How I met your mother: S6

How I met your mother
S6, Epi 1-24 Finale

من المشاكل اللي وقع فيها فريندز في بعض المواسم بشكل مقصود أو لظروف  خارجة عن إرادة الكاتب -زي مرحلة الإدمان بتاعة ماثيو بيري- واللي بتقع فيها أعمال كتير بشكل عام بالذات لما بتطول هي أن شخصيات الصف الثاني أو الشخصيات الثانوية إن صح التعبير بتتوقف عن التطور وبيبقي دورها هامشي أو مجرد مساعد للشخصيات الرئيسية .. وهو ما لم يقع فيه هذا المسلسل

الموسم ده بنسبة ٧٥% كان مركز مع مارشل وليلي ومع بارني.. روبين خدت أقل مساحة فيهم وده كان قرار جيد نوعاً وتيد ما أبتداش دوره يكبر الا مع نهاية الموسم

لو كان ممكن نحط عنوان أساسي للموسم ده فهو "أهلاً بك في عالم الكبار" .. المرحلة العمرية اللي بننسلخ فيها من الطفل اللي جوانا وتنتهي فيه علاقتنا بالمراهقة وإعتمادنا علي أهلنا وذوينا ونصبح جزء من مجتمع الكبار

نظراً المرحلة العمرية دي والتحول ده تراجيدي شوية فلذلك كان لازم الموسم ده يبقي جاد ومظلم شوية في بعض حلقاته وتدور فيه أحداث مأساوية شوية وحزينة .. وبناء عليه برضو كان من البديهي ان الموسم يتناول مواضيع خطيرة زي الموت .. حتي لو تناولها بسخرية يبقي موضوع خطير وغاية في القسوة

الخط بتاع موت والد مارشل والخط بتاع سعيه لأنه يبقي أب وخط علاقة بارني بوالده اللي عرفه بعد اكتر من ٣٠ سنة .. هي كلها خطوط بتكمل بعضها وبتكمل الصورة الكبري للموسم ككل اللي قلناها من شوية

مرحلة النضج الكامل أو تجاوز الشباب المكبر والمراهقة اللي بيتحول فيها الإنسان من مجرد ريشة في هوا لكيان بيحاول يثبت أقدامه علي الأرض .. اللي بيكتشف فيها الإنسان أن وقت الجموح قد يكون أنتهي وحان السعي للاستقرار أو تأمين المستقبل بشكل ما وتقبل مسألة الفقد والتخلي زي فقد ناس اعزاء بفعل القدر أو التخلي عن نمط حياة معين أكثر حرية ومساحات من اللامسؤولية في مقابل الحصول علي مكتسبات أخري جيدة للمستقبل

في المقابل تيد بيستمر في حماقاته وتجاربه المسمومة تقريباً تيد وروبين الصناع أصر أنهم يكونوا أخر اتنين ينضجوا في المجموعة عشان يستعرض إمام المشاهد مدي حماقة وسخف أختيارات الناس -عادة- في فترة الشباب .. وفي حالة روبين أظن أنها ح تكون العبرة أو النهاية الأكثر حزناً في الشلة .. أظن هي "جوي" بتاعة المسلسل ده

Bleach: Thousand-Year Blood War "Cour 3"

Bleach: Thousand-Year Blood War
P3, Epi 27-40 Finale

يمكن رغم أن الجزء ده من القصة يعتبر إنتقالي الا أنه خطير ومهم ومثير لأسباب كتير .. إنتقالي هنا بمعني أنه بينقل القصة من مرحلة لمرحلة أصعب وأعلي لكن مش بيحسم حاجة .. وعلي الرغم من أن الجزء حصل فيه تغيرات جذرية كتير ومعارك قوية بس لسة الحسم والمعارك الأقوي علي الإطلاق لسة جاية في السكة .. لذلك حتي نلاحظ أن ده يمكن أقل ظهور لإيتشيجو في القصة كلها وكذلك المجموعة اللي حوليه بما فيهم إيشيدا .. وان الظهور الأبرز ليهم في الجزء كان في بدايته لإستكمال أحداث الجزء اللي فات والنهاية عشان شرح دوافع إيشيدا والتمهيد للنهاية اللي في رأيي ح تكون قوية وفي تسريبات أنها مختلفة نوعاً ما عن المانجا

ليه الجزء ده خطير ومهم ومثير؟

مثير لأنه شهد معارك وظهورات من البداية للنهاية قوية وحماسية للغاية زي ظهور إيزن و جوريميجو لحد كيرا والفيزورد في أخر حلقة .. ومن حيث المعارك فحدث ولا حرج .. معركة كيوراكو ورسول يوهاباخ والظهور الأول للبانكاي بتاعه لمعركة مايري وذراع ملك الأرواح وكذلك معرك يوريو ورينجي .. لا الأكشن كان بخير والجرافيك كان عالي جداً في الموسم ده

الأخطر في الجزء ده كان الأحداث والمعلومات اللي تم الكشف عنها والمفاجئات اللي تفجرت في وسط التطورات المثيرة اللي كانت عمالة تحصل .. يعني في رأيي التطور الأقوي في القصة لما يوهاباخ أعاد تشكيل قصر ملك الأرواح من أول وجديد بحسب رؤيته هو طبعاً ده بعد ما قتله بإيد إيتشيجو

المعلومات في رأيي كانت هي أخطر شئ في القصة .. دافع إيشيدا اللي خلاه يعمل اللي هو عمله ومذكرات جده .. سيف عائلة ناناو"أنا كنت مستني الحلقة دي من يوم ما قرأت عنها في المانجا" .. قصة "نيمو" وقدراتها وعلاقتها المريبة بمايري .. لكن في رأيي المعلومات الأهم في الجزء ده كانت الخاصة بـ"ملك الأرواح" وطبيعته لأنها وضحت جزء كبير من دوافع يوهاباخ وكذلك سكواد 0 وليه الحرب دي والحرب اللي كانت من ألف سنة قامت أساساً

قصة بليتش لا يخفي علي أحد إنها قصة فيها جانب ديني كبير متأثر بالبوذية والشينو والتراث الديني في اليابان من حيث الرؤية للموت والأساطير اللي حولين الأرواح ومصيرها والعالم الأخر وحتي في القصة نفسها فكرة أختيارات الشخصيات وبنائهم أفكار زي الين واليانغ ولوصول للإستنارة والتصالح مع الذات والعالم موجودة طول الوقت .. بيزيد في الأرك الأخير من القصة جانب جديد بينعش القصة ويديها بعد جديد .. بيدخل علي الخط تأثر بالتراث الديني المسيحي باين أوي في بناء شخصية يوهاباخ وقصته

يوهاباخ هو مقلوب شخصية المسيح أو هو دمج لقصة المسيح مع المسيخ الدجال في جانب أو بعبارة أخري "كوبو" بيحط إفتراض ان لو كان المسيح رجع بعد الصلب –كما في الرواية المسيحية- وقرر أنه ينتقم من اللي حصله كان ممكن يعمل أيه .. هو مستند علي كلمات المسيح في الأنجيل وهو علي الصليب

" إلهي إلهي، لماذا تركتني؟" (متى 27: 46)

يوهاباخ مش زي الأرانكار ولا الشينجامي ولا أي عدو ظهر في القصة عايز يسيطر علي العالم أو يخلق جنس جديد أو يقضي علي مجتمع الأرواح بس وخلاص
لا هو عايز ينصب نفسه "إله" ويعيد تشكيل هذا العالم من أول وجديد .. رؤية يوهاباخ للعالم تتلخص في أنه شايف أن التوازن وهم والعدالة خرافة لا يمكن أن تحدث في ظل وجود هذة العوالم المتباينة "عالم الأرواح، عالم الهولو، عالم البشر" .. فهو بيؤمن بأن الحل في إفناء هذة العوالم وإعادة الوجود لوضع السكون زي ما كان في بداية الخليقة

عشان كدة أنا شايف ظهور يوهاباخ في بداية القصة كـ"زعيم فاشي" كان عبقري للغاية لأن الفاشية في جانب مهم منها حركة "عدمية" فكرها قادم علي إفناء الأخر من أجل السلام أو الأمان أو أياً يكن الشعار اللي بترفعه الحركة

دوافع كمان سكواد 0 كانت شريرة لأنها كانت تتلخص في إستخدام إيتشيجو كبديل لملك الأرواح بسبب تكوينته وقدراته وسلبه إرادته وحياته عشان الحفاظ علي العالم ومجتمع الأرواح بكل مساوءه .. خطة حقيرة الصراحة بالذات أنها كانت ح تتم بالخداع والتحايل

في برة إسقاط ذكي في القصة علي تاريخ اليابان مع المسيحية والغرب .. المسيحية أول ما وصلت اليابان وصلت علي إيد البحارة البرتغاليين في الأساس وتم مواجتها بشكل عنيف جداً .. اللي شاف فيلم "الصمت" لسكورسيزي أو ماساهيرو شينودا أو اللي شاف "ساموراي شامبلو" أكيد عارف القصة وأن أحد تداعيات القصة دي هو الإنغلاق اللي عاشت في اليابان بعد كدة لعشرات السنين خوفاً مما يفد إليها من الخارج لحد ما راحوا هما للخارج بعد كدة برجليهم وحصل اللي حصل في الحرب العالمية الثانية واللي أدي لأن الغرب جه المرة دي ولكن مدجج بالسلاح وسيطر علي كل شئ وأعاد بناء الثقافة والمجتمع في اليابان .. نوعاً ما برضو

معنديش شك ولو للحظة أن "تيت كوبو" كاتب المسلسل هو رجل قومي بشكل أو بأخر وأنه علي الرغم من إنتقاده للمنظومة القيمية بتاعة حقبة "أيدو" والحقبة الفاشية بعد كدة الا أنه رافض تماماً للهيمنة الأمريكية علي اليابان واللي حصل بعد كدة .. ده أنا لامحه في القصة بين السطور .. يوهاباخ بيرمز للوافدين من الغرب عشان كدة شكله وتكوينه كلها بتنتمي للثقافة الأوروبية تماماً

يمكن أكون بأفور شوية في الرؤية دي بس أنا عندي يقين أن كوبو شخص بينتقد القيم القديمة بس مش عاجبه اللي حصل بعد الهزيمة بشكل أو بأخر وده واضح أوي في القصة

 بصراحة الموسم ده كيفني أوي وزعلان أني لسة ح أستني كذا شهر علي ما يرجع المسلسل بفصله الأخير

Blue Lock: S2

Blue Lock
S2, Epi 1-12 Finale
 

بعيداً عن الأعمال القديمة .. أنا الأعمال الجديدة بالنسبة لي بتنقسم لأربع أنواع .. نوع بيفصلني من أول مشاهدة فبأركنه بنية الرجوع ليه في المستقبل .. نوع بعد ما بأمشي في شوية بأحس أني عايز أخد هدنة وأوقفه لكن ح أرجعله في المستقبل"جوجوتسو كايسن و سباي × فاميلي حصل معاهم كدة" .. عمل أحداثه أو فكرته بتشدني أوي لدرجة أني بأبقي عايز أعرف القصة ح توصل لفين وح تخلص علي أيه "موب سايكو وأتاك أو تايتين" .. وفي عمل أنا بأتعلق بيه عاطفياً بشكل غريب وبأحبه لدرجة أني حتي لو نفضتله شوية أو أحداثه كان فيها مشكلة بأركنه لكن بمجرد ما أرجع أتفرج ألاقي نفسي شغوف وبأتفرج بعنف .. ده حصل مع عملين بالتحديد .. ماي هيرو والمسلسل ده

 لدرجة أن صممت شخصية رين و ساي ومعاهم بارو و أيساجي في بيس 2006 –بالإستعانة بكتاب المعلومات بتاع المسلسل- ولعبت بيهم في الدوري الإيطالي

 المسلسل ده أسباب حبي ليه كتيرة أولها طبعاً أنه بيتكلم عن الكورة من وجهة نظر نفسية وتكتيكية ويمكن ده أكتر شئ جذبني للموضوع لأن في أنميات رياضية كتير عدت عليا لكن مفيش أنمي منهم علق معايا غير كابتن ماجد وسلام دانك وده .. الدراما كمان ليها عامل كبير في الموضوع .. يمكن هي العامل الأكبر بعد حبي للكورة

 الموسم ده قائم علي سردية "هابيل وقابيل" الصراع الأزلي بين الإخوات اللي بيبدأ بغيرة بسيطة ليصل إلي العداوة ورغبة كل طرف في أنه يقضي علي التاني عشان يثبت أنه صح .. المرة دي الإغواء كان لقب أفضل مهاجم شاب في اليابان والأخين رين وساي اللي بيسردوا قصتهم ضمن أحداث المسلسل بيوصل بينهم الصراع لذروته وبيبقي واضح ومباشر خلال مباراة فريق الشباب مع فريق بلو لوك

 لكن لأن المؤلف صايع عمل خدعة درامية جامدة أوي أنا أنتبهتلها في الموسم اللي فات بس مكنتش متوقع أنه ح يختمها بالشكل الملحمي ده

 من الموسم اللي فات وأنا ملاحظ ان "إيساجي" علي رغم من أنه بطله القصة الا أنه متواري في الظل طول الوقت ودايماً في حد واخد اللقطة منه .. ده أتبروز أوي في الحلقات الأول من الأرك ده .. الا أن الحقيقة المؤلف كان بيبني بهدوء شخصية البطل ويطورها دون أن يهمل الشخصيات التانية .. في شخصيات خرجت من إهتمامه من الموسم اللي فات لكن في كذا شخصية كان مهتم أنه يبزرهم لأنهم دول اللي ح يساعدوا إيساجي علي التطور

 
في ظل إحتدام الصراع بين الأخين أيتوشي وكل فريق عايز يثبت قوته ومهارته كان طول الوقت إيساجي بيحاول طول الوقت أنه يبني إستراتيجيته وخطته عشان يقدر يخلي الأفضليه لفريقه .. لكنه في نفس الوقت كان عايز يبقي ليه اللقطة بتاعته لأن في النهاية زي ما دايماً بيتقال في المسلسل أنه كل لاعب بيلعب لذاته ولمجده الشخصي وبطريقته الخاصة

لما الصراع بين كل عناصر اللعبة وصل للذروة وخلاص المعركة بقت وجهاً لوجه بين ساي ورين .. فجأة الأتنين بيتهزموا والفائز والبطل الحقيقي للقصة بيثبت وجوده .. إيساجي بيبقي هو المنقذ اللي بينقذ فريقه في اللحظات الأخيرة .. البناء الطويل ده ثمرته نضجت ووالحصاد نجح في النهاية

هي كانت مغامرة فكرة أنك تبعد الأنظار عن البطل طول الوقت عشان تيجي في الأخر تفاجئ الجميع بهذة النهاية الملحمية .. طبعاً هي القصة هنا مفيهاش لا شرير مطلق ولا طيب مطلق وكل واحد فيه وفيه وليه دوافعه .. لكن كان لازم بطل القصة يبقي مميز مش مجرد رقم هامشي أوي شخصية مساعدة في الحدوتة

 ده كمان بينقل القصة لمستوي أعلي .. كدة بقي في لإيساجي أعداء جدد ومنافسين أكتر والأنظار بقت عليه بشكل أكبر .. كمان انت ما بتحسمش الصراع ما بين الأخوة ولا المتنافسين وبتقول أن الصراع ده أزلي وصحي في الإطار الرياضي

 أكتر حاجة حبيتها في القصة هي الحكايات الجانبية والشخصيات الثانوية وجذورهم .. حلو أن القصة ما تبقاش أحادية بل متشعبة وعاملة عالم خاص بيها

ان موسم رائع الحقيقة بالذات إستلهامات المسلسل من الواقع زي كورة إبراهيموفيتش الأسطورية وهدف بيرجكامب الطائر الشهير

Serial Experiments Lian

Serial Experiments Lian
Epi 1-13 "End"

من ساعة ما خلصت المسلسل وأنا عاجز عن التفكير .. كل ما أجي أحاول أجمعه في ذهني أحس بتشتت .. مش عارف أبلوره كدة في فكرة واحدة أو أقول أوله فين وأخره فين .. أظن ده من الأعمال اللي محتاجة تتشاف أكثر من مرة عشان يتم إستيعابها

لذلك اللي أنا ح أكتب هنا ده أفكار وإنطباعات جت في ذهني أثناء الفرجة لكن مش تحليل مفصل أو رأي نهائي في المسلسل

هو أول إنطباعين بدروا إلي ذهني وأنا بأتفرج علي أول حلقة تحديداً هما أن المسلسل بيتراقص علي حبل تيمة فوبيا التكنولوجيا والتاني أنه شبيه أوي ب"نادي الانتحار" بتاع سيون سونو.. يمكن الانطباع التاني طلع بعيد شوية بس مش أوي.. لكن الأول هو اللي طلع صحيح تماماً

الطفرة اللي حصلت في التكنولوجيا والتواصل من السبعينيات واللي بقي وصلت ذورتها في بداية الألفية مع ظهور المحمول والكمبيوتر والانترنت بعدهم عملوا لناس كتير صدمة وخوف .. لأن جمع المعلومات بقي أسهل وأصبح العقل الاصطناعي بيعمل عمليات معقدة من اللي كانت بتاخد من البشر وقت طويل ومجهود كبير وده خلي شكل الحياة عامة أختلف .. في ناس خرجت برة الزمن  لمجرد انها لم تساير هذا التطور والبشر كلهم تقريباً حياتهم اتقلبت تماماً .. ده المسلسل كمان مكتوب في ١٩٩٩ يعني قبل الذكاء الاصطناعي والاندرويد اللي هما الرعب الحقيقي

الرعب في العصر ده كان مصدره الأساسي الخوف من تغول التكنولوجيا علي حياة البشر لدرجة فقدانهم السيطرة عليها وتبقي هي اللي مسيطرة عليهم زي ما حصل فيلم ماتريكس كدة مثلاً

هنا المسلسل بيجسد هذا الرعب في صورة أكثر تعقيداً وإثارة للفزع .. أن الإنسان يوصل لمرحلة يبقي فيها الواقع الحقيقي هو الواقع الافتراضي بتاع عالم الأنترنت بينما الحياة الحقيقية تبقي هي الوهم والافتراض والمجاز

وهنا الكاتب بصياعة شديدة سرد هذة الفكرة ما بعد الحداثية الخطيرة في قالب أسطوري أو ديني بيحاكي قصة الخلق .. بقي في ألهة جديدة وخلق جديد وطوفان يدشن عصر جديد وميلاد أخر للبشرية في عالمها الجديد

في الجزئية دي المسلسل ساح مني شوية وبقيت مش فاهم حاجة غير شوية خطوة أساسية مجمعها بصعوبة .. وهو المسلسل رغم أنه مفيهوش أكشن وأحداث متسارعة بس في كمية أفكار وحاجات بتتقال تخلي عقل المتلقي يلف

وبعدين في جانب من المسلسل خطير ومهم لا يجب إهماله وهو الجانب النفسي والفلسفي .. المرتكز الأساسي للمسلسل قائم علي سؤال الوجود والماهية بتاع الجماعة الوجوديين .. بمعني هل الإنسان هو اللي بيحدد هويته عن طريق إختيارته ولا هي قدر مسبق لا مفر منه

ح نلاحظ أن السؤال فضل داير في وجدان البطلة طول الوقت بالذات أن هي كمان حالة مختلفة .. هي مصابة بإنفصام الشخصي لدرجة أن شخصيتها علي الأنترنت أو الشبكة بتطغي عليها وبتخرج عن السيطرة وبتوصل لمرحلة أنها عايزة تمحو وجود الشخصية الأخري تماماً وبيدخلوا في صراع حاد وشرس

بينتهي الصراع بأن الشخصية الواقعية هي اللي بتبقي عن طريق الحب أو هكذا نظن لأن بيتهيألي .. المسلسل في حتة كدة مثلية شوية بس جاية في سياق أفلاطوني فممكن محدش ينتبه لها أوي اللي هي علاقة البطلة بصديقتها

بعد كدة البطلة بتاخد قرار عدمي انا باحطه في المرتبة الثالثة بعد قرار شينجي في إيفانجيليون و إيرين في هجوم العمالقة ضمن أكثر القرارات عدمية في تاريخ الأنمي وهو أنها بتقرر تمحو وجودها من ذاكرة الناس وبالتالي من الحياة والواقع وتعيد صياغة الواقع بحيث تغير حياة كل اللي أشتبكوا معاها خلال القصة

الحتة دي مرتبطة بفكرة الذكريات وهي عنصر مهم أوي في الادبيات الوجودية عامة .. أن وجود الإنسان مرتبط بوجوده في ذاكرة الأخرين ولذلك العمر الحقيقي للإنسان مرتبط بمدي تذكر الناس ليه

في ظني ولو انا فهمت صح "لين" في الحلقة الأخيرة أصبحت إلهة العالم الشبكي بعد ما قتلت مدعي الألوهية اللي كان عايز يستخدمها .. لكنها شافت أن لو فضلت موجودة الناس ح تسعي مرة تاني أنها تستغلها وتستخدمها فلذلك فضلت أنها تعيد صياغة الواقع بحيث الناس تنسي وجودها تماماً عشان المأساة ما تتكررش تاني .. بينما هي بتاخد القرار ده بتحزن لأنها كدة مش ح يبقي لها وجود ولا ح تعيش حياة طبيعية زي اللي كانت بتتمناها لذلك بتبقي علي جزء من ذكراها داخل عقل صديقتها اللي بتحبها

وده يفسر مشهد النهاية لما قابلتها وهي كبيرة وسلمت عليها بس ما كانتش فاكرة هي مين دي بس عارفة أنهم يعرفوا بعض

العمل ده معقد ومتعب ومحتاج تركيز كبير وإعادة مشاهدة أكتر من مرة

How I met your mother: S5

How I met your mother
S5, Epi 1-24 Finale

التحول النوعي اللي حصل في طريقة كتابة المسلسل وفي الموسم اللي فات واللي خلته في رأيي شبه ساينفيلد بشكل كبير هل كانت إيجابية طول الوقت؟ في رأيي لا

في بداية الموسم انا حسيت ان الموضوع واعد وفي رغبة قوية في إستكشاف مناطق جديدة في القصة وحياة الشخصيات عبر أن انا كل شوية احطهم في مواقف غريبة أو أركز علي جانب شخصيتهم وعلاقتهم ما طرحتوش في الأول أو ألعب لعبة الاحتمالات وأحطهم سوا في علاقات جديدة زي علاقة بارني و روبين وأشوف ح توصل لفين .. ده حصل وفضل شغال شوية .. لكن مع الوقت الموضوع ترهل حبة

بمعني أني في لحظة كدة بعد إنتهاء علاقة الثنائي روبين و بارني حسيت ان الكاتب حد هدنة شوية عشان يفكر ح يعمل ايه في الشخصيات دي وح يوديها فين بالذات تيد بطل المسلسل .. لو حد ياخد باله ده أكتر لحد الأن تيد فيه تراجع و تواري في الظل فيه .. هو دخل فيه في علاقات وقصص بس في أحيان كتير مكنش هو الحدث الرئيسي في القصة .. ده في رأيي ضريبة لفكرة البناء الطويل لقصة تيد اللي بيتوج في نهاية القصة خالص .. ثانياً حيرة الكاتب حياله وحيال مصيره .. مبقاش عارف يعمل فيه ايه .. مش هو بس بالمناسبة

حتي بارني برضو  حصل معاه نفس القصة .. لدرجة أن في حلقة هو تقريباً موجود فيها كمعلق ع الأحداث بس مش أكتر ومكنش ليه دور حقيقي

الكاتب خد وقته في البناء لمستقبل الشخصيات عبر تكتيك المواقف المنفصلة .. كل حلقة بتحكي موقف شكل وكل حلقة بيطلع بإفتكاسة جديدة واحياناً بيزق شخصيات جديدة زي ابو ليلي و زوج أم تيد وخلافه عشان يطرح شئ جديد غير مؤثر في سردية المسلسل ككل ولا علي مستقبله بشكل عام لحين ما يحدد هو شكل هذا المستقبل

هي دي أزمة بتواجه أي عمل بيطول عامة لأن مع مرور الزمن ممكن القصة تفقد إتجاهها وتتوه أو تبقي مكررة فهنا لازم الكاتب يتدخل عشان الموضوع ما يضيعش منه

عجبني اننا في نهاية الموسم رجعنا تاني علي الطريق الصحيح بقي في شكل واضح لمستقبل القصة وفي تطور حقيقي للشخصيات وحياتهم مش بندور في نفس الدايرة

الموسم كان لذيذ بس مش أفضل موسم بشكل عام

Solo Levelling: S1

Solo Levelling
S1, Epi 1-12 Finale

مع إحترامي للجميع واراءهم .. بس هو مين فهم ايه من المسلسل ده ووصل لأيه في القصة دي؟

بجد أول مرة أقابل الحالة دي بشكل عام .. مسلسل تحس قصته ساذجة ومش محبوكة كويس بس تحس عايز تشوفه وتعرف وهو ح يوصل لأيه في الأخر .. دي حكايتي مع سولو ليفلينغ

مشكلتي الأساسية مع المسلسل تكمن في القصة .. في كدة عيب متكرر في كتابة المانجا وهو أنها بتبدأ القصة بتقديم البطل إلي جانب لفيف من الشخصيات المنافسة والقوية اللي بتتحول في مرحلة معينة لحلفاء له ثم مع تقدم القصة وظهور شخصيات أقوي بتخسف بالحلفاء دول الأرض ويبقي وجودهم ملوش لازمه.. هنا ما شاء الله من البداية الكاتب ما تعبش نفسه أساساً وركز كل جهده علي البطل وأهمل بقية الشخصيات لدرجة انك في لحظة معينة ح تحس أن المسلسل فاضي ومفيهوش أي حاجة مثيرة للإهتمام غير التطور اللي بيحصل للبطل .. واللي بيتحول إلي شئ ممل مع الوقت

الملل مصدره أن البطل نفسه مش مفهوم .. لا انت فاهم دوافعه -عادا حتة أمه ومرضها- ولا المسلسل قدملك اي إشارة توضح لك هو ليه بقي قوي كدة فجأة وايه هو الايقاظ الثاني ده ولا في جديد في مسيرته غير أن قواه بتطور كل شوية لهدف ما غامض بشكل مستفز ومتفرد مفيش حد قادر ينافسه فيه .. عمال يكسب عمال علي بطال من غير ما يبقي فيه تحدي حقيقي ليه

الحاجة الوحيدة اللي جذابة في المسلسل هي المنافسات والأكشن وأجواء الجيمز و ألعاب JPRG اللي ح يحبها اي جيمر متابع المسلسل لأنها فيها كتير من جو الألعاب دي

برضو الثقافة الكورية مختلفة عن الثقافة اليابانية في الإستلهامات والتأثر .. المسلسل متماشي مع حالة المجتمع الكوري اللي بشكل كبير مش متمسك بتراثه القديم أوي زي اليابان والتكنولوجيا بتلعب دور محوري في حياته كأحد القوي الكبري المصنعة لل Hi-Tech والألكترونيات

أنا ح أكمل المسلسل ده بس عشان أعرف القصة ح توصل لفين في الأخر والقتالات .. غير كدة مفيش شئ يخليني أهتم بعمل بالشكل ده

How I met your mother: S4

How I met your mother
S4, Epi 1-23

أنا بقالي كذا يوم قاعد بأقيم تجربتي مع الموسم ده أو بالأحرى الأربع مواسم اللي فاتوا وواصل لحاله من من الحيرة .. أقول أيه بالظبط؟! .. أنا ح أكتب اللي ح يجي علي بالي واللي يحصل يحصل


كنت أشرت في رؤيتي للموسم الثالث مدي التأثير الكبير لمسلسل ساينفيلد علي أسلوب المسلسل في الكوميديا والمواقف .. لما تأملت شوية الموسم الرابع بتأني شوفت جانب أخر من التأثير يمكن مكنتش أنتبهتله قبل كدة

ساينفيلد في الموسم الرابع أبدع كدة أسلوب جديد مش عارف هل كان أول مرة يتعمل وقتها ولا لا بس هو بقي العادي في معظم السيتكومز بعد كدة .. وهو أن الموسم يبقي أرك أو قصة واحدة بتتحكي علي حلقات ومرحلة بتأثر علي توجه الشخصيات بعد كدة زي في أي دراما عادية .. الموسم في سردية طويلة بتتحكي علي مدي أحداث الموسم وبتوصل لقفلتها مع نهايته في الوسط في سرديات صغيرة ومواقف بتتجدد وتتغير مع كل حلقة

هنا المسلسل أعتمد الأسلوب ده من البداية خالص .. كل موسم يا أما بيركز علي علاقة معينة وتطوراتها علي مدي حلقاته يا عايز يوصل لفكرة معينة وبيسردها علي طول الموسم .. دي بتبقي السردية الأساسية .. في النص بيبقي في حدث أو سردية أو فكرة أو علاقة بتطبخ علي نار هادئة ثم عند نهاية الموسم بيحصل فيها تطور نوعي بيغير مسار الدراما كلها

كمثال في الموسم الرابع السردية الأساسية اللي الموسم بيتمحور حوليها هي أن علي تيد أن ينتظر قدره وما يستعجلش وأن القدر مش خط مستقيم بل علبة مليئة بالمفاجأت .. كل حدث وكل حلقة في الموسم ده بتروح بينا للمعني ده مباشرة أو بشكل غير مباشر .. بس عادة الحلقة الأخيرة أو اللي قبلها بتطرح المعني بشكل صريح ومباشر زي لما ستيلا قالتله قدرك بينتظرك في مكان ما

في نفس الوقت علاقة بارني وروبين كانت عمالة تسخن حتة في حتة من ساعة الحدث الجلل بتاعة نهاية الموسم اللي فات .. لحد ما ح تاكل المشهد بنهاية الموسم بينا حياة تيد ح تتراجع خطوة للوراء درامياً .. في نفس الوقت حياة ليلي ومارشل تجمدت تقريباً حتي إشعار أخر .. بقوا معلقين ع الأحداث لدرجة أن ليلي اختفت كام حلقة ورجعت دون أن يؤثر ذلك علي الدراما

الفكرة في الموسم ده أنه ثري عن الموسم اللي فات ومستقر أكتر .. كل يوم حدث وكل يوم تطور شكل والصدمات فيه كانت كتير .. بس هو الحسنة الأساسية اللي فيه أن قصة تيد وروبين تلاشت نوعاً ما وبقي كل واحد فيهم عنده جديد وداخل في قصة مختلفة .. وده في رأيي ح يحي الدراما شوية .. لأن أصل لو فضلنا ٩ مواسم بنحكي عن قصة واحد سيمب بيدور حولين واحدة توكسيك الناس ح تفطس مننا في النص

عجبني أرك ستيلا ده بكل تفاصيله وفكرني أكتر انا ليه ما باحبش شخصية تيد أو بالأحرى بأكره تصرفاته وقراراته الحمقاء .. بس هو للأمانة عمل حاجة وقال مقولة في الموسم ده خلتني أحترمته جداً لأني بقيت مؤمن بيها مؤخراً

أحياناً الصمت أو عدم قول أي شئ في العلاقات المشتبكة دي وعند الرحيل بيبقي أفضل حل .. لأن الكلام أحياناً بيبقي باب للشر ده غير أنه مش مفيد بالمرة

المجمل أنه موسم رائع كالعادة

How I met your mother: S3

How I met your mother
S3, Epi 1-20 Finale

في التلات المواسم الأولي ده يعتبر أقل موسم فيهم .. لسببين في ظني

أول سبب أن في كذا حلقة تايهة وتحس أنهم ملهمش لازمة .. لا قدموا معلومة جديدة ولا القصة فيهم قوية وحسيتهم حشو .. أه ضحكت بس مش الليفل اللي كنت مستنية

ثانياً هو المسلسل في الموسم ده حصله تحول شوية في التيمة .. بقي واخد سكة ساينفيلد أكتر من سكة فريندز .. اللي هو كل حلقة موقف معين بس مفيش تطور حقيقي ملموس بيحصل للشخصيات وحتي التطور بطئ ومش واضح .. فهمت بعد كدة ان ده راجع لأسباب إنتاجية لأن المسلسل كان مهدد بالإلغاء وقتها لولا أن الملاك بريتني سبيرز أنقذت الموقف .. ده يبرر ليه مكنش فيه بناء طويل لشئ حتي علاقة مارشل وليلي أتجمدت كدة في نهاية الموسم لأن طرح أي تطور في العلاقة لو جه مع قرار إلغاء المسلسل ح يخليه شئ بلا معني .. كذلك فضلت ملامح علاقة تيد بستيلا ضبابية لحد ما ملوا إيدهم من إستمرار المسلسل

حتي ح نلاحظ أن تطور علاقة روبين و بارني وخناقته مع تيد ما جتش غير بعد حلقة بريتني سبيرز

بالمناسبة دي أنا بأضيف سبب زيادة لأسباب عدم محبتي لشخصية تيد .. أنه ندل .. قطع علاقته ببارني عشان صديقة السابقة حاجة بعيدة كل البعد عن الرجولة والصداقة بمعناها الحقيقي وبجد والواد ده مشاعره بتحكمه بشكل سئ جداً بيخليه يرتكب حماقات مدمرة كتير .. زي قطع علاقته ببارني وزواجه من ستيلا

ناس كتير يمكن ح تشوف في تيد نموذج مشابه لجورج كوستانزا و روس بس انا بأشوفه متطور أكتر منهم شوية .. بالتأكيد هو عصري وده أحد ميزاته .. بس هو واضحة فيه أسباب فشل علاقاته .. أنه متخبط ومستعجل .. عنده رغبة محمومة في أنه يكون أسرة ويبقي أب بس في نفس الوقت هو مش متأكد هو متأهب لده نفسياً ولا لا ولا حاسبها مادياً .. أمعة وتابع في معظم علاقاته وده يمكن ح يبان في تطور علاقته بستيلا بعد كدة .. لكن الجميل فيه أنه نبيل نوعاً ما وبيتعلم من اخطاءه .. بس مش دايماً

أرجع لنقطة التشابه بين المسلسل ده و ساينفيلد لأن دي نقطة إيجابية في صالحه .. المسلسل هنا ما وقعش في فخ أنه يكرر تجربة فريندز تاني لإنها كانت الانجح وقتها ولأنه كان أنتهي من فترة مش بعيدة ونجاحه طاغي وملهم فلو كان اتحول لإستنساخ كان سرعان ما ح يتلاشى .. لكن هو أستخدم مع تيمات وقوالب فريندز الخاصة بالشخصيات تيمات أقدم شوية زي تيمات ساينفيلد بتاعة المواقف العبثية والنقد الإجتماعي والسخرية من الأحداث اليومية والنظر بعمق للعلاقات بين البشر بس المرة دي في ثوب عصري وبأسلوب مختلف يمكن محدش كان عمله وقتها قبل كدة

قصة المسلسل كلها عن رجل بيحكي لأولاده حياته شاباً وكيف ألتقي بأمهم .. وحتة الذكريات دي فتحت الباب علي مصراعيه لإستخدام السرد ما بعد الحداثي في المسلسل

السرد الكلاسيكي هو انك بتحكي قصة خطية ليها بداية ونهاية وفيها عقدة في النص وتقلبات .. زائد عامل مهم ومحوري وهو صدق الراوي وأن كلامه مسلم بيه .. عشان كدة حتي بنسميه الراوي العليم أو الإله لأنه يعلم كل جوانب القصة وكلامه مسلم بيه .. بينما في السرد ما بعد الحداثي بداية الترتيب الزمني للأحداث بقي شئ مش أساسي وبقي ممكن النهاية تيجي الأول والبداية في النص وهكذا

ثم تم نسف فكرة اليقين في السرد لأن ده أساساً قلب الحداثة وما بعدها .. الشك والنقد وتفكيك المسلمات

فمش معني انك بتحكي ذكرياتك أو حاجة شوفتها أن روايتك موثوقة ١٠٠% .. ممكن تنسي .. ممكن أمانيك الشخصية تدخل فتختلق أحداث ما حصلتش .. ممكن تخلط ما بين أحلامك وهواجسك والواقع اللي حصل .. وده اللي بيعمله تيد طول المسلسل تقريباً .. يقول علي حاجة معينة وبعدين يقولك ده اللي كان المفروض يحصل بس اللي حصل كذا .. بيقفز قفزات زمنية.. بيهمل أحداث عن عمد أو سهو.. وهكذا

لحسن الحظ المسلسل كمل .. وانا وراها لحد الأخر

How I met your mother: S2

How I met your mother
S2, Epi 1-22 Finale

الموسم الثاني هو مقلوب الموسم الأول .. بالملي

الموسم الأول أبتدي بعلاقة صحية طويلة بتاخد مسارها الطبيعي وتتحول لعلاقة رسمية بينما علي الجانب الأخر في علاقة سامة شنيعة بتولد من العدم .. للأسف .. بينتهي الموسم بنجاح العلاقة السامة بعد محاولات وصولات وجولات كتير وبعد التفاهم بين الطرفين وبناء أرضية مشتركة بينما العلاقة الصحية بتسقط من أعالي السماء إلي أعمق حفرة ممكن تقع فيها أي علاقة وهي الهجران

عاجبني أوي حتة أن كاتب المسلسل حابب يجرب كل الاحتمالات ويفتح أبواب لتساؤلات عميقة .. طيب مش ممكن تكون دي هي اللي مش علاقة صحية بينما التانية هي الصحية؟ طيب مش يمكن لو الطرفين دول كملوا ممكن ينجحوا؟ تفتكر ح ينجحوا؟ طيب ايه رايك لو حطيتلهم المطب ده في سكة علاقتهم؟ تفتكر التانيين ح يقدروا يستغنوا عن بعض؟ ايه مصير كل علاقة يا تري؟

وهو بيطرح الأسئلة دي اللي بتدور حوليها كل حلقة ح تلاقي في حاجة بتحصل .. طول الوقت الكاتب بيعمل Foreshadowing و Hinting لاحداث وحاجات ح تحصل في المستقبل سواء عاجلاً أم أجلاً .. يعني طول الموسم الكاتب كان بيصير بذكاء إلي فكرة أن علاقة روبين و تيد مش ح تكمل وأنهم ح ينفصلوا في وقت ما قد يكون قريب جداً .. بينما روبين و بارني لايقين علي بعض ولقاءهم في علاقة ح يحصل في مرحلة ما .. هما الاتنين بيعانوا من مشاكل في النشأة ومعندهمش طموح لعلاقة طويلة أو وطيدة .. بينما علي جانب مارشل وليلي فهو بس وضح هما ليه وازاي فضلوا علي علاقة لمدة ١٠ سنين .. لأنهم معاتيه وبلا اي خبرات .. لايقين علي بعض ولذلك لازم يكملوا .. وده يرجعنا لحتة الاحتمالات.. زي ما فيه ناس بتخش علاقات سريعة وفي ناس بتبحث عن الحب لسة وفي ناس بتخاف من العلاقات اساساً في ناس عندها استعداد تعيش مع بعض للأبد ولا يفرقهم سوا الموت بس حتي دول خاضعين لعملية الاحتمالات والمطبات اللي في طريق الحياة برضو

من ضمن برضو اللقطات اللطيفة اللي بألاحظها طول المسلسل أنهم متعمدين طول الوقت يسفوا علي فريندز و ساينفيلد لدرجة أنهم ذكروا ساينفيلد بالأسم في احدي الحلقات كنكتة .. وده طبيعي لأن المسلسل إمتداد عصري للملحمتين دول

الظريف بقي ان الموسم أنتهي عكس ما حدث في نهاية الموسم الأول .. العلاقة الصحية بس رسيمة وتوجت بالزواج بينما العلاقة الغربية أنتهت بطريقة سلسة ورجعنا لنقطة الصفر تاني

أو خلينا نقول رجع تيد أعزب بس مش زي ما كان في بداية القصة .. ودي ميزة القصص المتطورة عامة

Kaiju 0.8: S1

Kaiju 0.8

S1, Epi 1-12 Finale

"أستيقظ جريجور سامسا ذات نهار بعد ليلة عصيبة فوجد نفسه قد تحول إلي حشرة" - المسخ / فرانز كافكا

لو حد قرأ رواية المسخ ح ياخد باله من حاجتين .. أول شئ أنها تعبير مجازي عن حياة كافكا اللي كان بيعاني من مشاكل مع أسرته ومع الأخرين ككل ككائن غير إجتماعي عملي أوي وهو شئ يخلي أختيار أسم "كافكا" لبطل المسلسل بديهي وذكي .. تاني حاجة المسلسل يعتبر معالجة فانتازية مقلوبة للرواية .. يعني بدل ما بينتهي الأمر بجريجور سامسا مضروباً وملقياً علي ظهره دون القدرة علي ظهره حتي الموت هنا كافكا الأخرين بيتقبلوه بحذر وهو بيتحرك للدفاع عنهم دون أي تردد

فعلاً هي قصة المسلسل كافكاوية بامتياز في حتة أنها واخدة روح النكتة العبثية بتاعة كافكا اللي بتوديك لمعني كئيب في النهاية .. البطل هنا شبه أبطال قصص كافكا .. شخص عادي فاقد للأمل تماماً ومستسلم لليأس بعد ما فشل أكتر من مرة في تحقيق حلمه بيلاقي نفسه .. هو حتي حلمه كان أنه يبقي جنب صديقة طفولته .. جو فرانز وميلينا خالص .. فجأة بيدخل في حوار يشقلب حياته ويعمله مشكلة مع محيطه ومجتمعه ويبقي صراعه الأساسي أنه يحاول يخلي المجتمع يتقبله

علي الجانب الأخر المسلسل شبه إستنساخ لأحداث هجوم العمالقة في كل تفاصيله .. لدرجة أن ميكاسا وليفي وساشا وأني موجودين بالملي تقريباً يدوب الشكل أتغير سيكا .. بس هنا القصة أرمين هو بطلها مش إيرين .. فعلاً كافكا فيه من أرمين كتير بالذات في حتة أنه بيحلل كويس

برضو واخد من أكاديمية الأبطال كتير حتي لدرجة أنه قصة شوتو وإيندفار موجودة.. لدرجة أنهم راسمين الرئيس بتاع الوحدة شبهه

ده ما يقللش من المسلسل وكتابته الرائعة والمختلفة بس يرجعنا لنقطة بتتداول وهي أن مفيش أفكار جديدة وأن الجديد هو مجرد إستنساخ للقديم .. التأثر طبيعي بس الفكرة أن في بعض الأعمال الموضوع أكبر من مجرد تأثر

عجباني بصراحة حتة اختيار البطل أنه يبقي مش طفل ومش شاب صغير لا ده ثلاثيني .. حتة مختلفة لأنك كل ما بتكبر بسن الشخصية كل ما ح تلاقي المواقف والمشاكل اللي بيواجها مختلفة وفي أحيان كتير بتبقي أعقد .. في حالة الذكور بيبقي في محاولة لتقمص دور الأب والأخ الأكبر الناصح لأخواته اللي أصغر منه .. حتي منظوره للقوة والتحديات مختلف عن الشباب الصغيرين .. الحتة دي الكاتب حب يوضحها اكتر فقام مقدم شخصية إيتشيكاوا صديقه الشاب صغير السن الطيب واللي بيساعده وعنده طموح يبقي الأفضل .. شاسع ما بين طموح كل واحد وأساليبه رغم أن النية واحدة

كمان اللذيذ في طريقة كتابة المسلسل إنه في الموسم الأول رمي شوية خيوط وحاجات تديك فكرة عن طريقة تطور القصة والشخصيات بعد كدة .. زي طرح فكرة الأسلحة الخاصة والبدل اللي بتتصنع من بقايا الكايجو دي كلها خيوط واضح انها ح يكون ليها دور مهم في المستقبل .. لإن القصة لو فضلت ماشية أنهم مجموعة شبان ببنادق بيصطادوا الكائنات دي ح تفكس بعد أرك أو اتنين

كمان تقديم الكاتب للأشرار القصة كان مميز وحمسني أوي لما هو قادم

في الأول لما قرأت كلمة كايجو وشوفت أول حلقة قولت ده ح يبقي إستنساخ لسلسلة جودزيلا بالذات أن في كام وحش من اللي ظهروا شبه وحوش عالم جودزيلا .. لكن لا الموضوع طلع مختلف تماماً ولكن المسلسل برضو علي صلة بسلسلة جودزيلا

جودزيلا بتبدأ كسلسلة عن وحش مدمر ناتج عن التلوث النووي بيهدد البشرية لكن سرعان ما بتتحول لسلسلة أفلام عن وحش بيدافع عن البشرية من الأخطار الداهمة .. التحول ده بيحصل بالتدريج علي مدي كذا فيلم .. أظن ده بالظبط اللي ح يحصل مع كافكا

كانت تجربة ممتعة للغاية

How I met your mother: S1

How I met your mother

S1, Epi 1-22 "Finale" 

في مقولة بتقول أن المسلسل ده أذكي نسخة من فريندز .. أما أنا فأقول لكم يا أحبابي أنه نسخة عصرية ظريفة من ساينفيلد .. نسخة عصر ما بعد الأنترنت .. رغم أنها بتتكم علي عصر ما قبل السوشيال ميديا في الموسم الأول بس ملمسة معانا عكس فريندز و ساينفيلد اللي بيدوروا في عصر مختلف بمعايير وأدوات وطرق تواصل مختلفة تماماً 

ضيف علي ده أنه هنا الصانع تفادي خطأ فادح وقع فيه صناع فريندز وهما بيبنوا المسلسل وبأن بعد اكتر من موسم .. هنا جذور كل شخصية محطوطة من الأول وفي ربط منطقي ما بين سمات ومميزات الشخصيات حالياً وما كانت عليه في الماضي .. ودي نقطة مهمة في الكتابة أن كل شخصية يبقي ليها البروفايل بتاعها وجذورها وشبكة علاقتها اللي بتتحرك فيها..  لكن في فريندز جذور الشخصيات اتكتبت متأخر شوية وده خلي في ثغرات درامية كتير في القصة فتلاقي معلومة اتقالت في أول موسم بيتقال عكسها بعد كدة أو بتظهر علاقة أو تفصيلة في حياة الشخصية من العدم مكنش في ليها اي تقديم أو جذور زي حتة غباء جوي اللي ما ظهرش الا بعد تاني موسم تقريباً أو بعد كدة كمان ومكنش فيه أي تقديم ليه و زي قصة اعمار الشخصيات وامتي أول مرة يتقابلوا اللي كان فيها عك كتير 

طبعاً ممكن يكون حكمي مستعجل شوية بس أظن والله أعلم المسلسل هنا مش ح يبقي فيه ثغرات كبيرة زي اللي في فريندز أو الأعمال القديمة عامة 

المسلسل هنا واخد نفس قالب ساينفيلد والسخرية من الثقافة الأمريكية وطريقة تفكير وحياة المجتمع الأمريكي بس هو تركيزه الأكبر علي العلاقات وعنده بناء درامي بيتطور بإطراد علي طريقة فريندز مش مجرد حلقات 

منفصلة متصلة بدون تطور حقيقي للشخصيات 

كمان لو حد لاحظ هنا كان أبتدي ضحك الجمهور ينخفض شوية عن أعمال التسعينيات ودي كانت بداية تلاشي الأسلوب ده عامة من علي الشاشة 

كقصة المسلسل ما قالش جديد بس هو ركز على تفاصيل ومواقف جديدة في العلاقات وقدم أكتر من نموذج ليها متناقضين في قالب واحد وأدي لكل شكل مساحته 

بس المساحة الأكبر الحقيقة وخداها العلاقات التوكسيك وده اللي موترني أوي حيال المسلسل لأن شخصية تيد دي بتفكرني بنفسي أوي في نفس مرحلته العمرية وبتقلب عليا ذكريات مش لطيفة احياناً .. لذلك هو أكتر شخصية مش مفضلة عندي فيهم .. بينما المفضل هو بارني .. الإستنساخ الأفضل حتي الأن لتشاندلر 

ولنا عودة مع الموسم الثاني

Unluck Undead S1

Unluck Undead
S1, Epi 1-24 "Finale"

نادراً ما في السنين الأخيرة الواحد قابل عمل عموماً عجبه علي مستوي الرسم والكتابة مع بعض .. عادة مؤخراً يا المسلسل تبقي كتابته حلوة بس رسمه مش قد كدة يا المعالجة الدرامية رخمة بحيث بيبقي الرتم بطئ أو الأحداث متسارعة بشكل مش لذيذ أو في تغيرات ما بين المانجا والأنمي يا أما أساساً بتكون القصة مكررة وتقليدية بس لذيذة فتمام يعني

لكن المسلسل ميزته أن فكرته جديدة رغم أنه واخد من مشارب وأعمال سابقة بس المعالجة بعناصر القصة بالاجواء الغريبة اللي بتدور فيها الحكاية تخلي التجربة دي مميزة أوي

خلينا نحرق شوية تفاصيل ونحكي القصة من الأخر للأول .. المسلسل متأثر بل مرتكز بشكل كبير علي أطروحات نيتشه الوجودية بس هو معالجها بطريقة فيها فانتازيا لطيفة .. تحديداً العود الأبدي وموت الإله وإرادة القوة وشوية الإنسان المتفوق أو السوبرمان بس مش أوي .. مش ح أستغرب لو نيتشة ظهر كشخصية في أحد الأركات الجاية بطريقة أو بأخري .. هو ظهر بطريقة ما فعلاً واللي جسده الولد الرسام صاحب قدرة "المجهول" لأنه كان عارف أحداث الماضي والمستقبل وبيدونها عبر رسوماته بس برضو مش ده التجسيد اللي أنا منتظره

القصة مرتكزة علي نقطة أن العالم عايش في دايرة مغلقة بتنتهي كل مرة بإنتصار "الإله" اللي بيدمر الكوكب ومن شظاياه بيعيد بناء الكوكب تاني ويعيد دورة الزمن من أول جديد .. شخصيات معينة بس اللي هي عندها القدرة علي أنها تقدر تفتكر اللي حصل في الدورات الزمنية السابقة وكل مرة بتحاول تتفادي أخطاء المرة السابقة .. الناس دي ذوي قدرات خاصة وبيحاولوا يجمعوا ذوي القدرات الخاصة اللي زيهم اللي بيسموا "المبطلون" في محاولة لتغيير قدر العالم والحيلولة دون تدميره عبر قتل الإله المدمر

هنا في حتة المبطلين دي القصة شوية بنلاقيها متأثرة أوي وبشكل واضح ب"أكس مين" لدرجة أنها في قصة من القصص شبه خدت تيمات وقصص مشهورة من سلسلة الأكس مين زي حتة رفض العالم ليهم والكوارث المرتبطة بإستيقاظ قواهم وإستغلالهم من قبل تجار البشر كمسوخ وحالات نادرة وقتلهم أحياناً كنوع من العنصرية .. وهو المؤلف أستخدم التيمة دي في الأول حلو وكانت مدية للقصة طعم مختلف عن القصص الرائجة لأن عادة أصحاب القوي الخاصة في الأعمال المشهورة العوام والناس العادية ما بيكونوش علي دراية بقدراتهم ولا بوجودهم أصلاً بينما معروفين ومستهدفين وحياتهم علي المحك طوال الوقت

لما القصة دخلت في حتة أفكار نيتشة كمان التيمة بتبتدي تتميز أكتر لأن محاربة الأقدار بالشكل ده محتاجة قدراته خاصة بالشكل ده .. ضيف كمان علي ده أن طبيعة قوي الناس دي منطقية من أول التسمية لطبيعة القدرات نفسها.. كلها بتبتدأ بالمقطع "UN" بمعني النفي وهو في رأيي نفي للقدر بمعني أن الناس دي قدراتها موجودة لتغيير الأقدار ودي الفلسفة وراء التسمية

طبعاً لم يخلوا المسلسل من التأثرات بأعمال الشونين الكبيرة القديمة فكان تأثره الأكبر بملهم العصر الحالي الأول "بليتش"

من أول فكرة مجلس المطبلين لحتة أن دوافع الأبطال أساساً فردية بحتة لكن بعد كدة بتتحول لدوافع كبري علي طريقة إيتشيجو لأنهم نسخوا مشهد خيانة أيزن بالملي في حتة معينة للتيميات الجادة والظلامية أوي اللي في المسلسل زي تناول فكرة الشيخوخة والموت والوحدة والرغبة في الانتحار .. كلها حاجات شايفها فيها كتير من روح بليتش وتأثيره اللي بقي واسع حديثاً

الصراحة خسارة أن تقريباً محدش كان مهتم يتفرج علي المسلسل ده غير أنا واتنين أصحابي رغم أنه تحفة

Demon Slayer: S4 (Hashira Training arc)

Demon Slayer
S4 (Hashira Training arc) , Epi 1-8 "Finale"

دايماً منذ نشأة الشونين أنمي بالذات الأصناف المرتكزة علي الأكشن في كام ثابت كدة ما أتغيروش ونادراًوما شذ عنهم أي عمل .. يمكن أتكرروا في كلامي كتير بس ح أعيدهم تاني لجل التذكير

لازم يكون في أرك فلاش باك وأرك تدريب وانقطاع زمني الشخصيات بعديه بتتغير وتتطور و أرك حرب شاملة وأرك المتناقضين فيه بيجتعموا لمحاربة شرير شرس وقوي .. دي -وحاجات تانية طبعاً- بقت ثوابت خلاص قلما يخرج عنها أحد إلا المجددين وحتي دول لازم يكونوا علي دراية بالقوالب والمسارات دي لأنها بقت جزء من جماليات هذا الفن

ديمون سلاير تقريباً أستخدم كل القوالب دي سواء جت علي الشاشة ولا لسة ح تحصل .. وسواء جت بشل جزئي أو كلي بمعني أنه في بعض الأركات ممكن يجي مشهد فلاش باك أو يبقي في حلقتين تدريب مش كل الأرك .. لكن الأرك ده إستخدام القالب كان كلي

وده يودينا لفكرة بأقولها دايماً عن المسلسل ده وهو أن أحد أسرار نجاحه أنه تقليدي .. ما جابش جديد ولا حاول يخترع بل لعب في المساحات المضمونة كدراما وخلي اللعب كله والابتكار في التحريك والرسم والإبهار البصري .. ده أكتر مسلسل بأحسه أنه معمول بجودة الفيديو جيمز والشغل البصري فيه من أفضل ما رأيت في أخر ١٠ سنين مثلاً .. وده لأنه المشروع الأساسي للأستوديو بتاعه عكس شغل ماببا اللي عايشة حالة تشتت وضغط فظيع علي العمالة بعد بقي عندها مسلسلات الصف الأول كلها تقريباً عدا عملين تلاتة

هنا أرك التدريب كان ليه ٣ أغراض أساسية في رأيي.. الأول الغرض المباشر وهو أنه تدي فرصة للشخصيات تتطور وتستعد بقوة للخطر القادم والقتال الشرس اللي علي وشك أن يبدأ .. الثاني حاجة كدة أقرب لإستراحات المحاربين قبل بداية المعركة الأخيرة تدي فرصة للمتلقي يتعرف أكتر علي الشخصيات اللي مكنش فيه فرصة أنك تقدمهاله ضمن سياق الأحداث السابقة زي هاشيرا الثعبان وهاشيرا الرياح اللي لازلت برضو شايف أنهم كانوا يستحقوا يبقي ليهم مساحات أوسع مع تفادي فخ المط

ثالثاً الأرك ده تمهيد جيد جداً للنهاية .. لو نلاحظ الأرك كلها محاط بأجواء الحذر والاستعداد لحدث كبير يمكن محدش كان واعي بقربه أوي غير زعيم السلايرز وكان جاهز للتضحية الكبيرة اللي فتحت الباب للمعمعة الأكبر.. أظن موزان برضو كان مستعد للمعركة كويس وعارف أنها جاية فغالباً كانت خطته أنه يقضي علي عشيرة السلايرز بعد ما يخطف نيزكو .. الحذر حتي باين في أن مكنش فيه أكشن كتير برة التدريبات غير يمكن أول مشهد في الارك والحلقة الأخيرة .. كل طرف بيجهز نفسه بشكل جيد وبيخطوا خطوات متأنية وحذره عشان يباغت الطرف التاني ويكون مستعد للموجة القادمة .. محدش بيقدم علي أي خطوة متهورة عشان ما يفسدش خططه

تقريباً ده أكتر أرك في المسلسل متأثر بمسلسل بليتش أنا شوفته لحد الأن .. معروف أن بليتش هو أكتر مسلسل مأثر في أعمال الجيل الجديد بشكل ملحوظ أكتر من ناروتو و ون بيس رغم أنه كان أكتر مسلسل الفانز أنتقدوه في الثلاثي الكبير .. وده يرجع لأسباب كتير يطول شرحها بس في رأيي أهم سبب فيهم أنه الوحيد في الثلاثة اللي خرج عن سردية البطل اللي عنده حلم كبير عايز يحققه لسردية أبسط وهي أنه مجرد كد عايز يعيش بسلام ويحمي من يحبهم وأن كل القوي والأدوات اللي في أيديه دي بيتم تسخيرها لهذا الهدف

الأرك هنا -واللي بعده علي فكرة- متأثر أوي بأرك الأرانكار ومعركة أيزن بشكل أقرب للإقتباس والنسخ لدرجة أنهم راحوا جابو الممثل اللي بيعمل صوت أيزن يعمل صوت الغراب بتاع زعيم عشيرة السلايرز

لو من حيث المقاربات فالطبيبة الشيطانة هي هي شخصية أوروهارا كيسكي تقريباً .. هاشيرا الثعبان باين أوي أنه شبه مايري .. هاشيرا الرياح هو زراكي كينباتشي .. هاشيرا المياة قريب جداًومن شخصية بياكيا عشان كدة بديهي يكون في منافسة مع هاشيرا الرياح زيه زي كينباتشي و كوتشيكي .. طبعاً الشبه ما بين زعيم السلايرز والقائد ياماماتو واضح وكبير بس الفرق في السن والخبرة القتالية .. لكن التضحية واحدة تقريباً وده يوديني لحتة أن الأرك كمان متأثر بحرب الألف عام مش بس أرك الأرانكار

التأثر ببليتش مفيد لأسباب كتير .. أولاً لأنه عمل مشهور ومكتمل فأنت بتاخد من منهل مضمون وناجح وشبه اللي بتقدمه أوي .. ثانياً أنت بتشوف برضو هو وقع في ايه وبتحاول تتفاداه في تجربتك وده اللي أتمني يكون حاصل .. ثالثاً متماشي مع روم العصر اللي بتتمحور حولين الفرد شوية مش ناحية القضية الكبيرة ولا الهدف الكبير

الموسم ده يمكن من أقل المواسم اللي فيها أكشن لكنه ملئ باللحظات الإنسانية والعذوبة وكأنه قاعدة شاي هادية مع أبطال هذا العمل قبل ما نودعهم وداع أخير بنهاية الأرك الجاي .. فكرة ذكية ممكن ما تعجبش البعض بس انا باشوفها حلوة .. في رأيي أحلي من فكرة الموسم اللي فات اللي كان فيه مشاكل في رأيي ومش بالقوة الكافية

في إنتظار الأفلام الثلاثة علي أحر من الجمر