Dante Demon Lord "Manga"

Dante Demon Lord
Ch 1-26 End

في رحلتي للغوص في الماضي البعيد وقراءة الأعمال القديمة التي لطالما قرأت عنها وكنت شغوف بخوض تجربتها كان لابد أن يكون لي وقفة مع جو ناجاي

كيف لا وهو الرجل الذي بسببه في الأساس تعلقت بالأنمي وصار ومعه المانجا جزء لا يتجزأ من ذوقي وثقافتي .. فعبر بوابة مازنجر دخلت هذا العالم الواسع ولم أخرج حتي الأن

لما فُتحت شهيتي للمانجا حطيت كدة كام عمل كتارجت لازم اقراهم ولو بعد حين ولو خدوا من الوقت ما خدوا .. كان من ضمنهم بل وعلي رأسهم أعمال جو ناجاي .. لأني بصراحة بتعجبني أفكار الرجل ده وستايله العنيف الظلامي في الرسم وقصة الغريبة لكنها عميقة وحكيمة

في البداية كنت ح أبدأ ب"الرجل الشيطان" أو "جاك العنيف" بس بالصدفة قابلت "دانتي" وافتكرت اني كنت محمل المسلسل بتاعه زمان لكن ضاع مني قبل ما أشوفوا كمان قرأت أن المانجا أفضل من الأنمي وتعتبر هي الرحم اللي خرجت منه كل أفكار الرجل الشيطان ومازنجر وجريندايزر .. وقد صدق من كتب

فعلاً وانت بتقرأ وبتتأمل الرسومات تحس أنها المخطوطات الأولية لأعماله اللي جت بعد كدة من شكل الشخصيات وتصميم الوحوش وحتي القصة والأفكار اللي فيها.. وهي تختلف شوية عن أعماله السابقة عليها اللي كانت كوميدية وفيها كم من البذاءة والإباحية يخليك ما تاخدش القصة علي محمل الجد

يعني كمثال فكرة الألي ذو الأسلحة المتعددة ظهرت هنا بوضوح في النهاية .. فكرة قيادة العملاق من الرأس .. الغزو الفضائي .. الصراع ما بين الشياطين والألهة.. أفكار كتير من اللي أتكررت بعد كدة في أعماله الأشهر

أينعم القصة مختصرة شوية وحبكتها مش قوية أوي بسبب القفزات والرتم السريع للأحداث لكن الفكرة نفسها والأطروحة اللي بتطرحها القصة اللي بتقلب فيها موازين الكون وبتعكس السردية الأشهر في الصراع ما بين الخير والشر وأنها بتحول الشيطان لبطل في حبكة كدة خيالية شاطحة شوية لكن جميلة

القصة فيها كمية تأثر خطيرة بالتراث الديني البوذي في فكرة تناسخ الأرواح وشكل الألهة والإبراهيمي وده مستحضر من العامل الأساسي المؤثر في القصة وهو الكوميديا الإلهية لدانتي .. هو الحقيقة جاب من كل حضارة وتراث قابله حاجة بس كان مركز أوي علي التراث الإبراهيمي في تسميات الملائكة وشكلهم وشكل الشياطين

زي بعد كدة في معظم أعماله جو ناجاي تيمة المقاومة ثم تيمة رفض الحرب والسأم من الدمار مسيطرة علي جزء كبير من القصة .. فرغم كل الأحداث المشتعلة الا أن نهاية القصة كانت سلامية اوي والصراع حسم رغم كل الحرب اللي دارت بالتفاهم وتنازل طرف من الأطراف في النهاية

شخصياً القصة كانت ممتعة بالنسبة لي بشكل كبير واجواءها كانت جذابة وبوابة جيدة للدخول إلي عوالم جو ناجاي بالذات اني عندي نظرية كدة وهي أن قصة دانتي بتدور في نفس الكون الخط الزمني اللي بتدور فيه أحداث الرجل الشيطان وجاك العنيف وهما إختياري القادم إن شاء الله .. فلذلك قراءتها كانت لازمة 

Mob Psycho 100: Finale Season

Mob Psycho 100

S3, Epi 1-13 End 

مش غريبة بالنسبة لي أن لما "أي جي أن" –وهو الموقع اللي بقي ليه أعتباره نوعاً ما حالياً في عالم الأنمي والترفية عامة- ضمن أحدي مقالته المثيرة للجدل واللي كانت عبارة عن قائمة بأفضل 25 عمل في التاريخ حط "موب سايكو 100" في المرتبة رقم 6 .. وهو حاجة كانت صادمة أوي للبعض بالذات اللي ما شافش المسلسل لكن بالنسبة لي شخصياً كانت حاجة عادية بالنسبة لعمل بهذا الثقل وهذة القيمة

أول مرة أتعرض فيها موب كان بعد أقل من سنة من عرض "ون بانش مان" لنفس المؤلف .. وقتها كانت كل الناس منتظرة العمل اللي ح يبقي شبه ون بانش والقصة دي كلها .. بس اللي حصل أنه لقوا حاجة مختلفة تماماً .. نفس البداية وهي أن البطل عندها طاقة وقدرات شبه مطلقة لكن القضية والقصة مختلفة وإن تشابهت مع الأخري في بعض النقاط

في القصتين حرب البطل الأساسية بتكون مع ذاته .. حتي مش غريبة أن المعركة الأخيرة لموب في السلسلة تكون مع قواه واللي يحاولوا يوقفوه هما أعداءه ومنافسينه السابقين .. الإختلاف الجوهري بين موب وسايتاما أن موب بيحاول طول الوقت انه يعيش بشكل عادي وينكر قواه .. وده اللي أدي بقواه وذاته انهم ينفجروا في نهاية القصة

بأحس قصة موب اقرب للسيرة الذاتية للكاتب نفسه .. المسلسل معظم الوقت بيعالج مشاكل وقضايا حياتية كتير منها متعلق بعالم المحيط بالإنسان وبرحلة النضج من الطفولة إلي الرشد .. المسلسل تناول الغيرة والخوف والخرافة والإيمان والصداقة والخير والشر .. كل ده في قالب كوميدي ملئ بالأحداث الساخنة والحركة والقوي الخارقة لكنه لم ينغمس في الخيال بحيث يحيد عن فكرته وهدفه الأساسي .. فهو في رأيي عمل جاد وعميق لكن بيستخدم قوالب وأدوات هزلية وساخرة ومليئة بالحركة للتعبير عن فكرته

التوازن الكبير ما بين كوميديا المسلسل وجودة التحريك والرسم وقوة القصة وعمق الفكرة خلي المسلسل في حتة تانية خالص .. رغم أنه لحد الأن مخدش حقه في الشهرة الا أني أظن بوصوله إلي المحطة النهائية ح يعاد النظر إليه ويعاد تقديره كما يجب أن يكون 

فعلاً في رايي المسلسل ده من أعظم إنتاجات الألفية .. ما قابلتش حاجة بالعمق ده ولا بالإتقان ده يمكن من ساعة ما شوفت إيفانجليون .. لا وزاد وغطي أنه دمه خفيف جداً .. ح أفتقده جداً والله

Mob Psycho 100: S2

Mob Psycho 100

S2, Epi 1-13 Finale

ليه Mob Psycho 100 هو من أفضل الأنمي اللي أنتج في 2019 بل قد يكون الأفضل؟ وليه هو من أهم المسلسلات في الألفية التانية؟

طيب عشان بس اللي ما شافش المسلسل قبل كدة فهو مانجا من إبداع الرسام "ONE" وهو نفس الشخص اللي أبتكر One Punch Man صدر له موسم أول ناجح ورائع في 2016 ثم تم إنتاج موسم تاني أروع ليه صدر في يناير الماضي .. قصة بتدور حولين الطالب "كاغياما" اللي بيمتلك قدرات روحانية خارقة لكنه في ذات الوقت شخص خجول وطيب بيرفض إستخدامها في أي أعمال شريرة وبيشتغل مع وسيط روحاني "نصاب" بيوهمه أنه بيساعده علي إستخدام قواه بشكل صحيح الا أنه بيستغله من أجل الربح لكنه بيحبه وبيعمله دروس حياتيه مهمة

نرجع لسؤالنا .. الإجابة بكل بساطة كالأتي .. موب سايكو يعتبر من أنضج وأظرف القصص الموجودة في عالم الأنمي حالياً .. العالم بتاعه كله مبني علي الفانتازيا من الألف للياء وفكرة الأشباح والأرواح والقوي الخارقة لكن المسلسل مع ذلك كل مدي بيحاول أنه يبقي "واقعي" وينتصر للواقعية عن طريق قصة فانتازية لذيذة .. يعني في الحلقة التانية من الموسم ده الكاتب فكك فكرة الإشاعة والخرافة بشكل عقلاني للغاية وقدر عن طريق المغامرة الخيالية للبطل من أنه يناقش قضية واقعية ويعالجها بشكل واقعي دون الإرتكاز علي الخيال أو إستخدامه لحل المشكلة كأن العقل عاجز يعني عن حلها

علي هذا المنوال الحلقات كلها بتدور .. مناقشة لمعضلات وأفكار إنسانية متعددة بطريقة وأسلوب بيعظم من دور العقل والإنسانية وبيحجم الفانتازيا في أنها بتبقي مجرد مساعد علي سير الأحداث مش أكتر

طيب هل المسلسل كله مناقشات بس؟ .. لا طبعاً ده فيه أحداث مثيرة وأكشن ورسومات يمكن من أجمل ما شاهدت مؤخراً وفوقيها جرعة كوميديا ساخرة جميلة للغاية 

حقيقي أنا أستمتعت بالموسم ده واللي قبله بشكل كبير وفرحت أن بعد الموسم ده أبتدي ناس كتير ياخدوا بالهم من المسلسل ده ويتكلموا عنه في ظل الفشل النسبي وخيبة الأمل اللي أصيب بيها ناس كتير بعد إذاعة أول حلقات One Punch Man في موسمه التاني

حقيقة بأشوف المسلسل ده لا يقل عظمة عن 

Attack on Titan بس هو ساخر شويتين 

My Hero Academia: S6

My Hero Academia

S6, Epi 1-25 Finale 

ده أعظم موسم أتعمل للمسلسل ده منذ إنتهاء الموسم الثالث .. الأول نصف لطيف نصف قوي .. الثاني والثالث من أعظم ما يكون ويمكن يكونوا هما سر حبي للمسلسل .. الرابع النصف الأول منه قوي لكن النصف الثاني في الضياع .. الخامس دراما كتير أوي قللت من مستواه كتير .. وها نحن وصلنا لنهاية السادس 

أنا فعلاً بأحب المسلسل ده جداً رغم طول مدته مقارنة بباقي الأعمال المعاصرة ليه ورغم توهانه في تفاصيل كتير بعيد عن الخط الأساسي .. رغم كل ده الا أني باكنله حب كبير يمكن لأنه بيتناول عالم الأبطال الخارقين المفضل لدي بشدة وأنه مخلص أوي لثقافة الكوميكس رغم كونه شونين مانجا .. أحداثه والصراعات اللي جواه والتنوع ما بين الشخصيات وتطورها بيشدني أوي 

الموسم هنا وصل بالقصة عند منحني معين كنت منتظره طول الوقت لأنه مرحلة أساسية لابد منها في أي قصة شونين منذ فجر التاريخ .. مرحلة الحرب الشاملة والدمار الشامل .. النص الأول من الموسم كان تتويج للبناء اللي شغال بقاله 3 مواسم من ساعة الهزيمة الكبري لـ "أول فور ون" ضد "ألمايت" وهو المتعلق بشيجاراكي ومنظمة الأشرار اللي سلكت دروب كتير وتحالفت مع مختلف القوي والعصابات في محاولة دؤوبة لنيل القوة وتمهيد الطريق نحو عودة "ون فور أول" ومحاولة السيطرة علي العالم 

بعد ما المنظمة تحالفت مع مظمة التحرير وعملوا القاعدة القوية اللي يقدروا يرتكزوا  عليها في خطتهم اللي ثبت مع الوقت أنها كانت أعمق مما تخيل اي شخص .. جاءتهم المفاجأة من حيث لا يحتسبوا وأكتشفوا أن أمرهم كان مفضوح لمجتمع الرجال الخارقين وأنهم خدوا خطوة جدية لردعهم 

الجميل في الفصل ده أولاً أنه حسسك أخيراً أن في حاجة جدية بتحصل .. بالذات الموسم اللي فات كان في حالة دوران في المكان رخمة شوية بس مفهومة حالياً بالنسبة لي بعد نهاية السادس .. هو كان بناء بطئ لكن رتمه كان تقيل شوية .. ثانياً كم المفاجاءات اللي فيه كان كبير جداً فوق الإستيعاب وده ياخدنا لثالثاً وهي نقطة التغيرات اللي أتبنت علي ما حدث في هذا الأرك واللي كانت كبيرة .. تقريباً مفيش حاجة فضلت علي حالها بعد المعمعة الضخمة دي .. رابعاً كم الأكشن والرسم والتحريك اللي في الفصل ده كان ممتع أوي .. أنبسط بيه جداً 

وده يودينا للفصل التاني .. طيب دلوقتي الحرب أنتهت بنتيجة كارثية .. أينعم تم القبض علي كتير من الاشرار بس في المقابل رأس المخطط فر هارباً وكم الدمار اللي خلفته الحرب كان فوق طاقة المجتمع وأثره حتي علي الأبطال كان سلبي للغاية .. فوق كدة الحرب فجرت مفاجئتين هزوا المجتمع كله .. مفاجأة دابي الشرير اللي أتضح أنه أبن إيندفار واللي حمله مسئولية كل اللي بيعمله واللي حصله .. وتاني حاجة فتش سر "ون فور أول" وحالياً المجتمع كله تقريباً بقي عارف قصة ميدوريا وقدراته الخاصة 

لحد هنا كل شئ كان ماشي عال أوي لحد ما حصلت حادثة أقتحام السجن وهروب "أول فور ون" ومع أعتي أشرار السلسلة من يوم ما ظهرت وأنتشار الجريمة اللي حصل بعدها وسبب رعب ما بين الناس في مقابل عجز الأبطال عن الحفاظ علي الأمن وهو الشئ اللي أدي لتزعزع صورة في الأبطال في عيون الجماهير وكفرهم بيهم بل والحال وصل بالبعض للإعتماد علي نفسه وتسليح ذاته لمواجهة الأبطال 

أجواء كارثية أبوكاليبسية بإقتدار وسيناريو مكنش لا علي البال ولا علي الخاطر أستغله الكاتب بذكاء عشان يرجع بينا للصراع الأولي الاساسي خالص ما بين ون فور أول وأول فور ون .. يرجع للبطل نفسه ميدوريا اللي بدء حدوته بجملة "هذة هي قصتي وكيف أصبحت البطل الأعظم" 

بأتخيل أي طفل في سن ميدوريا لو كان أتحطت علي عاتقه مسئولية زي دي وش كان ح يستسلم بسرعة .. لكن بطلنا هنا مختلف لأنه مقدر قد أيه الفرصة اللي أتيحت له قيمة وثمينة وقد ايه هي أمانه قبل ما تكون مسئولية وهو لازم يبقي قدها .. الفصل ده رجعني للحلقة الثانية اللي حاول فيها ميدرويا اللي كان بلا قوي أنه ينقذ صديقه وهو ما دفع ألمايت أنه يهبه قواه .. الولد ده من الأول عنده حس البطولة والمسئولية .. بنيان صلب يقدر يتحمل أعباء الأخرين دون أن يكل أو يمل 

عجبني أوي الطريقة اللي أخرج بيه الكاتب ردة فعل ميدوريا علي التطورات اللي حصلت دي .. طبعاً اللي علي إطلاع علي ثقافة الكوميكس ح ياخد باله أن الفصل ده متاخد من أكثر من مصدر منهم علي سبيل المثال

World War Huk في الحتة اللي بينبذ فيها المجتمع ميدوريا بسبب قواه ولأنه بيجر إليهم الأخطار

Batman Dark Knight returns

Venom

هو شبه فينوم بالذات في نهاية الفصل لما مشاعره بتتحكم فيه وبيخرج عن السيطرة نوعاً ما .. لكنه كان أقرب لباتمان في قصة عودة فارس الظلام .. العالم بقي في حالة فوضي والشر في كل حتة مما يستدعي إن البطل رمز الخير أنه يتخذ خطوات جدية وإستثنائية لردع الشر بعيداً عن سربه 

طول الوقت كنت بأحس أن الكاتب عايز يعمل ميدوريا بيتر باركر حتي أول قوة قدر يستخدمها كان الخيوط والحبال .. مش صدفة في رأيي .. في كل مرحلة ميدوريا كان شبه بطل معين .. في الأول كان أيرون مان لشدة ذكاءه وأعتماده علي الأدوات والتخطيط وتوظيف قواه في سياق خطة .. مع الوقت ميدوريا تحول لسبايدرمان البطل المحبوب ذو القدرات المتعددة والمبهرة 

في المرحلة دي هو كان باتمان .. البطل القابع ف الظلال واللي بينشر العدالة وبيحمي المجتمع في الظلام وحده .. لكنها كانت مرحلة أنتهت بعودته لصيغته القديمة 

خاتماً عشان أنا طولت أوي المسلسل أنتصر لتيمته الاساسية وتيمة الشونين الأعرق .. الصداقة .. المسلسل هنا مش بس بيقيم الصداقة والحب لا ده بيستخدمهم في تطوير الشخصيات وكمان كأداة لصنع تنوع وتعدد .. يعني ح نلاحظ في أكثر من أرك أن دور ميدوريا بيتراجع في مقابل شخصيات أخري زي شوتو وباكوغو .. وده شئ إيجابي جداً في المسلسل .. ولذلك كان من المنطقي أنه لازم مجموعة الاصدقاء تتدخل لتعيد الشاة الشاردة 

كنت متخيل المسألة ممكن تاخد منحني مختلف بس مكنش ح يبقي في صالح القصة خالص .. لذلك نهاية الموسم مقنعة أوي بالنسبة لي 

عندي كلام كتير أقوله بس ح أكتفي بهذا القدر .. وفي إنتظار الموسم السابع بشغف

Coupling: S2

Coupling
S2, Epi 1-9 Finale

بأحترم أوي الأعمال المتطورة اللي الدراما فيها بتتحرك في إتجاهات معينة مش بتدور في حلقة مفرغة .. ولذلك حبيت الموسم ده وهو ما زود حبي للمسلسل ككل أكثر فأكثر

المفروض أن علاقة سوزان وستيف كانت مرت بمنعطف سلبي في نهاية الموسم اللي فات لكنها تجاوزته وأستمرت .. في الموسم ده بنشوف تطور العلاقة ومنعطفات ومواقف مختلفة بتمر بيها العلاقة وتحديات بتحارب إستقرارها واستمرارها .. حلو فكرة تجسيد العلاقة كتحدي مع الزمن والأقدار والتركيز علي المشاكل والحاجات اللي بتيجي ملحقة مع أي علاقة واللي بنتنج عن التقارب والتعايش وتغير نمط حياة الطرفين .. زي الخوف من الأرتباط والرغبة في التحرر من إلتزامات العلاقة ورؤية الطرفين لمستقبل العلاقة والخيانات وتغير العادات وغيره .. كل دي عناصر خلت الحلقات ثرية وغنية بالكوميديا والمواقف الطريفة

علي الجانب الأخر الموسم ده الي تركيزه شوية لبقية أفراد الشلة .. وتطور حياتهم وعلاقاتهم .. كمان تطور سماتهم.. في الموسم الأول الموضوع كان في إستنساخ مباشر لفريندز وأفكاره وقوالب الشخصيات بينما في الموضوع ده ومع التركيز علي باقي الشلة ابتدي المؤلف يقلب السمات والصفات ويدخل عناصر جديدة علي كل شخصية وياخد من دي ويودي لدي وهكذا بحيث خلي الشخصيات معقدة أكثر وجديدة مش تقليد او تكرار لقالب سابق

لازالت أرخم شخصية في المسلسل هي سالي بصراحة رغم اني باتعاطف معاها احياناً بس هي تكوينها رخم وبائس .. بينما لازال الثنائي المفضل لدي هو جيف و جاين .. دول أهم شخصيتين في المسلسل وبيطلع منهم أغبي تصرفات وكلام علي أفضل كوميديا ومواقف .. في حلقات ببقي مسترخمها لحد ما بيظهر جيف ويقلب الدنيا رأساً علي عقب

مستمرون

Coupling: S1

Coupling
S1, Epi 6 Finale

فاكر أول مرة سمعت عن المدرسة الإنجليزية في الكوميديا كان من المرحوم "سمير غانم" كان بيشيد بيها كمدرسة فريدة ليها ستايلها الخاص بعيد عن الكوميديا الأمريكية .. يمكن الكلمتين دول شجعوني لأني أحط الموضوع في ذهني وأخوض تجربتي الخاصة مع المدرسة دي ولو بعد حين

وقد حانت اللحظة

في البداية كنت متشكك حولين هل الكوميديا من الثقافة دي ح تعجبني ولا لا بالذات أن الأنجليز ثقافتهم مش محتكة بينا اوي زي الامريكان ولهجتهم مختلفة وصراعاتهم مختلفة .. لكن أتضح أني شكي لم يكن في محله .. وأتضح أنهم أجمل وأظرف مما تخيلت

كابلينج هو محاولة لإستنساخ فريندز بس المرة دي محاولة صايعة ومبذول فيها مجهود محترم في كتابة الإيفيهات وصياغة المواقف وبناء اصلاً العالم اللي بتدور فيه الأحداث واللي بالمناسبة هو عالم هزلي تماماً .. يبان واقعي لكن في حاجات كتير غير منطقية لكن تظل خفيفة واللذيذة

المسلسل بيطرح سؤال مهم بشكل غير مباشر .. ايه اللي يحصل لو في خط زمني موازي شخصيات فريندز ألتقت لكن في مكان جديد وبحيثيات جديدة لكن مع إحتفاظ معظمهم بملامح شخصيته الأساسية؟!

فرضية مهمة أثمرت عن كوميديا لذيذة ومتهكمة كسرت جميع الحواجز وخاضعت في جميع التابوهات المتعارف عليها .. بداية المسلسل أحداثه بتدور في لندن عن مجموعة بتجتمع عن طريق الصدفة وتتحول إلي منقسمة إلي صف ذكوري وصف أنثوي والطرفين بيلعبوا علي بعض

هنا في القصة تشاندلر و جوي لسة أصدقاء مقربين زي ما هما وصفاتهم زي ما هي تقريباً متجسدين في الثنائي  ستيف وجيف .. ريتشل لازالت زي ما هي متسلطة وافعوانية متجسدة في شخصية سوزان .. فيبي ومونيكا اندجموا ليشكلوا شخصية جديدة بملامح جديدة الا وهي سالي .. يمكن دي أكثر شخصية هامشية فيهم واكتر حد ملامح شخصية اتغيرت عن نسخة فريندز بس مازال محتفظ ببعض السمات .. روس بقي باتريك .. هو هو بالظبط بس الفرق أن هنا بقي محافظ في بعض الجوانب .. المفاجأة بقي واللي عجبتني أوي هي جاين وهي شخصية بتمثل إعادة تدوير لأفكار فريندز بس بشكل أكثر إبداعاً .. ايه اللي يحصل لشخصية جانيس أندمجت مع كارول وبقوا شخصية أساسية في المسلسل؟! .. بيتهيألي دي أكتر فكرة مبدعة في كتابة الشخصيات الستة كلها .. ووجودها بيخليني أتساءل ليه كارول وجانيس تم تهميشهم في فريندز في مقابل تعظيم دور الشلة ونساءها .. بصراحة صايعة منهم دي

الدراما بتدور ولعبة الفرضيات بتشتغل .. لو نسخة تشاندلر ارتبطت بنسخة ريتشل ولو مكنش مونيكا وروس اخوات كان ايه اللي ممكن يجري ولو جانيس كانت بايسيكشوال ايه اللي كان ممكن يطلع منها؟!

كل ده في ظل دراما كوميدية ساخرة بتناقش أعنف واظرف المواضيع وأكثرها جرأة ... أنا حبيت الموسم ده والمسلسل ده ككل

One Punch Man: S2

One Punch Man
S2, Epi 1-12 Finale

مشاهدة جاءت متأخرة .. بس انا سعيد بمجيئها

ون .. واحد من صناع المانجا الافذاذ والأذكياء بشكل كبير اللي قدر يفرض نفسه علي الساحة بأسلوبه الساخر وأعماله المغرقة في الكوميديا كن في ذات الوقت العميقة للغاية

أغلب الناس بتفضل له ون بانش مان لكن شخصياً زي ما قولت قبل كدة بأعتبر موب سايكو ١٠٠ هو درة أعماله وقد يكون أعظم أعمال القرن .. لكن ده لا يقلل من شأن ون بانش مان ولا مدي روعته كعمل

الموسم ده زيه زي الموسم الأول مزيج هايل ما بين الكوميديا الشديدة اللي بتقتحم كل زاوية وكل تفصيلة في القصة وما بين الأكشن القوي اللي موجود في كل الحلقات والي كان جدي بشكل يفاجئ اي حد قرر يشوف المسلسل كعمل هزلي .. ده غير أنه لم يغفل في لحظة عن رسالته الأساسية وهدف القصة وهو إعادة النظر لفكرة الرجل الخارق ككل

ون بانش مان هو إعادة تقييم لثقافة الكوميك بوك وفكرة الرجل الخارق ككل عبر بروزة الجوانب الهزلية والفجاجة والخطابية اللي غرقانة بيها الأعمال دي وإعادة تناول ساخرة للأنماط والقوالب اللي سيطرت ع الثقافة دي لعقود طويلة

يمكن أكتر حاجة ضحكتني وبتضحكني كل ما أتأمل شخصية سايتاما مسألة أنه لا مبالي وبسيط وأنه لا عنده هدف أسمي ولا نزعة بطولية زي الأبطال المشاهير هو عنده بس ضمير ورغبة في مساعدة الناس مش أكتر .. غير كدة هو مواطن عادي لا يبقي بالاً بما يلهث وراءه الأخرون

حقيقي الموسم ده رايق ومكتوب حلو أوي .. شخصياته الجديدة حبيتها بشكل كبير علي رأسهم جارو الشرير

ولذلك أنا منتظر الموسم الجديد بشغف