S9, Epi 1-24 "The End"
عادة إنتهاء الأعمال اللي الواحد أرتبط بيها عاطفياً وانسانياً بيخلق في النفس حالة من الفراغ والحزن .. أنا شخصياً نظراً لأني بأتعلق أوي بشخصيات الأعمال بالذات اللي فيها جزئية الأسرة والشلة دي فبيكون فراق هذة الأعمال ولحظة النهاية صعبة عليا شوية .. مش حزن علي ما هو إفتقاد لعالم موازي الواحد تعلق بيه وكان نفسه يبقي جزء منه
لكن هنا الوضع مختلف .. المسلسل سابني في حيرة وحالة تفكير عميق .. بأحاول أحكم علي العمل اللي أتعلقت بيه لمدة سنة من حياتي وبأحاول أبلور فكرة أو حتي إنطباع حولين النهاية
خلينا نبدأ من الأخر للأول .. هل النهاية دي حلوة؟!
انا شخصياً بأكره الحكم علي الاشياء بحتة حلوة ووحشة دي لأنه ميزان غبي للحكم وطريقة مغرقة في السطحية للنظر للأمور .. بس خليني أقول أن تيد كان يستحق أفضل من كدة و روبين لا تستحق هذة النهاية السعيدة
تيد علي مدي مواسم المسلسل كان بيبني علي أنه الشخص النيرد قليل الخبرات اللي بيتعلم المعني الحقيقي للحب والسعادة الحياة المستقرة وبيفهم أكتر عن نفسه وعن العالم من حوليه من خلال رحلته في البحث عن شريكة حياته أو حب حياته .. سردية كلاسيكية أوي رسخها المسلسل عبر مواسمه التسعة وتجلت في التطور والتغيرات اللي حصلت في شخصية تيد وأنعكست علي أختياراته وتصرفاته بالذات في الفصل الأخير من القصة .. رحلة الإنسان من الجهل والعتمة للمعرفة والنضج والخبرة .. وكأي سردية كلاسيكية كان بديهي أن هذة الملحمة تنتهي نهاية سعيدة .. علي الأقل تراضي الواد الغلبان اللي حفي وأتبهدل طول المواسم دي كلها .. لكن هل روبين كانت هي العوض أو النهاية السعيدة الحقيقية المستحقة؟!
روبين هي النقيض التام لشخصية تيد .. هي أقرب لأنها تكون شرير القصة .. شخصية بتعاني من ترومات طفولة نتيجة التربية القاسية والمعاملة السيئة من قبل والدها اللي كان بيعاملها كرجل وبيجبرها تنفي أنوثتها .. روبين في الجزئية دي من شخصيتها وفي تفاصيل تانية زي أنها ما بتخلفش وحياتها كانت مليئة بالوحدة تجبرك أنك تتعاطف معاها .. هي في جانب كبير من حياتها مسكينة وضحية لظروف سيئة حولتها لشخصية قاسية وعندها هواجس ومخاوف من حاجات كتير علي رأسها العلاقات .. ولكن
لكن كل ده لا يبرر كم السمية اللي بتتمتع بيها الشخصية دي .. كذلك لا يبرر فكرة أنها لم تتطور ولم يتغير طبعها علي مدي ٩ سنين ويمكن أكتر .. هي أصلاً معندهاش دافع ولا رغبة في تجاوز ترومات الطفولة وأثارها علي شخصيتها بل بالعكس هي متماهية مع الحالة دي لدرجة الانمساخ وبتستخدمها كمبرر لتصرفاتها السخيفة والإجرامية في بعض الأحيان وكأداة لأستدرار عطف الأخرين
أنا أصلاً كان عندي مشكلة مع فكرة أن الكاتب قرر يحطها في علاقة عاطفية مع بارني .. أظن هو نفسه كان عنده مشكلة مع الفكرة ولذلك قرر يحلها بطريقة مبتكرة في نهاية المطاف .. أنا كان رأيي أن بارني كان لازم علاقته بالبنت الستريبر أو البنت "نورا" تنجح أو تاخد فرصة تانية .. لأن بارني الوجه المقابل لروبين .. إنسان عنده ترومات طفولة وعقدة إنكار وفوبيا من المشاعر والعلاقات لكن مع الوقت بيعالج المسائل دي وبيتغلب عليها بطريقة أو بأخري .. أينعم هو لم يتغلب ١٠٠% علي مشاكله وبرضو المصير اللي وصله جه مطلسق وبطريقة فيها كسل في الكتابة وتطوره الأخير لم يكن بهذا الإقناع لكن علي الأقل أنا مقتنع بأن هذة الشخصية طيبة وتستحق فرص أفضل.. لكن روبين لا
لذلك لو رجعنا لسؤال هل روبين تصلح أنها تكون النهاية السعيدة لتيد؟ الإجابة لا لا لا
لأن كدة بكل بساطة القصة تحولت من رحلة تيد نحو النضج وفهم الحياة واستعياب مفاهيمها ومعانيها والبحث عن الحب الحقيقي إلي كيف تكون علق من الشباب حتي الشيخوخة!
النهاية المثالية في رأيي كانت تتجسد في وصوله لمحطة "ترايسي" اللي هو الحب الحقيقي اللي مش ح يلاقي زيه تاني باقي حياته .. عشان كدة برضو انا حزين أن مساحتها علي الشاشة لم تكن كبيرة وان تطور علاقتها ب"تيد" مخدش حقه في السرد .. جه علي هيئة مقتطفات بينما أحداث الموسم الأخير ضاعت في الهجص وقصة الفرح اللي ما كانتش تستحق كل هذة المساحة واللي كان ممكن تبقي أفضل بمساحة أقل علي الشاشة .. لأن حتي الخطوط الدرامية اللي جواها ساحت في لحظة ما وأتدمرت زي قصة خلاف مارشل وليلي اللي قعد يتبني علي مدي حلقات ثم أنتهي بشكل ساذج أوي
الموسم مكنش موفق بالمرة وكان محتاج يعاد كتابته من أول وجديد لأنه للأسف ما اداش للجمهور المخلص النهاية اللي كانوا منتظرينها ولا تجربة مشاهدة دسمة ومريحة نفسياً لأخر موسم من مسلسلهم اللي فضلوا متعلقين بيه لمدة طويلة أمتدت علي مدي ٩ سنين
لكن في رأيي رغم أن الموسم ده كان ملئ بالأخطاء الا أنه في الوسط كان فيه نقاط مضيئة فكرتني ليه انا حبيت المسلسل ده من الأول
تركيزهم بالذات في الموسم ده علي التباين ما بين شخصية الإنسان في مرحلة الشباب وشخصيته في الكهولة والشيخوخة كانت عبقرية أوي ويمكن ده أكتر خط أتكتب حلو في الموسم .. لأن المرحلة اللي وصلها أبطال المسلسل في النهاية انا بأمر بيها حالياً لذلك أنا فاهمهم فاهم فكرة الكاتب والمخرج ١٠٠% .. رغم أن الواحد في مرحلة الشباب الأولي بيكون كبر وممكن يكون دخل في معتركات زي العمل أو العلاقات الجادة الا أن آفة الشباب هي مسألة قلة الخبرة اللي بتؤدي في أحيان كتير لأن الإنسان ينجر إلي أختيارات خاطئة وتصرفات كارثية ممكن تأثر علي مسار حياته كله للنهاية .. الواحد بينتبه لأنه كبر لما بيتعلم من أخطاء الماضي وما بيكررهاش ولما بيقدر يتحكم في رغباته ومشاعره حتي لو ده سببله ألم أو ندم فيما بعد
أنا حبيت تيد أوي في الموسم ده علي عكس باقي المواسم رغم انه فضل في ذاته رواسب كتير من كوارثه السابقة الا أنه لما اتحط في الاختبار الصعب اللي كنت متوقع انه ح يتصرف فيه بغباء وتهور كالعادة فاجئني وأتصرف بعقل وشرف غفروا له كل اللي عمله قبل كدة .. هو ده النضج
كمان حتة أننا مجرد مراحل في حياة بعضنا البعض دي للأسف حقيقة قاسية انا ما باحبهاش لكنها واقع .. كتير بيرجع بيا الزمن لمجموعات وأكتر من شلة قضيت معاهم أوقات رائعة لكن الزمن حال بيننا .. دايماً بيبقي في جوا نفسي أمل للقاء ثاني وتجمع أخر وان ايام زمان ترجع تاني .. بس الحقيقة أن ده غالباً لن يحدث لأن دي سنة الحياة .. كلنا مجرد مراحل في حياة بعضنا ولازم نتعاطي مع ده بكل أريحية لكن ما يحي هي الذكريات والود
---
في المجمل أقدر أقول أن المسلسل ده هو يمكن أكتر مسلسل متماسك ومكتوب كويس في الأعمال اللي اطلعت عليها حتي الأن .. هو التطور الطبيعي لساينفيلد وفريندز بس هو ميزته بالنسبة لجيلي واللي بعدي أنه بيحكي عن حياتنا وواقعنا الحديث .. عصر ما بعد الأنترنت ووجود ظواهر زي المواعدة عن بعد وتأثير التكنولوجيا وثورة الاتصالات علي حياتنا .. وهي معاني وأفكار بيفتقدها المسلسلات سابقة الذكر لأسباب زمنية .. فالدراما هناك لسة واقعة في شبح التسعينيات ذو التكنولوجيا الأقل وتعظيم لفكرة التواصل المباشر علي حساب التواصل عن بعد وهكذا .. مش زمنا ولا حياتنا
كمان هو في رأيي أعرف مسلسل في اللي شفتهم .. رغم أن التانيين دمهم خفيف بس بأحس الشخصيات هنا حميمية أكتر ومكتوبة أحسن وده بيخليك تقدر تتفاعل معاهم أكتر
يعني شخصية زي بارني المسلسل الأول طرحها بشكل غامض ثم فضل يحل في اللغز بتاعها حلقة بعد حلقة بشكل خلق رابط وثيق بينها وبين المشاهد خلاك حاسس انها شخصية من لحم ودم مش مجرد بلياتشو جاي يضحك وخلاص .. ولذلك لحظاته الدرامية كانت مؤثرة جداً والخط الدرامي بتاعه كان المفضل عندي في أكتر من موسم
انا ح افتقد المسلسل ده أوي وأظن ح ارجع أتفرج عليه تاني في المستقبل من جديد
ليست هناك تعليقات:
إرسال تعليق