Seinfeld
S5, Epi 1-21 “Finale”
في أزمة بتتكرر معايا في المسلسلات بالذات اللي بأحبها .. أن يجي موسم يبقي عالي أوي فيعلي سقف طموحاتي بشكل كبير للي جاي .. ثم يجي اللي بعديه فيحبطني أو يطلع أقل مما كنت متخيل
الموسم الرابع من ساينفيلد كان جبار وفكرته كمان فشيخة أنهم بيحكوا أزاي عملوا المسلسل في سياق هزلي ساخر وكمان بينهوا الموسم بشكل فانتازي أوي بيكتبوا فيه نهاية بديلة لقصتهم الحقيقية وبيحطوا إفتراض لطيف يبنوا عليه للي جاي وهو أنه كان ح يحصل أيه لو فشلوا والمسلسل قُتل في مهده .. ودي فكرة مثيرة أوي .. بس للأمانة مش علي نفس قوة فكرة الموسم الرابع
الموسم لطيف جداً بس مستوي الكوميديا قل شوية مع رجوع المسلسل لوضعه القديم وهو تقديم حلقات منفصلة متصلة كل واحدة بتحكي حكاية شكل .. كمان الموسم ده كانت جرعة الحلقات اللي ملهاش موضوع أو اللي بينسميها "جنونات لاري ديفيد" كانت كتير أوي .. وهي حلقات تحس أنها ما بتحكيش حاجة الفكرة بس أنها مجموعة مواقف وأسكتشات وخطوط متداخلة بتخبط في بعضها في النهاية ومن هنا بتطلع الكوميديا وبناءها معتمد علي الصدف الغريبة وسوء التفاهم والرابط العجيب بين الأحداث والمواقف اليومية العابرة .. كانت المواسم اللي فاتت فيها ده وفيها حلقات ممكن تبقي عن موضوع أو أتنين كمحور للحلقة .. لكن هنا هو كتر أوي من الحلقات اللي بلا هدف دي واللي كان بعضها حلو لكن البعض التاني كان ألش .. ما طلعش الضحك والكوميديا اللي كنت منتظرها
أكتر حاجة لذيذة في الموسم ده هو نظرة لاري ديفيد لذاته ونفسه .. مش عارف الراجل ده متصالح مع ذاته بالشكل ده ازاي وهو عمال يعري نفسه درامياً ويرمي "جورج كوستانزا" اللي بيجسد شخصيته في المواقف المحرجة والأوضاع المدمرة بالشكل ده .. تصور لاري لنفسه لو مكنش ساينفيلد نجح فشخني ضحك .. تصور نفسه مفلس وفاشل لردجة أنه ح يضطر يروح يعيش مع أبوه وأمه تاني .. الحتة دي طلعت كمية كوميديا حلوة فشخ وتثبت حاجة قولتها قبل كدة في "فريندز" أن جزء من روح السيت كوم في التسعينيات كانت مستمدة من التمرد علي الرؤية المحافظة والتقليدية والتهكم علي أعمدتها الراسخة علي رأسها الأسرة تحديداً .. فهي كانت ردة فعل غير مباشرة علي تيار المحافظيين اللي صوته علي أيام ريغان وما بعدها
بشكل عام الموسم كان دمه خفيف بس مش زي ما توقعت
تعليقات
إرسال تعليق