Dragon Ball: Original
4- Red Ribbon Army Saga: Epi 29-67 Finale “No Fillers”
5- Fortuneteller Baba Saga: Epi 68-82 Finale “No Fillers”
الفصل الأطول في الموسم الأول واللي كانت تجربته مميزة بالنسبة لي لأن نص الفصل تقريباً مكنتش شوفته قبل كدة
إستكمالاً لنهج السخرية والتأثر بالثقافة الرائجة والتهكم عليها اللي ماشي معانا علي طول الخط من بداية السلسلة .. بيعمل المسلسل قطيعة مؤقته تيمة القتال والمعارك اللي كانت محور الفصل السابق وبيرجع تاني لتمية المغامرة والرحلة المحفوفة بالمخاطر .. والمبرر الدرامي كان سهل أوي "البطل عايز يستعيد الكرة الدراجون بول اللي سبهاله جده" .. وبناء عليه بيخوض رحلة للبحث عن الكرات .. لكن ده ما بيكونش دافع كافي فبيزق المؤلف قصة الطفل أوبا ووالدة اللي بيقتل دفاعاً عن جوكو عشان تدي دافع حقيقي لجوكو لإستكمال رحلة البحث وتديها بعد درامي وإنساني .. ولكن .. ولكن .. ولكن
المسلسل في الفصل بتاع "قوات الشريط الأحمر" –بالمناسبة ده كان سخرية من الإتحاد السوفيتي- خد شكل وطريقة افلام أنديانا جونز وجيمس بوند في الترحال حول العالم وإقتحام الأماكن شديدة الخطورة ومواجهة القوي العظمي للشر في سبيل تحقيق العدالة وخلافه .. بس في رأيي المتواضع الجزء ده من أقل وأسوأ أجزاء سلسلة دراجون بول بأجزاءها الأربعة .. لعدة أسباب
أولاً الجزء كان كبير جداً ويا ريته مليان أحداث لا كان مليان مط .. يعني في رأيي هو كان بالكتير يتعمل في 20 حلقة لكن كونه يمتد لما يقارب الـ 40 حلقة فده كان شئ يعل الصراحة بالذات أن وقت كتير كان بيضيع في المط والأحداث البطيئة بدون مبرر واللي تصيبك بالملل .. وده ياخدنا لثانياً
للأسف إرتكاز القصة كان علي الرحلة والتحديات اللي فيها .. ومعظمها كانت تحديات عادية ومفيهاش أي شئ جذاب .. حتي الشخصيات اللي واجها جوكو طول الفصل مفيهاش شخصية واحدة تشد رغم أن بعضها كان ظريف الحقيقة .. لكن أنت بعد فصل البطولة متوقع أن الأخطار اللي تواجه جوكو التحديات تبقي عبارة عن شخصيات تفوقه في القوي أو تحديات تدفعه للتطور .. لكن أنت قعدت حوالي 30 حلقة علي ما قبلت شخصية شكلت تحدي حقيقي للبطل وأديته دفعة للتطور .. عشان كدة الجزء بتاع "طاو باي باي" كان أجمل جزء في الفصل وفعلاً حسيت أنه بيحمل روح دراجون بول .. السحر والأسطورة والقتال والتحديات والدراما وحتي الكوميديا الساخرة اللذيذة .. لكن كل القادة والشخصيات اللي واجها قبله كانت فعلاُ بلا أي أثر في ذهني .. يمكن الجزء بتاع برج الجنرال وايت كان لطيف .. لكن مثلاُ الجزء بتاع الجنرال بلو كان فعلاً تقيل بشكل لا يطاق
ثالثاً أحد أسباب الملل كان أنك عارف طول الوقت أن جوكو ح ينتصر بطريقة ما ومفيش خطر عليه ولا علي مهمته .. ولذلك لما ظهر تحدي حط مصيره ومصير مهمته علي المحك أبتديت أتحمس تاني للفصل ... ويمكن ده عيب ح يمتد مع دراجون بول لحد الفصل الأخير في السلسلة وورثته للشونين من بعدها وهي أن القصة في لحظة ما بتقع في فخ أنها تبقي متوقعة ومفيهاش مفاجئات مدوية .. ولذلك السلسلة عند أكتر من منعطف بتكسر القاعدة دي وبتتفوق علي نفسها في أنها تنوع في النهايات لكن بترجع في الأخر لفكرة ان الخير يجب أن ينتصر لكن بطرق مختلفة ومبتكرة
الفصل اللي بعده ألطف منه كتير .. برضو كان فيه حبة مط لكن في حدود المعقول ثم كان ماشي بإندفاع جميل في سكة عودة دراجون بول لأجواءه اللي أكتشفت أنها السبب الأساسي في إنجذابي ليه .. الأجواء الأسطورية والقتالية وأن تغوص أكتر في عالم الفانتازيا بتاعة المسلسل اللي مليان إحالات وتأثرات من الميثيولجيا والثقافات الشعبية المختلفة
يمكن وجبة الدراما في الفصل ده كان أعلي وأجمل وبلورت الجانب الإنساني في السلسلة .. قيمة الصداقة ومفاهيم التضحية والوفاء والنقاء والإخلاص والتعاون .. قيم نبيلة وجميلة ح تظل السلسلة تحملها للنهاية
في المجمل الفصلين كانوا لطاف لكن يمكن فعلاً الشريط الأحمر كان تقيل علي قلبي شوية بالذات في الجزء اللي في نص بس نهايته كان ظريفة وفصل العرافة كان جميل جداً
مستمرون
تعليقات
إرسال تعليق