورحلة جديدة نستكمل بها قصتنا الملحمية قبل الرحيل الأبدي عن هذا العالم

فعلاً موت تورياما بعد إتمامه هذا العمل خلي في نوع من المشاعر الجياشة جوا الواحد وهو بيتفرج .. الرجل جاي يقول كل اللي عنده قيل ما يمشي .. بس هل هو قال كل اللي عنده؟! سؤال يطرح نفسه

في أخر ١٠ سنين تورياما كان شبه بيعمل مراجعات ذاتية للي عمله زمان .. فهو بيصحح بعض أخطاء الماضي اللي ارتكبها في القصة وبيكمل بناء علي اللي عمله زمان .. ده كان باين أوي في دراجون بول سوبر اللي مش بس صحح فيه كتير من الأخطاء بل كمان ضخ فيه دماء جديد بالشباب اللي ولاهم أمر السلسلة حالياً واللي مكملين بعد حتي موته

هنا هو عمل ضربة مزدوجة ضرب بيها عصفورين بحجر

أولاً رجع ووضح جانب مهم في القصة كان هو رمي له كدة إشارات عابرة في أرك ماجين بوو بس ما أهتمش يوضحه وهو حتة عالم الشياطين والسحر في القصة .. السحر موجود في عالم دراجون بول وتجسد في أشكال كتير وكذلك الشياطين والعفاريت لكن لا حد شرح هما جم منين ولا أهتم يركز علي جذورهم .. والله أعلم هو الرجل كان عنده فكرة وتصور لحتة عالم الشياطين ده بس لسبب ما مكنش عنده رغبة في تنفيذ أي مشروع خاص بيه .. يمكن كسل أو يمكن ضغوط شركات الإنتاج.. مش متأكد ولا عندي معلومة الحقيقة

ثانياً لو حد خد باله الجزء ده عبارة عن محاكاة لأحداث "دراجون بول جي تي" بس بأسلوب وفلسفة تورياما وكمان برابط وثيق أكتر مع أحداث الخط الزمني الأصلي لدراجون بول .. أزمة جي تي طول الوقت أنه بيعامل كفيلر لأنه برة المانجا وكمان المؤلف بتاعه مكنش تورياما إلي جانب أن أحداثه وجودته ما كانوش بالقوة المنتظرة لكن كان دايماً بيشار إلي أن فيه حبة نقط مضيئة في العمل -زي السوبر سايان ٤ مثلاً- طول الوقت الفانز كان نفسهم تدخل ضمن الخط الزمني الرئيسي وما تبقاش فيلر

هنا المسلسل شبه بيعيد سرد أحداث جي تي بس في قالب جديد أكثر ارتباطاً بالقصة اللي هو كتبها .. وده ما أقدرش أشوفه غير نوع من الاحترام والتقدير من الرجل لصناع جي تي والمشروع ككل كان اتقال كتير أنه بيكرهه وما بيعترفش بيه

أضيف كمان أن المسلسل شرح شوية حاجات ووضح حبة نقط كانت غامضة طول السنين اللي فاتت زي ليه فيجيتا ما وصلش للسوبر سايان ٣ وعلاقة الناميكيين بالشياطين .. هو اساساً المسلسل جاي عشان يريح الناس ويوضح النقط اللي تورياما كسل أو نسي يوضحها زمان

نرجع للسؤال .. هل تورياما قال كل اللي عنده؟! .. الإجابة لا .. بل كمان كرر نفس غلطات الماضي

يبدوا ان الرجل نفسه هو ده أسلوبه وطريقته .. يبني أحداث جامدة جداً وبعدين الموضوع بيسيح منه فبيلمه بشكل يعني لذيذ بس بيسيب وراه أسئلة وخيوط مقطوعة كتير

يعني مثلاً انا كان ظني أن ح يبقي في حرب متعددة الأطراف ما بين جوكو والجماعة وملك الشياطين و السبريم كايز وح يبقي في كذا معركة وتحالفات وخلافات وتحديات واعتقدت أن الرجل الناميكي العجوز ده ح يغدر بجوكو والجماعة في مرحلة ما وأن ح يبقي فيه اكشن كتير .. القصة كانت تحوي بكدة لحد ما وصلوا لقصر الملك وفجأة الدنيا أتقلبت وبقي الهدف هو القضاء علي الملك وكل المؤامرات بقي تفسخت والخيوط تلاشت وفجأة بقي كل عناصر القصة ضد الملك وبس علي كدة

حتي تحول الشخصيات مكنش مقنع لأن مكنش فيه مساحة حلوة للشخصيات أنها تعبر عن ذاتها وجذورها.. ده غير أن في حلقات مكنش ليها اي لازمة ولا داعي وكمان تحدي الحصول علي الثلاث كرات مكنش بالقوة اللب تم التمهيد ليها في أول القصة .. أنا في البداية اعتقدت أن المهمة شبه مستحيلة لكن بعد كدة لاقيت الموضوع مش بالصعوبة اللي تصورتها

علي فكرة دي حاجة متكررة في شغل تورياما وعيب متكرر في شغله .. بيعرف يعمل شخصيات قوية ومعارك مذهلة وتحولات تشد بس في النص الخيوط الدرامية بتتفسخ منه

اللذيذ بقي بعيد عن القصة دي اني حسيت تورياما بيحاول يعمل حاجة تبع دراجون بول فيها روح العاب ال "أر بي جي" بمغامراتها وعالمها الواسع المتنوع .. زي ما يكون كان عايز يعمل دراجون بول بروح  "دراجون كويست" .. اللي لعب اللعبة دي وشاف شغل تورياما فيها و جوها ح ياخد باله من اللي بأقوله

المعركة الأخيرة كانت ملحمة الحقيقة وحبيتها للغاية .. وكأنها مسك ختام لرحلة تورياما مع الرسم والمانجا ومعانا ومع الحياة

وداعاً يا سيد تورياما 💔🙏

Daredevil: Born Again - S1, Epi 1-2

Daredevil: Born Again
S1, Epi 1-2

أمتي كانت أخر مرة حد حد فيها أهتم بعمل تلفزيوني من إنتاج مارفل؟!

أظن من أيام موون نايت أو يمكن لوكي ٢ ما بقاش في حد عنده القدرة علي إحتمال العك اللي كانت بتمارسه مارفل واللي خرج من نطاق المسلسلات وسرح علي الأفلام كمان

أظن فيلم ديدبول السنة اللي فاتت والمسلسل ده السنة دي أقرب إلي طوق نجاة بينقذ الوضع المتهالك لهذا العالم وبيحاول يعيد بناء جسور الود مع الجمهور من تاني

---

مش قادر أفصل ما بين أحداث بداية المسلسل ده وصعود ترامب والتطور الهزلي اللي وصله الوضع العام في أمريكا مؤخراً .. طبعاً المسلسل مكتوب ومتخططله من مدة طويلة فهي جت صدفة برضو بس أولاً كان في مؤشرات كتير لعودة ترامب في الفترة الأخيرة وثانياً "حالة ترامب" اللي بدأت من ما يقارب من ١٠ سنين دلوقتي وما صحبها من صعود لنجم متطرفي اليمين والنازيين الجدد أصبح تجسيدها في ال Fictional Drama 

تريند ثابت ومتكرر بل وفي إقبال عليه زي في The Boys كمثال

فكرة ان مجرم عتيد يوصل لمنصب سياسي مهم والصراع يتحول من صراع ضد الجريمة والشر التقليدي لصراع ضد المنظومة والقانون اللي بتتحكم فيهم قوي الشر وبتفتح بيهم مساحات غير معتادة للإجرام وبتقوض قوي محاربة الجريمة بل وبتحولهم إلي مطاردين وخارجين عن العدالة دي فكرة أتعالجت كتير في الكوميكس لكنها لم تظهر علي الشاشة في ظني أبداً

أجمل ما فيها أنها فكرة برة الأنماط المعتادة لقصص الأبطال الخوارق وبتفتح مساحة للجدل حولين مفهوم الخير والشر والعدالة والصواب وطرق تطبيقهم

أصلاً الفكرة نفسها مربكة واللحظة دي بتبقي لحظة شك قاتل .. اللحظة اللي بينتصر فيها الشر بشكله التقليدي أو بيقفز قفزة للأعلي تخليه المتحكم بخيوط اللعبة وبيعاد فيها تعريف أو صياغة المفاهيم  فاللي كان بطل بقي مجرم واللي كان مجرم أصبح مطبق للقانون وراعي للعدالة .. لحظة لخبطة وجدل واسع عام وداخلي لكل المتورطين في هذا الفخ سواء بمزاجهم أو مجبورين

وهو شك متماشي أوي مع أجواء "ديرديفيل" اللي في الأساس مؤمن ملتزم لكن الشكوك بتطارده طول الوقت وحربه مع الجريمة بتفجر جواه حرب مع ذاته

المسلسل بيبدأ بالحتة دي .. بيبدأ من حيث أنتهي في الموسم الثالث علي نيتفليكس .. "مات موردوك" بيتعرض لهزة عنيفة في حياته أشد من كل ما سبق بتشقلب حياته تماماً وبتدخله في دوامة من إنعدام الوزن والثبات .. يبان من برة أنه قوي وصلب لكن الحقيقة اللي بنشوفها في أكتر من مشهد أنه من جواه بيصارع ذاته وشياطينه ورغبته في تحقيق العدالة وخوفه من أنه يسبب أذي لمن أحبوه .. بيزيد الموضوع والجدل صوته بيعلي مع صعود "ويلسن فيسك" لقمة الهرم جنباً إلي جنب مع صعود نجم الجريمة وتغلغلها بشكل سرطاني جوا المنظومة نفسها

ويلسن نفسه بيعيش صراع مشابه داخل ذاته ما بين الجانب الاجرامي من شخصيته وما بين صفته الجديدة كمسئول وما  بين الجانب الإنساني جواه اللي برضو بيتعرض لهذة عنيفة ممكن تؤدي إلي تحول دراماتيكي أعنف للشخصية

أنا لحد الأن سعيد ب٣ حاجات بعد طبعاً عودة المسلسل .. أولاً سعيد بالمستوى اللي وصله المسلسل بصرياً وسينمائياً .. لا حقيقي الصرف باين وبان كمان مدي فقر الإنتاج بتاع نيتفليكس مقارنة بشغل ديزني 

ثانياً سعيد بأن المسلسل بني علي اللي فات واننا ابتدينا من حيث انتهينا حرفياً وسعادتي ح تزيد لو بقية شخصيات العالم ده رجعت بالتوالي واللي تم الإشارة لبعضها في الحلقتين .. وح ابقي سعيد فشخ لو العنكبوت وعالمه تداخلوا مع العالم ده وبرضو ح ابقي سعيد لو العالم ده تداخل أكتر مع العالم الأكبر بطريقة أو بأخري

ثالثاً سعيد أنه ما طلعش عمل فارغ أو مهلهل وغير مفيد زي حاجات كتير كانت واعدة وفكست .. لحد الأن .. وأنه لون جديد و روح جديدة في عالم مارفل يمكن مفيش حاجة جت شبها قبل كدة .. وأنه لا أجندة ولا في خطابية من بتاعة الصوابية .. برضو حتي الأن

المشكلة بس الوحيدة اللي قابلتها يمكن في مشهد المعركة الأولي كان شوية كارتوني والجرافيك مش أفضل شئ بس جميل برضو

الأجمل أن المسلسل زي ما هما قالوا Soft reboot 

... فعلاً Born Again

وكأن ديرديفيل بيتولد من جديد .. أحنا أه معترفين باللي حصل قبل كدة وبالشخصيات اللي ظهرت في السلسلة قبل كدة وبنبني عليها بس البناء لعالم جديد بصراعات وشخصيات وقصص جديدة وشكل أوسع ومتطور أكتر

أنا متكيف ومنتظر الحلقة الجاية بشغف