Attack on Titan
S4, Epi 14
كان في مناقشة دارت بيني وبين صديق وزميل عزيز حولين الحلقات من بعد الهجوم علي "مارلي" وهو كان رأيه أن الحلقات ابتدت تبقي مش قد كدة والسبب الأساسي فده هو غياب الأكشن وطغيان الدراما .. ولو أني بأختلف مع الرأي ده بس بأحترمه وأضعه في عين الإعتبار لأن ببساطة يا شباب ده مسلسل "شونين أكشن" .. يعني المنتظر منه وسبب متابعه كل هذة الجموع والملايين هو الأكشن .. فغيابه شئ مش طبيعي
وبناء عليه نقدر نقول أن الحلقة دي "ريمونتادا" وعودة للمسار المنشود وتعتبر حلقة نموذجية أوي .. طيب ليه؟
الحلقة تقريباً فيها كل حاجة .. فيها دراما العنيفة اللي بتلمس المشاعر والتويستات والمفاجئات غير المتوقعة والأكشن الملحمي والفلاش باك الرايق وتفسير بعض الحاجات اللي كانت غامضة والشخصيات الثانوية خدت مساحتها وحقها زيها زي الشخصيات الرئيسية .. فعلاً حلقة تدرس
التسلسل الأول هو اللقاء الأول منذ برهة اللي جمع بين الشخصيات الرئيسية الثلاثة إيرين وأرمين وميكاسا .. ويمكن أهمية الإجتماع ده أنه بيربط شظايا الأحداث والتطورات والمعلومات اللي عماله تترمي يمين وشمال من ساعة الرجوع من هجمة مارلي علي طريقة سرد "هجوم العمالقة" المفضلة اللي عمرها ما بتديك معلومة كاملة واضحة علي بعضها .. وكذلك برضو أنت بتشوف فيها كنا فين ووصلنا لفين .. الأطفال اللي شوفناهم في أول حلقة بيحلموا ينطلقوا خارج الأسوار بقوا كبار وخرجوا فعلاً لكنهم تحولوا إلي شخوص مختلفة تعج بالألام والجراح نتيجة التجارب القاسية اللي مروا بيها
مخلص الجلسة كان توضيح مدي التطور اللي حصل لإيرين وترسيخ لفكرة تحوله إلي وحش .. ثم إيضاح بعض الحقائق حولين عالم العمالقة وكل ما يرتبط به .. يمكن أهمية الحلقة مش تبان دلوقتي .. ح تظهر الوضوح التام لنوايا وخطة إيرين .. لكن خلينا نكتفي باللي وضح لحد الأن في إنتظار ما سيكون .. يمكن أكبر عيب للمسلسل حالياً أنك تحس أن أرمين وميكاسا ما تطوروش .. يمكن أتغيروا شوية لكن مفيش تطور حقيقي حصلهم .. وحتي لما ح يبان عليهم التطور ح يكون ده قرب نهاية المسلسل .. كنت أتمني ده يتم بدري شوية
التسلسل التاني هو معركة زيك وليفاي .. والله كل مشهد بيجمع ما بين القامتين دول هو مشهد عبقري .. لدرجة أني بأفكر أجمع مشاهدهم سوا وأحطهم في فيديو عشان أبين مدي عظمة العلاقة بين الأتنين دول .. كمان خطة زيك والمفأجاة اللي ضرب بيها ليفاي و ردة فعل ليفاي والمعركة الملحمية اللي دارت بينهم .. لا فعلاً تسلسل ملحمي وعظيم كنا مشتاقين له الحقيقة .. يمكن حتي أجمل من ما أترسم في المانجا
التسلسل الثالث وهو اللي ما كملش مع الأسف بسبب أحداث زلزال فوكوياما المؤسفة كان مشهد أول قائد أستقبل إيرين وميكاسا وأرمين وهو بيحفز الجنود الجداد .. الزمن أتغير والدنيا أختلفت وأنقلبت رأساً علي عقب .. أول شئ جه في ذهني وأنا بأتفرج مقارنة المشهد ده بمشهد إستقبال الدفعة الجديدة في الموسم الأول .. نظرة الجنود وقتها ونظرة الجنود دلوقتي .. الحماس والروح اللي كانوا عند الأولاد وقتها لما كان بيتم تحفيزهم لقتال العمالقة ما بقوش موجودين عند الجيل الجديد .. التطورات اللي حصلت وعلم الناس بالحقيقة والتشتت اللي دار وحصل للصف خلي المشهد أختلف والوضع أنقلب .. الشبان الجداد مش متحمسين للكلام اللي بيتقال وشايفين أفكار إيرين جذابة أكتر .. لا وكمان الأدهي من كدة أن بعض اللي موجودين مش حابين أساساً فكرة القتال .. خدوا علي الرخاء والسلام وده خلاهم مش متحمسين للفكرة من الأساس .. ما بين زمن الحرب وزمن السلم تباين كبير جداً
العد التنازلي بدأ والإنفجار الكبير قرب .. مستمرون
تعليقات
إرسال تعليق