How I met your mother: S1

How I met your mother

S1, Epi 1-22 "Finale" 

في مقولة بتقول أن المسلسل ده أذكي نسخة من فريندز .. أما أنا فأقول لكم يا أحبابي أنه نسخة عصرية ظريفة من ساينفيلد .. نسخة عصر ما بعد الأنترنت .. رغم أنها بتتكم علي عصر ما قبل السوشيال ميديا في الموسم الأول بس ملمسة معانا عكس فريندز و ساينفيلد اللي بيدوروا في عصر مختلف بمعايير وأدوات وطرق تواصل مختلفة تماماً 

ضيف علي ده أنه هنا الصانع تفادي خطأ فادح وقع فيه صناع فريندز وهما بيبنوا المسلسل وبأن بعد اكتر من موسم .. هنا جذور كل شخصية محطوطة من الأول وفي ربط منطقي ما بين سمات ومميزات الشخصيات حالياً وما كانت عليه في الماضي .. ودي نقطة مهمة في الكتابة أن كل شخصية يبقي ليها البروفايل بتاعها وجذورها وشبكة علاقتها اللي بتتحرك فيها..  لكن في فريندز جذور الشخصيات اتكتبت متأخر شوية وده خلي في ثغرات درامية كتير في القصة فتلاقي معلومة اتقالت في أول موسم بيتقال عكسها بعد كدة أو بتظهر علاقة أو تفصيلة في حياة الشخصية من العدم مكنش في ليها اي تقديم أو جذور زي حتة غباء جوي اللي ما ظهرش الا بعد تاني موسم تقريباً أو بعد كدة كمان ومكنش فيه أي تقديم ليه و زي قصة اعمار الشخصيات وامتي أول مرة يتقابلوا اللي كان فيها عك كتير 

طبعاً ممكن يكون حكمي مستعجل شوية بس أظن والله أعلم المسلسل هنا مش ح يبقي فيه ثغرات كبيرة زي اللي في فريندز أو الأعمال القديمة عامة 

المسلسل هنا واخد نفس قالب ساينفيلد والسخرية من الثقافة الأمريكية وطريقة تفكير وحياة المجتمع الأمريكي بس هو تركيزه الأكبر علي العلاقات وعنده بناء درامي بيتطور بإطراد علي طريقة فريندز مش مجرد حلقات 

منفصلة متصلة بدون تطور حقيقي للشخصيات 

كمان لو حد لاحظ هنا كان أبتدي ضحك الجمهور ينخفض شوية عن أعمال التسعينيات ودي كانت بداية تلاشي الأسلوب ده عامة من علي الشاشة 

كقصة المسلسل ما قالش جديد بس هو ركز على تفاصيل ومواقف جديدة في العلاقات وقدم أكتر من نموذج ليها متناقضين في قالب واحد وأدي لكل شكل مساحته 

بس المساحة الأكبر الحقيقة وخداها العلاقات التوكسيك وده اللي موترني أوي حيال المسلسل لأن شخصية تيد دي بتفكرني بنفسي أوي في نفس مرحلته العمرية وبتقلب عليا ذكريات مش لطيفة احياناً .. لذلك هو أكتر شخصية مش مفضلة عندي فيهم .. بينما المفضل هو بارني .. الإستنساخ الأفضل حتي الأن لتشاندلر 

ولنا عودة مع الموسم الثاني

Unluck Undead S1

Unluck Undead
S1, Epi 1-24 "Finale"

نادراً ما في السنين الأخيرة الواحد قابل عمل عموماً عجبه علي مستوي الرسم والكتابة مع بعض .. عادة مؤخراً يا المسلسل تبقي كتابته حلوة بس رسمه مش قد كدة يا المعالجة الدرامية رخمة بحيث بيبقي الرتم بطئ أو الأحداث متسارعة بشكل مش لذيذ أو في تغيرات ما بين المانجا والأنمي يا أما أساساً بتكون القصة مكررة وتقليدية بس لذيذة فتمام يعني

لكن المسلسل ميزته أن فكرته جديدة رغم أنه واخد من مشارب وأعمال سابقة بس المعالجة بعناصر القصة بالاجواء الغريبة اللي بتدور فيها الحكاية تخلي التجربة دي مميزة أوي

خلينا نحرق شوية تفاصيل ونحكي القصة من الأخر للأول .. المسلسل متأثر بل مرتكز بشكل كبير علي أطروحات نيتشه الوجودية بس هو معالجها بطريقة فيها فانتازيا لطيفة .. تحديداً العود الأبدي وموت الإله وإرادة القوة وشوية الإنسان المتفوق أو السوبرمان بس مش أوي .. مش ح أستغرب لو نيتشة ظهر كشخصية في أحد الأركات الجاية بطريقة أو بأخري .. هو ظهر بطريقة ما فعلاً واللي جسده الولد الرسام صاحب قدرة "المجهول" لأنه كان عارف أحداث الماضي والمستقبل وبيدونها عبر رسوماته بس برضو مش ده التجسيد اللي أنا منتظره

القصة مرتكزة علي نقطة أن العالم عايش في دايرة مغلقة بتنتهي كل مرة بإنتصار "الإله" اللي بيدمر الكوكب ومن شظاياه بيعيد بناء الكوكب تاني ويعيد دورة الزمن من أول جديد .. شخصيات معينة بس اللي هي عندها القدرة علي أنها تقدر تفتكر اللي حصل في الدورات الزمنية السابقة وكل مرة بتحاول تتفادي أخطاء المرة السابقة .. الناس دي ذوي قدرات خاصة وبيحاولوا يجمعوا ذوي القدرات الخاصة اللي زيهم اللي بيسموا "المبطلون" في محاولة لتغيير قدر العالم والحيلولة دون تدميره عبر قتل الإله المدمر

هنا في حتة المبطلين دي القصة شوية بنلاقيها متأثرة أوي وبشكل واضح ب"أكس مين" لدرجة أنها في قصة من القصص شبه خدت تيمات وقصص مشهورة من سلسلة الأكس مين زي حتة رفض العالم ليهم والكوارث المرتبطة بإستيقاظ قواهم وإستغلالهم من قبل تجار البشر كمسوخ وحالات نادرة وقتلهم أحياناً كنوع من العنصرية .. وهو المؤلف أستخدم التيمة دي في الأول حلو وكانت مدية للقصة طعم مختلف عن القصص الرائجة لأن عادة أصحاب القوي الخاصة في الأعمال المشهورة العوام والناس العادية ما بيكونوش علي دراية بقدراتهم ولا بوجودهم أصلاً بينما معروفين ومستهدفين وحياتهم علي المحك طوال الوقت

لما القصة دخلت في حتة أفكار نيتشة كمان التيمة بتبتدي تتميز أكتر لأن محاربة الأقدار بالشكل ده محتاجة قدراته خاصة بالشكل ده .. ضيف كمان علي ده أن طبيعة قوي الناس دي منطقية من أول التسمية لطبيعة القدرات نفسها.. كلها بتبتدأ بالمقطع "UN" بمعني النفي وهو في رأيي نفي للقدر بمعني أن الناس دي قدراتها موجودة لتغيير الأقدار ودي الفلسفة وراء التسمية

طبعاً لم يخلوا المسلسل من التأثرات بأعمال الشونين الكبيرة القديمة فكان تأثره الأكبر بملهم العصر الحالي الأول "بليتش"

من أول فكرة مجلس المطبلين لحتة أن دوافع الأبطال أساساً فردية بحتة لكن بعد كدة بتتحول لدوافع كبري علي طريقة إيتشيجو لأنهم نسخوا مشهد خيانة أيزن بالملي في حتة معينة للتيميات الجادة والظلامية أوي اللي في المسلسل زي تناول فكرة الشيخوخة والموت والوحدة والرغبة في الانتحار .. كلها حاجات شايفها فيها كتير من روح بليتش وتأثيره اللي بقي واسع حديثاً

الصراحة خسارة أن تقريباً محدش كان مهتم يتفرج علي المسلسل ده غير أنا واتنين أصحابي رغم أنه تحفة

Demon Slayer: S4 (Hashira Training arc)

Demon Slayer
S4 (Hashira Training arc) , Epi 1-8 "Finale"

دايماً منذ نشأة الشونين أنمي بالذات الأصناف المرتكزة علي الأكشن في كام ثابت كدة ما أتغيروش ونادراًوما شذ عنهم أي عمل .. يمكن أتكرروا في كلامي كتير بس ح أعيدهم تاني لجل التذكير

لازم يكون في أرك فلاش باك وأرك تدريب وانقطاع زمني الشخصيات بعديه بتتغير وتتطور و أرك حرب شاملة وأرك المتناقضين فيه بيجتعموا لمحاربة شرير شرس وقوي .. دي -وحاجات تانية طبعاً- بقت ثوابت خلاص قلما يخرج عنها أحد إلا المجددين وحتي دول لازم يكونوا علي دراية بالقوالب والمسارات دي لأنها بقت جزء من جماليات هذا الفن

ديمون سلاير تقريباً أستخدم كل القوالب دي سواء جت علي الشاشة ولا لسة ح تحصل .. وسواء جت بشل جزئي أو كلي بمعني أنه في بعض الأركات ممكن يجي مشهد فلاش باك أو يبقي في حلقتين تدريب مش كل الأرك .. لكن الأرك ده إستخدام القالب كان كلي

وده يودينا لفكرة بأقولها دايماً عن المسلسل ده وهو أن أحد أسرار نجاحه أنه تقليدي .. ما جابش جديد ولا حاول يخترع بل لعب في المساحات المضمونة كدراما وخلي اللعب كله والابتكار في التحريك والرسم والإبهار البصري .. ده أكتر مسلسل بأحسه أنه معمول بجودة الفيديو جيمز والشغل البصري فيه من أفضل ما رأيت في أخر ١٠ سنين مثلاً .. وده لأنه المشروع الأساسي للأستوديو بتاعه عكس شغل ماببا اللي عايشة حالة تشتت وضغط فظيع علي العمالة بعد بقي عندها مسلسلات الصف الأول كلها تقريباً عدا عملين تلاتة

هنا أرك التدريب كان ليه ٣ أغراض أساسية في رأيي.. الأول الغرض المباشر وهو أنه تدي فرصة للشخصيات تتطور وتستعد بقوة للخطر القادم والقتال الشرس اللي علي وشك أن يبدأ .. الثاني حاجة كدة أقرب لإستراحات المحاربين قبل بداية المعركة الأخيرة تدي فرصة للمتلقي يتعرف أكتر علي الشخصيات اللي مكنش فيه فرصة أنك تقدمهاله ضمن سياق الأحداث السابقة زي هاشيرا الثعبان وهاشيرا الرياح اللي لازلت برضو شايف أنهم كانوا يستحقوا يبقي ليهم مساحات أوسع مع تفادي فخ المط

ثالثاً الأرك ده تمهيد جيد جداً للنهاية .. لو نلاحظ الأرك كلها محاط بأجواء الحذر والاستعداد لحدث كبير يمكن محدش كان واعي بقربه أوي غير زعيم السلايرز وكان جاهز للتضحية الكبيرة اللي فتحت الباب للمعمعة الأكبر.. أظن موزان برضو كان مستعد للمعركة كويس وعارف أنها جاية فغالباً كانت خطته أنه يقضي علي عشيرة السلايرز بعد ما يخطف نيزكو .. الحذر حتي باين في أن مكنش فيه أكشن كتير برة التدريبات غير يمكن أول مشهد في الارك والحلقة الأخيرة .. كل طرف بيجهز نفسه بشكل جيد وبيخطوا خطوات متأنية وحذره عشان يباغت الطرف التاني ويكون مستعد للموجة القادمة .. محدش بيقدم علي أي خطوة متهورة عشان ما يفسدش خططه

تقريباً ده أكتر أرك في المسلسل متأثر بمسلسل بليتش أنا شوفته لحد الأن .. معروف أن بليتش هو أكتر مسلسل مأثر في أعمال الجيل الجديد بشكل ملحوظ أكتر من ناروتو و ون بيس رغم أنه كان أكتر مسلسل الفانز أنتقدوه في الثلاثي الكبير .. وده يرجع لأسباب كتير يطول شرحها بس في رأيي أهم سبب فيهم أنه الوحيد في الثلاثة اللي خرج عن سردية البطل اللي عنده حلم كبير عايز يحققه لسردية أبسط وهي أنه مجرد كد عايز يعيش بسلام ويحمي من يحبهم وأن كل القوي والأدوات اللي في أيديه دي بيتم تسخيرها لهذا الهدف

الأرك هنا -واللي بعده علي فكرة- متأثر أوي بأرك الأرانكار ومعركة أيزن بشكل أقرب للإقتباس والنسخ لدرجة أنهم راحوا جابو الممثل اللي بيعمل صوت أيزن يعمل صوت الغراب بتاع زعيم عشيرة السلايرز

لو من حيث المقاربات فالطبيبة الشيطانة هي هي شخصية أوروهارا كيسكي تقريباً .. هاشيرا الثعبان باين أوي أنه شبه مايري .. هاشيرا الرياح هو زراكي كينباتشي .. هاشيرا المياة قريب جداًومن شخصية بياكيا عشان كدة بديهي يكون في منافسة مع هاشيرا الرياح زيه زي كينباتشي و كوتشيكي .. طبعاً الشبه ما بين زعيم السلايرز والقائد ياماماتو واضح وكبير بس الفرق في السن والخبرة القتالية .. لكن التضحية واحدة تقريباً وده يوديني لحتة أن الأرك كمان متأثر بحرب الألف عام مش بس أرك الأرانكار

التأثر ببليتش مفيد لأسباب كتير .. أولاً لأنه عمل مشهور ومكتمل فأنت بتاخد من منهل مضمون وناجح وشبه اللي بتقدمه أوي .. ثانياً أنت بتشوف برضو هو وقع في ايه وبتحاول تتفاداه في تجربتك وده اللي أتمني يكون حاصل .. ثالثاً متماشي مع روم العصر اللي بتتمحور حولين الفرد شوية مش ناحية القضية الكبيرة ولا الهدف الكبير

الموسم ده يمكن من أقل المواسم اللي فيها أكشن لكنه ملئ باللحظات الإنسانية والعذوبة وكأنه قاعدة شاي هادية مع أبطال هذا العمل قبل ما نودعهم وداع أخير بنهاية الأرك الجاي .. فكرة ذكية ممكن ما تعجبش البعض بس انا باشوفها حلوة .. في رأيي أحلي من فكرة الموسم اللي فات اللي كان فيه مشاكل في رأيي ومش بالقوة الكافية

في إنتظار الأفلام الثلاثة علي أحر من الجمر

Dragon Ball Z: Saga 2 - Namek Saga

Dragon Ball Z: Saga 2 - Namek Saga

Epi 36 - 107 "No Fillers" Finale

اول حاجة بتيجي في ذهني وأنا باحاول أستعيد أحداث الأرك الطويل متعدد المراحل ده حتة أن قصته متأثرة كتير بأفلام الويسترن و السباجتي .. تحديداً فكرني بفيلم "الطيب والشرس والشرير" .. رحلة البحث عن الكنز في عالم موحش ومقفر اللي بتقابل فيها شخصيات وقصص مختلفة وكل طرف من أطراف القصة بيدور علي الكنز لغرض مختلف عن الأخرين وكل واحد بيستخدم تكتيكات مختلفة وعنده ميزات عن غيره بيسخرها في سبيل نجاح هذة الرحلة الملحمية .. هو كمان شبه "حدث ذات مرة في الغرب" في حتة الشرير القوي اللي في طرف في القصة عمال يبذل كل جهده وبيخوض الرحلة الصعبة دي عشان في النهاية ينتقم منه .. لله درك يا سيرجي ليون والله

مسألة تأثر الأعمال دي بأيقونات الثقافة العامة في السينما والدراما عادي .. كنت أتكلمت فيما سبق عن تأثر دراجون بول بأفلام الكونغ فو وأزاي هي واخده منها بني شكلية وسردية كتير .. باين أوي في بناء شخصية فريزا .. أنا في الأول كنت ح أتكلم عن الجزء ده وأقول أنه شبه ألعاب الفيديو جيمز اللي بتقابل فيها الوحش الأكبر في أخر الرحلة .. لكن لما فكرت شوية أكتشفت أن الألعاب دي نفسها بالذات القتالية منها  متاخدة من أفلام الأكشن وبالذات الكونغ فو .. فكرة البطل اللي بيرمز للخير المطلق ورمز الجد والإجتهاد والموهبة المصقولة بالتدريب والمثابرة في مقابل الشرير الطاغية اللي بيمثل الشر المطلق في أبهي صوره والقوي بشكل مفرط بيديله مساحة أنه يؤذي الأخرين بلا حساب .. الفكرة دي ورحلة لقاءهم اللي بتيجي بالتدريج دي منتمية أوي لسينما الكونغ فو بقيمها المثالية وأسلوبها المباشر الأقرب للطفولي

فريزا مبني بحيث أنه يمثل الشر الأكبر في الكون كله وعشان كدة -وده رأي ناس كتير- كان المفروض ده يا يبقي الفصل الأخير في قصة دراجون بول أو القصة تاخد منحني مختلف بقي .. لكن لما القصة كملت بعد هذا البناء المهيب والشرير المكتوب حلو أوي تحس أن الموضوع بوخ .. حتي تورياما نفسه لما أضغط عليه عشان يعمل الشرير الأكبر في الكون بعد كدة عمله بشكل هزلي "ماجين بوو" وأظن والله أعلم تورياما ما بيحبش الشخصية دي لدرجة أنه لما أستعاد سيطرته علي القصة في دراجون بول سوبر طلعه نكتة وهزقه وكأنه بيسخر من المسئولين سابقاً وضغوطهم عليه وافكارهم اللي اجبروه عليها

فريزا نموذج لكل ما هو شرير ومنحط من وجهة نظر أكيرا تورياما .. عنصري، سفاح، جشع، مصاب بجنون العظمة .. أينعم هو شخصية يبان أنها ظهرت من الفراغ لكنها حقيقي تقيلة .. اولاً تم الإشارة ليه لفظاً قبل يظهر وكانت إشارة مرعبة ملخصها إنه قوة جبارة بتجر وراها جيش جرار لغزو الفضاء .. ثم جاء ظهوره بالتدريج وفض الحجاب عن شخصيته الغامضة والمخيفة لحد ما ظهر بشكل واضح وتجلي في المعركة الأخيرة .. أصلاً قبل ما يظهر قوته حتي في أي معركة أظن أغلب المشاهدين كان عندهم شغف لمعرفة ما يخفيه هذا الكائن المخيف من قوي جبارة .. وهي دي ثمرة البناء القوي والطويل في أي دراما أنها لا تقطع حبل التشويق أبداً بل بتزيده .. وهو شئ ح تفتقده القصة في مراحل لاحقة

القصة في الجزء ده رسخت جوكو كنموذج حي للقيم النبيلة وأصبح كل من حوله في حالة مقارنة معاه تحديداً فيجيتا اللي وجوده وقرار الإبقاء عليه وأنه يبقي شخصية أساسية كان من أكتر القرارات العبقرية في التاريخ وح يأثر مش بس علي القصة بل علي الصناعة كلها لحد يومنا هذا .. الشرير الأمثل في رأيي جنباً إلي جنب مع فرانك كاسل .. شخصية بتبدأ القصة كطرف ثانوي علي هامش جانب الشر لكن بيكتسب أهمية مع مرور الوقت ومع التعمق أكتر في تفاصيل شخصيته وأبعادها لحد ما بيبقي بطل القصة التاني وند البطل الأول .. بيقوم بالدور اللي كان المفروض يقوم بيه بيكولو قبل ما يحصله تحول يخليه يتراجع في الترتيب شوية .. حتي لو حد يلاحظ هما الأتنين جذورهم متشابهة أوي .. الأتنين أبناء رموز كبيرة للشر والاتنين كانوا عايزين يدمروا البشرية في منعطف ما .. حتي في الدوبلاج الأمريكاني اللي كان بيؤدي صوتهم واحد

للأمانة لما رجعت أتفرج للمرة التانية علي أحداث المسلسل أكتشفت انها مش محبوكة أوي زي ما كنت متصور وان الاعمال الحديثة مكتوبة افضل وبشكل أعمق .. رغم ان دراجون بول زد مش عمل سطحي ويمكن تأويله تأويلات مذهلة بس يبقي أنه كلاسيكي وأسلوبه قديم .. فعلاً بني وقوالب الأنمي حتي لو محافظة علي بعض أشكالها لكن من جواها كأفكار وسرد قفزت قفزات كبيرة من وقت إنتاج السلسلة لحد الأن 

لكن يبقي دراجون بول زد  بيكتسب قيمته الأساسية من كونه عمل مؤسس لا يمكن إهمال دوره

ملحوظة: كتبت هذة الكلمات قبل ساعات من إعلان وفاة العزيز الراحل "أكيرا تورياما" وهو ما سبب لي صدمة يومها لأني كنت أنسج قصيدة في عشق عالم هذا الرجل الساحر .. لروحه السلام والأبدية

Slam Dunk: 188-278.5 "End"

Slam Dunk
Ch 187-278.5 "End"

وها قد وصلنا لنهاية الرحلة .. الوداع يا فريق الصقور والوداع يا ملاعب كرة السلة

زي ما توقعت تماماً فالمرحلة اللي جت بعد الصعود للبطولة الوطنية كانت أرك تدريب .. وكالعادة البطل في المرحلة دي بيتلقي تدريب من نوع خاص علي يد المعلم بتاعه بيعمل طفرة في مهاراته وبينقله للمستوي اللي بعد كدة .. بس في الأرك ده حصل حاجة غريبة أو خليني أول أكتشفت حاجتين في غاية الأهمية في القصة كنت شاكك فيهم لحد ما بقوا واضحين بشكل كبير في المرحلة دي

الحاجة الأولي أن ساكوراجي/حسان مش هو بطل القصة أو بمعني أدق مش هو بطلها الوحيد.. تقريباً كل شخصية في الفريق بل في القصة تصلح تبقي شخصية رئيسية .. لأن كل شخص فيهم بيعبر عن شئ أو بيجسد معني .. الطموح، الإجتهاد، تحقيق الحلم بعد سنين من اليأس، تجاوز الحدود وتحدي الواقع، الصلاح والتغيير، الشغف لحد الجنون، الموهبة بأشكالها ... وده يودينا للحاجة التانية وهي أن كل فريق في القصة هو مجاز أو وجه أخر للقصة الرئيسية

يعني كمثال فريق "ريونان" هو إجابة علي سؤال ماذا لو كان فريق شوهوكو/الصقور فشل في التأهل للبطولة الوطنية .. فريق كاينان رمزية للطموح والقوة اللي بتصطدم بالواقع والواقع هنا أنهم فريق متفوق علي المستوي المحلي لكن علي مستوي القطر هو طموح لكنه في اللي أقوي وأشد منه .. سانوا هو وحش اللعبة اللي تجاوزه هو إنجاز في حد ذاته وهو برضو إجابة علي سؤال ماذا لو كان شوهوكو فريق متفوق أو ماذا لو كان في فريق بيجمع ما بين الإلتزام  والقوة وفيه كوكبة من المواهب .. فريق تويوتوما هو نقيض فريق الصقور تماماً مجموعة من النجرسيين اللي بيلعبوا لعب غير نظيف والعلاقة بينهم وبين مدربهم فيها كراهية وعدم إحترام

نيجي نخش علي مرحلة البطولة الوطنية فخليني أقول أنها لو كانت أنتهت أو أبتدت بشكل مختلف عن اللي حصل ده كنت ح أعتبر القصة دي عبيطة ولا تستحق الإستكمال أو القراءة حتي

واقعياً احنا قدام فرقة محلية محدودة محدش يعرفها برة الأقليم بتاعها بتروح للمنافسة الأكبر علي مستوي القطر لأول مرة بعد عنااااااء طوييييييل ومعركة مضنية .. فطبيعي أولاً في بدايته أنه يعاني من إستخفاف المنافسين بيه ويجد صعوبة بالغة في مجاراتهم لأنهم من مستوي تاني .. ثانياً طبيعي أنه يقع في مرحلة متقدمة من البطولة إن لم يكن من بدايتها .. لأنه ليه سقف في النهاية وكذلك لأن الحماس والتعاون لوحدهم لا يصنعوا النصر

لو رجعنا لحتة المجاز ح نشوف أن أختيار الفرقتين دول عشان يواجهوا الصقور أفادوا الدراما بشكل كبير .. الفرقة الأولي بتمثل الشر المطلق .. النموذج المضاد تماماً للقيم التي بني عليها فريق الصقور .. لكن مع مرور الوقت بنكتشف أن وراء هذا الشر حب وإخلاص ورغبة إثبات وجهة نظر معلمهم اللي بيدينوا له بكثير من الفضل .. حتي الشر هو خير لكن من وجهة نظر أخري .. فهو من ناحية أدي مساحة لمناقشة عقدة فلسفية وهي مسألة الشر ومن الناحية الدرامية أنتصر للقيم النبيلة اللي بني عليها الفريق

الفريق التاني "سانوا" هو البطولة الحقيقية لفريق الصقور .. فرقة الإنتصار عليها بطولة في حد ذاته .. ولذلك كان من العبقري إنهاء القصة بعد المباراة دي وأنها تبقي المباراة الأطول في القصة لأن التحديات فيها كانت كبيرة وعلي جميع المستويات.. التكتيكية والمهارية والبدنية والذهنية.. لا فعلاً ملحمة مش عايزة تخرج من ذهني شى فخم للغاية

نيجي لنهاية القصة واللي طبعاً عاملة جدل .. فرأيي هي دي مش النهاية الأصلية للعمل .. لأن مش معقول الرجل يبني العالم الواسع ده كله ويقدم الشخصيات دي كلها عشان في الأخر يقفل القصة قبل ما يدي حتي الشخصيات دي فرصة أنها تتحدث عن نفسها .. دي يا اما ضغوطات من الناشرين ودي مسألة معروفة في الصناعة أو زهق وكسل منه هو وهي مسألة متكررة ومفهومة بين المؤلفين والرسامين

بس خلينا نعطي قليل من الإنصاف للقصة ونهايتها ... هو الرجل بنهاية القصة قدر يعكس تجاربه الشخصية والذاتية مع الرياضة اللي حبها ومارسها في شبابه الأول .. من كل الجوانب حتي بما فيها المخاوف والإصابات والفشل .. هو أتكلم عن كل ده في خضم الرحلة القصيرة لفريق الصقور في البطولة الوطنية.. فهو عمل كل حاجة وقال اللي في نفسه .. بس في نظري القصة كانت محتاجة تتمد أكتر من كدة شوية .. القصة في قماشة حلوة لأجزاء وقصص كتير للأسف النهاية قطعتها

مشكلة العمل ده أنه ممتع وملحمي لدرجة تخليك يصعب عليك أنه أتقفل بدري بدري كدة .. كل شخصية فيه هي قصة وعالم في حد ذاته .. الصراع جواه مش صراع علي بطولة ولا مباراة علي قد ما هو صراع إرادات بين وجهات نظر مختلفة في الحياة مبنية علي تجارب قاسية وأحلام واسعة أثرت في حياة كل شخصية

انا أتكلمت كتير .. لأن العمل مهم وقوي الحقيقة وممتع للغاية .. لكن أن الأوان لأني أسيب المجال للاخرين للإستمتاع بهذة التجربة

Slam Dunk: 73-187

Slam Dunk

Ch 73-187

الأرك ده رغم أن زمنياٍ المفروض أن أحداثه مش كتير لكنه طويل وممتد بشكل ملحمي .. فيه قليل من الملل لكن كثير من المتعة والتفاصيل والفلاش باك والقصص الجانبية العميقة والمؤثرة اللي بتدي القصة ثقل كبير للغاية

بيفكرني بالمرحلة اللي بين عبور طاقم قبعة القش للجراندلاين ودخولهم للعالم الجديد .. لسببين .. أولهم أن المرحلة دي في القصتين بنستكشف فيها مدي قوة وصلاة قوام الفريق اللي تشكل بنهاية المرحلة الأولي وكذلك بنستكشف نقاط ضعفه وحدوده وعيوبه اللي ممكن نتقف عائق قصاد رغبته في إستكمال الرحلة .. ثانياً بوصوله لنهاية هذة المرحلة بيصطدم الفريق بطبيعة المرحلة القادمة اللي علي وشك أنه يدخلها .. خصوم أقوياء للغاية، مهارات أعلي، قدرات خرافية، تحديات من مستوي مختلف تماماً .. بناءً عليه أظن لازم الفريق يستعد جيداً لهذة المرحلة الجديدة ويفجر كل طاقة كامنة داخلة .. ده الطبيعي 

الأحداث بتبتدي من بعد إكتمال قوام الفريق الأساسي واللي مكمل معانا لنهاية القصة .. هدفهم الفوز في بطولة المنطقة عشان يتأهلوا للبطولة الكبيرة علي مستوي القطر .. رحلة شاقة وطويلة بيواجهوا فيها عدة خصوم ما بين اللي في مستواهم واللي أقل واللي أعلي بمراحل .. أحلي ٣ مراحل في الجزئية دي مرحلة التأهل ما قبل المجموعات لأنها كانت إختبار حقيقي لمدي جدية وقوة هذا الفريق ولأن الدراما فيها كانت عالية .. ثانياٍ مواجهتهم لفريق كاينان المتأهلين الدائم لبطولة القطر واللي مواجهتهم كانت تحدي عالي أوي بالنسبة لشوهوكو وكذلك كانت صفعة ضرورية درامياً عشان القصة ما تبقاش متوقعة وكذلك عشان تبقي منطقية لأن مش معقول فريق لسة باني نفسه من فترة قصيرة يغلب فريق متماسك وعناصره قوية ومتفوق تاريخياٍ بسهولة وعن طريق الروح فقط .. الهزيمة كانت ضرورية برضو عشان أبطال القصة يبتدوا يبقي عندهم دافع للتطور والفوز.. ضغط الهزيمة والموقف والحرج والأخطاء اللي أدت للموقف ده كلها دوافع قوية للفريق عشان يتقدم ويطور من أسلوبه 

زاد وغطي أنه ثالثاً خصمهم كان ريونان الفريق اللي غلبهم في المباراة التدريبية واللي برضو وقع في نفس موقفهم الحرج وبقت مواجهتهم مصيرية.. فريق واحد بس اللي ح يتأهل.. وهنا الدراما راحت لحتة تانية خالص .. فعلاً أحداث المباراة دي إلي جانب كونها طويلة فهي متعبة للأعصاب وموترة بشكل كبير .. من أول غياب مدرب شوهوكو بسبب مرضه المفاجئ للضغوط اللي حولين المباراة لحد أحداثها المشبعة بالدراما والمشاعر والمصالح والدوافع المتضاربة 

فعلاً الجزء ده كان زي ما يكون معركة حربية مش مجرد مباراة .. ودي حالة ساهمت فيها القصة إلي جانب الرسم الملحمي والمثير .. يمكن ده أكتر جانب مميز في القصة أنها مثيرة وحماسية كأنها معركة لكن في حلبة التنافس الرياضي 

طبعاً القصة فخمت من البطل أوي في بعض الأحيان بلا منطق بس تمام يعني بالنسبة لمانجا شونين .. لكن برضو علي الجانب الأخر القصة بتعظم من روح المنافسة وفكرة التدريب والمثابرة

العظيم بل والجميل في القصة أنها مش متمحورة حولين ساكوراجي/حسان بتاتاً ولا الفريق بتاعه .. كل شخصية في العمل مهمة حتي الفرق المنافسة وحتي أعضاء الفريق الأخرين والفرق الأخري .. لدرجة أن البطل بينزوي ويبتعد عن الصورة الرئيسية لمدة أثناء الأحداث لأن التركيز بيبقي منصب علي بعض الشخصيات التانية بما فيها حتي شخصيات فرعية وهامشية

المرحلة القادمة صعبة والتحدي رايح لمستويات تانية تماماً .. مكملين 

Peaky Blinders S6 "The End"

Peaky Blinders
S6, Epi 1-6 "The End"

لكل رحلة نهاية .. ونهاية هذة الرحلة الملحمية كانت كما هو منتظر .. مثيرة، بديعة، مؤلمة

بدون شك شبكة البي بي سي شبكة إستعمارية كذابة حقيرة ومضللة للرأي العام منذ نشأتها.. لكن لكل شئ سئ جانب مضئ .. الجانب الأجمل في تاريخ هذة الشبكة من وجهة نظري حاجتين:

برامجهم الخاصة بتعلم اللغة الإنجليزية وهي متاحة علي موقعهم وعلي اليوتيوب وأكتر من بلاتفورم وبأدعوا أي حد حابب يذاكر إنجليزي أو ينمي وينعش لغته أنه يتابع محتواهم لأنه مجاني وخصب ومهم للغاية ... ثم الإنتاج الدرامي بتاعهم

لحد الأن انا أتفرجت علي ٣ مسلسلات من إنتاجهم وبصراحة أبهروني جداً .. إنتاجات قيمة فنياً وفيها لمسة جمالية رهيبة.. وده أول شئ جذبني لمسلسل بيكي بلايندرز

أول مرة أنتبه للجانب الجمالي في بيكي بلايندرز .. فعلاً المسلسل مصروف عليه إنتاجياً بشكل حلو والصناع لمستهم الجمالية في الإخراج والتصوير مدية المسلسل فخامة و ثقل فني .. كل كادر بيحكي قصة .. تناسق الكادر ورمزيته وإستخدام الألوان في الديكور والملابس والإضاءة تحديداً سواء عشان تدي جو زمني أو نفسي معين .. كل ده أثري العمل جداً في رأيي ومخليه مش مجرد مسلسل لا ده عمل فني متقن زيه يمكن زي أي عمل سينمائي جمالي

كمثال في النهاية لما تومي شيلبي تحرر من حياته السابقة وقرر يرجع لحياته السابقة كغجري نلاحظ أن السماء كانت صافية والشمس منورة .. بينما لما راح يهدد الدكتور الجو بقي قاتم والشمس غابت .. وفي لحظات تمكن المرض والكأبة منه ومن حياته بنلحظ أن الإضاءة بتبقي خافتة والظلام هو سيد المشهد ... دي كدة حاجة من ضمن حاجات كتير في المسلسل

المستوي التاني او الجانب التاني هو الخاص بالكتابة .. رغم أني طول المواسم السابقة كان عندي مشكلة دايماً مع طريقة كتابة الحبكة البوليسية وطريقة إنهاء عقدة كل موسم .. بأحس الكاتب بيفرش أوي ويمد خطوط درامية وبعدين فجأة بيقدر يلم ويقلب كل ده في الحلقة السادسة عشان يلحق يقفل الموسم وده بيؤدي لأن النهاية عادة بيبقي فيها ثغرات درامية وحاجات مش منطقية كتير .. ظهرت بالذات في الموسم التاني والتالت.. يمكن حالياً هو تفادي ده بس لسة عنده بعض عيوب الحتة دي

رغم كل ما سبق الا ان الكاتب قدر بطل براعة يسرد بالتوازي مع الخط البوليسي قصة روحانية بطريقة ميتافورية رحلة روح الغجري المعذبة وعودتها للبرية حيث المنشئ والنهاية

أول مرة كنت أخد بالي من ده كان في الموسم ده ويمكن ده لأن العملية المرة دي كانت أوضح .. من بداية القصة توماس وأرثر تحديداً عندهم أزمة دفينة بيحولوا يشيرولها طول الوقت لكن ما بيحبوش يتكلموا عنها بوضوح وهي أنهم طواقين للعودة لحياة الغجر الحرة الطليقة .. توماس بالذات .. وأنهم أتخطفوا من الحياة دي في بداية حياتهم وأترموا في تجربة شنيعة وهي تجربة الحرب مع فرنسا اللي من بعدها أتغيرت حياتهم تماماً .. نفسهم أتجرحت وأتربت جواهم وحوش العنف والشر اللي مع الوقت بعدتهم وعزلتهم حتة في حتة عن ماضيهم وأصلهم اللي بيحلموا يرجعوله

لدرجة أنهم في منتصف الرحلة تاهوا ما بقوش عارفين أصلهم فين .. هل هما غجر ولا مجندين في الحرب ولا لصوص .. نفس تبحث عن الخلاص .. لكنها وجدته في النهاية

يمكن عندي إقتناع بإن القصة لم تنتهي وأنها ليها بقية بس الصانع نفسه قال ان دي نهاية المسلسل .. وهي نهاية مقبولة بتفتح وتطرح خطوط جديدة تصلح أنها تبقي مادة خام لموسم جديد أو فيلم زي ما بعض الإشاعات بتقول
خلاص عائلة شيلبي يمكن في عودتهم لعالم الأرواح والابتعاد عن الضوء .. يمكن تكون هي دي عبرة المسلسل في النهاية

أكتر شئ كمان عجبني في المسلسل ككل أنه مدي مساحة لحتة التاريخ أنها تظهر في خضم أحداث المسلسل في فترة كانت ثرية أوي بالأحداث .. الحرب العالمية الأولي ونشأة الإتحاد السوفيتي وصعود الفاشية في غرب أوروبا .. دخل علي التاريخ بعض الدراما بس فصل محافظ علي سير التاريخ دون
المساس بيه

عمل عظيم .. سأفتقده كثيراً 

Peaky Blinders S5

Peaky Blinders

S5, Epi 1-6 Finale

لأسباب كتير معظمها خارجة عن إرادة الواحد تم تأجيل مشاهدة هذا الموسم الشيق من هذا المسلسل المثير لحد ما بقينا في نهاية 2020 .. بس أن تأتي متأخراً خير إن شاء الله

في كل المسلسلات الطويلة ومتعددة المواسم لازم دايماً يبقي في موسم إنتقالي .. عامل زي الكوبري كدة بينقلك من مرحلة لمرحلة وبيحل الرتم والأحداث من شكل لشكل ومن تيمة لتيمة .. وهو ده الوصف اللي ينطبق علي هذا الموسم 

لكن هل ده يعني أن أحداث الموسم مش مهمة في حد ذاتها؟ لأ 

الموسم هنا أتسم بالسوداوية والتركيز أوي علي 3 عوامل مهمة .. التطورات التاريخية ودي حصلت في جميع المواسم أظن .. بداية الكساد العظيم وبودار صعود اليمين المتشدد والفاشية في أوروبا بس التركيز كان أكتر علي بريطانيا 

الجانب العائلي الخاص بأل شيلبي والإنشقاقات والصراعات ما بينهم واللي كان فيه صراعين أساسين هما محركي الاحداث .. صراع الجيل الشاب اللي بيمثله مايكل غراي وفين مع الجيل القديم اللي هما توماس وأرثر وبولي وشلة حرب فرنسا .. ثم صراع الطامعين في خلافة شيلبي اللي كان منهم برضو مايكل بل وعلي رأسهم

الجانب التالت والأهم هو الصراع النفسي .. كل فرد خد مساحة عبر فيها عن مخاوفة وأزماته بشكل جيد واللي تصرفاته بتبقي نتيجة ليها بشكل أو بأخر .. تقريباً كل العيلة مكملة علي نفس الخط اللي أرتسم لها .. تحديداً أرثر اللي غرقان في عواطفه وإنفعالاته ونزعته العنيفة ... توماس هو اللي بقي أسوأ من المواسم اللي فاتت .. العمل السياسي غيره للأسوأ وأصبح أكثر قلقاً وتخبطاً حتي لو بان ذكي ومتزن .. ذكري حبيبته الراحلة بتلاحقه ومشاكل العائلة أثقلت كاهلة .. لكن الأزمة الأكبر هي طموحاته اللي أصبحت مش مفهومة حتي ليه هو شخصياً وبتدفع بيه إلي الهاوية

طبعاً الأخبار اللي بتتسرب كل شوية عن الموسم السادس وكمان نهاية الموسم ده تدينا أكتر من تفسير لنهاية هذا الموسم وإيحاء حولين اللي جاي .. أولاً يبدوا أن المسلسل أوشك علي النهاية .. يعني بالكتير ح يكمل للسابع وأحداثه ح تنتهي وأظن ح تنتهي مع إنتهاء الحرب العالمية الثانية

ثانياً الموسم الجاي ح يشهد أحداث ساخنة للغاية وقد يكون بيدور في مدي زمني طويل شوية بالذات أن خلاص تم تأكيد معلومة أن شخصية "هتلر" ح تظهر في الموسم القادم واللي ح يقوم بيها النجم "روين أتكينسون" بتاع "مستر بين"

ثالثاً الموسم جاي يبني للي جاي وأن كتير من الشخصيات الجديدة والتغيرات اللي حصلت ح يكون ليها دور كبير في الموسم الجاي

السينموغرافي والإخراج كانوا علي مستوي عالي أوي في الموسم ده وما وقعش في فخ الملل أو الحبكات اللي فيها إستسهال والدراما اللي مش علي المستوي .. بالعكس الموسم كان مثير جداً وكان في لحظات مثيرة للغاية وشيقة في الموسم بشكل يخيله من افضل المواسم في رأيي رغم أنه مفيهوش نجوم كتير زي الموسم اللي فاتت

منتظرون بشغف للقادم

Peaky Blinders S4

Peaky Blinders

S4 , Epi 1' 2' 3' 4' 5' 6 Finale

موسم أخر قوي وخاتمة رائعة لموسم هذا العام

طيب .. الموسم ده أفضل من الموسم السابق كتير .. بداية متماسك عنه كتير رغم وجود مشاكل في الحبكة لكنه أكثر تماسكاً من الموسم الثالث ... قصته ممتعه أكثر .. فكرة الإنتقام والصراع مع المافيا أكثر إثارة من القصة بتاعة الموسم السابق .. كالعادة القصة ماشية في كذا خط لكن المرة دي كل خط خد حقه بشكل كويس .. يمكن بعض الشخصيات مخدتش مساحتها المطلوبة لكن برضو ما تمش تهميشها أو تسطيحها ... الفكرة بس أنها كانت عايزة مساحة أزيد شوية ... يمكن أكثر شئ أمتعني في الجزء ده التويستات والتغيرات الدرامية المفاجئة والتقلبات اللي لحد أخر لحظة في السيزون فضلت تبهرني

التمثيل في الموسم ده حكاية ... مبارزة في الأداء ما بين المثلث العبقري "كليان ميرفي . توم هاردي , أدرين برودي" .. كل واحد فيهم أدي روحه ببراعة وعبقرية .. يمكن كان في أزمة كدة حسيتها في أداء الشخصيات الإيطالية وهي تكمن في نطقهم للإيطالي اللي كان بعيد كل البعد عن نطق ولاد البلد نفسها ليه .. بينطقوا الكلمات ببطئ وتروي وده عكس طبيعة الإيطاليين اللي نطقهم سريع .. طريقة إلقاء ونطق الشخصيات الإيطالية متأثرة أوي بشخصيات فيلم The Godfather وتحديداً مارلن براندو .. لكن يمكن المؤلف أوجد للقصة دي مخرج وهي أنهم إيطاليين عايشين في أمريكا فلسانهم أتوجع شوية .. رغم كل شئ التمثيل كان عبقري للغاية .. حبيت أوي بول اندرسون في دور أرثر شيلبي .. أكثر شخصية تأثرت وتعلقت بيها في المسلسل وأكثر الشخصيات نضجاً وتطوراً ووضوحاً وصدقاً في الأداء في رأيي

المسلسل أنتهي نهاية مثيرة للإهتمام .. لكن المثير أكثر للإهتمام هو أن الموسم القادم أغلب الظن هو الأخير .. فيا تري ماذا سيحصل خصوصاً أن نفوذ عيلة شيلبي دخل الملعب الأمريكي وأتذكر اسم "أل كاوبني" ويبدو أن القصة ح تاخد منحني أكثر إثارة

الموسم لازال فيه عيوب المواسم السابقة من مشاكل الحبكة وبعض الأشياء غير المنطقية أو الربط بين الأحداث بيتم بشكل ساذج .. لكن يبقي المسلسل عبقري ومن أفضل ما شاهدت ... لسة قدامنا سنة علي ما يجيج ميعاد الموسم الجاي .. منتظرون!

Peaky Blinders S3

Peaky Blinders

S3 , Epi 1' 2' 3' 4' 5' 6 Finale

موسم أخر غاية في الروعة .. لكن في الحقيقة كان أقل من الموسمين السابقين

كل شئ في المسلسل علي ما يرام عدا القصة والحبكة ولكن بداية القصة ما كنتش جذابة وقوية .. أحداث الموسم كانت رائعة لكن المحور نفسه اللي بيدور حوليه الموسم ضعيف ومليان تفاصيل وتعقيدات تتوه وتزهق .. حتي أنا ما فهمتش في النهاية هو اللي حصل وكل القلبة دي كانت عشان أيه وحسيتني تايه كدة .. لكن خلينا نقول رغم ضعف القصة لكن أحداثها كانت في غاية القوة خصوصاً الحلقتين الأخيرتين اللي كانوا غاية في الروعة والجمال

كل شئ حافظ علي قوته بل وزاد .. التمثيل بالذات كان عبقري للغاية والإخراج

والأسطورة مستمرة

#Drama

Peaky Blinders S2

Peaky Blinders

S2 , Epi 1' 2' 3' 4' 5' 6 Finale

Another Bloody Awesome Season

العظمة تستمر وأكثر .. القصة خرجت من خندق الموسم الأول لصراعات أكبر وأوسع ومختلفة عن صراعات الموسم الأول .. الشيوعيون يختفون من الصورة مع تصدر الإيرلنديون والإيطاليون واليهود للمشهد .. وتطورات أخري أكثر روعة

أعظم شئ في المسلسل ده هو أنه بينوع ما بيمشيش علي خط واحد ولا أتجمد عن احداث وقصة بعينها وفضل يعيد ويزيد فيها بوجوه مختلفة .. أحنا هنا في خضم عمل بيتكلم عن تطور عائلة غجرية الجذور وخروجها من عالم الغجر وتوغلها في بحر الجريمة وسعيها المحموم للترقي والوصول لمرتبة السادة ... القصة رائعة ومختلفة عن الموسم الأول تماماً .. برضو بتحمل نفس روح الموسم الأول .. العائلة المتماسكة رغم كل التناقضات والصراعات اللي بتدب وتدور ما بينها وبين بعضها .. بيحمل علي عاتقه حلمها في التوسع والإنتشار توماس القوي والقائد والطموح .. لكن طموح تومي بيصطدم مع بقية أفراد الأسرة ورغباتهم وإعتراض بعضهم علي إستبداد توماس وإستئثاره بالقيادة والرؤية لوحده دون مشاركة حقيقية مع باقي أفراد العائلة ... لكن رغم كل شئ تأتي العائلة أولاً قبل أي شئ ... الإهتمام بكل شخصية وتفاصيلها وتسليط الضوء علي جوانبها المختلفة وأن ما يبقاش في أي شخصية حشو أو بدون فائدة في السياق الدرامي من الحاجات اللي باحترمها أوي في العمل ده .. رغم أني شايف أنه كان محتاج يدي الإيطاليين مساحة أكبر لكن ده لم يخل بتوازن الموسم ككل

توم هاردي ثم توم هاردي ثم توم هاردي .. الرجل ده برنس يا جدعان وحياة ربنا .. فعلاً ظلم بين ليه ولكيليان ميرفي أن سبب شهرتهم يبقي عمل هزيل زي The Dark knight rises .. مواهب تمثيلية جبارة بتدي نوع من الهيبة لأي عمل أو مشهد بتظهر فيه .. فعلاً الأتنين دول ومعاهم باقي طقم المسلسل بصراحة بوست واحد ما يديهمش قدرهم .. كنت مستمتع بكل حوار وإنفعال أو حتي مشهد صامت في الموسم .. أداءات تاخد العقل

الأحداث يا تري رايحة علي فين .. مكملين

Peaky Blinders S1

Peaky Blinders

S1 , Epi 2' 3' 4' 5' 6 Finale

 

تجربة رائعة للغاية في موسمها الأول رغم أني كنت أتمني أن الأحداث تنتهي بشكل مختلف لكن واضح أن النهاية اللي أختارها المؤلف تصب في مصلحة الأحداث ككل وثمارها ح تبان في المواسم القادمة

المسلسل بتدور أحداثه في بريطانيا وتحديداً في أزقة برمنجهام .. بتبدأ أحداثه في سنة ١٩١٩ ما بين الحربين العالميتين .. وقت بيعج فيه الواقع البريطاني بالأحداث والصراعات .. علي بعد خطوات من حرب ضروس أنطفئت شعلتها حديثاً لكن رمادمها لازال يخنق الأجواء .. ثورة مشتعلة في أيرلندا وحرب يخوضها ضروس الجيش الجمهوري في سبيل الأستقلال .. موجات من الأضرابات العمالية تتنشر عدواها في شتي أرجاء البلاد مشعلة حرب أخري لا هوادة فيها بين السلطة والشيوعية .. وعلي الجانب الأخر مجتمع تحكمه العشائر الأجرامية والعصابات من كل طائفة وشكل .. أحدي هذة المجموعات عشيرة "أل شيلبي" والمعروفون ب "Peaky Blinders" .. تلك العشيرة التي أنقلب حالها بعد عدوة خيرة شبابها من الحرب ضد فرنسا معبئة نفوسهم بنيران العنف واثار المعارك لتصبح ذات شأن وأسم معروف في عالم الجريمة والنشاطات غير الشرعية خصوصاً رهانات سباقات الخيل ... عن طريق الخطأ يسطو رجال العشيرة علي حمولة قطار ظانين أنها بضاعة عادية لكن الأمر يختلف عندما تفتح الصناديق ويكشف عنا بداخلها .. لتبدأ بعدها سلسلة من الأحداث الدرامية المثيرة التي تخطف الأبصار وتأسر القلوب

المسلسل أعاد إلي ذهني صراحة أجواء ثلاثية "The Godfather" بالذات في نقطة رحلة صعود العشيرة أو العائلة وبداياتهم المتعثرة والصعبة وسط الفقر والعنف اللي بتبعها أرتقاء وتحولهم من حرافيش إلي اصحاب ياقات بيضاء .. كمان ما أشبه تومي شيلبي بڤيتو ومايكل كارليوني وطريقته في قيادة العائلة وحفاظه علي مصالحها في وجه مختلف التحديات ... المسلسل شدتني اجواءه والصراعات اللي فيه بين مختلف القوي سواء إجراميه أو سياسية .. كونه بيسرد سيرة إجراميه وبيربطها بالظرف التاريخي المحيط وقتها شئ عبقري ومدي المسلسل لذة خاصة ... فوق كدة أنه ورغم التركيز علي أل شيلبي ومدي قوتهم وعنفهم وحنكتهم الا أنه مش مطلعهم رجال خوارق بل بشر عاديين بينهزموا وينتصروا وينجرفوا ويقعوا في أخطاء كارثية ويتم خداعهم .. الا أن عندهم رابط وتماسك مخليهم بيمتصوا الضربات ويردوها بقوة ويتجاوزوا ويتقدموا للأمام 

أكتر شخصيات جذبتني في الموسم هما تومي والعمة "بولي" اللي بأشوفها الأب الروحي والعقل المدبر الحقيقي للعائلة واللي من غيرها كان العائلة وقعت في أفخاخ كتير وممكن تنهار .. القصة جميلة وقوية والشخصيات مخدومة والتفاصيل حتي الصغيرة متخدم عليها كويس .. الإخراج روعة ويمكن هو أول شئ شدني في المسلسل .. إخراج عبقري في كل تفاصيله وإستخدمه للأماكن والكاميرات وحتي للجرافيك

متشوق لتكملة التجربة وخوض غمار الموسم الثاني وما بعده

The Shield S7 "The End"

The Shield

S7, Epi 1-13 "The End"

يا لها من رحلة شاقة وقاسية للغاية .. لكن لكل رحلة نهاية .. وها قد أنتهت رحلتنا مع المحقق فيك ماكي وفريق الإقتحام

الإنهيار اللي كنت بأتكلم عنه في المواسم اللي فاتت وصل لذروته في هذا الموسم .. كنت اعتقدت أن أقصي إنهيار هو اللي حصل ما بين ماكي وشين بعد مقتل ليم .. لكن لا .. الكاتب لأنه شخص رجل أخلاقي بيؤمن بحتة العظة والعبرة حب يعمل من كل واحد فيهم عبرة شكل ويبقي نموذج مؤسف يفزع كل من تلوث بالفساد .. وكلاً علي قدر خطيئته وعلي حسب شخصيته .. الإنهيار حصل علي مستويين الأول نفسي وده واضح جداً في حالة شين اللي مع نهاية القصة كان وصل للحضيض وكل ما ياخد خطوة يرتكب كارثة أكبر من اللي قبلها .. وعلي المستوي الإجتماعي بأنهم أتفضحوا أخيراً وأصبحوا مجرمين وقتلة في نظر الجميع والحاضنة بتاعتهم تهالكت بما فيها عائلاتهم وهيبتهم وسط المجرمين والعالم .. مشهد فيك ماكي الأخير معبر أوي عن القصة دي .. أنه نجي ظاهرياً لكنه في الحقيقة بقي خردة وبلا قيمة

الحقيقة لما بأجي أبص بشكل عام علي المسلسل باكتشف أنه واخد أسلوب القصص الديني تحديداً منطق العظات والعبرات .. من أول قصة الكنيسة اللي تحولت لمركز شرطة وحتي بروفايل كل شخصية .. الأشرار اللي بتبدأ رحلتهم بذنب صغير لتتحول في النهاية لكارثة ثم مشنقة تلتف حول أعناقهم .. المترددين ما بين الحق والباطل والقابضون علي جمر الحق مهما حصل زي كلوديت

كل شخصية بتشرح نفسها وتبرز عن طريق نقيضها .. ماكي نقيض كلوديت.. الاستقامة التامة ضد الإنحراف التام .. شاين نقيض داتش .. العقل الكبير مع نفسية متذبذبة ضد اللاعقل مع ثقة لا نهائية في النفس .. فيك ضد أسيفيدا.. الفاسد الصريح اللي عنده جانب خير ضد مدعي الإستقامة اللي جواه شيطان إنتهازي .. وهكذا

لو كان للمسلسل ده رسالة تلخص قصته فهي فكرة أنك لا تدع نافذة للشيطان ليدخل لك منها.. شين كان شيطان فيك اللي أدي بيه للتهلكة بحماقاته وكذبه.. وعدم تصالح فيك مع ذاته وأنه في أنه بيعمل ما هو ضروري للحفاظ علي الأمن وأمن ذاته هو اللي أدي لإنهيار العالم علي دماغه في النهاية .. وجروداكي وليم لأنهم بلا شخصية ولأنهم أمعة كان طبيعي ينتهوا بالشكل المأساوي اللي حصلهم في النهاية

سألني بعض الأصدقاء عن الفرق بين هذا المسلسل و ذا وير .. فقلت أن هنا المسلسل أمني أكتر منه إجتماعي .. ويمكن ده مصدر لذاذة هذا العمل 

يعني انا كنت بأستمتع أوي بفقرات داتش وكلوديت في كل حلقة وكلهم للقضايا .. ده مكنش موجود في ذا واير لأنه كان مركز أكتر علي السياسة وحتة من أين تأتي الجريمة وفي أي بيئة تنبت

يعيب المسلسل في العموم حاجتين .. اولاً إرتباك الحبكة في بعض الخطوط والمواضع زي أن يبقي فيه قصة ولا تستكمل أو خيط ويتم تجاهله زي مثلية جوليان وصراع الهوية جواه .. ثانياً أنه متأثر أو بوجهة النظر السياسية لجهة الإنتاج .. طبعاً فوكس بيسيطر عليها مجموعة من اليمنيين المتصهينين الفتاة.. لذلك نظرتهم لقضية الهجرة والعرب والسود كان فيها كثير من العنصرية وبتحمل قدر غير هين من الخطاب التمييزي بالذات ضد اللاتينيين

بشكل عام كان عملاً ممتعاً للغاية .. سأفتقده بشدة