Demon Slayer: Kimetsu no Yaiba S1

Demon Slayer: Kimetsu no Yaiba

S1, Epi 1-26 Finale

والله الواحد زعلان من نفسه أنه كان عنده فرصة أنه يتابع العظمة دي حلقة بحلقة بس أجلتها لعدم ثقتي في مستواها .. فعلاً كان قرار عاري من الصحة تماما .. بأعترف أمام الجميع أني غلطان الصراحة

خليني أنط علي فكرة مش عايزة تسيبني من ساعة ما تعلقت بهذة التجربة .. وهي أن المسلسل ده لو أستمر علي مستواه اللي قدمه في الموسم الأول ممكن يتحول إلي "دراجون بول" بتاع الحقبة دي .. بس بشرط انه يحافظ علي مستواه .. طبعاً إنتهاء المانجا يخلي برضو طموحات الواحد تنزل شوية .. بس برضو المسلسل يقدر خلال السنين الجاية أنه يعمل حالة زي اللي عملها "هجوم العمالقة" وهو فعلياً أبتدي يعمل ده والمسألة أنعكست بشكل واضح علي إيرادات الفيلم بتاعه في السينما

بس قبل أي شئ خلينا نسأل السؤال المهم .. هو أيه اللي مخلي المسلسل ده عامل الضجة دي كلها؟

أول شئ الستايل والشكل المميز .. ودي يمكن حاجة بيفتقر إليها بعض الأعمال الجديدة أو الواعدة ... أنا فاكر كويس أول مرة شوفت فيها دراجون بول .. من حوالي 20 سنة .. وقتها شوفته مدبلج للغة مش مفهومة .. ما أهتمتش أوي لا للأحداث ولا الكلام بس حبيت الشكل والستايل بتاع الرسم وتصميم الشخصيات وتفاصيلها .. دي يمكن حاجة من الحاجات اللي مخليا مسلسل زي "بليتش" عنده شعبية طاغية لحد الأن رغم كل الإنتقادات اللي بتنهال عليه والكلام علي مشاكله ... الستايل .. أنك لما بتبدأ تتابع الأحداث بتنفصل عن العالم اللي أنت عايشه وبتدخل عالم "جديد" بأشكال ومعايير جديدة حتي ما قبلتهاش قبل كدة في مسلسلات تانية .. التركيبة دي من ألوان ورسم وتصميم وتحريك وإستخدام للسي جي أي .. التوليفة دي مفيش زيها كتير أو خالص ... ده كان مثلاً أحد الأسباب اللي خلتني ما أتشدتش لـ "قبضة النجم الشمالي" وأنا صغير .. الستايل ما شدنيش وقتها .. لكن لما كبرت قدرته أكتر .. طيب ليه؟ عشان السبب التاني

الدراما .. فعلاً كتير بنقابل أعمال مفيهاش لا معارك ولا أكشن بس بتشدنا وبتجبرنا علي أحترامها .. زي "الوحش" كمثال .. السبب بيكون الدراما اللي بتقدمها .. من اول حلقة المسلسل بيدفع بالمأساة اللي ح تحرك كل الأحداث بعد كدة لصدارة المشهد .. وفي وسط المشهد الحالك اللي بتبتدي بيه القصة بنلاقي بصيص نور .. بيكون هو الحافز الأساسي اللي بيدفع القصة للأمام .. رغبة تانجيرو في علاج أخته والطريق الواعر اللي قرر يخوضه عشان يحافظ علي ما تبقي له من عائلته .. مسألة إنسانية جداً مبنية علي علاقة في غاية الرقة .. الدراما اللي بتلعب علي مشاعر المشاهد والأوتار اللي بتحركه من جوا .. وعلي طول الخط المسلسل بيركز علي اللعب الأوتار دي وبيدي مساحة محترمة للدراما وخلفية كل شخصية عشان يغدي القصة أكتر وما تبقاش مسطحة أو قتال بلا منطق

العامل الثالث والأهم في رأيي هو الرسم والتحريك .. الحقيقة من مدة طويلة ما شفتش حاجة بالفخامة دي .. يمكن هو و"جوجوتسو كايسن" و"موب سايكو 100" حالياً بيمثلوا أحسن رسم وتحريك موجودين علي ساحة الشونين في إطار ما شاهدت يعني .. الموضوع فيه طفرة ملحوظة بالنسبة لي بالذات تعوض اللي حصل في الأنميات الكبيرة زي "ناروتو" بالذات في الأركات الأخيرة .. تطور الأدوات والتكنولوجيا مساهم في الطفرة دي مفيش كلام .. بس لازم ندي برضو الصناع حقهم لأنهم قدروا يسخروا الأدوات دي بالشكل الأنسب ... يعني حلقة زي الحلقة 19 مثلاَ هنا لو كانت أتعملت رسم بس أو بأي أسلوب تاني مكنتش ح تطلع بالعبقرية دي 

المسلسل كقصة تقليدي وبسيط خالص .. شبه حاجات كتير أنا شوفتها قبل كدة سواء قديمة أو جديدة .. يعني هي هي حبكة "بيرسيرك" مع بعض الإختلافات مثلاً .. وبرضو في شبه كبير من "بليتش" و"هيلسينج" و"ناروتو" ... المقصد يعني هو ما أخترعش حاجة جديدة  ..ويمكن تقليديته دي هي أحد أسباب نجاحه

عامة يعني أنا بأراهن علي المسلسل ده بشكل كبير وأصبحت من كبار معجبيه .. وأتمني أنه ما يخيبش ظني فيما هو قادم .. علي الأقل علي مستوي الدراما والأكشن 

مستمرون

Chainsaw Man Ch 98-99

Chainsaw Man P2, Ch 1-2

انا كنت ح استني لحد ما يعدي ٥ شابتر أو  أول أرك يخلص عشان أبدأ أتكلم بس ما قدرتش أستني بصراحة .. عودة هذة السلسلة بجزءها الثاني شئ مبهج للغاية لدرجة اني خلاص ما بقتش متحمس للأنمي زي الأول لأني ما اظنش أنه ح يقدر يجاري العظمة والمتعة دي

القصة الجديدة بتبتدي ع الهادي لسة .. وهنا لازم نشيد بنقطة معينة جميلة أوي في القصة 

ميزة "شينسو مان" عن كتير من السلاسل أنه لا متمحور حولين بطل القصة ولا حولين الشخصيات الرئيسية.. يعني هو جه في الارك الأخير من الجزء الاول تقريباً صفي كل الشخصيات الرئيسية بشكل او بأخر وخلي القصة ترجع لنقطة الصفر لكن مع تغير حيثيات كتير فيها .. العالم والحالة هما البطل وده حلو .. كمان هو بأسلوب ما بعد حداثي شوية ما شغلش باله لا بتفسير العالم اللي بتدور في القصة ولا ظواهره الغريبة بل هو وضعه امام المتلقي كدة وأبتدي قصته عادي

هنا هو بيعمل في سردية "بطولة العالم وليس الشخصيات" وبيبتدي القصة من زاوية تانية بعيدة بعيون تلميذة عايشة في نفس الوقت وبتتورط في عالم الشياطين عن طريق صدفة تعيسة بنفس الطريقة يمكن اللي ابتدت بيها قصة الجزء الاول بس مع إختلاف بعض الحيثيات

القصة لسة ما سحنتش بس بدأت مسيرتها بشوية عنف واجواء مخيفة وغرائبية من اللي بافضلها شخصياً في القصة .. العلاقة بين البنت والشيطان عجباني أوي لأنها نقيض علاقة دينجي بالشيطان بتاعه .. منتظر اللحظة اللي ح يتواجهوا فيها بفارغ الصبر .. ح تبقي معركة حامية بس أظن ح ينتج عنها صداقة جميلة فيما بعد

مستمر ✌

#Manga

Chainsaw Man Ch 55-97

Chainsaw man

Ch 55 - 97 "Finale"

أنا سعيد جداً بأني خدت قرار قراءة هذا العمل الفشيخ.. وحزين لأني خلصته وح أخطر انتظر صدوره عدد بعدد خلال الشهور الجاية

السؤال اللي كنت بطرحه علي نفسي طوال مدة القراءة "هو المسلسل ح يقف عند أنهي فصل؟" .. لأني أولاً مستوعب أن الكم ده من الأحداث والتطورات بمقاييس العصر صعب تتعالج في موسم واحد .. ح تبقي مغامرة غير محسوبة الحقيقة .. ثانياً لأن كل فصل يصلح لأنه يكون نهاية مناسبة وقوية لموسم أول شيق جداً

في ظني الموسم ح يقف عند الفصل ٥٢ او يمكن قبل كدة كمان .. ممكن عند الجزء بتاع "الشيطان السياف" .. عشان يدي فرصة للمانجا تتقدم شوية وعشان كمان ما يحرق الإثارة كلها مرة واحدة لأن الموضوع كبير

جزء كبير من عظمة المسلسل تكمن في انه غير متوقع وملئ بالمفاجئات والإنقلابات الدرامية الحادة والعنيفة بشكل حتي يخليك مش عارف الصدمة الجاية ممكن تيجي منين .. كمان حاجة مهمة من اللي شدوني للسلسلة فكرة انها طول الوقت بتخرج عن المألوف في تقاليد وقوالب الشونين .. بس هنا في نقطة

الفكرة أن السلسلة كثفت جهودها أويوفي البداية لتحطيم الأشكال النمطية للشونين بس جت عن نقطة معينة ومع تطور معين في القصة رمت كل ده وتقولبت في الاشكال والقوالب القديمة المعتادة .. يعني عند حتة معينة كدة انا لاقيت القصة فجأة قلبت علي "ناروتو" أوي وبقي حتي البطل بيتعامل بقيم وطريقة الأبطال المعتادين.. ت

وده خلي جزء من مميزات القصة تلاشي 

جزء تاني وهو الخاص بالنهاية .. النهاية كانت عنيفة ومربكة بس مربكة بشكل مش إيجابي طول الخط .. أولاً المؤلف استهلك فصل او اتنين بحالهم في شرح دوافع شرير القصة .. ثانياً في تغيرات ومفاجئات بالنسبة لي لحد الأن مش مفهومة وكمان في لقطات زي ما تكون مش مربطة مع بداية القصة .. يعني تحديداً شخصيات بداية القصة اللي فجأة ظهرت واتضح أنها جزء من خطة الشرير .. الموضوع ده مربك اوي بالنسبة لي وحاسه كان ممكن يتعمل بشكل أعمق

المجمل اني مبسوط اوي بالتجربة وحاببها.. وحزين علي أنها خلصت .. لذلك ح انتظر عودة السلسلة بفارغ الصبر وكذلك المسلسل ❤

Chainsaw Man Ch 13-54

Chainsaw man 

Ch 13 - 54

تقريباً انا وصلت لنص الأحداث المنشورة. .. والحقيقة حابب أبدي إعجابي وأشارك الجميع بمدي إستمتاعي بالتجربة 

في البداية زي ما قولت قبل ك،ة كنت حاسس أن السلسلة فكرتها مرة وجابته جديد .. بس الحقيقة بداية من الأرك الثالث ومع بداية ظهور الجانب الشرير في القصة اللي هو "الشيطان البندقية" والموضوع أصبح أعنف وسحيل أكتر واكثر عمقاً مما كنت متخيل في البداية .. والوتيرة فصلت تتصاعد ووصلت للذروة مع فصول أرك "الإنفجارات" وهنا إنتبهت لنقطة مهمة في القصة

السلسلة مش بس جاية تقدم أجواء غرائبية وعنف .. هي بتقدم فكرة كدة عمالة تنضج وتتضح مع الوقت .. وهي رحلة الإنسان نحو معرفة ذاته وفهم العالم.. دينجي بطل القصة نموذج للبداوة والإنسان البدائي .. ومع كل مرحلة في القصة بيتعلم شئ جديد ويفهم نفسه والعالم أكثر .. القصة مركزة بالذات علي الجانب العاطفي والإنساني للشخصية وتطوره .. من الغرائزية التامة لنمو حتة الإحتياج العاطفي لظهور أخلاقيات زي التضحية والإخلاص والحب جواه وتبلورها وتطورها

القصة بعد أرك الانفجار بتاخد منعطف حاد غريب وتظهر معلومات جديدة ح تغير من طبيعة القصة ككل .. بصراحة مش عارف هو الأنمي ح يعالج القصة لحد أنهي فصل بس أتمني أنه يعالجها لحد علي الأقل قصة الإنفجارات لأني حابب أشوفها علي الشاشة 

مش عارف القصة ممكن تنتهي علي ايه بس متحمس للنهاية .. ونفسي القصة ما تخلصش ❤

Chainsaw Man Ch 1-12

Chainsaw Man

Vol. 1' 2, Ch 1-12

يمكن من غنائم تجربة العمل بمعرض الكتاب اللي عمري ما أتكلمت عنها واللي تبان ثانوية شوية بس بالنسبة لي هي أحد المكاسب الأساسية هي فتح سكك للتعرف علي كتب ومشارب ثقافية جديدة عبر الاحتكاك بالآخرين

من ضمن غنائم المعرض الماضي كان ان الشباب حمسوني لقراءة مانجا "الرجل المنشار" عبر كلامهم الكتير عنها وعن تفاصيلها الغريبة مما دفعني لقراءتها في أقرب فرصة .. والحقيقة السلسلة ما خيبتش ظني وكانت لذيذة وعنيفة وجريئة بشكل كبير وصادم لكن بعيد عن كل ده لفت إنتباهي شئ مهم في بداية القصة يستحق التأمل في رأيي

القصة هنا متشابهة بشكل كبير مع تيمة كتير من القصص اللي أتقدمت مؤخراً مع إختلاف الأجواء ما بين كل سلسلة والتانية .. تحديداً "قاتل الشياطين" و "جوجوتسو كايسن" في حتة الشخصية الرئيسية اللي بتقف علي خط التماس بين عالمين فهي نص إنسان ونصف كائن لا إنساني وبرضو في حتة طرح فكرة التعايش كبديل عن الصراع الأزلي بين البشر والأجناس الأخري .. ولو رجعنا لورا شوية ح نلاقي أن الأعمال دي تكرارات لتيمات خدت وضعها في سلاسل مطلع الألفية بالذات اللي كانت عاملة تريند جامد زي "بليتش" و"إينوياشا" ثم "طوكيو غول" بعديهم بسنين

ولو سافرنا أبعد عبر الزمن ح نلاقي التيمة دي أصلها بعض الأعمال اللي يعتبر كان ليها دور مؤسس في عالم الشونين وذات الصيط الواسع .. أخص بالذكر "ديفيل مان" لأنه يعتبر من أوائل اللي تعاطوا مع التيمة دي وافكارها و"يو يو هاكاشو" لأنه طور التيمة شوية وأداها أبعاد تانية وعمق أكبر

الفكرة ان نقطة التشابة دي أزعجتني في البداية وحسيت اني بأقرأ فكرة مستهلكة ومتكررة بس في قالب جديد .. لكن مع تقدم القصة الموضوع أختلف وظهر للقصة جانب مشرق الا وهو أن القصة مش جاية تتكلم جد ابدا وانها في جزء كبير من بناءها تهكم علي "كليشيهات" الشونين من أول دافع البطل لشخصيته لجو الخطابية والوعظ اللي عامة بيمارسه عامة البطل في أي مغامرة بيخوضها

لحد الأن القصة غريبة ومريبة بشكل ممتع ومثير للإهتمام ..أينعم لسة الرؤية مش واضحة حيال العالم والتاريخ اللي بيدور فيهم المسلسل بس براحته .. ما ورناش حاجة

ولسة 

Chainsaw Man S1

Chainsaw Man

S1, Epi 1-12 “Finale” 

بما أني علقت قبل كدة علي أحداث القصة في الحديث عن المانجا فهنا التركيز ح يبقي أكتر علي الأنمي كفنيات مش كأحداث

رؤيتي الشخصية التي لا قيمة لها علي الإطلاق الأنمي كان جيد بشكل كبير .. معالجته لأحداث المانجا كانت متقنة بشكل كبير بس عانت من مشاكل متعددة بقت متكررة كتير بالذات في الأعمال اللي بيتبناها وينتجها أستديو ماببا 

الفرق بين المانجا والأنمي في أي عمل هو أن المانجا رغم أنها عمل مرسوم الا أنها أقرب إلي فن القصة منها إلي الفنون المرئية .. معتمدة بشكل كبير علي خيال المتلقي ورؤيته للأحداث .. هي فقط بترسم الخطوط العريضة لكن باقي الثقل بيقع علي مخيلة القارئ فهو بيتخيل الشخصيات بتتحرك أزاي والمعارك بتدور ازاي وأصوات وأداء الشخصيات وسماتهم بعيداً عن السمات الظاهرية أو الواضحة في القصة ممكن تبقي أزاي .. مين صوته رفيع مين لهجته حادة مين لغة الجسد بتاعته بتنم عن خبث مين وجهة بارد بلا مشاعر 

لما بنيجي لمعالجة أي مسلسل أو عمل لمانجا لازم ناخد بالنا أنها وجهة نظر متلقي ما للعمل .. في النهاية حاجة مش ح تعجب كل الناس .. هو المخرج شايف أن صوت الشخصية دي يبقي نسائي ناعم أكتر .. هو شايف أن الشخص ده لهجته المفروض تبقي فظة أو دي تبقي طفولية .. المسألة مسألة وجهات نظر في النهاية .. ولذلك أنا شايف إعتراضات الناس اللي ظهرت في أول 3 حلقات كانت سخيفة جداً علي معالجتهم لشخصية ماكيما أو هيمونو بعد كدة .. اه أنا كنت متخيلهم بأصوات وأداءات تانية غير اللي تمت بس يبقي الموضوع مسألة وجهات نظر ويبقي وأن الصانع عنده منطق في إختياراته

اللي فعلاً ما عجبنيش واللي شايف أن الناس كان عندها حق فيه هو ما يخص الـ"سي جي أي" .. فعلاً كان سئ في بعض الحلقات بشكل فظيع .. أفسد مثلاً المعركة الأولي بين السياف ودينجي وأكي .. الحتة دي من حتتي المفضلة وكنت أتمني تتعمل بشكل أحسن من كدة .. نفس الغلطة اللي أرتكبها الأستوديو في أتاك أون تايتن كررها هنا .. إستخدام الجرافيكس لدرجة أن المسلسل يبقي كأنه فيديو جيم .. مسألة سخيفة أوي 

في النهاية العمل حقق مراده وأنتشر بشكل واسع وخلي هذة القصة المختلفة والمختلة تبقي تريند عالمي .. بس هل أنتو فاكرين أنكم شوفتوا أجمد حاجة؟ صدقوني اللي جاي أقوي

Blue Lock S1

Blue Lock
S1, Epi 1-24 Finale

والله أنا دمعت عيناني حينما وصلت للقطة الأخيرة بهذا الموسم الرائع من هذا المسلسل الجميل

حقيقة ورغم كل الإنتقادات اللي بتوجه للمسلسل ده علي أنه غير واقعي وأنه في حتة أفورة شوية قريبة من جو الشونين أكشن أكتر منها قريبة من جو المسلسلات الرياضية الواقعية .. الا أني بأشوف التجربة دي شخصياً تجربة مختلفة وقوية وواقعية رغم كل ما قيل .. واقعية التجربة جاية من الأتي .. أنه علي عكس المعتاد في الأعمال اللي شوفناها زمان زي الكابتن ماجد وهايكيو-اللي ما أستلطفتوش أوي-  العمل هنا لا بيعظم من العمل الجماعي ولا البطل فيه شخصية خارقة للعادة وكذلك رؤية المسلسل نفسها لكرة القدم عملية أوي اوي أوي ملهاش دعوي بالمثل المنتشرة حوليها

الفكرة الأساسية اللي مبني عليها المسلسل هي فكرة بسيطة .. أن مفيش فريق بطل في كرة القدم ما بيسجلش أهداف وأن تسجيل الأهداف هو العنصر الأهم من أجل تحقيق أي طموح في هذة الرياضة .. الفكرة هنا مبنية علي حاجة مش عارف هل الناس واخدة بالها منها ولا لا .. اليابان في الكاس العالم 2018 خرجت قصاد بلجيكا بعد ما كانت متقدمة 2-0 وتراجعت في الدقايق الأخيرة لـ 3-2 .. الفكرة أن اليابان وقتها أهدرت كمية فرص كبيرة –علي ما أذكر- ولو كانوا أحرزوا هدف كمان كانوا عقدوا الموقف بشكل كبير علي بلجيكا .. دي الفكرة الأساسية للمسلسل ودي حقيقي مشكلة بتعاني منها اليابان لحد يومنا هذا .. أن معندهاش مهاجمين سوبر يقدروا يسجلوا أهداف كتير

المسلسل بيعمل معالجة تخيلية للفكرة واخدة شكل الصراع الدارويني التقليدي بين مجموعة من مهاجمي اليابان الشبان اللي مشروع بلو لوك بيوعدهم أن اللي ح يفوز فيهم بهذة المنافسة الإقصائية ح يبقي مهاجم اليابان رقم 1 ... لحد هنا الكلام حلو .. ولكن

ولكن في مشكلة في القصة أنا لاحظتها مع أول كام حلقة .. أن المسلسل لو مشي بالوتيرة دي ح يبقي أولاً مش واقعي أوي وثانياً عمره قصير .. بمجرد ما الأختبار يخلص القصة ح تفقد بريقها وتنتهي تماماً .. لكن المؤلف كان أذكي مني وعمل تويست لطيف في القصة أداها بعد واقعي .. أنه زي ما ركز علي عالم بلولوك ركز كمان علي التحديات اللي بيواجها المشروع ككل من إنتقادات الممولين وإستعجالهم للنتايج وكمان تشكيكهم في مدي جدوي الموضوع .. وده أدي أن بنهاية الموسم تيمة المسلسل أختلفت وعلي الموسم التاني ح نشوف شئ مختلف تماماً وألذ .. ح نشوف مدي قوة وجدية المشروع ونضج ثماره قصاد الأختبارات الحقيقة وضمن العالم الواقعي .. شوفنا بروفة لده في أخر حلقتين قصاد مهاجمي العالم لكن الموضوع ح يتفرشله مساحة أكبر وأفضل في الموسم الجاي

الجميل في المسلسل واللي عجبني شخصياً أنه مركز أوي أوي أوي علي الناحية التكتيكية في كرة القدم وتوظيف المهاجمين وأنواعهم .. المتفرج العادي علي كرة القدم بيعتقد خطأ أن المهاجم هو مجرد أخر حد في الملعب وخلاص وأنه لازم يجيب أجوان بأي شكل .. الموضوع أعمق من كدة .. كل مهاجم وليه ميزة وشكل غير الباقيين وعنده نواقص بيكملها بميزات زمايله التانيين وبيوظفها في سبيل إحراز الهدف

المسلسل مش بس بيحلل وظيفة المهاجم ده بيفكك فكرة الهدف وفكرة الحظ وكل العوامل المؤثرة علي عملية إحراز الهدف .. المسلسل مش عن كرة القدم قد ما هو عن إحراز الأهداف

صراحة المسلسل يستحق كلام كتير كتير كتير .. بس خلينا نكتفي بالقول بإنه يستحق المشاهدة

Hell's Paradise: Jigokuraku S1

 Jigokuraku

S1, Epi 1-13 Finale

في الأسابيع اللي فاتت لفت نظري أوي مصطلح "ثلاثي/ثلاثية الظلام" وهو مسمي أطلقه محبي الأنمي والمانجا عبر الإنترنت -خصوصاً المؤثرون منهم- علي الأعمال الثلاثة (جوسوتسو كايسن، تشينسو مان، جيجوكوراكو) في محاولة لإيجاد مسمي معاصر 

يوازي في الثقل والتأثير مصطلح الثلاثة الكبار والذي أطلق علي قمم الالفية الثلاثة الاشهر (ون بيس، ناروتو، بليتش)

من سنين طويلة والعشاق في حالة ترقب وإنتظار لبزوغ عصر جديد علي قمته يتربع مجموعة من الأعمال بنفس قوة وملحمية الأعمال القديمة تيجي تدشن عصر جديد للشونين أنمي .. شخصياً بأشوف أن الموضوع مش شرط يعني وأن بكل بساطة كل عصر وله أذان فلا الدنيا زي الدنيا وقتها ولا الصناعة والفن نفسه بنفس تفاصيل وحيثيات بتاعة وقتها .. لكن المسمي مقبول بالنسبة لي أوي علي مستويين .. اولاً كإعلان لبداية مرحلة جديدة من تاريخ هذا الفن هي بدأت من فترة طويلة الحقيقة لكن ده بمثابة إعلان حقيقي .. ثانياً هذة الأعمال تستحق التأمل والمتابعة لأن مستواه جيد جداً وفيها تفاصيل وحاجات جديدة تستحق التأريخ .. وعلي رأسها جنة الجحيم

يمكن الحدوتة طويلة شوية في رأيي لكن ممكن نختصرها في نقط سريعة كدة علي أمل أننا ممكن نفردلها مساحة في المستقبل بعد ما الأعمال دي تكون خدت وقتها وأكتملت وتجربتها تبلورت

الفكرة أن في طفرة في الأعمال الحديثة من أواسط العقد الماضي .. الطفرة باينة في جوانب كتير أهمها الحبكة .. الأعمال الحديثة ماشية علي طريقة نحن نبدأ من حيث أنتهي الأخرون .. فمبقاش فيه دلوقتي عمل في الحاجات الحديثة بيستعمل القوالب التقليدية القديمة زي بتاعة دراجون بول وقبضة النجم -الا بعض الحاجات- بل بقي السائد حالياً هو تفكيك البني والقوالب القديمة والسخرية منها في بعض الأحيان وصنع قوالب وأنماط وسرديات جديدة مشبعة بروح العصر .. كمثال في تشينسو مان الكاتب كل مدي بيضرب فكرة البطل النبيل ذو الأهداف السامية أو اللي رحلته ليها غاية كبيرة في مقتل .. أنت عندك بطل حيحان وجربوع عايز بس ياكل ويشرب وينام مع نسوان ويعيش في سلام ولا عنده هدف أكبر ولا غاية ولا مهتم بأي حاجة تانية

علي جانب أخر الأعمال بدون شك بتتأثر بما سبق وأحياناً بتنسخ وده مش عيب .. بس في النسخ والتأثر أصبح الثلاثة الكبار هما نبراس هذة الأعمال .. وتحديداً "بليتش" المتهم طول الوقت أنه أضعفهم وبلا إتجاه وغيرها من الحاجات اللي بأشوفها إفتئات كبير عليه .. الظريف ان الأعمال دي معظمها خد من بليتش عنصر مهم لازال بيعتبر من اهم عيوبه رغم أنه في رأيي نقطة قوة كبيرة وحاجة تخيله مختلف عن أقرانه .. وهو عنصر غياب الغاية أو خلينا نقولها بشكل دقيق أكثر أن البطل معندوش رحلة نحو شئ معين ولا هو عايز يوصل لمستوي ما .. البطل في القالب ده بيبقي شخص عادي فجأة بيلاقي نفسه محطوط في وش المدفع فبيتصرف بناء غريزته الداخلية اللي بيطورها مع التجارب والصدمات .. غاية البطل بيكتشفها مع الوقت وفي وسط الرحلة .. فالمغامرة اشبه بالرحلة الوجودية

هنا في "فردوس الجحيم" بداية القصة قوية للغاية .. الفصل الأول بيحكي عن شخص محدش عارف يقتله ولا هو عارف يسيب نفسه يموت .. حالة غريبة ومعقدة وغير طبيعية .. لكن مع الوقت البطل بيكتشف غايته الحقيقية اللي عشانها بيقرر يعيش وبيرفض الموت .. لكن القصة ما بتتوقفش عند ده .. القصة بتيجي في نهاية الموسم الأول بتصدم المشاهد بحاجة يمكن أنا كنت شاكك فيها من الأول بس مكنتش متخيلها بالطريقة دي .. وهي أن الهدف البطل بيلقي بنفسه في الجحيم عشانه وهو مجرد وهم زُرع في ذهنه 

بصراحة كانت صدمة كبيرة وغير تقليدية .. لكن الكاتب كان طول الوقت بيرمي إشارات ليها علي مدي الحلقات والجدع اللي لقطها في وسط الأحداث

من البداية خالص لو حد لاحظ ان التيمة المسطيرة علي القصة هي رفض المفروض والتمرد علي سلطة الأمر الواقع .. والقوالب اللي  بيتزرع الناس فيها من البداية .. قصة جابيمارو مع قريته وقصة السيافيين كلهم تقريباً مع العرف والتقاليد .. تقريباً كل شخصيات المسلسل اللي مكملة كلها كاسره للعرف وعايشة حالة تحد سواء مع الواقع أو مع نفسها أو مع حتي حدود قوتها والخصوم اللي بتقابلهم وده بيبان بعد كدة مع ظهور الحكماء وأرتفاع سقف التحدي

فكدة القصة عبارة عن ناس بتحاول تسيطر علي ناس وتتحكم في حياتهم ومصيرهم وأخرون يقاومون .. عظيم 

سبيل مهم من سبل السيطرة علي الأخرين بالذين اللي في مرتبة أدني بأي شكل وهو زراعة الوهم وسجن الناس دي جوا سجون لا وجود لها لكنها مسيطرة عليهم ومحجمة حركتهم ومقيدة حريتهم .. في قصة"ساجيري" المسألة دي باينة أوي .. هي بنت في مجتمع بينظر للمرأة علي أنها كائن ضعيف ودرجة تانية ولا يصلح الا للخدمة فقط .. طول مسيرتها اللي شقتها بإختيارها بتواجه طوال الوقت إما تربص الأخرين بيها لمحاولة إثبات أن ست ولا تصلح للسيف والقتل أو بتواجه مخاوفها الداخلية اللي ناجمة عن الأفكار والقيود اللي حجمت عقلها وطول الوقت معيشاها حالة من التشكك في قدراتها ونفسها وخوف من الإقدام علي أي فعل خارج المقرر

الابطال خارجين عن المألوف .. تمام؟ .. أوكيه .. بس مش هما بس .. ده الكاتب كمان خارج عن المألوف

القصة من أول ما أنتقلنا للجزيرة الملعونة دي وهي بتاخد شكل مغامرات ألف ليلة وليلة .. طبعاً التأثر بالتراث الديني للشرق الأقصي باين أوي في الأشكال والمسميات والأفكار .. بس طول الأحداث  أنا شايف روح ألف ليلة وليلة تلوح في الأفق .. من الكائنات العجيبة للأجواء لشكل الجزيرة لغرض الرحلة نفسه كله جو أسطوري كدة بيفكرنا برحلات السندباد 

لكن الكاتب حب يحط تاتش خلي الرحلة مختلفة وفيها إبداع .. وهي حتة أن جانب الشر بيتجسد في الكائنات المقدسة .. يعني الجانب الإلهي في القصة هو الشرير وهي فكرة صادمة وعجيبة

لحد الأن أنا مش فاهم هي طبيعة الجزيرة وهي أيه الغرض من وجودها وليه الإمبراطور بعت الناس دي لهناك .. هل هو بجد عايز إكسير الحياة ولا دي مجرد حجة بينما الرحلة ليها أغراض أخري .. لسة أسئلة كتير ما أتجاوبتش .. وده مخليني مش عارف أدي رأي كامل حولين القصة 

لكن خليني أقول إن طريقة كتابة المسلسل ومنطقه عاجباني جداً علي المستوي الشخصي .. من ناحية الغموض المركب والمعلومات المتشظية المشتتة دي بتعزز الإثارة بشكل كبير .. وكمان الأسلوب الإقصائي في التعامل مع الشخصيات الرئيسية وفكرة أنك تعتاد علي أن الشخصيات اللي بتتعلق بيها ممكن في أي لحظة تتلاشي ده بيزيد من الإثارة والحماس أكتر

فعلاً هي القصة فيها جرأة كبيرة وكل شوية تفاجئك بصدمة أكبر من اللي قبلها تقلب أصلاً رؤيتك للقصة وتخليك تعيد تفكير في ماهية وغرض هذة الرحلة الخطيرة

كنت في بداية عرض المسلسل بأقول أنه متأثر أوي بهانتر ولازلت عند رأيي نوعاً ما .. بس بيتهيألي أظنه يشق طريق خاص به 

عيوب الموسم تتلخص فيه أنه علي الميديا مش واخد الضجة المطلوبة رغم جودة المسلسل .. للأسف ماببا مكنش مهتم أوي بالتسويق ليه زي شينسومان .. ثانياً أخراجياً المسلسل عاني كتير بالذات في مشاهد الأكشن .. كان لازم يخرج بصورة أحسن من كدة .. لكن المطمئن انه الحلقات الأخيرة كانت جودة الرسم والتحريك فيها عالية أوي بشكل يبشر بإن الموسم الجديد ح يبقي أقوي 

شكلي ح أكمل مع المانجا وأمري لله .. مش قادر اوقف هذة العظمة

Inuyasha - Finale Season

Inuyasha

S6, Epi 139-167 (No Fillers)’ End

وقد وصلت الرحلة إلي المنعطف قبل الأخير ..

أينوياشا سري عليه ما سري علي كثير من السلاسل في الوقت ده –بداية التسعينيات ومطلع الألفية- وهو أن المسلسل توقف سنة 2004 بسبب أنه أبتدي يزاحم المانجا وأحداثهم أبتدت تتقارب .. ولذلك ح نلاقي أن مليان فيلرات من ناحية ومن ناحية تانية لم تستكمل أحداثه الا في سنة 2009 عن طريق أوفا قوامها 26 حلقة .. لم يجي وقتها ح نتكلم عنها بالتفصيل

الفصل ده بصراحة رغم أنه ما ينفعش قفلة لمسلسل الا أنها بيحمل كل مقومات الفصل المثير واللي فيه نقلة درامية واسعة وقوية .. يمكن أكتر شئ زهقني في المواسم اللي فاتت كان فكرة أن الأبطال تطورهم بطئ في الناحية الإنسانية وشبه معدوم علي مستوي القدرات .. وده اللي حصل عكسه تماماً في الموسم ده .. إينوياشا تحديداً .. بطل القصة .. قفز قفزة جيدة علي مستوي القدرات وأصبح أقوي وقادر علي مواجهة التحديات الجديدة .. كذلك كاغومي اللي تطورت نوعاً .. بس التطور الأكبر بالنسبة لها كان علي المستوي الإنساني في علاقتها مع إينوياشا وحبها المعقد ليه

وده ياخدنا للجانب الإنساني اللي أتحرك كتير في الموسم ده ويمكن حتي علي مستوي الشخصيات الشريرة بان أوي عند شخصية زي كاجورا اللي بقت دورها في الصراع أعقد من أنها مجرد شريرة تابعة وخلاص .. ويمكن ده شئ يبين عظمة المسلسل والقصة ككل

يمكن قصة إينوياشا من الحاجات اللي حيرتني كتير .. أولاً هي مش قصة البطل الخارق اللي قادر علي مواجهة كل الصعاب ولا هي قصة صراع تقليدي بيهزم في الخير الشر دائماً .. هي رحلة طويلة أوي في عالم منسوج بإبداع من خامة خطيرة وهي الفلكلور والأساطير اليابانية القديمة تحديداً اللي بتدور حولين الشيـاطيـن والأرواح وخلافه البطل فيها محدود القدرات .. ثم ثانياً القصة تركيزها متوزع ما بين الأبطال والأشرار بشكل يخليك تشك أساساً فمين هو البطل الحقيقي للقصة .. ساعات بأشعر أن "ناركو" هو بطل القصة .. اللص المنبوذ الضعيف اللي رمي نفسه في قلب عالم الشر عشان يتخلص من ضعفه وإنسانيه وظل صراع الأساسي والأمر طوال الوقت صراعه ضد إنسانيته وضد مشاعره .. ساعات بأشعر أنها قصة الجوهرة اللي تعتبر رمز أكتر منها شئ فحد ذاته .. فهي قوة جبارة ممكن تتلوث بالنوايا السيئة وتتطهر بالحسنة

ثالثاً طبيعة المسلسل أصلاً تخليه مختلف شوية رغم أنه مش فريد من نوعه .. فكرة أن كل حلقة ليها قصة وشخصيات جديدة وبتحكي جزء بسيط من الصراع الكبير أينعم أتكررت كتير بس في مسلسل بيسرد بالطريقة اللي وضحتها قبل كدة تخليك عند لحظة معينة متلخبط ومش قادر تجمع رؤية كاملة حولين العمل .. بالذات أن في كل حلقة أو قصة من دول بيطلعلك مفاجأة جديدة وقوي وسحر وشخصيات متداخلة وبتأثر في القصة 

يمكن ده في ناحية يخلي المسلسل ذو تفاصيل كتير وصعب أنك تختصره في قصة بسيطة صغيرة .. بس في ناحية تانية يخلية عمل عظيم .. لأن عالم متكامل بشخصيات حية ومتعددة الجوانب وليها نقاط ضعف وقوة وصراعها جزء من صراعات وأزمات هذا العالم مش كل حاجة فيه ... يمكن بس مسألة المنحي العاطفي اللي واخده المسلسل تخليه لفئة الشبان الصغيرين بس كمجمل العمل يصلح للجميع وهو عمل ثري جداً .. وده بان أوي في الموسم ده

الرسم في الموسم ده كان متقن وعظيم بالذات في التحريك ومشاهد المعارك .. علي ما وصلت لأخر حلقتين شوفت تقريباً أحسن ما قدمته هذة السلسلة .. وكذلك الأحداث اللي كانت عنيفة وسريعة للغاية .. بس برضو لا تصلح كقفلة لمسلسل حتي كقفلة مؤقتة .. ما حستش أني شبعت من القصة لسة .. لذلك إكمال السلسلة مسألة حتمية وواجبة

كمجمل المسلسل ممتع للغاية بصراحة .. تجربة وإن طالت بالنسبة لي وتخللها بعض الملل الا أنها ممتعة وشيقة جداً .. رحلة سنتكملها قريباً إن شاء الله

Inuyasha S5

Inuyasha

S5, Epi 111-138 “No Fillers” Finale

يااااااااه .. من زمن الواحد ما أتكلمش عن أينوياشا وفضلت موقف فرجة ع المسلسل لأسباب مجهولة الحقيقة .. يمكن فهمت بعضها مع العودة للمشاهدة والإستمرار مرة أخري وبعضها كنت فاهمه من الأول –زي أني غاوي دايماً يبقي عندي مسلسل متعلق بدون سبب في قايمة مشاهدتي- وبعضها مش قادر افهمه إلي الأن بالذات أني حبيت الموسم ده بشكل كبير يمكن أكتر من اللي قبله

المهم ... نخش في المفيد

السبب الأساسي اللي خلاني أتوقف وأستوعبته مع الوقت كان جودة الرسم ثم رتم القصة .. مفيش شك أن مع دخول الجرافيكس للأنمي في مطلع الألفية وبداية إستخدامه في الرسم عمل نقلة نوعية في جودة الرسم وقدرته علي التعبير عن الحالة المطروحة ... لكن ده أثر علي جانب تاني وهو روح الرسم

بمعني أن في الرسم اليدوي الخالص كانت مسألة الخطوط الحادة والأشكال اللي فيها ظلامية وتدي نوع من الفخامة الرعب للأجواء والشخصيات بالذات في مسلسل بيدور حولين الكائنات الخرافية زي أينوياشا .. الجرافيك خلي الرسومات شكلها "كيوت" اكتر وللأسف أثر علي جودة الحركة والعنف في المسلسل ونادراً لما بقي فيه مشهد أو معركة بتشد الواحد أو فيها تفاصيل خاصة .. ده أثر بالسلب علي المسلسل ثم علي القصة

في الموسم الرابع القصة دخلت في نفق مظلم .. فلا الأبطال بيطوروا ولا الأحداث بتتحرك للأمام والحالة كلها وقعت في فخ أو مأزق كدة لا مفر منه .. فأنت لا عارف هو الشرير وصل لفين ولا ح يوصلوا له ولا لا .. ولا شايف أي علامة أن الجانب الخير في القصة ح تحصله طفرة تخليه يتجاوز العقبة دي .. ولا كمان التحدي الموجود قصاد الأبطال مخليك متحمس أوي يعني للي جاي .. الصراحة فريق السبعة دول من أبـضـن الأشرار اللي ظهروا في المسلسل علي الأطلاق رغم أن فيهم شخصيتين حبيتهم لكن المجموعة علي بعضها بـضـان الحقيقة

يمكن مكنش فيه غير سيشيمارو هو الوحيد اللي تطوره كشخصية جذبني في الموسم اللي فات .. غير كدة قصة كان رتمها ووضعها لا تحسد عليه ... وهو نقيض تماماً اللي حصل في الموسم الخامس اللي بنتناوله حالياً

الموسم ده واخد تيمة "أرك فريزا" .. وهي تمية مشهورة في عالم الشونين ومتسمية علي أسم أشهر وأقوس أرك في دراجون بول

التيمة دي بتمشي كالأتي .. أنك بيبقي عندك شرير أساسي قوي للغاية بس ما ظهرش من قوته غير قدر بسيط جداً وطول الوقت بتبقي في إشارات أن ما خفي كان أعظم .. في الضفة التانية بيبقي عندك فريق أبطال بيسعي للقضاء عليه .. في الوسط الفريق ده بيتشتت وكل طرف فيه بيخوض رحلة مختلفة .. بس بيبقي الهدف المحوري لكل الرحلات دي هو الوصول للشرير الأقوي والقضاء عليه .. في وسط الرحلة دي كل طرف بيواجه خطر داهم مختلف عادة بيكون حد من معاوني الشرير ... وسط الرحلة برضو كل واحد بيكتشف جزء من اللغز الأكبر وهو طبيعة الشرير واللي بيسهل مهمة القضاء عليه بعد كدة ... في النهاية الفصل بيوصل للحتة اللي الأبطال أو البطل الأساسي بيصل للشرير وتبدأ ما بينهم المعركة الملحمية

دي التيمة اللي مشي عليها الفصل الا أنه في النهاية ما أنتهاش بإنتصار الأخيار بل بتعقد الموقف أكتر تمهيداً للمعركة الأكبر ما بين الخير والشر

عجبتني أوي الطريقة اللي مشي بيها الموسم والبناء الرايق لكل رحلة خاضها الأبطال والأخطار اللي واجهوها .. حتي الأشرار اللي كنت مخنوق منهم تعاطفت معاهم في النهاية والقصة بانت أن وراها فكرة أكبر وهو الصراع ما بين الخير والشر وطبيعتهم .. وأن المسلسل واخد النظرة البوذية للإنسان علي أنه مزيج بين الخير والشر لكن عليه أنه يحاول ما يقعش فريسة للشر تماماً

برضو الشخصيات ما أتطورتش ويبدوا أن أينوياشا قواه مش ح تقفز قفزة نوعية قريب زي ما كنت متوقع علي طريقة السوبر سايان في دراجون بول .. لكن في المقابل العلاقة بين الأشرار والأخيار وحتي بين الأخيار وبعضهم تطورت وتشابكت أكثر وأكثر وده أدي الصراع أبعاد جديدة ودوافع جديدة و زق القصة للأمام بشكل أفضل

مستمرون 

Inuyasha S4

Inuyasha

S4, Epi 83-88' 102-110' Finale (Without Fillers)

كل المسلسلات الطويلة سواء أنمي أو دراما لازم تقع في كام فخ كدة أثناء سير أحداثها أشهرهم فخ توقف تطور الشخصيات لدواعي درامية وده اللي حصل في الموسم الرابع من أينوياشا .. الموسم ده اصلاً فيصل ما بين مرحلتين فيهم واحدة أنتهت الموسم اللي فات وواحدة بدأت في نهاية الموسم ده .. لذلك هو موسم تمهيدي لأحداث وتحديات جديدة فهو في حد ذاته مش مهم علي قد ما التطورات الجديدة اللي بتظهر فيه هي اللي مهمة 

يعني ح نلاحظ أن في كم كبير من الشخصيات الجديدة واللي ماكانتش موجودة قبل كدة ظهرت في الموسم ده وأتفردلها مساحة كويسة في الأحداث .. كمان في عدد من الحقائق وجوانب من القصة كنا أول مرة نعرفها الموسم ده أتفردلها مساحة كويسة .. في المقابل تطور الشخصيات توقف تقريباً بالتزامن مع إختفاء الشرير المحوري للقصة اللي يعتبر محور الأحداث في الموسم ده .. فالموسم كله عبارة عن رحلة بحث لم تنتهي عن مكان الشرير وسر أختفاءه فده عمل حالة تجمد شوية لشخصياتنا الأساسية بالمقارنة بما سبق 

كل ده العوامل دي خلت الموسم شوية مش قوي لكنه لطيف إلي جانب جودة الرسم اللي كان فيها شوية مشاكل رغم أنه كان أبتدي يظهر أثر أستخدام الجرافيكس وتطور تنكيك الرسم نفسه لكن في المقابل الريومات كانت في بعض المشاهد كان سذاجة زي برضة بعض الأحداث والحبكات اللي كانت بتعاني من بعض السذاجة واللامنطقية وفقدان الحماس أحياناً

عامة يعني موسم مش قد كدة في مقابل كذا موسم جيدين مش ح يخلينا نتوقف إلي زائد أن نهاية الموسم كانت حماسية جداً وأدتني أمل في اللي جاي

Inuyasha S3

Inuyasha

S3 , Epi 55-58' 60-67' 69-74' 80-82 Finale (No Fillers)

أينوياشا مسلسل أنمي شبابي أكشن حول مغامرة شيقة ومرعبة ودموية ودرامية ورومانسية ومثيرة في الماضي البعيد وتحديداً العصر الإقطاعي لليابان حيث الحروب والخرافات والعفاريت والفرسان والشياطين والأساطير العابرة للأزمنة

الموسم الأول كان تعريف بالمحور الأساسي للقصة وتعريف بالأبطال الأساسيين للسلسلة وتشابك للخطوط وتقاطع أدي لتجمع الأبطال وتكوينهم لفريق من المحاربين لمحاربة الشر المتمثل في "ناراكو" وتجميع أجزاء الجوهرة الزمردية التي تعطي كم كبير من القوة لمالكها .. الموسم التاني كانت تركيزه منصب علي تطور القصة وظهور شخصيات جديدة علي الجانبين الخير والشرير وبإبراز جوانب جديدة في الأبطال الأساسيين والتركيز علي قوي أينوياشا الخفية وقدراته والتحليق بيها لأفاق جديدة

الموسم الثالث كان درامي أكثر فهو ركز علي جميع الشخصيات الأساسية للمسلسل اللي تراجعت في مقابل تقدم وتصدر شخصية أينوياشا للمشهد في الموسم اللي قبله .. أدي الشخصيات دي مساحات أكبر لأظهار جوانبها المختلفة ومشاعرها وعلاقتها بمحيطها ومكامن قوتها وضعفها .. ده إلي جانب تطوير قوي أينوياشا ودفعها بقوة للأمام التعريف بقدراته الجديدة أكثر ومزاياها وعيوبها .. يمكن هو مخدش نفس مساحة الموسم الماضي لكن فضل -وده الطبيعي- شخصية محورية في جميع الأحداث والأكثر من حيث الدفعة الدرامية والتطور علي مستوي القوي .. لكن للامانة المسلسل لحد الأن ما وقعش في فخ البطل الأوحد اللي كل اللي حوليه مجرد كومبارس زي ما حصل في Naruto في الفصول الأخيرة بالذات و Dragon Ball في بعض فصوله لكن مش كلها للامانة

مكملين

Inuyasha S2

Inuyasha

S2 , Epi 28-54

بعد تعاطي أكثر من 50 حلقة من أينوياشا خدوا من وقت طويل حبتين بلورت فكرة حولين الأنمي بشكل عام والمسلسل ده بشكل خاص والدافع ورا أني أكلمه رغم أن إنطباعي الأولي والمستمر عنه أني لو كنت شفته في سن أصغر من كدة كنت ح أتعلق بيه وأنهبر أكتر من دلوقتي .. يعني ده لو كنت شوفته وأنا في إعدادي أو في ثانوي مثلاً كان خطفني وبقيت منبهر بيه أوي عكس دلوقتي أنا مستمتع وحابب أكمل لكن مش لدرجة أني أنبهر

الأنميات الأكشن علي حسب تسلسل القصة ونوعية الشر اللي بيواجهوا الأبطال بتنقسم لأكثر من نوع بس أهمهم 3 انواع .. نوع الأشرار فيه حقب ومراحل فكل ما بتخلص من شرير بتخش ع اللي بعده اللي أكثر منه ذكاء أو قوي زي دراجون بول و ناروتو غيرهم .. وفي نوع تاني مفيهوش شرير بالمعني التقليدي لكن في حالة خطرة أو غامضة الكل عايشين فيها والقصة كلها عبارة صراع من أجل البقاء وفي الوسط المفاهيم بتتبدل وطيبين بيبقوا أشرار والعكس وهكذا .. دول زي كود جياس وإيفانجليون وهجوم العمالقة غيرهم .. وفي نوع ثالث الشرير فيه شخصية محورية ما بينتهيش غير في نهاية القصة ومستمر وبيتطور وبيبتكر في ألاعيبه وأساليبه جنباً إلي جنب مع الأبطال زي ديث نوت و زي إينوياشا

دي النقطة المحورية اللي مخلياني معجب بالمسلسل وعايز أكمله .. القصة بتتطور والشخصيات كل مدي بتكتشف شئ جديد عن ذاتها وبتطور من قواها وكذلك الشرير .. في البداية أعتقدت أن الشخصيات عند مرحلة معينة ح تفضل ثابتة وعلاقاتها وقدراتها ح تثبت علي كدة .. بس المسلسل تفوق علي ظني الحقيقة ووراني قد أيه هو مسلسل مسلي ومعمول حلو مهتم بتفاصيل كتير دقيقة ممكن أعمال تانية كبيرة ما تهتمش بيها زي العلاقة ما بين شخصياته والجانب الأنساني .. طبعاً هو في مشكلة وهي الرتم البطئ للأحداث والتطور وسذاجة بعض الجوانب والحبكات الدرامية بس مش مشكلة كبيرة يعني أوي بالذات انه مسلسل للمراهقين يعني

موسم قوي .. ومكملين