Epi 1-6 "End"
مشكلة المسلسل ده الجوهرية في رأيي أنه كان محتاج يتصرف عليه إنتاجيًا أكتر شوية وبناء عليه كان ح يبقي متقن أكتر ومدته أطول وكان ح يبقي فرصة ومساحة لمشاهد وأكشن متكلفين أكتر من كدة
إنما ده أنا حاسس طول الوقت انه معمول علي قد الإيد رغم ان القصة اللي بيتناولها في رأيي المفروض انها ملحمة ومرتبطة بعالم كبير "عالم تهريب وتجارة الكوكايين من كولومبيا"
وبتتناول قطب من أقطاب هذا العالم وشخصية شهيرة سببت رعب كبير في زمنها .. الا ان المسلسل لم يجسد هذة المسألة كما يجب
ده بان بالذات في مشاهد الأكشن والتصوير الخارجي اللي كان فيها فقر كبير وتقشف باين .. لأن بكل بساطة لو قارنا المسلسل ده ب"ناركوس" فالفرق ح يتضح طبعًا رغم أن القصة لا تقل قوة وإثارة عن قصة ناركوس
---
عنصر القوي الأساسي في المسلسل ده كانت القصة ورحلة الصعود التي لم تخلوا من الأجندات الصوابية والخطاب الموجه .. في رأيي أساسًا أختيار نيتفليكس لشخصية "جريزيلدا" جاي أساسًا بناء علي حاجتين أولهم أنهم عارفين مدي شعبية قصص المخدرات بين متابعينهم والنوع ده من المنتوج الإعلامي أزاي بيسمع وسط الفانز وثانيهم أنها قصة صعود واحدة ست بتعول أسرة بحالها لوحدها تقريبًا
وده نوع من القصص نيتفليكس والجماعة بتوع الصوابية السياسة بيحبوه أوي حتي لو الشخصية المطروحة شخصية قمة في السلبية والإجرام .. المهم أن الشخصية الرئيسية هي إمرأة قوية تنتصر علي الرجال وتقودهم في مرحلة من المراحل .. نموذج "قوة المرأة" والأنثى التي جمعت ما بين النجاح والريادة والأمومة نموذج الناس دي بتقدسه وبتسعي لتلميعه بشتي السبل
لدرجة أني لما رجعت لقصة جريزيلدا الحقيقية أولًا أكتشفت انه تم إختصارها بشكل مخل في تفاصيل كتير وثانيًا تم تغيير أكتر من تفصيلة محورية في القصة عشان تخدم علي المعني الصوابي .. كمثال .. لم يتم التركيز بالشكل الكافي علي شخصية زوجها الأول -أبو أولادها- وهو الشخص اللي عرفها علي عالم التهريب وكذلك أن كان ليها تجربة سابقة في أمريكا بصحبته لكنها كادت ان تنتهي بالقبض عليهم
ده غير أن أساسًا صوفيا فيرجارا غير ملائمة للدور بتاتًا فهي لا شبها شكلًا في الحقيقة ولا هي في بداية القصة كانت قدها سنًا بس طبعًا لازم عمل زي ده عشان يسمع يتم اختيار نجمة رنانة تجذب الجمهور ليه
غير كدة شخصية الشرطية اللي كانت بتطاردها والخط ده كله مختلق -عشان الصوابية السياسة- ومختلف بشكل كبير عن القصة الحقيقية لأن الموضوع كان متشعب وفي تفاصيل أكتر وهي مسألة كانت محتاجة أن المسلسل يبقي أطول ويتصرف عليه أكتر
---
نرجع لحتة الصعود .. انا بأحب أوي قصص الصعود من القاع إلي القمة بالذات اللي بيكون فيها عقبات كتير ومنحدرات بعضها بيحطم مجهودات صاحب الرحلة وبيضطره للبدء من جديد وكذلك اللي فيها مخاطر وتضحيات تصل إلي درجات مميتة
جريزيلدا تقريبًا مرت بكل ده مع بعضه .. واحدة أساسًا جاية من عالم الدعارة وجذورها لا تخلوا من مأساة يمكن المسلسل ما رضيش يوضحها أوي لكنه أشار إليها بشكل خفيف كدة علي أستحياء نظرًا لقسوة القصة
جريزيلدا أساسًا ضحية الاستغلال الجنسي منذ طفولتها ودُفعت إلي عالم تجارة الجنس من وهي قاصر .. لذلك شعور الخوف والقلق لم يفارقها أبدًا .. هي عندها قلق وخوف من الأخرين ومن المجهول يصل إلي درجة الجنون .. الحيز الوحيد اللي بتشعر فيه بالأمان كان وسط أولادها لأنهم جزء لا يتجزأ من ذاتها ومن حلمها ورغبتها بس العيش بأمان
تركيز المسلسل علي الجانب ده كان عبقري الحقيقة حتي لو كانت فلسفته ليست بذات العبقرية .. الفكرة إنها علي عكس الصورة النمطية للزعيم اللي بيكون قوي وشخصيته مخيفة وعنده قدرة علي اتخاذ القرار .. هنا هي الزعيمة ولكنها في نفس الوقت شخص متوتر وخايف وعنده أزمات دفينه بتشكل الدافع الحقيقي ليه للمضي قدمًا
شراسة جريزيلدا وإجرامها نابعين مش من أنها شخص شرير بالفطرة ولا متجبر .. بالعكس دول نابعين من كونها شخص ضعيف وخايف وبيحاول يحمي نفسه طول الوقت ويحمي الناس اللي تخصه
تبرير المسلسل لده هو اللي كان سخيف الحقيقة .. ما هو مش كل حد خايف بسبب أزمات في نشأته يبقي ده مبرر لأنه يتحول لمجرم .. كذلك مش عشان هي أنثي مضطهدة ده يبقي مبرر لأنها تطيح في الناس
--
أكثر شئ مؤلم في المسلسل كانت نهايته .. رغم عدم تعاطف الواحد مع الشخصيات الإجرامية عامة لكن مشهد النهاية اللي بيجسد إنهيار الحلم اللي فضلت تسعي له طوال حياتها وهو الأسرة المستقرة السعيدة كان مؤلم
لكن لو ح نحسبها بالعقل .. الحلم كانت عوامل إنهياره موجودة جواه من الأول .. وعمر ما كان ح يبقي في أسرة سعيدة في هذا الجو المسموم أبدًا
--
مسلسل لطيف ورايق بس كان محتاج شوية صرف
ليست هناك تعليقات:
إرسال تعليق