Vinland Saga
S1, Epi 1-24 Finale
صدف غير منتظمة وغير مقصودة هي اللي أخرت متابعتي للمسلسل ده وقت صدوره .. مرة الملف بتاع الأنمي يتحذف بالغلط ومرة والنت يحصل فيه مشاكل .. المهم صدفة سعيدة خلتني أخد المسلسل بجودة محترمة من صديق وزميل عزيز يعني وأستغل وقتي في متابعة هذا العمل الملحمي
بكل صراحة وأريحية أقدر أقول أن ده أقوي وأعظم عمل نزل في الموجة الجديدة بتاعة أعمال العقد الثاني من الألفية .. مجموعة الأعمال اللي صدوره بدأ من 2019 لحد يومنا هذا .. ولو أستمر علي هذا المنوال ونفس الوتيرة وبقي يتذاع بإنتظام كل سنة أو سنة نص .. في ظني ح يزيح من قدامه كل الأعمال التانية اللي واخدة التريند دلوقتي زي جوجوتسو كايسن وديمون سلاير .. حتي الأعمال بتاعة العقد السابق زي ماي هيرو أكاديميا
فعلاً .. هل هو يستحق كل ده؟ .. أه وأكتر من كدة كمان
أنا شخصياً ما تابعتش مسلسل "فايكنيج" لكن عندي ولع بالحقبة دي في تاريخ أوروبا .. عصر ما بعد أفول نجم الإمبراطورية الرومانية وما قبل الحملات الصليبية .. نشأة بقي الممالك الكبري في إنجلترا والألمانيا والدول الإسكندنافية والصراع ما بين الأعراق المختلفة وحروب المسيحيين مع الوثنيين من فايكينج وغال وغيرهم ممن كانوا بيسموا بالبرابرة
الحقبة دي ثرية أوي ويمكن السينما ركزت عليها أحياناً بس مش بنفس القدر بتاع فترات تانية .. بس هل المسلسل جاي يحكي تاريخ؟ .. لا .. الموضوع أبعد من كدة
القصة بتبتدي من أهدي مكان في العام إيسلاندا .. بنراقب عن قرب نشأة الطفل "ثورفين" بطل القصة .. عالمه البسيط الصغير وظروف نشأته مع اب من المحاربين السابقين وأسرة حاضنة ودافئة للغاية .. في لحظة كل ده بيتقلب وبيتحول للنقيض تماماً .. اللحظة اللي ثورفين بيقرر فيها يخرج برة بيئتة الحاضنة الدافئة ويركب السفينة ويخوض مع ابوه رحلة مكنش يعرف أنها ح تبقي أقسي درس ح ياخده في حياته
بأفكر دايماً في حكاية ثورفين دي علي أنها منسوجة نفس تمية ونسق قصة الخلق .. الخطيئة اللي بتخرج الإنسان من الجنة وتلقي به إلي جحيم الحياة علي الأرض .. اللحظة اللي خرج فيها البطل من قريته وركب السفينة هي اللحظة اللي غيرت حياته للأبد .. اللحظة اللي بدأ فيها الدرس القاسي اللي خلاه يستوعب مدي قسوة ووحشية هذا العالم وأزاي أن مش كل اللي بنحلم بيه هو حقيقة أو شرط نوصله وأن أحياناً يجب علي الإنسان أنه يتنازل عشان يقدر يكمل ... في كل حلقة كنا بنشوف كادر ثابت لملامح ثورفين وإنفعالاته عن قرب .. بنراقب شكله وهو بيتغير وملامحه وهي بتكبر بتتطور مع المواقف والعقبات اللي بيقابلها وأزاي تحول هذا الطفل السعيد إلي هذا الوحش
بس هل القصة بتقف عند ده بس؟ لا
خروج ثورفين من القرية كان بمثابة فتح الباب علي مصراعيه لمعرفة ما يدور في العالم .. بنبتدي نشوف صراعات الممالك والدول علي السيطرة والحكم والغنائم وطبيعة البشر وتقلبات الحياة .. ويمكن تقلبات الحياة دي أكتر مسألة عجبتني في المسلسل .. كل حلقة بتويست شكل والمسألة ما بتمشيش بشكل منتظم مستقيم أبداً من أول حلقة لحد النهاية .. كل حلقة بمفاجأة وكل مفاجأة بصدمة
الجمال الحقيقي للمسلسل هو بناءه الدرامي .. هو مش أحسن رسم ولا أقوي معارك .. بس هو دراما مركبة متعددة الطبقات .. من برة تشوفها دراما تاريخية سياسية عن حقبة مهمة في التاريخ القديم .. تتعمق شوية تشوفها دراما نفسية فلسفية عن الوجود والبشر وطبيعتهم وطموحاتهم وصراعتهم .. تتعمق شوية كمان تلاقي فيها التيمات المعروفة والمحبوبة في الأنمي وواخدة الستايل بتاع مسلسلات الأكشن .. تتعمق أكتر تلاقي شخصيات بتتغير وبتتطور بتأثر في بعضها بشكل ديناميكي
حقيقي مسلسل عبقري ونهاية الموسم الأول كانت صادمة بس جميلة أوي مخلياني منتظر الموسم الثاني بشغف
#Anime
تعليقات
إرسال تعليق