Hades Project Zeorymer

Hades Project Zeorymer

Epi 1-4 End

إلي جانب حبي الشديد للـ Mecha أو سلاسل الأنمي اللي بتدور حولين الرجال الأليين .. أنا مولع جداً بكل ما يتعلق بالثمانينيات والتسعينيات في عالم الأنمي وأجواءها العنيفة والظلامية والإباحـيـة لأبعد حد ممكن 

أكتر وأكتر بأحب الحاجات اللي بأكتشفها عن طريق الصدفة .. أصلاً أنا ما سمعتش عن الأوفا دي غير لما أتقدمت شوية في لعبة Super Robot Wars J .. وهي لعبة إستراتيجية علي الجيم بوي أدفانس بتخوض فيها حروب عبر أليين مستلهمين ومقتبسين من عالم الأنمي زي مازنجر والجاندام وغيره .. المهم أني قابلت "زيوريمر" في اللعبة وعجبتني قصته وبحثت عنه لاقيت أنه له أنمي مش مشهور مع الأسف

وبأقول مع الأسف لأنه فعلاً حلو جداً .. يمكن هو نمطي حبتين وقصته مفيهاش جديد .. ولد بيكتشف أنه تجربة معملية مصممة لقيادة إنسان ألي ذو قدرات خارقة كان مختطف من تحالف لقوي الشر عايزة تدمر العالم .. القصة مش مهمة أوي يمكن غير في الأخر لأنها شوية قرب النهاية بتبتدي تاخد منحي فلسفي وإنساني فيها إعادة تعريف لفكرة الخير والشر والقدر وحرية الإرادة

لكن أجمل ما في المسلسل هو أجواءه والرسم .. آجواء ظلامية أخاذة ومثيرة تحب أنك تتعاطي معاها وبتجذبك من أول وهلة .. رغم أن الأكشن في الأربع حلقات كان فكسان شوية وحتي الألي معندوش أسلحة مميزة لكن الرسم والأجواء وجودة القصة اللي بتزيد مع الوقت بيخلوك حابب تكمل وتتمني لو أستمر أكتر من كدة

يعني تجربة كدة لذيذة في السريع بس ممتعة .. ومش ح تبقي الأخيرة مع الأنميات اللي أقتبستها لعبة Super Robot Wars J

 لأن في أكتر من سلسلة منهم أظن يستحقوا المشاهدة

Variable Geo

 Variable Geo

Epi 1-3 Finale 

في خضم رحلتي في عالم الأوفا أو الأعمال القصيرة المنتجة للدي في دي وشرائط الفيديو عدل قابلت صنف من الأعمال في رأيي هو مهم لأسباب كتير أهمها أنه شغل مساحة لا بأس بها من منتجات الاوفا ولأنه كمان صنف مميز بيربط ما بين صناعتين ترفيهيتين في غاية الأهمية اليابان غزت بيهم العالم في التسعينيات وشكلت ثقافة جيل بحاله .. وهما صناعة الأنمي وصناعة ألعاب الفيديو جيمز

صناعة الألعاب في التسعينيات كانت مزدهرة ومنتشرة بشكل غير طبيعي .. مفيش بيت في طفل في العالم حتي العالم المتخلف مكنش عنده لعبة أو جهاز ألعاب بمختلف أصنافهم .. في خضم الإنتشار ده وإستغلالاً لنجاح الألعاب بالذات القتالية منها -لأن ده كان زمن الكاراتية والكونغ فو والأكشن أيضاً- واللي كانت مسيطرة علي المشهد الحقيقة كانت بيتم إنتاج مسلسلات قصيرة وأفلام مستلهمة من الألعاب أو بتحكي جزء من قصة اللعبة 

ألعاب كتير أتعملها أفلام وأعمال بعضها كانت جيد بل أسطوري وبعضها كان وجبة سريعة خفيفة ليس لها ثقل .. الأعمال دي كان الغرض من صناعتها حاجات كتير زي إستغلال النجاح التجاري للألعاب أو الدعايا ليها عن طريق العمل أو عمل حالة يبقي السلسلة موجودة في جميع الوسائط الترفيهية المتاحة سواء أنمي أو مانجا وأحياناً بعضها وصل للسينما والعروض الترفيهية علي المسرح بس معظم المحاولات دس كانت مخيفة تماماً بل متفسخة 

أهمية الأعمال دي غير اللي انا قولته فوق أنها بتبين قد ايه كان في إهتمام في مرحلة إنتشار ألعاب الفيديو جيمز بمسألة القصة وسرد الأحداث لدرجة أننا ح نلاقي بالذات للسلاسل الكبيرة في كتاب وصناع أساساً جايين من حتة كتابة المانجا أو حتي السكريبت والسيناريو وأشتغلوا في صناعة ألعاب الفيديو جيمز علي حتة القصة وبناء الشخصية وتكوين العالم الخاص باللعبة 

وده جانب إبداعي مهم يمكن مش ماس كتير بتنتبه له

قصة الاوفا نفسها كما هو موضح في الصور غريبة وعجيبة ومثيرة ومليئة بما يطلبه المشاهدون

أنا أول ما أتعرفت علي السلسلة دي كان عن طريق اليوتيوب فأتجهت مباشرة للعبة وهي لعبة مغرقة في القدم والكلاسيكية وصعبة للغاية لدرجة الغتاتة لكن اجواءها ورسوماتها حلوة بشكل شجعني اني اشوف الأوفا بالذات أن اللعبة كانت غير مترجمة ومكنتش فاهم حاجة من اللي مكتوب

المسلسل بيدور حولين مسابقة قتال حريمي فيها أجواء ستريت فايتر والاكشن المحبوب بس فيها اوبشن غير لكن مثير وهو أن اللي بتخسر بتخلع ملابسها وتترعي تماماً امام الجمهور وهو شرط غريب أدي مساحة لأن العمل يكون فيه جرعة إباحية غريبة ولا بأس بها من جميع الألوان الغريبة والعجيبة ومختلف الممارسات العجائبية

إلي جانب ده في تيمة الصداقة  والتضحية وأزمات الطفولة والخيال العلمي الغريب والأجواء المغرقة في الظلامية والقوي الكامنة وأساليب القتال المختلفة وغيرها 

كان وجبة خفيفة ولذيذة والله علي مدي ٣ حلقات .. ينصح به

Guyver: Bio-Booster Armor

The Guyver: Bio-Booster Armor

Epi 1-12 End

في خضم رحلة كدة بدأتها مصادفة مؤخراً في عالم "أوفا" أو مسلسلات الأنمي -اللي عادة بتكون قصيرة- وهي الأعمال التي كانت تنتج وتوزع عن طريق شرائط الفيديو والسيديهات فيما بعد ولا تمر بمرحلة البث التلفزيوني .. والتي أشتهرت وانفجرت في حقبة التسعينات بشكل كبير خلاها تبغي حتي علي الإنتاج التلفزيوني التقليدي .. في خضم هذة الرحلة اللي لسة في بدايتها وجدت درر وكنوز خفية حقيقية تتواري عن الأنظار في غياهب هذا العالم 

لا فعلاً متفاجئ من المستوي والجودة اللي قابلتها حتي الأن في هذة الأعمال .. وسر المفاجأة كالأتي .. اصلاً علي حد فهمي الأوفا زمان في الثمانينيات والتسعينيات كان ليها دور أساسي وهو أنها بتستخدم كنوع من الدعايا للمانجا .. في الوقت ده المانجا حصلها طفرة كبيرة يمكن لا يضاهيها غير الطفرة بتاعة الفترة اللي أحنا فيها دي .. الإنتاج بقي كبير وكثيف والمنافسة بقت علي أشدها .. بالتوازي كانت صناعة شرايط الفيديو في حالة إزدهار هي الأخري جنباً إلي جنب مع الأنمي .. عصر الطفرة الاقتصادية في اليابان بقي وكدة .. فبناء عليه كان أي مانجا بتتنشر وتستمر شوية وتنجح بيسعوا سريعاً لتحويلها كأنمي .. بداية كانوا بيعملوها مسلسلات تلفزيونية بس ده كان بيعمل مشكلة أتكررت كتير وهي أن المسلسل يجري ازي في الأحداث لدرجة انه يحصل المانجا فيضطروا يا يوقفوه يا يحشوه بفيلرز تفسد متعة المشاهدة .. لذلك أظن غالباً الإتجاه للأوفا جه كحل مثال للمشكلة دي .. عمل قصير بيعالج جزء محدد وصغير من أحداث المانجا وبيستعرض أهم تفاصيلها أمام الجمهور .. وبيعتبر بمثابة دعايا ممتازة للمانجا بحيث اللي حابب يكمل الأحداث يروح يقرأ

جايفر رغم أنه في بدايته كان متفسخ أوي .. قصة تقليدية ورسم علي الله بس كنت طول ما انا بأتفرج حاسس أن المسلسل ده في حاجة شداني .. في شئ جذاب مش فاهم ايه هو بس في حاجة مخلياني عايز وقادر أكمل للأخر .. مع الوقت خدت بالي من هذا الشئ وسر تأثيره عليا

قصة جايفر بتبدأ زي قصص السوبرهيروز التقليدية خالص بخطأ بيؤدي لحصول طالب علي قوة خارقة خارجة عن السيطرة وده بيحوله لمطارد من قبل منظمة سرية بيعمل تحت أمرتها جيش جرار من الوحوش المتحول .. لحد هنا انا كنت حاسس اني بأتفرج علي مازنجر أو الباور رينجرز بالذات مع الجو التسعيناتي المظلم والمزيكا الروك المتطرفة والعنف والدموية اللي في كل مشهد .. لحد ما بدأ المسلسل يلمح لسر القوة اللي أكتسبها "شو" بطل المسلسل وقصة الوحوش المتحولة دي وهنا ابتدت الأمور تاخد شكل تاني خالص

الشئ اللي جذبني في المسلسل إلي جانب أجواءه الظلامية الدموية هو تيمة القصة وجو العمل نفسه .. العمل نفسه فكرني بأفلام الموجة اليابانية الجديدة والأفلام التجريبية بتاعتهم .. اللي هو أجواء غرائبية مليئة بالمطاردات وسط الغابات والأماكن المهجورة والأطلال وأكشن في غاية العنف والمتعة .. ثانياً ودي مش صدفة لأن أكتشفت أن حتي مواقع المانجا متفقة معايا في الحتة دي .. المسلسل في شبه كبير من سلسلة ديفيل مان وشغل جو ناجي

في الوقت ده في سلاسل كتير كانت بتتخد الأبوكاليبسية كتيمة لقصصها .. بس هي مش أعمال زي قبضة النجم الشمالي مثلاً بتحكي أن الأرض حصل فيها دمار شامل وبتجيب حياة الناس بعدها .. أو زي الجاندام بتحكي عام من المستقبل الأرض فيه بتتعرض لتغيرات جذرية .. لا دي بتدور في وقت عادي حديث العالم فيه بيواجه خطر داهم يكاد يفتك بيه والبطل هنا دوره مواجهة هذا الخطر وإيقافه .. اللذيذ في التيمة دي والمشترك بين جايفر وديفيل مان هو إن العملين دول بيعيدوا سرد التاريخ من أول وجديد .. تحديداً تحديداً بداية الحياة علي الأرض

في ديفيل مان القصة أعادت سرد قصة الخليقة والقيامة معاً وكأنها خلقت عالم جديد له سرديته وواقعه الخاص .. كذلك هنا المسلسل بيعيد سرد بداية الحياة علي الأرض وبيستبدل القصص التقليدية بقصة جديدة تخدم القصة وتودي الموضوع في سكة غرائبية لكن ممتعة للغاية

علي ما بنوصل للحلقة الأخيرة بيكون الموضوع بقي متشابك أوي.. في فضائيين و وحوش وبدله خارقة وكلام عن التطور وعنف غير محدود .. بس للأسف المسلسل بيقف وما بيكملش الأحداث وهو ما يدعوني دلوقتي للذهاب إلي المانجا وبدأ المغامرة أمن البداية إلي أن يشاء الله 

لولا بس الرسم السئ بتاع الجزء الأول من الأحداث كان المسلسل بقي عظيم للغاية .. بس هو لازال في رأيي عمل جيد جداً يستحق المشاهدة والإستمتاع بالتجربة

I love Bleach ❤

ما أعرفش إزاي طول المدة اللي فاتت فاتتني فرصة أني اكتب عن مسلسل عظيم زي "بليتش" .. بليتش هو واحد من العظماء الأربعة لمسلسلات الأكشن الشبابية في عالم الأنمي .. في رأيي يتربع علي عرش الأكشن الأسطورة "دراجون بول" ثم يأتي بعديه "ناروتو" ثم "ون بيس" ثم يأتي "بليتش"

القصة بتحكي عن "كروساكي إيتشيجو" طالب الثانوية اللي عنده القدرة علي رؤية الأرواح والتكلم معاها منذ طفولته بس دون فهم مصدر القدرة دي ولا التأكد أن هل هو الوحيد اللي عنده القدرة دي ولا في حد غيره بيمتلك نفس القدرة .. الصدفة -أو اللي بعد كدة اللي ح يشوف المسلسل ح يعرف أنها مكنتش صدفة- بتجمعه ب"كوتشيكي روكيا" .. روكيا بتنتمي لألهة الموت أو "شينيغامي" وهم كائنات روحانية مهمتها إرسال الأرواح إلي العالم الأخر .. روكيا بتصدم بأن إيتشيجيو قادر يشوفها ويتعامل معاها علي عكس ما هو معروف عن البشر .. في نفس يوم لقاءهم بتحصل حادثة غريبة وهي هجوم من "هولو" .. الهولو هما كائنات روحانية لكن شريرة بتتغذي علي الأرواح الضعفية وعندها قدرة علي إيذاء البشر .. بتحاول روكيا التصدي لهذا الكائن لكن بتفشل والكائن بيتمكن من هزيمتها مما يستدعي تدخل إيتشيجو لمحاولة إنقاذها .. بتهب روكيا قوتها الخاصة لإيتشيجو وبتحولوا لشينيغامي وتساعده علي هزيمة الهولو .. لتكن هذة نقطة إنطلاق أحداث هذا المسلسل العظيم

مع تتابع الأحداث بيكتشف إيتشيجو انه مش هو البشري الوحيد القادر علي التعامل مع الأرواح وبيكتشف أن عالم الارواح معقد فوق تصوره وأنه ملئ بالغرائب والقوي والأسرار اللي هو نفسه واحد منها ... احداث كتير وصراعات ومعارك ومتعة لا توصف تحتويها هذة السلسلة بين جناباتها

ليه أنا بأحب بليتش؟

في لحظة ما انا كنت بأشوف بليتش أفضل من ناروتو و دراجون بول .. يمكن الإنطباع ده ما أستمرش كتير بس لازلت  بأعتبره منافس قوي ليهم لأسباب كتير منها:

*المسلسل قصته ممتعة وثرية بالأحداث والمتعة والإثارة فوق ده متأثرة بالميثيولوجيا اليابانية والتاريخ الياباني القديم في الستايل وطريقة بناء الشخصيات والشكل العام

*القصة بتحتوي علي مجموعة من الأفكار العظيمة .. حوار المسلسل ده في كم تفلسف وحكمة في غاية الروعة .. المسلسل ناقش مفاهيم زي التمرد والتسلط والوحدة والنظم الجامدة والصراع ما بين الخير والشر والقوة واليأس والتغيير والإتساق مع الذات وإلخ ... كل شخصية بتحمل فلسفة خاصة وجانب إنساني بينضح بالمشاعر 

*موسيقي المسلسل ورسوماته فوق الرائعة وكان ليها دور كبير في حبي للمسلسل

*القصة بتحمل كم كوميديا ودراما إنسانية جميل يمكن ممكن عند لحظة ما تنسي أنك بتتفرج علي مسلسل أنمي ويتهيألك أنه مسلسل حقيقي

بليتش من الحاجات اللي حبيتها وأثرت فيا الصراحة ومنتظر بلهفة عودة الأنمي من جديد بعد توقف دام ٤ سنين لحد الأن واللي حاسس أني ما أديتوش حقه زي ما عملت مع ناروتو  فقررت النهارد أديله جزء من حقه .. وفي إنتظار المزيد

Bleach: Thousand-Year Blood War (Cour 1)

Bleach: Thousand-Year Blood War
P1, Epi 1-13

والله لا أريد لهذة القصيدة أن تنتهي .. بالذات لو نهايتها بالشاعرية والجمال ده

نهاية الفصل ده من ملحمة حرب الألف عام غير أنه بيمهد للأحداث القوية اللي ح تيجي بعد كدة فهو بيكمل خيط مهم في القصة وصورة كانت عمالة تتبني وتكتمل بالبطي علي مدي أحداث القصة .. الا وهو قصة إيتشيجو وصراعه مع نفسه وحياته وماضيه
لا يخفي علي أحد أن بليتش من أول القصة وهو مبني علي التراث الثقافي الشينتوي والبوذي ومستعين بمفاهيم وبني ومصطلحات عظة بالذات من التراث الديني الياباني .. ده واضح اوي .. بس اللي أتضح مع نهاية الفصل ده أن الموضوع أعمق من مجرد مظاهر او مسميات لا دي قصة البطل تحديداً هي محاكاة لسردية مهمة في البوذية وهي سردية الوصول إلي الإستنارة

أحد أهم سبل الوصول إلي الإستنارة هو التصالح مع الذات بسوءها وطيبها وأن الإنسان لازم يفهم أن الجانب المظلم اللي جواه هو جزء من طبيعته زيه زيه الجانب المضئ .. وأن التوازن بين الجانبين وبيرفع الإنسان إلي مرتبة الكمال والإستنارة
في نهاية الفصل إيتشيجو بيتصالح مع الهولو اللي جواه بعد ما بيعرف ماضيه وقصة أمه وبناء عليها بيعرف طبيعة قواه .. وأنها جزء أصيل منه بل أنها حميته في كتير من اللحظات الحرجة

في رأيي قوي الهولو بتمثل الشر والغرائزية جوا الإنسان بينما قوي الكوينشي بتجسد الجانب نقي في الإنسان حتي عشان كدة المؤلف أختار الكوينشي يبقوا بشر عاديين وقدراتهم بشرية نوعاً ما معتمدة علي القوي الروحية

بعيد عن نهاية الفصل فالأحداث من بداية الفصل لأخره مخيفة بشكل كبير .. الهزة اللي أحدثها رجوع يانباخ واللي عمله سواء في عالم البشر او السيريتي أو الهوكوموندو مسألة خطيرة تليق بأرك حرب نهايته بتمثل نهاية القصة .. ملحمة من الأحداث القوية والرسم المتقن والمفاجأت المدوية والعنف المفرط تجاوزت حرب أيزن بسنين ضوئية .. خطر بيداهم الوجود كله لدرجة ح تخلي بعد كدة الكل يتكاتف في تحالف غير مسبوق للقضاء علي الخطر ده

يمكن من أول القصة و الشينيغامي بيتقدموا علي أنهم محاربي العدالة ورجالها وده يخلي الكوينشي تحديداً رجال باخ مع الظلم .. لكن الحقيقة كل طرف فيهم بيدعي أنه بيمثل الحق والعدالة لكن هو بيدافع عن أفكاره ومصالحه فقط .. الفرق بس في المرجعية القيمية لكل طرف .. السيرتي بعد إبادة الكوينشي أتجه لنبذ العنف والعمل علي بناء أجيال مؤمنة بالسلام .. بينما باخ وجيشه علي النقيض تماماً

كان فصل شيق وممتع للغاية.. منتظر بشغف الجزء الثاني  

Bleach: Fullbring Arc

Bleach

Fullbring Arc, Epi 343-366 "No Fillers" / End 

طيب .. من حسن حظي اني شوفت الأرك ده مباشرة قبل عرض الموسم الجديد عشان أبقي مربط لأن بيتهيألي في تفاصيل كتير فيه مهمة وبتبني للي جاي 

مبداياً أنا من المشاهدة الأولي زمان للأرك ده كان عندي معاه كام مشكلة وتقريباً نفس المشاكل أتكررت لما رجعت شوفته تاني دلوقتي إلي جانب مشاكل أخري جديدة .. بس هل الأرك ده وحش؟! لا .. هل هو مفيد للقصة؟! أه .. ولكن .. ح نقول كل حاجة دلوقتي 

أول مشاكلي مع الأرك هي أنه أرك أساساً .. ده لو كان أتعمل في العصر دن بيتهيألي كان تمامه يبقي فيلم ٣ ساعات وأقلب .. فعلاً مكنش مستاهل كل المساحة والوقت دول كلهم .. القصة بسيطة ومش تقيلة رغم أهميتها فكان حلو عليها أوي انها تبقي فيلم 

ده يودينا للمشكلة التانية واللي مع الوقت أكتشفت أنها كانت ملاحظة عندي برضو لما شوفته أول مرة .. كثرة المط مع تراخي الأحداث وهبوط رتمها مقارنة بالأرك السابق .. فعلاً الأرك ده في ملل بالذات في نصه الأول .. أول ٣ حلقات دول ممكن كانوا يختصروا في حلقة .. الجزء بتاع إنضمام إيتشيجو للفريق والتدريب كان تمامه اوي ٥ حلقات .. الجزء الأخير بتاع المعركة تمامه حلقتين او ٣ مش ٦ حلقات خالص يعني .. مط فظيع علي أحداث مش بالقوة المطلوبة 

يمكن أكتر جزء كان مثير في القصة هو بتاع مطاردة إيتشيجو وتسيوكومي والتويست اللي في الأخر .. لكن الباقي كله حرق ممكن يتقلب بسرعة .. سبب ان الجزء ده مثير ان اغلب المعارك والمفاجئات حصلت فيه وأنه كان مليان أكشن .. ما طبيعي يا جدعان إن مسلسل أكشن يبقي الناس شغوفه بالأكشن اللي جواه ثم الدراما.. غير كدة كله تفاصيل مملة محدش مهتم يسمعها ولا يشوفها 

الهبوط اللي حصل في المستوي كان كمان سببه في رأيي خاتمة الأرك اللي قبليه .. كوبو كتب نهاية مرحلة الأرانكار وكأنها نهاية القصة والشرير اتسلسل والواد فقد قوته ورجع ولد عادي .. لو حد مش واخد باله ح يفتكرها النهاية السعيدة المنتظرة لقصة زي دي وأن إيتشيجو خلاص حقق هدفه وقدر يحمي كل شئ بيحبه .. فاكر انا وقتها وانا بأشوف النهاية دي أول مرة قولت طيب هو ناوي يقول ايه تاني بعد كدة؟! .. قام الباشا أبتكر خطر جديد يستوجب عودة إيتشيجو لدوره كحامي وحارس لهذا العالم 

ناس كتير أنتقدت الحتة دي وأنه عشان يكمل القصة راح جاب حاجة من برة السياق .. بيتهيألي الموضوع كان ممكن يجي بطرق تانية أحلي تربط القصة ببعضها لكن اللي حصل كان أقل الحلول جودة 

بس هنا لازم أشيد بحاجة ح تدخلني في حتة إيجابيات الفصل 

لما رجعت أشوف الارك تاني وانا عارف كويس التويست اللي فيه شوفت أزاي كوبو أستغل الدافع الأساسي لشخصية إيتشيجو عشان يبرز الجانب السلبي اللي فيه واللي غاب عننا تماماً .. وهو أنه بكل بساطة ممكن يبقي نقطة ضعف يُستغل منها ويتضغط عليه بيها وهو اللي حصل طول الأرك.. إيتشيجو لو مكنش دخل في دوامة الخوف من عدم القدرة علي حماية ذويه ولو كان حكم عقله شوية كان ح ياخد باله من أنه بيتضحك عليه أو ان فيه شئ غلط في القصة دي.. أو علي الأقل كان تواصل مع أوراهارا أو أبوه وفهم قبل فوات الأوان 

كمان زي ما قال جينجو في الأخر مرحلة التدريب علي الفولبرينج دي طورت من قدرة إيتشيجو علي التحكم في قواه وقدراته والرياتسو بتاعته وده خلي حتي شكل السيف بتاعه أختلف 

يعني المرحلة دي كانت خطيرة ومهمة بالنسبة للبطل لأنها تمهيد مهم للحرب القادمة .. هو المشكلة بس كانت في طريقة طرح التطور نفسه .. لكن هو كتطور مهم للغاية للقصة وللبطل 

في حاجة كنت المفروض أبدأ بيها بس قولت أختم بيها أفضل ويمكن هي معلومة مش منتشرة أوي .. الجزء ده من قصة بليتش مقتبس أو متأثر بالأرك الثالث في مسلسل "يو يو هاكاشو" واللي شاف المسلسل ح ياخد باله من مدي التشابه ما بين السلسلتين ككل وتحديداً الجزء ده .. مش عارف أعتبر ده إستسهال ولا تأثر عادي لكن هو نقطة سلبية في حق الأرك ده وخلتني حاسس طول الوقت أنه تجربة غير أصلية 

هو في العموم أرك لذيذ وفيه حتت كتير مشوقة بس كان محتاج يتعمل أحسن من كدة 

ولنا أحاديث أخري مع الأرك الجديد المنتظر من بليتش 

Bleach: Arrancar (Final Part)

Bleach: Arrancar

P6, Epi 266-316 "No Fillers" Finale/End

الأرك ده بيمثل الذورة الدرامية للحدث الكبير اللي أحنا بصدده والرقصة الأخيرة في هذا الصراع الطويل .. ولذللك كان لازم الجزء يبقي ملحمي .. وقد كان من البداية للنهاية

أيزن في اللحظة دي في القصة كان بيجسد الشر والخطر الداهم بكل ما يحمله التوصيفين من معني .. ولذلك الكاتب أجل مواجهته مع الجانب الخير في القصة للأخر خالص بعد ما يقفل كل الخطوط اللي أتفتحت في غضون الرحلة الطويل والمعركة المديدة دي .. عشان يدي فرصة لكل شخصية تجود بأفضل ما لديها وكمان يدي فرصة للبطل يطور ويحقق جزء مهم من أهدافه وهو الدافع اللي عشان أساساً خاض الرحلة الخطيرة دي كلها .. إنقاذ صديقته أوريهيمي

لو ركزنا مع إيتشيجو في خلال الأرك ده ح نلاقيه كان بيتطور بسرعة مع تطور الدنيا من حوليه وأنه قفز ما بين أكتر من حالة في مدة مش كبيرة .. وأن كل مرحلة أو حالة كان بيصل إليها إيتشيجو في القصة كان لازم يبروزها بمعركة .. من أول صدمته بعد أول مواجهة مع الأرانكار لإحساسه بالعجز أمام جريميجو ثم تدريبه علي إيد هيراكو ومجموعته وحتي رحلة إقتحام الهوكوموندو ... معركته مع أولكورا جزء منها كان تصفية حسابات وإنتقام من اللي عمله فيه واللي عمله في أوريهمي .. بس كان في جانب خطير خدم أوي علي نهاية الأحداث بعد كدة الا وهو أنه إختبار قوي وحقيقي لقوة ومشاعر إيتشيجو

فعلاً إيتشيجو في المعركة ده ذاق المعني الحقيقي للخوف .. الخوف علي أكتر من مستوي .. الخوف من الفشل في مهمته المقدسة الا وهي حماية من يهمه أمرهم وكذلك الخوف من نفسه وقواه الخفية اللي ممكن تؤذي من حوله لوخرجت عن السيطرة .. وده هز ثقته بنفسه وخلاه متردد في إستخدام قواه ضد أيزن

الجزء ده طويل ومتشعب وتقريباً كل شخصية فيه عايزالها مقالة لوحدها .. بس أنا هنا ح أركز علي 3 شخصيات لأن هما دول اللي يهموني أوي .. أيزن ، إيتشيجو ، جين إيتشيمارو ثم كلام عام علي الأرك ككل

أيزن زي ما قولنا هو من ساعة فصل السيرتي بيتمهدله علي أنه الشر الأعظم .. خائن ، متجبر ، مناهض لكل قيم مجتمع الأرواح بشكل مباشر وبيهدف لتدميره .. بس الكاتب شاف أن ده مش كفاية .. ضاف عليه عامل كمان وهو أنه قاسي ولا يأبه إلا بمصلحته وهدفه .. فهو لما حس أن الإسبادا أصبحوا ثقل علي كتفه تخلص منهم بدون أي شفقة .. ودخل المعركة بنفسه .. في البداية إيزن كان مجرد رد فعل لكن قوي ثم أبتدي ياخد أكشن .. وهنا أكتملت الأسطورة .. فعلاً محدش قدر يصمد قدامه .. مش بس لأنه قوي لا لان كمان قدراته عالية مدياله مساحة يتلاعب باللي قدامه بكل أريحية وخفة وبدون أي مجهود .. كمان بيقدر يستخدم ألاعيب ذهنية ضد خصومه تخرجهم برة الجيم تماماً زي ما عمل مع توشيرو وإيتشيجو .. ولذلك كان لازم اللي يقضي عليه حد يكون متفوق وعمل طفرة زي إيتشيجو وأوراهارا كيسكي

لكن لأن أيزن في النهاية شخصية متعددة الأبعاد كان لازم يبقي ليه دافع أو سر يبان في الوقت المناسب .. والسر كان اللي قاله إيتشيجو وهو أنه حس بمشاعر وحدة جياشة خارجة من الزمباكتو بتاع أيزن بتعكس حالة صاحبه .. أيزن كان شخص بيشعر بالوحدة وعلاجه للوحدة كان أنه بيحاول دايماً يلاقي منافس وشخص قوي علي نفس مستواه يتنافس معاه .. ولذلك أغلب الظن لما أصطدم بحقيقة أن إيتشيجو بقي أقوي منه في النهاية قرر أنه يستسلم لأنه لم يعد وحيداً ولا مميزاً كما سبق

علي الجهة المقابلة يهمني أوي النتيجة النهائية اللي وصلها إيتشيجو واللي كنت أتمني أنها تبقي نهاية القصة .. إيتشيجو فقد قواه دفاعاً عما يؤمن به وعن من يحبهم .. ولذلك في النهاية كان سعيد لأنه نجح أخيراً في أنه يحمي دائرته من الخطر وما أستسلمش للفشل ولا الخوف والإحباط زي ما حصل زمان .. إيتشيجو ما بقاش طفل وأصبح حد يعتمد عليه .. دي نقطة كان مهم إثباتها قبل القفزة الزمنية اللي ح تحصل بعد كدة .. أحنا بنشوف نهاية إيتشيجو الطفل وبزوغ شخصيته الناضجة .. لكن للأسف ده ح يعمل مشكلة بعد كدة لأن بالشكل ده كان المفروض المسلسل ينتهي بعد ما البطل حقق هدفه وتخلص من مخاوفه .. لكن الكاتب زي ما يكون أفتكر أنه في لسة صفحات ما أتقفلتش وجوانب في الشخصية محتاجة تتطور فقرر يمد في القصة شوية بطريقة مش ح أقول مبتكرة لأنه مقتبسة من عمل أخر .. بس يعني فيها شغل

جين ده من أكترالشخصيات المفضلة عندي في القصة .. أنا بأحب النوع ده من الشخصيات المليئة بالمفاجأت وكمان نوعية البطل المضاد اللي بيمشي في طريق الخير بس بأساليب الشر .. زيه زي إيتاتشي في ناروتو وكوما في ون بيس.. كلها شخصيات بدأت القصة كأشرار ثم مع الوقت بنكتشف أنهم علي النقيض تماماً ... لكن في رأيي جين هو أعظمهم لأن الدافع بتاعه نبيل بشكل غير طبيعي وهو الإنتقام للبنت اللي بيحبها .. هو هنا ولا يهمه مجتمع الأرواح ولا مين ينتصر علي قد ما هو بيتحرك بدافع الحب ومن أجل الحب .. شئ نبيل للغاية

الأرك بشكل عام ملحمي وعبقري وملئ بالإثارة والتشويق وزي ما كان فيه لحظات عبقرية كان في حتت فيها مشاكل .. لكن المجمل عظيم الحقيقة .. الأرك خد صيغة وشكل "مرحلة فريزا" من دراجون بول زد بالدراما والوتيرة المتصاعدة اللي فيها والأحداث المتلحقة والسرد المتوزع ما بين أكثر من نقطة ومنطقة في نفس الوقت

لكن علي عكس أرك فريزا الأرك ده مكنش نهاية القصة .. وهو كوبو بيكتبه تعمد أنه يبين أن ده مش النهاية وأن لسة الحرب الكبري الحقيقية جاية بعد كدة في أرك حرب الألف عام .. عشان كدة نلاحظ أنه مش كل الناس أظهر قدراتها وأن شخصيات قوية كتير أظهرت عيوبها ومواطن الضعف فيها .. وده خلي الأرك أشبه بالإختبار الأولي لقوة فرق السيرتي قبل ما مواجهة "الحياة أو الموت" الحقيقة تبدأ ... للأسف لأن الأرك الأخير أتأخر كتير وما أتذاعش ناس كتير ح تعتقد أن قادة وقوات السيرتي قدراتهم محدودة وأنهم لولا إيتشيجو كانوا ح يبادوا .. لكن ده عاري تماماً عن الصحة

أرك عبقري .. نخش في اللي بعد

Bleach: Arrancar P5

Bleach: Arrancar

P5, Epi 213-229 "No Fillers" Finale

هو بداية كدة ده أكتر جزء ما عجبنيش في الأرك كله رغم ان فيه حسنات كتير لكن في رأيي ده أكتر جزء بتتجسد فيه مشاكل الكتابة عند كوبو والمشاكل اللي عاملة أزمة بين بعض الجمهور وبين المسلسل ككل وأثرت علي مساره بعد كدة 

المعركة بتنتقل من الهوكوموندو لمدينة كراكوا .. في الأول ونظراً لأني نسيت كتير من الأحداث كنت معتقد ان الحلقات ح تمشي شوية هنا وشوية هناك لكن الحقيقة الكاتب فضل انه يركز علي جانب معين من المعركة الكبري أحسن ما يشتت إنتباه المتفرج لأن كمان في لحظات وحتت ح يبقي فيها أكشن عالي أوي ومحتاجة تركيز كبير.. ولذلك بأشوف القرار كان مناسب أوي 

لكن اللي مكنش مناسب هو اللي عمله الكاتب بعد كدة

من الذكاء ومن حسن الكتابة أنك تفرد مساحة خاصة لشخصياتك الثانوية عشاه تقوم بدور فعال في القصة وتظهر قدراتها.. في الأول لما نواب القادة تقدموا للمعركة حسيت بقلق شوية من مستواهم بس كنت متحمس أشوف اللي عندهم .. وبصراحة المعارك الأولي كانت جميلة فشخ .. رتم سريع وإثارة وإستخدام رائع الذكاء التكتيكي وكمان فرد مساحة للتعرف أكثر علي الشخصيات دي وخلفيتها 

لكن أول ما كامامورا دخل المعركة وكسب بالطريقة السهلة والساذجة دي ابتدت مشكلتي مع الفصل ده ...المشكلة اللي لاحظتها طول الفصل ان كوبو مش عارف يوازن ما بين أنه عايز يبين جيش أيزن بشكل قوي وكتحدي خطير وبين أنه عايز يبين في المقابل جيش الشينيغامي وعناصره بالذات اللي تحت القادة كفريق قوي وعنده خبايا ومزايا تفاجئ المتلقي .. للأسف النتيجة النهائية اللي انا طلعت بيها من الفصل ده أن جيش أيزن جامد فشخ بينما الشينيغامي دول شوية مكسحين وعالم جاية تهزر مفيهمش غير كان واحد جامد بينما الباقي بيعافروا وبيكسبوا بالعافية ده لو كسبوا

حتي النواب اللي طلعهم أقوياء في البداية رجع قلل من قدرهم بعد كدة وفي شخصيات كانت بلا قيمة خالص في المعركة وشكلت نقطة ضعف رغم أننا كنا مستنين منهم كتير زي أبي وماتسيموتو 

الغلطة دي ح يرجع يكررها تاني في الفصل الجاي مع فريق الفيزارد بعد ما مهد لوجودهم وقوتهم بشكل كبير راجع جاي حولهم لنكتة 

في الجانب ده دايماً بأتذكر "أودا" وكتابته لمرحلة المارينفورد كلها من أول أرك أرخبيل سابونجي.. في لحظة معينة فريق قبعة القش كان لازم سلسلة إنتصاراته الخرافية دي لازم تقف بشكل ما يقلش منهم لكن بيعظم من قدر التحدي وبيديهم فرصة لمراجعة اخطاءهم وتطوير ذاتهم .. فكان الحل أنك تبين قد ايه الطاقم قوي ومثابر بس لسة ما وصلش لمستوي الوحوش والجبابرة اللي علي وشك أنه يواجهم.. وعمل ده في ملحمة درامية مؤلمة خلت لحظة لم الشمل وإستكمال الرحلة لحظة جليلة ومنطقية 

هنا أنا فاهم منطق الكاتب شوية .. كوبو بيحاول يبين الفرق ما بين أعضاء السيرتي الخبرة والجداد نسبياً وبيعلي من قيمة القدماء .. بس للأسف الطريقة أخلت بقيمة الجدد كتير 

الفصل كأكشن جيد ومثير بس كان ينقصه الكتابة المتوازنة

Bleach: Past arc

Bleach 

Past Arc, Epi 206-212 "Finale"

أركات الفلاش باك دي بتبقي زي هدنة كدة وسط الأحداث الساخنة .. لكنها هدنة فيها وجهة نظر شوية

فهي اما بتوضح شئ ضبابي في خلفية المشهد بيمثل عصب ومحور أساسي بتنبني عليه الأحداث أو بتستغل وصول القصة لنقطة معينة عشان تمهد لشئ قد يحدث في المستقبل 

بأفتكر دايماً في الكلام في الجزئية دي الفلاش باك اللي كان بعد حرب المارينفورد بتاع إيس وسابو.. ده كان فلاش باك ذكي جداً .. أدي المشاهد هدنة شوية من الأكشن بعد المعركة الطاحنة المليئة بالأحداث دي ومهد لظهور سابو في دريسروزا 

هنا الفلاش باك بتاع أوروهارا كيسكي الغرض الأساسي منه كان توضيح الجانب المظلم والغامض فيما يتعلق بكيسكي وأسرته وكذلك هيراكو وعصابته .. وبرضو هو ظهر في التوقيت ده بالذات لأنه ح يساهم بشكل كبير في توضيح مخطط أيزن واللي عمله في أرك السيرتي وسر قوي الهولو اللي عند إيتشيجو او جزء منه السر يعني لكن جزء مهم .. زائد شوية تفاصيل جانبية تتعلق بالمشهد الحالي في مجتمع الأرواح والأقسام

يعني هو فنياً الأرك مفيهوش كتير يتقال أكتر من أنه وضح العلاقات الغامضة بين الشخصيات الفعالة في القصة وأدي مساحة حلوة لشخصية كيسكي بينت جوانب مهمة كتير في الشخصية ومدي قوتها 

أرك لطيف لكن الأجمل والألطف هو القادم

Bleach: Arrancar P4

Bleach: (Arrancar Arc)

P4, Epi 190-205 (No Fillers) “Finale”

بعد ما خلصت أحداث الفصل ده ذاكرتي بدون سابق إنذار كدة قعدت تستعيد أحداث فيلم "أفنجرز: الحرب الأبدية" .. الفيلم ده أكبر فيلم ملحمي في تاريخ مارفل حتي الأن ويمكن في تاريخ السوبرهيروز .. أكبر حتي من إيندجايم .. لأسباب كتير أهمها في رأيي أن الفيلم بدء كخمس خطوط .. خط ثانوس وخط أيرون مان وشلته ثم خط ثور وجارديانز ثم خط كابتن أمريكا وشلته ثم خط واكاندا .. ثم بشياكة وصياعة قدر ت يلضم الخطوط مع بعضها عشان واحدة واحدة لحد ما لحظة المعركة المشهد كان مقسوم نصين .. نص في الفضاء ونص في واكاندا علي الأرض .. وقدر يوازن بين الخطوط دي ويتنقل ما بينها بخفة وسلاسة خلت المشاهد متفاعل مع كل حدث ومتابع لتطورات كل خط بدون ما يفصل

الحتة في رؤيتي أنا فيها تأثر كبير من صناع مارفل بثقافة الشونين .. لأن تقريباً أكتر لون ترفيهي أستخدم الأسلوب ده في خلق حالة المعركة الكبري .. أن المشهد يبقي متقسم ما بين أكتر مكان وفي كل جانب بيحصل تطور ما بيأثر علي مسار الدراما وكلهم في النهاية بيصبوا في بوتقة واحدة وهي التطور السريع والقوي للأحداث المتناسب مع الطبيعة الملحمية للحدث .. الا وهو وصول الصراع ما بين الطرفين الأساسين في القصة لمرحلة التصادم الكبير اللي نتيجته ح تكون تلاشي طرف وإنتصار وبقاء أخر

طبعاً كالعادة دراجون بول هو كبيرهم الذي علمهم السحر وكان رائد في الحتة وأول مرة أستخدمها بالشكل المبلور ده كان في "أرك ناميك" وده أدي لأن الأرك يخرج بشكل ملحمي وقوي 

هنا مش الأرك ده بس بل الحدث كله مبني بالشكل ده .. في مهمة كبري وهي إنقاذ أوريهيمي والقضاء علي الأشرار وفي مجموعة من الأبطال أنطلقوا لإتمام العملية دي وفي مرحلة ما بتتشتت بيهم الطرق وكل طرف بيخوض معركة شكل ضد عدو شكل أثناء رحلته

الفصل اللي فاتت بينتهي بأن المرحلة الأول من مهمة أبطالنا بتكلل بالنجاح وفعلاً أيتشيجو بيقدر بينقذ أوريهيمي .. بس تكلفة ده كانت باهظة أوي .. فتقريباً كل أعضاء الفريق ما عدا إيتشيجو بقوا علي حافة الخطر وأتصابوا إصابات بالغة تعطل الباقي من المهمة .. طبعاً دي مشكلة كبيرة تقيع المهمة بالذات في مرحلتها التانية وهي العودة للديار .. لكن يا ريت الموقف يقف علي كدة .. لا ده الموضوع بيتطور لأن أطراف أقوي وهم "الإسبادا" بيدخلوا علي خط وده بيخلي المهمة قاتلة علي أبطالنا المنهكين واللي سقف قدراتهم لازال أقل من أنه يناطح مقاتلين أقوياء بهذا الشكل 

لذلك كان الحل الأكثر عقلانية واللي في رأيي بيتناسب أوي مع أسلوب "بليتش" بشكل عام هو التدخل المفاجئ من القادة وإنخراطهم في معارك طاحنة مع الإسبادا .. الحتة دي غير أنها أنقذت القصة من الوقوع في فخ الإستسهال والسذاجة فهي أدت للأرك ثقل كبير فالمعركة تحولت من مجرد عملية إنقاذ لحرب شعواء بين أقوي الأطراف في الصراع .. وأدت فرصة حلوة للدارما فشخصيات الإسبادا دي مش شخصيات شريرة مسطحة بل دي شخصيات لها أفكار وأبعاد ودوافع وفلسفة خاصة بيها

وهنا الصانع قدر يتحكم في الحدث بصياعة بدون مط ولا تنطيط مربك .. فهو قسم الإهتمام بين كل معركة والتانية بالتساوي وأدي مساحة حلوة للشخصيات عشان تعبر عن نفسها

الجزء ده من القصة جميل أوي بعد عن مط بداية الأخر ومكتر في الحتة اللي بأحبها أنا شخصياً وهي الأكشن .. يمكن وأنا بأتفرج هنا أستعد ذكريات المشاهد الأولي لبليتش وقدر أحدد بشكل كبير ليه أنا حبيت بليتش وليه بأشوفه من الأعمال التقيلة

مستمرون

Bleach: Arrancar P3

Bleach: (Arrancar Arc)

P3, Epi 152-167 “Finale”

دلوقتي مشاهدة ما تبقي من بليتش بأسرع أداء وأقل مدة بقت مهمة قومية والوقت اللي بأضيعه بقالي سنة لازم أعوضه في الأسابيع اللي فاضله قبل إذاعة الموسم الجديد .. سهلة إن شاء الله

علي ما وصلت لنهاية الفصل ده في القصة أكتشفت سبب تاني مهم من الأسباب اللي خلتني أحب بليتش وأتعلق بيه في المشاهدة الأولي .. الأكشن والمعارك .. جودة المعارك في بليتش بشكل عام بتعتمد علي حاجتين أساسيتين .. الرسم والتحريك ثم فلسفة المعركة نفسها

الرسم والتحريك متفاوت الجودة ما بين كل حلقة والتانية بس للأمانة والحقيقة في الأحداث الفاصلة والمعارك المهمة الرسم بيتحسن وجودته بتعلي شكل خرافي جداً .. يعني في معركة أيتشيجو مع جريميجو ومعركة رينجي وإيشيدا مع العالم اللحظات الحاسمة مستخدم فيها جرافيك ورسم وتحريك خرافي .. الكادرات بتنطق حرفياً .. عكس يمكن الأحداث العادية وده بديهي لأن الميزانية مش بتساعد في أوقات كتير علي أن كل الحلقات تطلع مثالية بالشكل المطلوب

الجانب التاني وهو جانب الفلسفة .. طبعاً كل شخصية بكل تأكيد ليها فلسفة ودوافع بتؤدي لأفعال ونتائج في خضم تفاعل الشخصية مع محيطها .. الجانب ده تحديداً كوبي كتبه بمعلمه غير طبيعية .. يمكن بمعلمه أفتقدها في جوانب أخري خاصة بتطور الأحداث في بعض الأوقات والفصول .. بالذات الشخصيات الرئيسية دايماً متعددة الجوانب وليها شخصيتها البارزة علي السطح وأخري تخفيها في أعماق نفسها والجدل ما بين الجانبين دول بيشكل دوافع ثم أفعال كل شخصية .. بناء عليه نشوف ونفسر مشهدين من اهم أحداث الفصل وهما لقاء أيتشيجو بأولكارا ومعركته مع جريميجو

جرميجو زي ما وضح وزي ما السردية بتبين من بداية القصة شخص مغرور وعنده أعتزاز كبير بالذات مرجعه أنه شايف نفسه دائماً الأقوي والشخص بيحطم اي تحدي يقابله .. لذلك كان طبيعي أنه يطارد إيتشيجو عشان يثبت قوته .. ولذلك تعمد أنه يهينه في لقاءهم الأول والموضوع تحول معاه لثأر شخصي لما إيتشيجو تصدي له وأذاقه الويلات في التانية .. كمان ده يفسر ليه هو أصر أن إيتشيجو يتعالج ويقابله وهو في كامل قوته .. عشان يقدر يثبت لنفسه ثم الكل أنه قادر علي تجاوز أقوي خصومه وهم في أزهي حالاتهم

ألكورا علي العكس تماماً غرضه كان القضاء علي إيتشيجو لآنه كائن بيقتل بدم بارد وعنده موقف سلبي من أي مشاعر أو تعاطف مع الأخرين .. هو نموذج للقوي المفتقد إلي الحب وده ح يبان أكتر مع تقدم الأحداث

القصة هنا أنتقلت من مرحلة دخول عالم الهوكوموندو إلي المواجهة المباشرة مع أعتي القوي داخل هذا العالم .. الفصل ده بيبين شئ مهم وهو مدي فارق القوة والجاهزية بين الأرنكار والأبطال .. ودي نقطة إيجابية أوي في أن الكاتب ما خلاش الأبطال أقوياء بشكل غير منطقي يسخف من قوة الخصم وكذلك أدي فرصة ومساحة للتطورات اللي جاية بعد كدة ودخول أطراف أخري في المعركة .. لكنه في نفس الوقت أدي مساحة للأبطال أنهم يطلعوا أفضل ما لديهم ويقدروا يناطحوا الأرنكار لكن بصعوية شديدة

لسة الأحلي جاي ورا .. يلا بينا

Bleach: Arrancar P2

Bleach: Arrancar

P2, Epi 132-151 Finale “No Fillers”

حلوة تجربة إعادة المشاهدة مش بس عشان كم الذكريات والحنين إلي الماضي اللي بتحملها لا عشان كمان بتنضوي علي إعادة تقييم لشئ الواحد تعلق بيه نفسياً بناء علي تجاربه الجديدة وتطور وعيه

وقت ما شوفت بليتش من حوالي 7 أو 8 سنين فاتوا كنت لسة بادئ أتابع أعمال طويلة حديثة من وقت مش بعيد .. كنت بأشوفه بالتزامن مع عرض ناروتو وهانتر .. برضو وقتها معرفتي بأساليب وفنيات الشونين مكنتش زي دلوقتي ولا كنت كونت ذوق خاص ولا وجهة نظر حيال هذا اللون من الفن .. فكنت بأستمتع باللحظة قبل أي شئ .. فرق بين نظرتي وقتها وحالياً بعد ما مشيت في رحلة طويلة مع فن الأنمي وشوفت كتير من الأعمال الكلاسيكية والمشهورة بالذات ون بيس .. الموضوع فرق كتير فرأيي

بليتش علي العكس من ون بيس وناروتو مبني أكثر علي طريقة أفلام الثريلر أو الغموص والإثارة .. هو عمل بيلفه الغموض بيتكلم في موضوع مخيف وعن عالم غير مفهوم .. التعاطي معاه أشبه بالسير في طريق مظلم وسط الضباب .. وأسلوب السرد وتطور الأحداث والتحولات الدرامية عامل زي ما يكون وسط العتمة دي كل شوية يطلعلك شئ يفزعك أو يفاجئك دون سابق إنذار .. فهو معتمد علي التويستات أو الإنقلابات الدرامية المفاجئة وحل الأزمات بيأتي عادة من خارج الصندوق

ولذلك حتي تلاقي شخصيات بليتش منقسمة 3 أنواع .. يا شخصيات ذكية جداً وعندها قدرة علي حل مختلف المعضلات بطريقة مبتكرة .. يا شخصيات قوية جداً بس بتخفي من القوي والحيل والأساليب أكثر مما تظهر .. يا شخصيات عندها قوي كامنة لكن هي مش واعية بمدي قوتها أو تطورها بيسير بشكل بطئ شوية وبينفجر فجأة وقت اللزوم أو علي مراحل .. النوع الأخير ده زي إيتشيجو وزراكي كينباتشي ورينجي اللي هو الشخصية القوية بس لسة ما قدرتش تحكم في كل قواها ولا توصل لأعلي مستوي ممكن وتوصله .. النوع الأول زي إيشيدا تحديداً اللي بيمثل عامل العقل والدهاء في المسلسل وهو في رأيي متأثر كتير ببناء شخصية "كوروما" من يو يو هاكاشو .. النوع الثاني بيمثل معظم قادة السيرتي ومعظم الشخصيات القوية في المسلسل زي بياكيا

في نوع رابع وهو الشخصيات محدودة القوي بس بتعافر لأسباب شخصية أو قيمية بس دول شخصيات ثانوية أو صف ثاني ودول وجودهم طبيعي لمساعدة الشخصيات الرئيسية وبرزوتهم .. سنيد زي ما الكتاب بيقول في عالم الشونين .. دول زي سادو وأوريهيمي .. 

وفي نوع من الشخصيات مزيج من الثلاث أنواع ودول عادة بيبقوا الأشرار زي أيزن كدة

الشكل ده في بناء الشخصيات نابع من طبيعة العمل كبنيان درامي قائم علي المفاجئات وفي نفس الوقت بيساعد الكاتب في سرديته وصنع تويستاته والدراما الغامضة اللي بيبنيها .. لكن للأسف بليتش علي العكس من عمل ملحمي زي ون بيس بيفتقد تماماً للبناء الطويل .. بأحس المعلومات والأبعاد الخاصة بكل شخصية وحتي الشخصيات بالذات الثانوية كلها بنت وقتها مفيش فيها شخصية بتتحط عشان يبقي ليها دور بعد كدة ولا معلومة بتترمي عشان ح يبقي ليها صدي أو أهمية فيما بعد .. لا هو الفصل أو الأرك أبن وقته ومعلوماته خاصة بيه هو لكن مش بتبني لأي شئ بعد كدة .. حتي الحاجات اللي أتبنت علي معلومات سابقة جت بعد كدة لما جت فكرة أن القصة تمتد لكن مكنش فيه نية لأي بناء طويل من الأول

الجانب الوحيد اللي بيتطور وبيتبني بناء طويل الحقيقة في القصة هو دوافع الأبطال وعلاقاتهم ببعض سواء العاطفية أو الروابط الإنسانية .. بالذات شخصية إيتشيجو .. مشاعره تجاه ذاته والأخرين بتطور ومعاه دوافعه الا أن في محور ذاتي لا يتبدل لكنه بيتقدم وهو دافعه الإساسي اللي نابع من مأساته الشخصية .. رغبته في حماية الأخرين .. الرحلة الخطيرة اللي بيخوضها إيتشيجو في الهوكوموندو في الفصل ده سببها أنه حس أنه عجز مرة تانية عن حماية حد بيهتم بيه .. لسة مشاعر إيتشيجو في المرحلة دي تجاه أوريهيمي مشوشة بشكل كبير ومش واضحة .. لكن الشئ الوحيد الواضح أنه بتهمه وأنه حاسس بالذنب لأنه عجز عن حمايتها .. من العوامل المهمة في شخصية أيتشيجو برضو أنه مش بس عايز يحمي أصدقاءه لا ده كمان مش حابب يشاركهم معاه الهم والخطر وبيتحمل العبء بدالهم .. وده بان أوي في مواجهته مع أصدقاءه

لوهلة كنت بأعتقد أن إيتشيجو أناني أو معندوش ثقة في ذاته .. بالعكس هو واثق من ذاته ومتحمل المسئولية لدرجة أبوية بتخليه مش حابب حد يتحمل المسئولية غيره وشايف أنه لازم يحمل الصخرة عن كاهل رفاقه

الفصل ده في شوية مط وده عادة الشونين وقتها يعني لكنه لطيف .. الموضوع غلبت عليه الكوميديا بس مكنتش مزعجة .. لكن لسة الأكشن ما بدأش فعلياً .. مستمرون

Bleach: Arrancar P1

Bleach: Arrancar

P1, Epi 110-131 Finale

من يوم ما تم الإعلان عن أن بليتش راجع لإستكمال قصته ومعالجة فصله الأخير –أو اللي بقي قبل الأخير حالياً- وأنا طوال الوقت باخطط لفكرة أني أعيد مشاهدته تاني عشان أقدر أستعيد الأحداث في ذهني من جديد وثانياً عشان أقدر أقيمه من منظوري حالياً نظراً لأني تقريباً أنتهيت منه في 2013 أو 2014 يمكن ودي مدة طويلة أوي الصراحة أولاً لأني أتذكر الأحداث وثانياً أراءي وقناعاتي فيها أتغيرت كتير .. زائد كمان شوفت وقرأت إنتقادات كتير لبليتش سواء علي تطور الأحداث والشخصيات أو علي النهاية اللي أتقال عليها وعلي ظروف كتابتها كلام كتير ويمكن ده اللي مهد الطريق لأنها ما تكونش النهاية والسلسلة تستكمل في المستقبل القريب 

ثم جاءت الصدفة وفجئت أن بيتذاع علي التلفزيون وفبدأت أتفرج عليه من أول وجديد .. أنتهيت من الجزء الأول من القصة الخاص بالسيرتي وبداية حكاية إيتشيجو واللي الصراحة أعاد إلي ذهني فكرة هو أنا ليه بأحب المسلسل ده جداً ويمكن ليه معايا ذكريات ومعزة خاصة رغم أني ما بأتكلمش عنه كتير .. ثم جاء موعد أرك الأرنكار .. وهنا بدأت المعركة 

يمكن أول حاجة بتيجي في ذهني مع بداية الفصل ده ويمكن أكتر شئ أستعدته مع بداية الأحداث هو أحد أسباب حبي الشديد لبليتش .. أنه أنمي مظلم للغاية 

يمكن بليتش مش الأكثر دموية ولا رعباً وفيه جرعة كوميديا جميلة لكنه بيتمتع بأجواء مظلمة فريدة من نوعها .. طبعاً الموسيقي وأسلوب الرسم ليهم دور عبقري في الحتة دي .. بس أنا عايز أخد المسألة لحتة أبعد شوية وهي القصة والأحداث نفسها ... لو ح نلخص فكرة بليتش كمسلسل عن شخص بيحاول طوال الوقت حماية من يحب خوفاً من فقدانهم نظراً لأنه تذوق مرارة هذة الفقد سابقاً في مرحلة مبكرة جداً من حياته .. ويمكن هو ده الدافع الأكبر والأساسي لإيتشيجو طوال القصة .. يمكن لو ح نلاحظ إيتشيجو لا مهتم يعرف أي معلومات عن أصله ولا جذوره ولا أي معلومة عن العالم من حوله علي قد ما هو مهتم بأنه يبقي قوي ويصل إلي المستوي اللي يخليه قادر علي حماية كل اللي بيحبهم واللي دايرتهم بتوسع كل مدي .. من النقطة دي نقدر نفهم ونحلل القصة 

أرك الأرنكار هو إستكمال منطقي لأحداث الفصل السابق بيرفع التحدي لمستوي جديد .. وهو الفصل ده والفصل الجاي دورهم في الأرك كله أنهم يرفعوا التحدي لأبعد مدي ممكن .. ويمكن ح أقول حاجة وممكن أبقي أوضحها في وقتها المناسب .. أن ده أخر أرك بيمثل "إستكمال منطقي للأحداث" في بليتش علي العموم لأن الأركات اللي ح تيجي بعد كدة هي دفع للقصة للأمام عن طريق إختلاق تحديات جديدة أو سد ثغرات و توضيح جوانب في القصة لم يتم توضيحها بعد بس مش أكتر .. بس خلي الكلام ده لوقت تاني 

رفع التحدي هنا جه عن طريق حاجتين مرتبطين ببعض .. أولاً كشف جزء من مخطط "أيزن" الشرير المحوري حالياً في القصة ومعاه الكشف عن مدي القوة والعتاد اللي عنده .. أيزن أصبح ملك متوج فوق جيش من المقاتلين المحترفين اللي وجودهم بيهدد أن عالم الأرواح والاحياء سوياً ... ثانياً الصدام المباشر مع بطل القصة وتهديد أمنه وأمن من حوله عن طريق إبراز فارق القوي بينه وبين أيزن ومقاتلينه وأنه لسة محتاج يبذل مجهود كبير عشان يقدر يحمي دايرته وعالمه 

طبعاً الفصل بيبدأ بداية "دراجون بولية" بإقتدار والإقتباس فيها باين أوي يعني بإن أتنين من مقاتلي إيزن بييجوا عشان يعلنوا الحرب ويصطدموا بإيتشيجو .. واحد ضخم وهو الأضعف والتاني أقصر وأقوي .. نابا وفيجيتا أوي يعني 

بعيداً عن النقطة دي خلينا نقول أن الحتة دي كانت ذكية .. أنك تبدأ الفصل بصدمة وهي أنك تبين مدي حاجة البطل للقوة ومدي الخطر اللي بيتهدد عالمه الخاص .. بس الأذكي في رأيي أن الخطر مكنش بس جاي من الخارج بل من الداخل أيضاً .. أن إيتشيجو بيوصل لقناعة أنه ضعيف مش بس أمام الخطر القادم من بعيد بل وكمان أمام ذاته والقوي الغريبة اللي بتحاول تسيطر عليه وعلي قواه .. ولذلك أول خطوة خدها كانت أنه يحاول يكبح هذا الشئ ويسيطر علي قوته بشكل أكبر من الأول .. كدة جزء من الخطر زال .. أما الخطر الحقيقي فلازال علي الأبواب 

للحديث بقية 

Bleach: The Substitute Soul Reaper arc, Soul Society arc

Bleach

The Substitute Soul Reaper arc, Epi 1-20 Finale

Soul Society arc, Epi 21-63 Finale

فعلاً من فات قديمه تاه

كان بقالي مدة طويلة نفسي عايز أتفرج علي "بليتش" من أول وجديد وكنت مكسل وشايف يعني مش لازم .. بس كان دايماً جوايا هاجس بيقول أني ح أعيد مشاهدته يوماً ما .. السبب الأساسي في ده كان أني عايز أقيمه من أول وجديد بالذات بعد ما المانجا توقفت والسلسلة خلصت وكمان بناء علي تراكماتي الشخصية ومشاهداتي للكلاسيكيات والإنتقادات اللي أطلعت عليها واللي بتتهم السلسلة أنها الأضعف في الثلاثة الكبار "ناروتو، ون بيس، بليتش"

جت لي الفرصة لما فجئت بان الأم بي سي بتذيع حلقتين منه كل يوم .. بصراحة كانت تجربة جميلة وممتعة للغاية تشكر عليها الأم بي سي الحقيقة يعني .. تألق كالعادة والجودة كانت خرافية الحقيقة

بعيداً عن الإنتقادت والقصص دي كلها ورغم أني أراء الناس اللي طرحوها مهمة وعلي عيني وعلي راسي الا أني هنا ح أحاول انظر للمسلسل بعيد عن أي أراء وإنتقادات وكأني بأتفرج علي لأول مرة .. طبعاً ده صعب بس ح أحاول

مش عارف أبدأ منين بس خليني أمسك بطرف خيط مهم في قصة بليتش وكيفية خروجه للنور ... قيل أن كوبو لما عرض السلسلة لأول مرة علي مجلة شونين جامب قابل رفض قاطع وشديد من المجلة .. كان السبب في الرفض أن المجلة أدعت أن السلسلة ما هي الا إستنساخ لفكرة سلسلة "يو يو هاكاشو" بتاعة توجاشي .. لكن مرت الأيام ولما السلسلة نجحت غيرت المجلة رأيها بقت الناشر بتاعها ... من سنتين أنتهيت من مسلسل "يو يو هاكاشو" وكتبت عنه وعن مدي حبي وإعجابي بيه كسلسلة بتجسد الروح الحقيقة للشونين ... من الملاحظات اللي ما قدرتش أفوتها هو التشابه الكبير اللي بينه وبين بليتش بذات في البداية والنهاية ... البطل في السلسلتين بتحصله حادثة غريبة بناء عليها بيفتح باب صلة بينه وبين عالم الأرواح وبيخوض مغامرة بنتنهي بانه بيبقي مندوب ليهم في الأرض ضد الأرواح الشريرة والشياطين .. حتي شخصية يوسكي شبيهة بشكل كبير بإيتشيجو .. الإتنين طيبين لكن طباعهم حادة وميالين للعنف اللي سببه بيكون مأساة ومشكلة في النشأة .. لغاية ما بيجي الحدث الجلل اللي بيحول حياتههم تماماً وبيخليهم يوظفوا قواهم وطاقتهم لعمل خير .. بعد كدة في الجذور الخاصة بكل شخصية بنلاقي أن الموضوع كبير وأنهم شخصيات ليها وضع خاص ووراثة القوي اللي عندها .. وهي تيمة متكررة في كتير من السلاسل

في المجمل ظني الشخصي أن كوبو كان متأثر بشكل كبير بـ يو يو هاكاشو وأنه حب يعمل سلسلة علي طريقتها وأسلوبها لكن بطريقته الخاصة ويكمل فيها تجربة توغاشي التي لم تكتمل كما يجب ويضع تصور لما كان من الممكن أن تكون عليه لو سارت في الإتجاه الصحيح

الفصل الأول أو خلينا نقول المرحلة الأولي كلها من المسلسل كانت عبارة عن تعريف بالشخصيات والعالم اللي ح تدور فيه المعركة والدراما اللي ح نعيشها بعد كدة .. لو حد لاحظ ح نلاقي كل حلقة أو جزء عبارة عن تعريف بحتة معينة في القصة أو شخصية معينة وحيثياتها ودورها وقواها

يعني الفصل الأول مثلاً كان عبارة عن تعريف بإيتشيجو ودايرته .. أسرته وأصدقاءه ومدينته .. مش أكتر من كدة .. عشان كدة الكاتب ما أهتمش أنه يدينا أي معلومات عن وركيا ولا مجتمع الأرواح ولا حتي أوراهارا طول الحلقات دي غير فالأخر .. يدوب كان بيدي عنهم معلومات علي القد .. لكن التركيز كله كان علي دايرة إيتشيجة .. وده كان لسبب وجيه وهو أنهم ح يبقوا العمود الأساسي اللي ح تتبني عليه أحداث الفصل الثاني 

في الفصل التاني أنتقلنا لمجتمع الأرواح وعالم الشينيغامي .. وبدأنا نعرف تفاصيل أكتر عن حياتهم ونظامهم وبنيتهم الإجتماعية ثم تقسيمة السيرتي قلب هذا المجتمع وقوي كل واحد من القادة بتوعه .. وده كله برضو كان إعداد للفصل اللي بعد كدة .. المعركة المحورية اللي ح يبقي فيها حسم ومواجهة مباشرة ما بين الخير وقوي الشر اللي بنعرفها بوضوح في نهاية الفصل ... حتي ده باين في أكتر من معركة من معارك الفصل اللي كتير منها ما شوفناش كل تفاصيلها او أكتفت بإستعراض مقتضب لقوي كل شخصية .. لمحة كدة لكن التفصيل سايبينه لبعد كدة

وده يمكن يرد علي كلام بعض الناس علي أن فصل "الأرانكارو" كان تكرار لنفس تيمات فصل السيرتي .. هي الفكرة أن المؤلف ح يعمل تفصيل بعد إجمال .. فأدي صورة مجملة في الفصلين الأولانيين ثم فصلها بإستفاضة بعدين ... طيب كانت أيه هي التيمات بتاعة الفصلين؟

الفصل الأول كان واخد طريقة رحلة إستكشاف الذات والعالم .. البطل اللي بيعاني من أزمات مختلفة بتحصله حادثة بتغير حياته نهائياً وبتخيله يواجهه أزماته ومخاوفه ويعيد إستكشاف ذاته .. يمكن عشان كدة كان الشرير الأساسي في الحلقات الأولي الهولو اللي قتل أم إيتشيغو .. كان لازم عند حتة معينة البطل يواجهة مخاوفه وينتصر عليها ولو بشكل رمزي .. وده اللي حصل وقتها .. ولذلك لما البطل وصل للمرحلة دي من النضج بدأت المرحلة اللي بعدها وهي المواجهة مع مجتمع الأرواح

يمكن الفصل التاني ده فكرني بتيمتين مهمين أوي .. واحدة سينمائية والتانية في الشونين أنمي .. السينمائية هي تيمة الأفلام السياسية اللي بتدور في عصر الساموراي واللي أنتشرت في الستينيات بشكل كبير وكانت بتوجه أسهم نقدها للمنظومة الإقطاعية وموروثها الثقافي ونظامها القيمي اللي بيستبيح كرامة وروح البشر من إرساء القواعد والقوانين ... إيتشيغو في رحلة لمجتمع الأرواح مكنش مجرد رايح ينقذ صديقته بل كان رايح يواجه مجتمع الأرواح بتكلسه وجموده العقائدي وجاي يثور ضد تقاليدهم الجوفاء .. حتي هو المؤلف حب يأكد علي الحتة دي فعمل مجتمع الأرواح شكلاً وتفصيلاً متطابق مع مجتمع الساموراي وبيستخدم نفسه أساليبه وتقاليده وحتي لغته

التيمة التانية هي "أرك فريزا" .. ودي تيمة متكررة في مسلسلات شونين كتير بدأها دراجون بول في الأساس .. وهي أن مجموعة الأبطال بيخوضوا رحلة لمواجهة تحدي صعب للغاية .. وهما في الطريقة بيتفرقوا ويتشتتوا ويروح كل واحد منهم في سكة عشان يقابل خصم مختلف في سكته .. وفي نهاية بيجتمع كل الأبطال عشان يواجهوا الخطر الأكبر في النهاية وكانت لايقة علي مسار القصة .. فأحنا بنتدرج لحد ما بيصطدم الخير والشر في النهائية

في رأيي ده واحد من أعظم فصول الشونين علي الإطلاق وأحلي فصل في بيلتش .. بداية قوية وحماسية للغاية لواحد من الأعمال اللي ستخلد للأبد

Demon Slayer: Kimetsu no Yaiba S3

Demon Slayer

S3, Epi 1-11 Finale

من المنصف أن الواحد يعيد النظر في الشئ مرتين .. في حاجات لو خدت فرصة كافية تثبت نفسها بكل نجاح .. زي الموسم ده

حلوة فكرة أن الموسم بدء زيه زي الموسم اللي فات بحلقة خاصة مطولة -تقريباً بمدة حلقتين مع بعض- وكأن المنتج بيحتفل بعودة هذا العمل الفخم الضخم .. بس دي بالنسبة لي شخصياً كان سقطة مش ظريفة .. لأن أحداث بداية الموسم ده مكنتش حماسية ولا مثيرة بالدرجة المطلوبة لدرجة أنها تسببت في أني أجل المسلسل شوية لحد ما تخلص أحداثه خالص وأتفرج عليه مرة واحدة .. وبصراحة القرار مكنش صائب اوي بس كان كويس لأنه أغاني فرصة أحكم علي الموسم كويس وأركز أربط بين التفاصيل وبعضها

الموسم ده عكس الأركات السابقة بيبتدي بداية تقليدية تماماً مفيهاش شى مثير يمكن غير ظهور هاشيرا الحب والضباب .. لكنه بينتهي نهاية مش بس مثيرة وقوية وحماسية .. لا دي كمان مفاجئة كفيلة بانها تغير مسار القصة والدراما تماماً

لحد قبل الحلقة الأخيرة من الموسم ده كنت بأفكر .. هو أيه الغرض الحقيقي من ديمون سلاير؟ .. هل هو مجرد صراع ما بين البشر وأكلي لحوم البشر ولا فيه غرض تاني؟

الحقيقة الحلقة الأخيرة خدت القصة لحتة تانية خالص .. يعني لغاية قبل الحلقة كان الصراع ما بين الشياطين بزعامة موزان وأعوانه من الأقمار وبين البشر بقيادة محاربين الشياطين .. وكان صراع كلاسيكي اوي ما بين الخير والشر وصراع علي البقاء .. لكن بعد التطور الأخير اللي حصل في نهاية الأحداث وبعد ما موزان حكي قصته وظهرت دوافعه بشكل واضح للجميع فالمحور الأساسي للقصة أتغير تماماً

القصة دلوقتي بقت ما بين موزان اللي بيسعي للخلود حتي لو علي محي البشرية كلها عن بكرة أبيها .. وبين قاتلي الشياطين اللي دلوقتي مهمتهم أتطورت وبقتومش مجرد القضاء علي الأقمار والوصول لموزان بل أضيف إليها كمان مهمة حماية نيزكو اللي بقت دلوقتي أهم شخصية في القصة كلها

كمان النهاية فجرت عدد لانهائي من الأسئلة حولين أصل نيزكو وتانجيرو والقوي بتاعتهم دي جت منين وايه علاقتهم الرجل اللي بيشوفه تانجيرو في المنام؟! .. وليه هي تحديداً وصلت للدرجة دي من التطور؟

أسئلة كتير في إنتظار الإجابة عليها في الموسم الجديد اللي أتمني يجي بسرعة وما يتأخرش لحد السنة الجاية

طبعاً بدون شك المسلسل عمال يعلي كل مدي في حتة الرسم والتحريك بس هي الحاجة الوحيدة اللي بايخة في الحتة دي إستخدام السي جي أي المفرط في رسم الشياطين .. فكرني بشكل ماببا في هجوم العمالقة .. كنت اتمني أنهم ما يقعوش  في الحتة دي .. بس ملحوقة

الشخصيتين بتوع هاشيرا الضباب والحب لطاف جداً .. حتي لايقين علي بعض .. فيهم كدة وداعة وطيبة غير طبيعية .. طبعاً لازم تخش حتو صوابي كدة في القصة بتاعتهم باينة طبعاً في قصة هاشيرا الحب لكن تمام يعمي مش مضرة .. خلي النسوان تفرح

الفكرة الأتنين دول مكنتش منتظر منهم كتير علي مستوي القوة لكن أبهروني اوي .. وأبهرتني أكتر النهاية وأن علي عكس الفصول اللي فاتت مش لازم كل مرة قتلة الشياطين هما اللي يدفعوا الثمن الباهظ

عشان كدة انا بأعتبر الأرك ده أهم جزء في القصة ونقطة تحول محورية غيرت شكل الحدوتة كلها

لأنه قلب الموازين كلها وقدم كم كبير وجديد من المعلومات والمفاجئات اللي غيرت نظرة المشاهد للموضوع كله .. يعني مثلاً شخصية جينيا مهمة جداً بالنسبة للقصة لأنها بتطرح حاجة جديدة وهي أن نيزكو مش الشخصية الوحيدة اللي عندها جزء شيطاني لكن مع ذلك هي عندها قدرات وقوي في البداية اعتقدت انها متعلقة بكونها شيطانة لكن مع ظهور جينيا اتضح لي انها مسألة منفصلة تماماً ومتعلقه أكتر بجذورها هي

الفصل ده مدته قصيرة لكن تفاصيله كتير وكل تفصيلة عايزة حكاية لوحدها

لكن خليني أقول المجمل .. كان موسم للتاريخ 

Demon Slayer: Kimetsu no Yaiba S2, P2

Demon Slayer

S2, Epi 18 “Finale”

وأنا بأشوف الحلقة الأخيرة من الموسم جت في ذهني فكرة كدة ملازماني من الموسم الأول مروراً بالفيلم .. وهي أن اللي كاتب المانجا دي حد ضرب غطس في قاع المجتمع وتاريخه المنسي وطلع منه حكاوي وقصص وأحداث حقيقة وصاغها في قالب فانتازي جميل للغاية

عوالم البغاء في اليابان دايماً كانت بيئة ثرية وخصبة لكل ما هو إجرامي وغير إنساني وشاذ .. وكانت علي الجانب الأخر كنز لا يفني للمتأملين والمبدعين والمحللين من كل الجوانب سواء الجمالية أو الإنسانية أو الإجتماعية ..  ناس زي ميزوجوتشي وأكيو جيسوجي وكاواباتا وميشيما وغيرهم طلعوا من قلبها حكاوي وقصص إنسانية للغاية وتحمل من الخصوبة الدرامية والفلسفة ما لا يتخيله حتي المتلقي والمتعاطي

كان حالة من الإرتياب كدة بالذات في شريحة أباء وأمهات النشئ من متابعي المسلسل حولين الأرك ده والموضوع والبيئة اللي بيتناولها وكونها ممكن تنتاول محتوي لا يتناسب مع ذويهم .. بس للأمانة المسلسل لعب اللعبة بصياعة كبيرة الحقيقة .. أحداث المسلسل دارت داخل المنطقة الحمراء ووسط بيوت البغاء وبيئة بنات الهوي لكن الحقيقة المسلسل مكنش فيه محتوي خارج خالص تقريباً .. هو تناول الحياة دي من الناحية الإجتماعية والإنسانية وبروز أوي الجانب المأساوي فيها وجسده كأن هذا التجمع وهذا المجتمع قدر قذر علي نار مستعرة من المأساة والويلات الإنسانية

بالنسبة لي كمتابع لكلاسيكيات السينما اليابانية يمكن المواضيع والقصص اللي تناولها الجزء ده مكنتش غريبة .. زي ما أشرت سابقاً السينما اليابانية وأبرزها تجربة ميزوجوتشي تناولت عالم البغاء كتير وتناولت جانبه المأساوي في العديد من أعمالها .. هنا كمان المسلسل بالغ شوية في المأساة وربطها بأحداثه وفلسفته

قتلة الشياطين فلسفته الأساسية قائمة علي الصراع من جانب ما بين الخير والشر ومن جانب أخر الدعوي للتعايش مع الأخر المختلف ومن جانب ثالث بيركز وبيتناول مدي ضعف البشر وصراعهم من أجل تجاوزهم وضعهم وضعفهم .. طبعاً ما أقدرش أفصل الفكرة التانية عن تريند "الصوابية السياسية" بالذات أنه تأثيره بقوة في المانجا اللي صدرت أخر 10 سنين بل والمسألة كانت مباشرة في بعض الأعمال زي اللي ظهرت فيها بعض العلاقات المثلية بالشكل الحديث المنتشر حالياً .. ما علينا يعني .. الفكرة أن فكرة تقبل الأخر والتعايش معاه بقت حاضرة بقوة في الأعمال الحديثة وبقي تبنيها واخد الشكل والفلسفة الغربية أكتر من الأشكال والتكونيات الثقافية القديمة اللي برزت وظهرت في أعمال سابقة في مطلع الألفية زي ناروتو كمثال

نرجع لمرجوعنا ... المسلسل لما تناول مجتمع بنات الهوي زي ما قولنا تناولها من جانب إنساني مأساوي .. بشر في غاية الضعف الأقدار رمتهم في السكة الموحشة دي .. لكنه بنظرته اللي بتحض علي التعايش نظرلهم بعين الشفقة والرحمة وتقبلهم كبشر ألقت بهم الظروف إلي هذا المصير .. من ناحية تانية لما جينا للشياطين وقصة الشرير الأساسي في الجزء ده تعامل معاه أيضاً بشكل إنساني لأنه كان ضحية للنبذ والظروف الصعبة .. حتي هو عقد مقارنة كدة ذكية ولعب لعبة حداثية شوية بأنه حط الشياطن ده وأخته علي أنهم المصير البديل أو المقابل لمصير البطل تانجيرو وأخته نيزكو لو كانوا أختار أي طريق سوي طريق الخير والتعايش والصراع من أجل تجاوز ضعفهم وظروفهم ومحاول السعي للأفضل .. كانت لعبة صايعة أوي الصراحة وعجبتني

الموسم ده كيفني أوي الصراحة .. رسومات أيه وتحريك أيه وشخصيات أيه وتطور شخصيات وأحداث أيه .. في رأيي أقوي بمراحل من الموسم الأول ومركز أكتر في صراعه ومعركته أكتر منه ونتائجه مهمة للغاية مش بس لأحداث المسلسل بل لشعبية المسلسل نفسه ومستواه الفني

وفي إنتظار الموسم القادم

Demon Slayer: Kimetsu no Yaiba S2, P1

Demon Slayer

S2, Epi 1

زي ما في أستدويو بيطفي العمل .. في أستوديو بينوروا .. وزي ما فيه صانع ممكن يعمل أسطورة من عمل متوسط أو مش أقوي حاجة .. ممكن صانع يخسف بأسطورة الأرض

في الشهور اللي فاتت أطلعت علي مانجا "ديمون سلاير" وخضت معاها تجربة لطيفة سأعود إليها قريباً إن شاء الله لإستكمالها .. مانجا جميلة وأحداثها مثيرة .. لكن للأمانة مش أقوي رسم ومش أقوي أحداث 

يمكن قولت الكلام ده عن الموسم الأول بأكرره دلوقتي .. ديمون سلاير مثال لكيف تصنع من عمل عادي أو جيد علي أقصي تقدير تحفة ومنتج مثير وجذاب .. والأنجح أنك تخليه علي قمة هرم المشاهدات والمتابعة والبوكس أوفيس زي ما حصل مع الفيلم اللي برضو مكنش أقوي شئ بس كان تجربة جميلة أنا شخصياً شوفته بتاع 4 مرات مثلاً وعندي أستعداد أني اشوفه كمان 10 مرات ومش عايز أقول أنا ح أنتظر الحلقات الجاية بشغف كبير قد أيه

الفضل الأكبر في صناعة هذة التحفة يرجع لطقم التحريك والرسم والإخراج .. فعلاً الناس دي بتقوم بمجهود خرافي .. الصورة بتنطق والتحريك وصناعة الكادر يمكن من أقوي ما صُنع في أخر 10 أو 20 سنة علي الاقل .. ده جانب .. الجانب الأخر المهم جداً هو أن وراء هذا العمل منتج ومخطط ذكي بيعرف يستغل أي فرصة عشان يضع العمل ده فوق القمة ويخليه متصدر للتريند

نقطة أن المسلسل يبدأ بحلقة عن "رينجوكو" هذة الشخصية اللي أكتسبت شعبية كبيرة علي مدار الشهور الماضية وبقت من رموز الأنمي حالياً في هذا الجيل نقطة ذكية للغاية .. إستثمار عبقري لنجاح الفيلم وكمان نوع من المصالحة للجمهور بعد الإعلان عن أن أول 7 حلقات مسلسل ح يبقوا إعادة إنتاح لأحداث الفيلم .. الحلقة دي أولاً وعد بأن مستوي الرسم والتحريك زي ما هو بل وأفضل .. ثانياً أن الحلقات مش ح تبقي إعادة وخلاص لا ح يبقي فيه إضافات تدي للمسلسل خصوصية وكأنه تجربة جديدة .. ثالثاً الحلقات ح تبقي تكريم للفيلم والطاقم بتاعه علي النجاح الباهر اللي حققه

الحلقة الصراحة ممتازة ومربوطة بشكل حلو وجميل أوي بأحداث الفيلم ثم أحداث المانجا اللي جاية بعد الفصل ده

المسلسل ده مبهج بشكل كبير .. أنا بأبقي سعيد وأنا بأشوفه

***

Epi 2-7

حلو والله أننا نعيش هذة الأحداث العظمية مرات ومرات وبنفس الجودة .. لازالت نهاية هذا الفصل مؤلمة وتفطر القلب رغم أني باشوفها للمرة الرابعة او الخامسة مثلاً .. بس بأحب أرجعلها تاني

والقادم أفضل ❤❤❤

Demon Slayer: Kimetsu no Yaiba - Mugen Train (Movie 2020)

Demon Slayer: Kimetsu no Yaiba the Movie: Mugen Train 2020

نادراً ما بأتفرج علي حاجة مرتين .. يمكن دي عادة أستلهمتها من مقابلة قرأتها زمان بداية ما أهتميت بالكتابة والسينما العالمية أتعملت مع وودي ألن .. كان بيقول أنا عمري ما رجعت وأتفرجت علي فيلم عملته قبل كدة .. الفيلم بأشوفه مرة واحدة وشكراً علي كدة وبأخش في المشروع اللي بعده .. الحكاية قصيرة ولذلك يجب إستغلال كل دقيقة فيها

كنت أتفرجت علي الفيلم ده أول مرة في منتصف رمضان وكنت مستعجل والجو حوليا مش مساعد بشكل جيد علي التركيز فقولت ح أتفرج عليه تاني بدون ضغوط أو تشتيت .. عشان أستمتع بيه أكتر وأقدر أبص له نظرة أعمق .. وقد كان

طبعاً ناس كتير شافت الفيلم بناء علي التريند اللي داير حوليه واللي ح يعلي أوي من أسهم الموسم التاني في رأيي .. وده شئ جميل وإيجابي للغاية في رأيي .. التجربة دي لازم ما تفوتش حد بيحب الأنمي أو السينما بشكل عام .. حتي لو ما شافش الموسم الأول من المسلسل فأشطة مش ح يبقي فيه مشكلة وح يستمتع في رأيي

السبب الأول لنجاح الفيلم في رأيي بالشكل الكبير ده هو النجاح الكاسح للموسم الأول .. قولت ده قبل كدة وبأكرره تاني يمكن يكون ديمون سلاير مش أقوي قصة ولا أكثرها جاذبية بس الأنمي معمول بشكل يخليك تنبهر .. بالذات الرسم والتحريك والمعارك .. عالم تاني خالص في رأيي ح ياخد فن الأنمي لحتة جديدة في المستقبل القريب

السبب الثاني وهو الأهم في رأيي أن صناع ديمون سلاير عملوا اصيع حركة ممكن تحصل في تاريخ المانجا والأنمي .. وهو أنهم عملوا فيلم من أحداث المانجا ومؤثرة في أحداث المسلسل .. بحيث أنك لو ما أتفرجتش علي الفيلم ودخلت علي الموسم الجديد ح يبقي فايتك كتير .. أصلاً الفيلم يعتبر أرك من أركات القصة وبتتقدم في شخصيات جديدة وبيتم التركيز فيه علي شخصيات أتقدمت قبل كدة زي "رينغوكو" اللي يعتبر البطل الحقيقي للفيلم .. لذلك علي الأقل هما ضمنوا أن المتابعين ح يتفرجوا عليه .. بس اللي كان مفاجأة أن الفيلم جذب شرايح جديدة جاية تشوف أيه ده .. وده شئ عظيم

السبب الثالث هو إستغلال غياب الكبار عن ساحة السينما بالذات في العرض خارج اليابان وشوق الناس للعودة لدور العرض ... غياب ديزني-مارفل عن موسم 2020 بفعل الكروونا فضي الساحة تماماً أمام منافسينها .. وده شئ أستغله صناع الفيلم لصالحهم .. يعني المنافس الأول للفيلم في الدور الأمريكية كان "مورتال كومبات" ومكنش بالقوة المطلوبة لذلك أكتسحه بسهولة .. الإنتصار في مــعــركــة الشباك الأمريكي دي دخلت الفيلم التاريخ وح تخليه يعيش لأجيال بعد أجيال

الأسباب الفنية في رأيي كتير جداً .. اولاً الفيلم لأنه أرك مش قصة صغيرة فكان دسم جداً وملئ بالأحداث والتفاصيل والمراحل اللي كلاً منها أعلي من التانية .. اقواهم في رأيي الأخيرة اللي ظهر فيها القمر الثالث الأعلي  .. معركته مع رينغوكو من أفضل معارك الأنمي اللي شوفتها .. ويمكن هي نموذج واضح لمدي إبداع الفيلم .. المعارك معتمدة مش بس علي جودة التحريك ولا الأكشن السريع .. في عامل أهم فيها وهو المفاجأة والتويست .. كل ما تعتقد ان الأزمة أتحلت والمعركة أنتهت الموضوع بيتعقد وبيتصعد أكتر وأكتر .. وكل معركة نتيجتها أوعر من اللي قبلها .. بحيث بتتجاوز توقعاتك ... ثانياً جودة الرسم اللي ما خيبتش ظن محبي المسلسل الحقيقة .. ثالثاً والأهم في رأيي أنه ما أنتهاش نهاية تقليدية ومهد مرحلة قوية جاية .. في المرحلة دي الأبطال بيكتشفوا مدي محدودية قوتهم في مقابل الشياطين .. وده في رأيي دافع مثالي للقصة إلي جانب الرغبة في الإنتقام بكل تأكيد

يمكن في المرة الأولي أنبهرت بدراما الفيلم واللحظات المؤثرة فيه .. لكن في المرة التانية ده محصلش .. معنديش تفسير حقيقي لده .. بس في رأيي ده لا يقلل من دور الدراما في الفيلم

بصراحة .. تجربة مميزة للغاية