P4, Epi 41-50 "The End"
فكرة إنهاء بليتش في حد ذاتها بالنسبة لي كئيبة أكتر من العشر سنين اللي قعدهم بعيد عننا وكل شوية نسمع إشاعة إنه راجع وخبر هنا وخبر هناك والتشويق لرجوعه اللي قعدله حبة حوالين أيام الكورونا.. كنت متخيل إن العالم هيتهي قبل ما نشوف نهاية بليتش على الشاشة.. لكن الحمد لله ده مَحصلش.
بالنسبة لي إنهاء بليتش يعتبر فعلياً إنهاء عصر العظماء.. حرفياً.
يعني لو قسمنا الأنمي لعصور فممكن نقول إن الثمانينيات هي عصر الآباء.. دراجون بول وقبضة النجم الشمالي وسانت سيا.. ثم التسعينيات هي عصر الأبناء اللي كملوا مسيرة الآباء.. دول الحقبتين اللي جماليات وقوالب وأنماط هذا الفن تكونت فيهم وأتبنى الأساس اللي مشي عليه الكل بعد كده.
الألفية بقى كانت عصر حصاد لزرع جيل الآباء وبداية انتشار الفن مع ظهور الإنترنت وانتشار الفضائيات والشرايط والـ DVD.. ده العصر اللي الناس فيه بره اليابان ابتدت تعرف بشكل حقيقي معنى كلمة "أنمي"، وهو العصر اللي مهد الطريق للانتشار الواسع اللي هيحصل بعد كده في العقدين الثاني والثالث من الألفية.
---
ليه أعمال الفترة دي عظيمة في رأيي؟!
لأنها خدت الأسس اللي اتحطت مع جيل الآباء زي قوالب الدراما والتيمات الأساسية وطورتها بحيث خلت الكتابة منطقية ومتماسكة أكتر وعميقة أكتر ومعقدة أكتر، بحيث العمل يتحول من مجرد عمل ترفيهي لعمل فني يستحق النقد والإطلاع والتأويل.
وفي نفس الوقت قدمت هذا الفن بشكله العصري المطور للعالم كله وللأجيال الجديدة بشكل جعلها النبراس الذي ألهم كل من جاء بعدها.
---
بليتش بالذات أنا بشوف إنه الأب الروحي للموجة الجديدة من أعمال الشونين اللي بدأت في نهاية العقد الثاني من الألفية.. يعني أعمال زي ديمون سلاير وشينسومان وبيرادايس هيل وجوجوتسو كايسن ودان دا دان باين فيها جينات بليتش من حيث الأجواء الظلامية والبطل اللي بيحارب التقاليد والمنظومات المتسلطة اللي بتعلي قيمة القواعد على قيمة حياة الفرد.
وأهم من كل ده وفي رأيي هي حتة البطل المعاصر والنقيض للبطل الأسطوري.
بمعنى إن في ناروتو على سبيل المثال، البطل بنعرف من أول لحظة إنه عنده قدرات خاصة، ومن أول حلقة إن هدفه يبقى زعيم القرية؛ بطل على شاكلة وبنفس تكوين أبطال الأساطير القديمة زي هرقل وأمثاله ذو قدرات وعنده هدف كبير أو عايز يعمل إنجاز أسطوري محدش عمله قبل كده أو إتمامه مسألة إعجازية.
لكن هنا إيتشيجو هو مجرد شخص عادي في بداية القصة، بنعرف إنه عنده قدرات تفوق البشر العاديين لكن عقبال ما بنعرف إنه شخص مش طبيعي وإنه له قدرات خاصة خارقة للعادة بناخد وقت حبتين.. الأهم إنه شخص عادي عنده تروما ومشاكل بسبب حادثة موت أمه ولدت جواه شعور بالذنب خلاه طول الوقت ملوش هم غير إنه عايز يحمي ذويه واللي بيحبهم.
هو لا عايز يبقى عنده قوى خاصة ولا فارق كل ده معاه.. ولو فارق فعشان بس يقدر يحمي اللي حواليه.. شخص عادي الشيء الوحيد اللي عايز يحققه هو هدفه الذاتي البسيط والنبيل، مش أي هدف كبير ولا إنجاز أسطوري.
في الحتة دي بليتش متأثر بشكل كبير بالعملين اللي من غيرهم مكنش هيبقى ليهم وجود: "دراجون بول، يو يو هاكوشو".
---
واخد تكوينة عقلية البطل من غوكو.. البطل القوي اللي بيقاتل فقط عشان يحمي العالم اللي بيحبه وعشان بيحب القتال.. حتى هو وإيتشيجو بينهم حاجة مشتركة لطيفة وهي إنهم ألقوياء وذوي قدرات خاصة ومميزة لدرجة خلتهم في مرحلة معينة من القصة مؤهلين لأن يبقى ليهم صفة أو مرتبة إلهية في العالم بتاعهم لكنهم رفضوها بشكل أو بآخر وفضلوا الحياة العادية بين أصدقائهم وناسهم.
إيتشيجو ويوسكي تقريباً شبه بعض في كل حاجة.. في السن وطبيعة الشخصية والتجربة اللي بيخوضها كلاً منهم مع الموت وعوالم الميتافيزيقيا.. يمكن يوسكي متشرد وبلطجي أكتر شوية من إيتشيجو لكنه زيه بالظبط.. حابب يحمي ناسه وعايز يعيش حياة عادية.. لا عايز يبقى خارق ولا عايز يبقى ملك.. هو فقط شخص شهم وبيسخر قوته لحماية تلك الحياة التي يحبها.
صورة أقرب للبطل المضاد (Anti-hero) في البداية، لكن مع تقدم القصة بيتحول إلى بطل كلاسيكي مع الاحتفاظ ببعض ملامح وعناصر البطل زي عدم الالتزام بالقواعد وترجيح كفة الضمير الذاتي على المفروض.
---
من كام يوم قرأت تصريح لكوبو بيتكلم فيه عن نفس النقطة اللي بناقشها هنا وهي تأثيره على الجيل الجديد، وقال إن ده بيحصل وطبيعي لأنه هو شخصياً تأثر بمن قبله، وضرب مثال خطير أول مرة أنتبه له وهو تأثره بـ Saint Seiya، تحديداً في تكوين وكتابة قادة الفرق في مجتمع الأرواح، وقال إنهم متأثرين بقادة الأبراج والقديسين الـ ١٢ في المسلسل.
وهي مسألة أول مرة أنتبه لها، بالذات إن القصة في سانت سيا وبليتش فيهم حتة الصراع ما بين قادة الصف الواحد وإن فيهم واحد يتحول إلى شرير أو يتم إغواؤه، وكذلك مسألة وحدة الصف من أجل استعادة الأميرة المختطفة على طريقة الإلياذة.
ليست هناك تعليقات:
إرسال تعليق