Seinfeld
S4, Epi 1-23 Finale
الموسم ده سفاح كوميديا .. ومتطور كتير عن المواسم اللي قبله
العنصر الأساسي اللي تطور بشكل بارز في الموسم ده هو الاستمرارية والترابط .. وهي حاجة كانت بدأت تظهر علي إستحياء في المواسم اللي فاتت لكن في موسم ده بقت موجودة بقوة ومأثرة علي سير أحداث المسلسل .. ما بقتش الحلقات منفصلة زي الأول بل بقي في رابط ما بينها وفي عناصر بتتكور وبتأثر علي الدراما وبقي فيه تطور للشخصيات والأجمل أن المحيط البشري اللي حولين دايرة جيري بقي حضوره طاغي ومؤثر بشكل أكبر .. العلاقات اللي بيدخلوها وجيرانهم والأماكن اللي بيزوروها وعائلتهم .. أكتر من شخصية ظهرت كذا مرة في الموسم وبعض الشخصيات من المواسم السابقة ظهرت في الموسم ده وبقي في إشارات طول الوقت لأحداث حصلت أوقات سابقة
العنصر التاني الجميل في الموسم ده هو القصة والمصور الأساسي للموسم .. وهي قصة نشأة مسلسل "ساينفيلد" من وجهة نظر صناعه .. لاري وجيري .. الحتة دي فيها ميتا-دراما شوية بس ذكية ومشوقة .. الموسم كله بيطرح كام سؤال عبقري إجابتهم لسة كمان ح تستكمل في الموسم الخامس
السؤال هو: "كيف خرج ساينفيلد إلي النور؟ عن ماذا يدور ساينفيلد؟ ماذا لو كان صناع ساينفيلد هم شخصيات المسلسل في عالمهم الخاص؟ ماذا لو فشل ساينفيلد منذ البداية ولم ينطلق؟"
السؤال الأخير إجابته لسة ح نعرفها في الموسم الجاي .. السؤالين الأول والثاني كانوا هنا محور المسلسل بينما الثالث بيجسد الطريقة اللي أختارها لاري وجيري في التعبير عن نفسهم وسرد حكايتهم بشكل لا ينحرف عن سكة الكوميديا اللي هما أساتذة فيها .. لاري وجيري بيشرحوا ساينفيلد للمبتدئين بكل بساطة ووضوح وبيوضحوا الفرق بينه وبين السيتكومز التانية
ساينفيلد مسلسل بيتكلم عن الولا حاجة حرفياً .. أنا باقول الجملة دي من أول ما اتفرجت علي المسلسل لحد ما فجئت في الموسم ده انها بتتقال علي لسان الأبطال والصناع نفسهم .. المسلسل بيدور حولين الحياة اليومية لمجموعة من الأشخاص تجاوزوا الثلاثين بلا زواج وبلا عمل ثابت وعايشين حياة شبان الطبقة الوسطي التقليدية وقتها .. مش ح أقدر انه مسلسل بيعبر عن كذا ولا بيرصد كذا لأن ده تأويل ممكن يبقي زيادة شوية .. بس علي الأقل ساينفيلد نوعاً بيرصد الحياة الأمريكية في التسعينات من بعض الجوانب وأهتمامات وذوق الأمريكان وقتها
في أكتر من حلقة كان فيها سخرية حادة من العلاقات المثلية وبعضها كان فيه كوميديا مفهومة بشكل عنيف وصلت لتناول المعاقين حي بنوع من الفكاهة .. ذوق غليظ وعنيف بالنسبة للوضع الحالي بعد موجة الصوابية اللي سيطرت علي الإعلام .. أزاي الناس دي تحولت من ده لده في المدة الزمنية دي لدرجة أن الأعمال دي بيتعملها فلترة دلوقتي وبيتقص منها
المسلسل في الموسم ده عمل طفرة علي مستوي الكوميديا والمواضيع والسخرية.. كل حلقة كانت انقح من اللي قبلها حرفياً .. وفي إنتظار المزيد
تعليقات
إرسال تعليق