Attack on Titan S4 I - Epi 7

Attack on Titan

S4, Epi 7

حلقة عظيمة للغاية الحقيقة ..

من ساعة حلقة "إعلان الحرب" وأنا بقت عندي عادة كدة .. بأتفرج علي الحلقة مرة أول ما بتنزل وأسيبها لبعديها بيوم أو يوم الأجازة عشان أتفرج عليها تاني علي راوقة عشان أكتب عنها .. ودي مسألة مفيدة لأسباب كتير منها زيادة المتعة مع تركيزك في المشاهدة التانية علي تفاصيل ممكن تكون أغفلتها أول مرة .. وبرضو أنك بتقدر تبلور رأيي حقيقي عن الحلقة 

الصراحة أول مرة شوفت فيها الحلقة حسيتها مبالغ في تقدريها .. وده عيب أنك تقرأ المانجا وتبقي عارف الأحداث قبلها .. بس اللي حصل في المشاهدة تانية أن رأيي أختلف تماماً .. لا حقيقي الحلقة مبهرة حتي لو أنت عارف الأحداث .. وجبة دسمة أوي أتمني ما تأثرش علي اللي جاي بعدها لآن رتم الأحداث ح يهدي شوية في الحلقات الجاية 

دائرة الدم أكتملت .. أهل الجزيرة أنتقموا من المارلي وخلفوا وارهم ثأر سيشعل الصراع من جديد .. ودي الفكرة اللي المسلسل بيستهدفها في الفصل ده .. أن العنف دائرة لا تنتهي والعدوان لا يولد سوي العدوان

يمكن الحلقة مفيهاش تطورات درامية كتير علي قد ما كان فيها أكشن .. لكن في تطور مهم حصل تقريباً لف دماغ الناس كلها وهو أن إيرين أصبح هو العملاق الأقوي في كل الموجودين .. بقي عنده قوي المهاجم والأساسي وضيف عليهم كمان المطرقة الحربية .. وهنا يجي السؤال .. ليه أستهدف المطرقة تحديداً؟

يمكن معنديش إجابة مثالية علي السؤال ده لكن عندي رؤية مبنية علي اللي بين إيدينا وبعض أحداث المانجا ...

لو حد خد باله فمن ساعة ما قصة عائلة "ييغر" بدأت مع تمرد جريشا وقدر العمالقة والأسس اللي أتبني عليها الصراع عمالة تتغير .. أولاً قوة العملاق المهاجم راحت لجريشا ثم دخل جريشا جوا الحصن وأصبح أول شخص يدخل الحصن من براه من ساعة عزل الإيلديين في الجزيرة وجوا الحصن .. وده أدي لثانياً وهو أن المارلي خرقوا العهد اللي بينهم وبين الملك وخرقوا الحصن .. فده أدي لثالثاً وهو الأخطر أن جريشا سرق قوي الأساسي من العائلة الملكية ودي حاجة كانت أول مرة تحصل في التاريخ وح يتبني عليها حاجات كتير

علي الجانب الأخر كان لأول مرة برضو حد من الدم الملكي يورث عملاق غير الأساسي زي ما حصل مع "زيك" .. ودي نقطة خطيرة ومبنية علي تمرد جريشا برضو

في نظرية كدة بتقول أن أتاك أون تايتن هو عبارة عن قصة "إنتقام يومير" من العالم .. يومير اللي عاشت طول الوقت سبيـة وعبـدة وتم إستغلالها من قبل ملك الإيلديين قررت أنها تنتقم من الإيلديين والعالم عبر خطة طويلة المدي .. الخطة دي أطرافها هما إيرين وفالكو ... لو حد خد باله في أول ظهور لإيرين وفالكو الأتنين بتجيلهم رؤية لأحداث ح تحصل في المستقبل .. قبل حتي ما يكتسبوا قوي العمالقة .. يقال أن دي اللحظة اللي عقدت فيها يومير معاهم عقد لتنفيذ مخططها 

المخطط مشي علي خطوات أول خطوة هي تغيير أسس الواقع .. فالعائلة المالكة تفقد العملاق الأساسي ثم عائلة تايبر تفقد عملاق المطرقة وبالتالي قيمتها وهيبتها .. والعمالقة يبقوا موجودين عند الجانبين

لذلك بأشوف أن كان من المهم أن إيرين ياكل المطرقة الحربية .. لأن دي خطوة مهمة لإنقلاب الواقع وتغيير للأبد

الأحداث علي صفيح ساخن .. مستمرون

#Anime #AOTS4

Attack on Titan S4 I - Epi 6

Attack on Titan

S4, Epi 5

رغم أن أني أطلعت علي تفاصيل الحلقة دي والحلقات الجاية في المانجا .. الا أني أولاً أستمتعت بالحلقة جداً .. وثانياً ما حرقتهاش علي زمايلي في الشغل كعادتي المفضلة 😁

بداية الحلقة عبقرية أوي .. وهي بالمناسبة مختلف عن بداية الفصل في المانجا .. الفلاش باك بتاع بداية تواجد الثلاثي أني وهوفر وراينر في الجزيرة والحديث اللي بيدور بينهم حولين قصة الرجل اللي أنـتـحـر وليه هو حكالهم قصته وقصة أطفاله كان معبر أوي ومهم لأنه بيرسم خط منطقي أساسي للحلقة الا وهو "المحاكمة والحساب" بيخلي في النهاية المشهد الأخير في الحلقة منطقي والأحداث اللي بعد كدة كلها ليها مبرر وهدف وسبب وجية

في الأول لما جت قصة الرجل أفتكرت أن المؤلف حاططها عشان تبقي بداية لإشتعال التعاطف والشعور بالذنب داخل نفس راينر تجاه سكان الجزيرة .. لكن في الحلقة دي هو وضح أكتر قيمة وهدف المشهد .. الشعور بالذنب والرغبة المحمومة في الخلاص والغفران

زي ما قولنا في حلقة الفلاش باك راينر من ساعة ما رجع من الجزيرة وهو حاسس أنه أرتكب جريمة كبري وحاسس بذنب كبير بالذات بعد ما تبين له أن كل اللي كان بيشاع عن سكان الجزيرة كاذب وكمان لأن اللي لاقاه وسطهم كان شئ أساسي مفتقده وبيبحث عنه في أرض مارلي وهو الإعتراف والإحترام ... ولذلك كان طوال الأربع سنين بيبحث عن طريقة ينعتق بيها من ذنبه ويجد الغفران بأي شكل  .. ده جانب

الجانب التاني هو جانب سكان الجزيرة .. لو حد خد باله الشخصيتين اللي ظهروا فقط من سكان الجزيرة لحد دلوقتي هما جين وإيرين .. جين اللي طول الوقت حاطط في ذهنه مشهد جثة صديقه "ماركو" وهي مقطوعة ومتشوهة وإيرين طبعاً لم ينسي أبداً مشهد إلتهام أمه .. وده في رأيي كان شئ ذكي جداً .. لأنه بشكل كدة غير مباشر بينسج سحابة من روح الإنتقام والرغبة في القصاص علي الأحداث اللي تبان في الظاهر هادئة لكنها مشتعلة من الداخل

من الأخر الصانع بيشير بشكل غير مباشر طوال الحلقة أن الإنتقام ح يكون هو عنوان الأحداث ومحركها الأساسي .. ده الخط اللي رسمه في بداية الحلقة وأكد عليه بشكل واضح في نهايتها وفضل يعززه مش بس طول الحلقة دي بل علي مدي الحلقات اللي فاتت 

كمان في خط تاني مهم ويمكن ح يبان أكتر في الحلقات الجاية .. وهو التشابه والتناقض .. لو حد خد باله الوضع حالياً في أرض مارلي شبيه بالوضع في جزيرة الفردوس وقت تحطيم الجدران لكنه بيمثل نقيضه .. بمعني أننا برضو قصاد ناس عايشين في وضع صعب ومأزوم لكن مستقر .. في نفس الوقت في طرف بيخترقهم بشكل خفي وفي لحظة معينة بيشن عليهم هجوم لتحقيق هدف معين .. الهدف في كل حالة هو نقيض الأخر .. في حالة إختراق الجدار كان الهدف فيه رغبة في الإستحواذ ونوع من العدوان .. بينما هنا الغرض إنتقامي أولاً ثم رغبة في الإستحواذ ثانياً .. تناقض بيغذي الصراع من ناحية وبيزيد الحماس وبيغذي أكتر روح الإنتقام والثأر اللي قولنا عليها .. أنت كمشاهد قاعد طول الوقت منتظر اللحظة -اللي أنت عارف أنها جاية- اللي سكان الجزيرة فيها ياخدوا فيها حقهم ويردوا الألم للمارلي .. وبيزود شعورهم التشابه اللي بين الوضعين والتناقض اللي بيوصل الصراع لنقطة أصبح فيها الصدام أمر حتمي

بصراحة الموسم ده مكتوب بشكل رايق أوي .. بعض النظر عن الرسم اللي بيتحسن مع الوقت لكن خلينا نقول أن الكتابة والسرد هما أقوي نقطة في الموسم .... الحلقة دي مقدمة لأحداث ساخنة للغاية .. تمهيد متفجر لوضع أكثر تفجراً 

مستمرون

Attack on Titan S4 I - Epi 5

Attack on Titan

S4, Epi 5

رغم أن أني أطلعت علي تفاصيل الحلقة دي والحلقات الجاية في المانجا .. الا أني أولاً أستمتعت بالحلقة جداً .. وثانياً ما حرقتهاش علي زمايلي في الشغل كعادتي المفضلة 😁

بداية الحلقة عبقرية أوي .. وهي بالمناسبة مختلف عن بداية الفصل في المانجا .. الفلاش باك بتاع بداية تواجد الثلاثي أني وهوفر وراينر في الجزيرة والحديث اللي بيدور بينهم حولين قصة الرجل اللي أنـتـحـر وليه هو حكالهم قصته وقصة أطفاله كان معبر أوي ومهم لأنه بيرسم خط منطقي أساسي للحلقة الا وهو "المحاكمة والحساب" بيخلي في النهاية المشهد الأخير في الحلقة منطقي والأحداث اللي بعد كدة كلها ليها مبرر وهدف وسبب وجية

في الأول لما جت قصة الرجل أفتكرت أن المؤلف حاططها عشان تبقي بداية لإشتعال التعاطف والشعور بالذنب داخل نفس راينر تجاه سكان الجزيرة .. لكن في الحلقة دي هو وضح أكتر قيمة وهدف المشهد .. الشعور بالذنب والرغبة المحمومة في الخلاص والغفران

زي ما قولنا في حلقة الفلاش باك راينر من ساعة ما رجع من الجزيرة وهو حاسس أنه أرتكب جريمة كبري وحاسس بذنب كبير بالذات بعد ما تبين له أن كل اللي كان بيشاع عن سكان الجزيرة كاذب وكمان لأن اللي لاقاه وسطهم كان شئ أساسي مفتقده وبيبحث عنه في أرض مارلي وهو الإعتراف والإحترام ... ولذلك كان طوال الأربع سنين بيبحث عن طريقة ينعتق بيها من ذنبه ويجد الغفران بأي شكل  .. ده جانب

الجانب التاني هو جانب سكان الجزيرة .. لو حد خد باله الشخصيتين اللي ظهروا فقط من سكان الجزيرة لحد دلوقتي هما جين وإيرين .. جين اللي طول الوقت حاطط في ذهنه مشهد جثة صديقه "ماركو" وهي مقطوعة ومتشوهة وإيرين طبعاً لم ينسي أبداً مشهد إلتهام أمه .. وده في رأيي كان شئ ذكي جداً .. لأنه بشكل كدة غير مباشر بينسج سحابة من روح الإنتقام والرغبة في القصاص علي الأحداث اللي تبان في الظاهر هادئة لكنها مشتعلة من الداخل

من الأخر الصانع بيشير بشكل غير مباشر طوال الحلقة أن الإنتقام ح يكون هو عنوان الأحداث ومحركها الأساسي .. ده الخط اللي رسمه في بداية الحلقة وأكد عليه بشكل واضح في نهايتها وفضل يعززه مش بس طول الحلقة دي بل علي مدي الحلقات اللي فاتت 

كمان في خط تاني مهم ويمكن ح يبان أكتر في الحلقات الجاية .. وهو التشابه والتناقض .. لو حد خد باله الوضع حالياً في أرض مارلي شبيه بالوضع في جزيرة الفردوس وقت تحطيم الجدران لكنه بيمثل نقيضه .. بمعني أننا برضو قصاد ناس عايشين في وضع صعب ومأزوم لكن مستقر .. في نفس الوقت في طرف بيخترقهم بشكل خفي وفي لحظة معينة بيشن عليهم هجوم لتحقيق هدف معين .. الهدف في كل حالة هو نقيض الأخر .. في حالة إختراق الجدار كان الهدف فيه رغبة في الإستحواذ ونوع من العدوان .. بينما هنا الغرض إنتقامي أولاً ثم رغبة في الإستحواذ ثانياً .. تناقض بيغذي الصراع من ناحية وبيزيد الحماس وبيغذي أكتر روح الإنتقام والثأر اللي قولنا عليها .. أنت كمشاهد قاعد طول الوقت منتظر اللحظة -اللي أنت عارف أنها جاية- اللي سكان الجزيرة فيها ياخدوا فيها حقهم ويردوا الألم للمارلي .. وبيزود شعورهم التشابه اللي بين الوضعين والتناقض اللي بيوصل الصراع لنقطة أصبح فيها الصدام أمر حتمي

بصراحة الموسم ده مكتوب بشكل رايق أوي .. بعض النظر عن الرسم اللي بيتحسن مع الوقت لكن خلينا نقول أن الكتابة والسرد هما أقوي نقطة في الموسم .... الحلقة دي مقدمة لأحداث ساخنة للغاية .. تمهيد متفجر لوضع أكثر تفجراً 

مستمرون

Attack on Titan S4 I - Epi 4

Attack On Titan

S4, Epi 4

هو أنا مش عارف هو ده يتسمي بناء هادئ وتمهيد متأني للعظمة اللي جاية بعد كدة ولا ده يتسمي تحنيس .. بس ماشي

دي أخر حلقة في الفترة الضبابية الهادئة التي تسبق العاصفة وحتي كان من الذكاء أنها تتذاع قبل أجازات الكريسماس عشان يبقي في فاصل ما بين أحداث الحلقات الأولي اللي أتسمت بالهدوء والغموض عادا يمكن أول حلقة وبين اللي جاي اللي كله صدام وأكشن عالي أوي

طبعاً مع الوقت أكتشفت -وكنت متأكد الصراحة- أن الإعلان كان متاخد من أول 7 حلقات .. وبناءً عليه فأحنا ما شوفناش فيه غير الأحداث الممهدة وبعض لقطات من معارك مهمة لكن التقيل والأنفجارات المدوية ما تمش المساس بيها إطلاقاً .. ده إستنتاجي .. وده طبيعي وكويس عشان اللي ما يعرفش الأحداث يتصدم 

يعني هي الحلقة مفيهاش شئ مميز غير تحريك الدراما شوية لقدام .. بتسيبها عند عتبات الإثارة والإنقلاب الدرامي .. بنشوف الصراع بيتصاعد بين فالكو وغابي .. بنقرب أكتر من علاقة فالكو و"إيرين" اللي خلاص تم الكشف عن هويته -علي أساس أننا ما عرفناهوش من الأولي يعني😅- وبنفهم أنه كان طول الفترة دي بيستخدمه للتواصل مع "عائلته" .. أو للي مش فاهم يعني هما مجموعة فرقة الإستكشاف الموجودة في أرض المارلي ضمن عملية الإختراق والتجسس اللي بيعمولها لأسباب ح تبان خلال الحلقات الجاية

تمت كام إشارة ذكية كدة أثناء الحلقة لأحداث سابقة وأحداث لاحقة ح تكشف بعد كدة .. منها واحدة ح أحتفظ بيها لنفسي لحين ما يكشف عنها والتانية كان مشهد جد إيرين اللي بيقابله بالصدفة في المستشفي وبيحكيله عن مأساة عيلته اللي أوصلته للجنون .. مشهد مؤثر لأن لما تيجي تحسبها ح تلاقي أن مأساة الرجل ده هي اللي فجـرت الأحداث دي كلها .. لو بنته مكنتش أتـقـتلت مكنش "جريشا" ابنه بقي معارض للمارلي ولا خلف "زيك" و"إيرين" ولا خد قوة العملاق المهاجم وورثها لأبنه بعد كدة ولا راح جزيرة الفردوس من الأساس .. الرجل يا عيني أتجنن بسبب اللي حصل لعيلته وهو كمان ما يعرفش اللي ترتب علي مأساته دي بعد كدة ولا واخد باله أن اللي قاعد معاه ده يبقي حفيده اللي بشكل أو بأخر جاي ينتـقم له

مسألة عائلة تايبر دي محيرة أوي بالنسبة لي ومفهمتهاش حتي لما قرأت عنها .. بس هو اللي أنه أستوعبه أنهم الحكام الفعليين لأرض "مارلي" رغم أنهم من الإيلديين .. والصفقة اللي بينهم المارليين مش مفهومة بالنسبة لي .. لكن أظن ح توضح مع الوقت

الأحداث أبتدت تخش في الجد .. والحلقة القادمة مواجهة درامية ساخنة بين إيرين وراينر ح توضح جزء مش قليل مما صعب علينا فهمه في الأربع حلقات الأولي 

منتظرون

Attack on Titan S4 I - Epi 3

Attack on Titan

S4, Epi 3

بتبقي جميلة أوي حلقات الفلاش باك دي .. بسيطة وموجهة وسريعة ومنشطة للذاكرة ... بس هل هي بسيطة فعلاً؟ .. لا

الحلقة كلها بتدور حولين "راينر" اللي تقريباً بنكتشف أننا ما نعرفش عنه أي حاجة .. الحلقة جاية تدي المشاهد مفتاح لفهم هذة الشخصية من جهة وتفسير لحاجات كتير من اللي بتحصل من بداية الموسم ده وكذلك بتروي أحداث المواسم السابقة من وجهة نظر مقابلة

فعلاً راينر بالنسبة لي طول المواسم اللي فاتت كان لغز .. في الاول حبيته وبعدين كرهته وبعدين تعاطفت معاه شوية وبعدين بقيت مش فاهم هو عايز أيه بالظبط بالذات بعد تطوراته الأخرانية .. كل ده كان سببه أني مش فاهم دوافع الشخصية ولا قادر أعرف هو بيعمل كل ده ليه ... وهو اللي بنعرفه في الحلقة دي

إنطباعي العام عن راينر بعد أحداث الحلقة دي أنه مسكين من ناحية وأنه نـدل من ناحية تانية .. راينر ضحية مباشرة للـعـنـصرية .. طفل أبوه مش راضي يعترف بيه لأنه بيعتبره "شيـطان" ورافقه بيضطهدوه لأنهم بيعتبروه أقل منهم .. هو في الحقيقة شخص بسيط كان حلم حياته أنه يبقي مواطن من المارليين عشان يتم الإعتراف بيه هو وأمه من قبل أبوه وأهله لكن ده ما حصلش .. لما بيصطدم بحقيقة أبوه والعالم من حوليه بيتحول مع الوقت للـنـدل اللي بأقول عليه .. شخص عنده إستعداد يدعي ويـكـذب ويقضي علي مستقبل أي حد عشان يحقق هدفه لأن الهدف عنده أهم من أي شئ .. كمان بيحاول طول الوقت يحطم إدعاءات من حوله عنه زي أنه ضعيف ولا يستحق القدرة اللي الدولة أدتهاله وخلافه ... يعني بإختصار راينر هو شخص بيبحث عن إعتراف الجميع ولذلك كان بيخوض المهمة بتاعة الجزيرة بالروح والدم من البداية للنهاية

بس في شئ أتغير في راينر وده يمكن اللي الحلقة ما ركزتش عليه بس نقدر نشوفه من مجمل اللي حصل في التلات حلقات .. راينر لما عاش جوا الأسوار مع أهل الجزيرة أبتدت شخصيته تتغير مع الوقت .. أبتدي من جانب يحس أنه معترف بيه وأن في ناس بتحبه وتحترمه وده يمكن السبب الأساسي اللي عمله الهزة النفسية اللي أثاراها بنشوفها دلوقتي .. بيتهيألي لو سألوه تفضل تعيش فين ح يختار الأسوار .. لأنه هناك لقي ضالته .. الإعتراف والحب والإحترام .. لذلك إيمانه اللي كان بيدعي أنه راسخ ببروباجندا شعب المارلي ضعف وتحول إلي تعاطف مع شعب الجزيرة ثم تحول إلي يأس من الحياة عامة .. من جانب هو خايف من أن حد يكتشف مشاعره ومن ناحية من هول تجربته هو فقد الثقة في كل حاجة وحاسس أن مصيره ومصير شعبه أنهم يعيشوا في دايرة مفرغة من العـذاب للأبد

بس هل الحلقة كانت عن راينر بس؟ .. الحقيقة لا .. كان مشارك فيها طرف تاني .. إيرين

الفلاش باك لو حد خدباله هو بيحكي حدوتة إيرين وأصدقاءه بس من طرف العـدو .. كمان من ناحية تانية هو بيحكي عن علاقة راينر بالجزيرة والأسوار والسبب وراء الكابوس اللي بتمثلهوله التجربة دي .. أحد أسباب الكابوس هو تأنيب الضمير لأن راينر من جواه حس أنه خان الناس الوحيدة اللي أعترفت بيه في حياته والصديق الوحيد ليه في الوجود .. إيرين .. لما تيجي تحسبها ح تلاقي فعلاً راينر ملوش أصدقاء غير إيرين .. حتي بيرتولت كان رفيق قـتـال لكن مش صديق بالمعني الحقيقي وطبعاً "أني" هو مكنش بيطـيقها أساساً .. لذلك الموضوع عامله شرخ في ذاته حس أنه ملوش علاج غير بالـمــوت .. وبناء عليه هو كمان عايز يحمي قريبته المتحمسة من ذات المصير ومعاها كل الاطفال الصغار اللي زيها

طبعاً البعض ما قدرش يفهم حاجة من أخر مشهد في الحلقة .. الموضوع بسيط .. جزيرة الفردوس بدأت خلاص الهجوم علي أرض المارلي .. بس 

Attack on Titan S4 I - Epi 2

Attack on Titan

S4, Epi 2

الإشارة والإسقاط علي ألمانيا النـازيــة أو الـفاشية بشكل عام في أوروبا وأمريكا في تعاملهم مع الأقليات سواء اليهود أو الزنــوج أو غيرهم أظن بقي واضح أوي في الحلقة دي .. وهو كان باين من ساعة الحلقة اللي رجعنا فيها لذكريات جريشا .. بس دلوقتي بقت أوضح

الموسم ده يبدوا أنه ح يطول شوية في فكرة سرد الأحداث من وجهة النظر المقابلة .. أحنا شوفنا الأحداث لمدة 3 مواسم من وجهة نظر سكان جزيرة الفردوس لكن مكنش عندنا فكرة نعرف الطرف الأخر في الصراع باصص للمسألة أزاي .. تساؤل أتجاوب عليه ولازالت الإجابة سارية حتي حين

اللطيف في الأمر شئ بصراحة واخد بالي منه من الحلقة اللي فاتت .. دولة مارلي علي قد ما هي دولة شـمـولـيـة وقادرة ظاهرياً تبسط سيطرتها علي شعبها والإلديين الا أنها في الحقيقة مـخـرتـقـة ومخترقة وده شوفناه بجلاء في نهاية الحلقة الأولي لما ظهر جاسوس جزيرة الفردوس –حد قال أنه جين زميل إيرين في السلاح- علي أرضهم وكمان الدول المحيطة بدأت تطور أسلحة تتصدي للعمالقة بتوعهم .. فالصورة العامة لهذة الدولة أنها نمر من ورق يعني .. لكنها مرتكزة بشكل أساسي علي الإرهاب والقوة الغاشمة .. المشهد اللي فالكو فيه بيعبر عن أفكاره وراينر بيهدده بأنه ح يلبغ عنه وكذلك مشهد راينر وهو بيحكي عن سكان جزيرة الفردوس فعائلة أضطرت تقفل الشبابيك لأحسن يكون حد بيتنصت عليهم أثروا فيا بشكل صعب جداً .. قد أيه الناس دي مغلوبة علي أمرها لدرجة أنهم مش عارفين حتي يعبروا عن نفسهم ولا يتكلموا .. مجرد ذكر جزيرة الفردوس أو أرث العمالقة بغير الـلـعـن والرواية الرسمية ممكن يقضي علي حياتك أنت وأهلك .. فعلاً المؤلف عرف يجسد روح الـفاشية بشكل عبقري جداً ويعيشنا أجواءها

الحلقة دي ظهر فيها رويث العملاق الفك والعملاق العربة اللي عرفنا أن وريثه وهو واحدة ست .. كمان عرفنا معلومة مهمة وهي أن زيك قدامه سنة أو أقل ويموت وأنه قرر خوض عملية إستعادة العملاق المؤسس قبل ما يورث قواه لأخو فالكو الكبير .. كمان برضو ظهر لأول مرة في المسلسل العملاق ذو المطرقة الحربية .. ظهر أسم بس ودار حديث عن العائلة المالكة لقواه بس كان حديث مقتضب

الحلقة مفيهاش أحداث كتير لكن فيها شئ مهم وهو الإبحار أكثر وأكثر في عالم الإلديين ودولة مارلي ورسم خطوط أوليه لمستقبل السلسلة .. محدش لسة من أبطال المسلسل ظهر –ما عدا واحد وكان مفاجأة الصراحة- لكن أتوقع أن قريباً ح تحصل الصاعقة وح نلاقيهم فوق دماغنا

منتظرون بشغف

Attack on Titan S4 I - Epi 1

Attack On Titan

S4-Final Season, Epi 1

قبل ما أقول أي كلمة بس حابب أسأل الشباب اللي بيصيحوا علي جودة الحلقة من أمبارح بليل .. لما الصياح؟! .. ما الكلام حلو أهه .. وبعدين الصبر فضلوه ع الصياح

أنا بالنسبة لي عودة "هجوم العمالقة" في حد ذاتها مسألة فخمة وتستحق الإحتفال .. ده بداية الكلام كدة .. فوق كدة الحلقة كأحداث وسرد ورسم وأكشن دسمة ومشوقة والشغل فيها عالي .. شئ جميل الحقيقة

العيب الوحيد في الحلقة هو إستخدام الـ CGI .. بصراحة ملوش لازمة وبيفكرني بالتجربة المأساوية بتاعة "بيرسيرك" في 2016-2017 .. بجد أتمني يخفوا منه ونقضيها أنيميشن بس 

الحلقة بقي في حد ذاتها رايقة أوي .. وخلينا نقول #Spoilers #حرق من باب الإحتياط:

 الأحداث بتدور بعد 4 سنوات من معركة السور اللي بين كانت بين "جيش مارلي" بقيادة زيك وشعب الحصن أو جزيرة الفردوس زي ما ح يبقي أسمها بعد كدة .. المعركة اللي نهايتها غيرت وجه المعركة تماماً .. أولاً شعب الحصن بقي عنده دلوقتي 3 من العملاقة التسعة "المهاجم، الطويل، الأنثي-أسيرة" + أنهم عندهم "هيستوريا" ودي من السلالة الملكية وإيرين بيحمل دماء العملاق الرئيسي ... ثانياً وده الأهم سكان الجزيرة أو الحصن فهموا حقيقة القصة والصراع اللي داير حوليهم وتاريخهم الحقيقي .. طبعاً الحلقة ما ورتناش لسة أيه اللي حصل لسكان الجزيرة بعد 4 سنوات بس يبدوا أن سكان الجزيرة بقي ليهم جواسيس في بلاد المارلي .. الشخص اللي ظهر في أخر الحلقة أظن هو "إيرين" نفسه بس متخفي

ثالثاً دولة المارلي أتسربت أخبار فقدانها لأتنين من العمالقة لأعداءها وفشل عمليتها علي الجزيرة وده تسبب في دخولها لحرب ضروس .. وهو ده محور أحداث الحلقة

الحلقة بتدور ماشية في 3 خطوط .. الخط الأساسي واللي خد مساحة أوسع هو الحرب واللي عبرها بيتم تلخيص أهم الأحداث اللي دارت من لحظة إنتهاء الموسم الثالث

الخط الثاني هو صراع شعب مارلي والإلديين أو شعب العمالقة .. طبعاً كنا خدنا فكرة عن الموضوع ده من مذكرات أبو إيرين في الموسم اللي فات لكن هنا بنتعمق فيه أكتر وبنشوف نظرة مارلي للإلديين عاملة إزاي ونظرة الإلديين لنفسهم ولسكان الجزيرة وأيه الدافع اللي بيخليهم يحاربوا في صفوف جيش الدولة اللي بتضطهدهم وضد أبناء جلدتهم .. هما شايفين أن العمالقة دول سبب شقاءهم وأن نجاتهم ح تكون عبر القضاء عليهم تماماً 

الخط الثالث هو المستقبل ومصير قوة العمالقة .. طبعاً برضو عرفنا أن اللي بيكتسب قوة العملاق بيعيش لـ 13 سنة فقط وبناء عليه المارلي بيدوروا علي من يرث قوة العملاق المدرع من راينر .. وشوفنا الأطفال الأربعة المرشحين لخلافته .. كذلك شوفنا العملاق الفك الجديد اللي ورث القوة من "ييمير" بعد ما تم إعدامها زي ما ح يتقال بعد كدة .. وأيضاً شوفنا أزاي الدول والتحالفات الدولية الأخري أبتدت تطور تسليحها تحديداً الموجه ضد العمالقة وهو ما يشكل أزمة وخطر علي شعب مارلي وقوتهم اللي كانوا بيتفوقوا بيها علي الشعوب الأخري

الحلقة فجرت مفاجئات كتير وطرحت أسئلة أكتر .. أيه مصير إيرين -اللي فاضله 4 سنوات ويموت- وسكان الجزيزة؟ يا تري شعب مارلي ح يعمل أيه ضد سكان الجزيرة لإستعادة القوي المسلوبة منه خصوصاً بعد إنتهاء الحرب؟

كمان الطفل فالكو قال جملة غريبة .. قال أنه شاف نفسه بيحارب بالسيوف ضد العمالقة .. وهنا ح نقول #حرق تاني

هو اللي أنا فهمته من المانجا أن العملاق المهاجم غير قواه الجسدية عنده القدرة علي السفر عبر الزمن والتأثير علي الشخوص في الماضي والمستقبل وده ح يظهر في المعركة الأخيرة .. فهل ممكن يكون إيرين من المستقبل أو حتي من الحاضر بيتلاعب بالولد ده عبر قدراته؟! .. محدش عارف

المهم الحلقة عظيمة وفي إنتظار القادم

Attack on Titan S3 II

Attack on Titan

S3, P2, Epi 13-22 Finale

والله الواحد صعبان عليه يصدق أن الجزء ده خلص

أقوي جزء في المسلسل كله .. أقوي حتي من الجزء الأول من الموسم ده نفسه .. كمية المفاجاءات والمعارك الملحمية والأكشن العالي المثير والحماسي والرسومات القوية والأجواء الدرامية المائلة للسواد وملتفحة بالكأبة .. كل دي عوامل خلقت الحالة العبقرية دي

فعلاً أنت بتشوف الحلقة وأنت شغوف تعرف أيه اللي ح يحصل بعد كدة لآنك عندك ثقة عمياء -حتي لو مش قارئ المانجا- أن في صدمة أو مفاجاءة جديدة في إنتظارك أو تطور للشخصيات أو معلومة جديدة ح تتقال تكشف جزء من غموض الحالة اللي أحنا بصددها أو تبينلك جزء كان خفي أو مخدتش بالك منه أو تربط شراذم وشظايا المعلومات اللي عمال تجمعها بقالك سنين من يوم ما أتذاع المسلسل ببعضها وتديك سياق منطقي وقصة مفهومة تقدر بيها تستوعب هذا العالم الغريب والغامض بظواهره وحيثياته الغير عادية

طبعاً بدون حرق ولا خوض في أي تفاصيل بأكررها وضميري مستريح أن ده أفضل جزء في المسلسل حتي الأن لكن بناء علي اللي شوفته في المانجا ح يكون في ما هو أقوي وأجمد بس الأهم أن الرسم والإخراج يساعدوا علي أن الأحداث المثيرة دي تخرج علي الشاشة بشكل لائق

بناء علي مشهد النهاية في أخر حلقة فالموسم الأخير من المسلسل ح يتذاع 2020 دون تحديد موعد بعينه لآذاعته .. ده يدينا كذا إشارة كدة .. أولاَ أن المانجا ح تنتهي قريب يعني غالباً علي أول السنة الجاية ح تكون خلصت .. ثانياً ده ياخدنا لفكرة تانية وهي طيب المانجا ح تخلص علي أيه؟! .. أنا تقريباً متوقع النهاية من دلوقتي بناء علي اللي شوفته وقرأته لو اللي في دماغي حصل مش عارف هل دي ح تبقي نهاية عظيمة بل قد تكون الأولي من نوعها في تاريخ الأنمي ولا ح تبقي غير مرضية بالذات لكتير من الناس اللي غاوية الإنتصار الحاسم للخير .. مش عارف لكن خلينا ننتظر ونشوف

لكن الحقيقة في حاجة معينة في النهاية لو حصلت أنا ح أحترم الرجل مؤلف المانجا دي فشخ وهي أنه ما يفسرش نشأة العمالقة ولا يدي حتي أي إشارة لحقيقة تاريخهم ويأكد علي الفكرة اللي قالها علي لسان "البومة" .. الا وهي أن لا وجود للحقيقة المطلقة ولا الرواية الصحيحة بنسبة 100% وأن كلها وجهات نظر ورؤي من زوايا مختلفة .. بكدة ح يدي المسلسل عمق كبير ويخلي الموضوع أكبر من مجرد قصة العمالقة والفانتازيا المتعلقة بيها

أخيراً الإعلان بيوحي أن الموسم الجاي ح يبقي زي الموسم ده طويل وممكن يتقدم علي أجزاء .. لأن الأحداث كتير الصراحة فصعب أنها تتقدم علي موسم واحد .. منتظرون ومتحمسون ❤️

Attack on Titan S3 I

Attack on Titan

S3' P1, Epi 1-12 Finale

عظيم عظيم عظيم .. الموسم الأقوي في رأيي وقد تجاوز معظم أخطاء الموسم الثاني وعيوبه

الموسم ده لعب نفس لعبة الموسم الأول .. أحداث مثيرة وشيقة للغاية، شخصيات جديدة جذابة وقوية، كشف غموض بعض أحداث الماضي من غير متوقعة، أحداث خارج المتوقع تماماً، نهاية مركبة وإشارات ذكية ومرعبة لكا سيحدث مستقبلاً، أخيراً طرح جيد للعديد من الإسقاطات الواقعية والتاريخية والأفكار ضمن سياق القصة اللي كان أبرزها فكرة الشك ونسبية الحقيقة وتدمير ثنائية الخير والشر ورؤية العالم من منظور الضرورات وصراع القوي

الجميل والجديد في الموسم ده أن القصة بعدت فكرة الصراع المباشر مع العمالقة ودخلت في صراع جديد أكثر إثارة وهو صراع البشر مع بعضهم والصراع علي السلطة وإستغلال البشر لبعضهم .. المحور ده دار في دماغي طول الموسمين اللي فاتوا وطرحت علي نفسي تساؤلات كتير حولين ح يكون أيه موقف سلاح "الكشافيين" من النبلاء والإمبراطور بالذات أنهم بيشكلوا عائق في طريق إنتصار البشرية وبقاء الوضع علي ما هو عليه ملائم ليهم أوي ... وقد جاءت الإجابة في هذا الموسم

أنا ما قدرتش أنام بشكل عميق الحقيقة وأكتفيت بكام ساعة وقومت أكمل الموسم لحد ما خلصته من كتر العظمة ... وتقريباً مش ح أقدر أنام خالص من اللي شوفته تحديداً في النهاية .. منتظر الجزء الثاني بغباء

Attack on Titan S2

Attack on titan

S2 , Epi 1' 2' 3' 4' 5' 6' 7' 8' 9' 10' 11' 12 Finale

موسم ثاني ملئ بالقوة والإثارة لكن مازالت الأمور تتسربل برداء الغموض

الموسم عجبني جداً وفي كمية متعة وإثارة كبيرة .. للأسف لم يحمل توضيح للأمور زي ما كنت أرجو لكنه حمل جرعة إثارة وتشويق عظيمة وحمسني للمزيد من هذة السلسلة 

لازالنا مش عارفين ايه السر وراء العمالقة وازاي غزوا الأرض .. والحقائق اللي تكشفت في الموسم الثاني دي ح توصلنا لفين .. لازالت الأمور يكتنفها الغموض

يمكن الموسم الأول يكون أكثر جودة في ناحية الدراما من الموسم ده لكن ده لا يمنع انه موسم عظيم .. مشكلته بس تكمن في انه كان أقل في المدة وجودة الرسم فيه قلت شوية والتمهيد لبعض الصدمات درامية القوية كان ضعيف شوية .. لكنه موسم مثير وعبقري

في إنتظار المزيد

Attack on Titan S1

Attack on Titan
S1 , Epi 1-25 Finale

تجربة رائعة ووجبة دسمة للغاية وعود حميد لعالم الأنمي

"في ذلك اليوم تذكرت الإنسانية أن الرعب هو ما يتحكم بهم .. وذل بقاءهم داخل قفص"

الجملة واللي ذكرت في مطلع الحلقة الأخيرة من الموسم الاول تقريباً لخصت لب المسلسل .. صراع الإنسان ضد الخوف والمجهول .. المفاضلة ما بين أمن لن يدوم للأبد ومغامرة محفوفة بالمخاطر والموت فيها عالي النسبة .. القصة بتدور بعد ٢٠٠٠ سنة من وقتنا الحالي يعني في الالفية الرابعة في أجواء مليئة بالدمار وتميل للبدائية .. قبل ١٠٠ سنة من أحداث المسلسل ظهرت علي كوكب الأرض كائنات خطيرة تسمي العمالقة قضت علي معظم البشرية ومن تبقي منهم أحتمي في داخل حصن واسع المساحة محاط بثلاث أسوار المسافة ما بينهم تقدر بالأميال .. أصبح هذا الحصن هو الملجئ الوحيد للبشرية .. مع مرور الزمن وعجز العمالقة عن إختراق الحصن بيعتقد الناس أن الوضع ازلي وانهم في امان للابد بيستقر نظامهم علي هذا الأساس لدرجة إستنكارهم لأي محاولة للخروج خارج السور وعبادة البعض للسور .. في يوم ما بيستطيع العمالقة إختراق أول سور لتبدأ مرحلة من الخطر الحقيقي وتهديد الوجود البشري

المسلسل بيحمل أفكار كتير وتساؤلات حولين الخوف ومفهوم الإنسانية والموت وفكرة التضحية والصداقة .. كلها حاجات بتظهر بشدة في الحوار وبوضوح شديد .. لكن اللي حابب أشير إليه هو أن المسلسل بيحمل إسقاطات عدة من التاريخ الحديث عموماً والتاريخ الياباني خصوصاً إشارات لعزلة اليابان في نهاية القرن التاسع عشر ومرحلة التطور والخروج للعالم .. إشارات وتأثر كتير بأحداث الحرب العالمية الثانية .. كلام كتير حولين الطبقية والفوارق ما بين الطبقات ... مسلسل ثري ودسم فعلاً ومحتاج تحليل تفصيلة تفصيلة والتدقيق فيها

القصة عبقرية ومشوقة للغاية والرسم عبقري .. يمكن في البداية القصة كانت مهتزة لكن مع الحلقة الثالثة مثلاً دخلنا في المعمعة والحماس ... محاولات نسخ فكرة أو أجواء المسلسل ده زي كابانيري وتيرافورمرز كلها فشلت فشل ذريع لأنه رغم تعقيداته لطيف ومليان حماس وأفكار وأحداث سهلة الهضم والتركيز علي الدراما والإنسانيات أكثر من الأكشن مديله هالة من العظمة

تجربة عظيمة للغاية وفي إنتظار المزيد

Oldboy "Manga"

Oldboy

Ch 1-79.5 "End"

ما أقدرش أحكم علي العمل ده بدون ما تلقائياً أعمل مقارنة ما بين المانجا والمعالجة السينمائية .. يمكن المعالجة ساعدتني في تجاوز فكرة المقارنة لأنها ببساطة ملهاش علاقة بالقصة تقريباً غير في التفاصيل الأساسية والخطوط الأولية للقصة لكن في التفاصيل اللي جوا والمحور اللي بتدور حوليه القصة الموضوع مختلف تماماً والعملين ملهمش علاقة ببعض 

في رأيي أكتر حاجة جذبت "بارك تشان ووك" في القصة هي رحلة البحث عن الماضي المجهول اللي أقرب للرحلات التراثية بتاعة البحث عن الكنز أو سر الحياة والخلود وإلي أخره من الأشياء الأسطورية .. حاجة كدة فيها من ريحة رحلة أليس في بلاد العجائب .. الرحلة الغامضة المتقفلة زي الدومينو وكل ما تقول خلاص لاقينا باب الخروج تلاقي نفسك داخل في دوامة جديدة وطول الطريق بتقابل شخوص وحالات وعلاقات غريبة وعجيبة تزيد الحيرة وتزيد التية .. رحلة أشبه بالمتاهة أو البازل بتبدأ من حالة تشظي تام والحقيقة بتتضح مع وضع أخر قطعة في مكانها واكتمال الصورة 

لكن الحاجة اللي ما عجبتوش واللي ما عجبتنيش انا كمان هي النهاية أو السبب وراء هذة المأساة .. ولذلك هو عمل اللي عمله وأقتبس من التراجيديا الاغريقية محور أقوي من كدة ويتماشي مع اللون السينمائي اللي بيقدمه 

كل حاجة في القصة دي هايلة من أول الرسم لرحلة البحث والغموض والكتابة ما عدا ٣ حاجات 

أول حاجة المط في بعض الفصول والمراحل من القصة .. تاني حاجة بعض الشخصيات والأحداث اللي ظهرت فجأة في النص بلا داعي أو بدون سابق إنذار كان ممكن إستبدالها بحاجات أقوي أو تقديم نفس الشخصيات بس بدري شوية أو بطرق مختلف أكثر منطقية 

ثالث حاجة هي النهاية .. القصة بتتمحور حولين فكرة الوحدة وفردتلها مساحة علي طول القصة عشان المتلقي يقدر يتفهم مدي الوحشة والوحدة اللي بيعيشها طرفي الصراع .. الكاتب ساب حتة الوحدة بتاعة شرير القصة لخيال المتلقي لكنه رماله كام دليل وبرهان علي مدي شقاء ووحدة هذا الرجل والحالة اللي وصتله للي هو فيه .. ولكن 

هل لمجرد أن الشرير في طفولته قدر يستوعب مدي وحدته بسبب تعاطف بطل القصة معاه، هل ده يصلح كمبرر لكل هذا الإنتقام الشنيع؟! 

فاهم ان الموضوع فيه أبعاد تانية منها الحسد والحقد وازمات الطفولة اللي سيطرت علي الشرير .. بس برضو مش مبرر كافي في رأيي 

 بشكل عام انا مبسوط بالتجربة اوي بس الحلو كالعادة ما يكملش .. لكنها تجربة فخمة الحقيقة وقوية لأنها مش قصة شونين من اللي متعود أقرأها لا هي قصة سينين للبالغين فيها عنف وغموض وعقد قريبة أشبه بالأدب البوليسي 

Slam Dunk: Ch 1-72

Slam Dunk
Ch 1-72

قبل الأسترسال في القراءة لابد من وقفة ونظرة

سلام دانك هو درة من درر التسعينيات التي يزيدها القدم بهاءً .. تقريباً مفيش طفل تابع سبيستون في بدايتها لم يتعلق بهذا العمل .. بس للأسف الحلو ما يكملش وللأسف هنا الحلو ما كملش بسبب ان المانجا وقت إذاعة المسلسل كانت لسة شغالة ولم تكتمل مما استدعي أنه يتم إيقاف المسلسل عند حد معين وفضلت ٢٠ سنة عايز أعرف هو فريق الصقور عمل ايه في الأخر؟ وهل كسب البطولة ولا لا ومين الفرق اللي قابلها؟! لذلك كان ولا بد اني أقرأ المانجا والأفضل لو من البداية وهو ما حدث

أحب بس مبدأياً أشيد بدبلجة مركز الزهرة للمسلسل لأنها بصراحة أنقذت الأطفال من صعوبة كبيرة في نطق أسامي الشخصيات والأماكن.. فعلاً التعريب كان حل مناسب للغاية للمسلسل ده

تقريباً سلام دانك هو القالب الكلاسيكي لشونين الرياضة .. مرتكز أولاً علي شخصية رئيسية بتخوض مغامرة جديدة مع رياضة لا تفقه فيها أي شئ .. غريمه نقيضه تماماً سواء في المهارة أو الدوافع لكن الأرضية المشتركة ما بينهم حب المنافسة والتحدي .. لو حد شاف "هايكيو" أو قرأ المانجا ح ياخد باله أن واخد نفس البداية بالظبط .. بس الفرق أن هيناتا كان عنده خلفية عن الرياضة قبل كدة .. وبالمناسبة هو ده قالب رسخه من قبلهم "كابتن تسوباسا/ماجد" .. الجديد في سلام دانك كان حتة أن البطل عديم الخبرة وبياخد المتلقي في رحلة لتعلم كورة السلة بمهاراتها وقوانينها.. هو يمكن واخد العنصر ده في القصة من الأكشن شونين ودي حاجة ح ارجعلها قدام شوية

ثانياً مرتكز علي حتة الروح الجماعية والحلم المشترك ودي تيمة متكررة في الشونين عامة بالذات لو بنتكلم علي عمل بيدور حولين رياضة جماعية زي كرة السلة هنا

ثالثاً هو عمل إجتماعي عن حياة الطلاب والشباب عامة .. مركز أوي علي الحياة العاطفية للطلبة في مرحلة الثانوي وجموح الشباب ومجموعات الأباضيات لدرجة أنه مخلي العنصرين هما منطلق المغامرة كلها

رابعاً وهي النقطة اللي أثرتها مسبقاً هو مسلسل أكشن .. لا فعلاً طريقة رسم التمرين والمباريات وحتي الخناقات بين الشخصيات فيها إثارة وتشويق وعنف يخليها زيها زي اي سلسلة قتالية .. يعني بيتهيألي لو الصانع كان قرر يعمل المسلسل عن الجودو كان ح يبقي جميل وملحمي زي سلام دانك.. وده باين أوي في فيجابوند

الرسم وتسلسل الأحداث حول كرة السلة ومبارياتها إلي حرب ومعركة ملحمية أنت بتاخد فيها صف فئة مقابل فئة وبتندهش وتفاجئ وبتبقي قاعد طول الوقت منتظر الشخصيات تكسر المألوف وتصدمك بحاجة برة الصندوق .. شخصية ساكوراجي/حسان تحديداً

لكن ده مش معناه ان السلسلة جادة أبداً هي كوميدية إلي درجة الهزل وفيها مبالغات ومواقف كوميدية مدية الحالة ككل روح مرحة

ولأن السلسلة أترسمت في التسعينيات فهي واخدة الأسلوب والشكل الفحولي الرجولي في رسم الشخصيات الرئيسية .. تحس الأبطال كلهم خارجين من فيلم أكشن .. كلهم بنيانهم قوي وشكلهم رجولي ودي كانت سمة الرسم وقتها علي عكس ما سبق وما تلي ذلك

مقدمة القصة أنتهت بإكتمال نصاب الفريق والمرحلة القادمة هي بداية الرحلة نحو الهدف الأساسي والرئيسي للقصة وهو بطولة الجمهورية.. مكملين