Fist of the North Star
S1, Ch1 (Shin Arc)’ Epi 1-22 "No fillers", Finale
تفاعلاً مع الأجواء الأبوكاليبسية التي تعصف بعالمنا المعاصر قررت التعمق أكثر في المجال وخوض تجربة غالية مؤجلة منذ سنين .. قبضة النجم الشمالي .. درة الأعمال أبوكاليبسية في عالم الأنمي
طبعاً الرسم قديم والحبكة والدراما بتمشي علي مهلها ولسة الحالة كمجمل في طور التكوين لذلك بلاش نحكم عليها دلوقتي
لكن الشئ اللي عايز أشيد بيه هو الأكشن والمعارك والجو العام للحلقات اللي بيدور علي خلفية الدمار الشامل .. دول يمكن أميز نقطتين في الحلقات الأولي واللي مخليني عايز اكمل وأشوف أكتر إلي جانب طبعاً بعض الإثارة المرتبطة بماضي البطل "كينشيرو" نفسه وجذوره وأصل قوته الجبارة
-.-.-
في أواسط القرن العشرين ظهر كدة توجه في الأدبيات المستقبلية سواء في السينما أو الأدب وأنتقل بعد كدة لفن الرسوم المتحركة كان بيطرح سؤال فلسفي كبير ومحوري مبني علي فكرة كانت بتعامل كأنها ثابت مقدس .. السؤال كان "ماذا بعد الدمار الشامل؟" وهو سؤال مبني علي فكرة أعتبرت حقيقة مطلقة وهي "أن البشرية في خطر والدمار الشامل قادم لا محالة"
السؤال والفكرة كانوا أصداء ما بعد الحرب العالمية التانية ما تلاها من معارك متفرقة في كوريا وفيتنام وحتي في الشرق الأوسط .. منظر القنبلة الذرية وهي بتساوي مدن بالأرض ورعب الحروب ومنظر الدماء لم يفارق خيال المبدعين علي مر السنين فجاء هذا التوجه كردة فعل علي هذة الهيستريا وكصرخة في وجه البشرية وهوسها المجنون بالدمار
طبعاً مش ح أقدر ألم بكل الأشكال اللي طرح فيها التوجه ده نفسه بس ح أكتفي بالإشارة لشكل واحد هو اللي يهمني هنا وهي الأدبيات اللي بتتناول شكل الكوكب وحياة الناس عليها بعد الدمار الشامل والكارثة النووية واللي دايماً بتبتدي بأن حادثة نووية ما حدثت دمرت كل أشكال الحضارة نجي منها عدد قليل من البشر بيتصارعوا علي الموارد المحدودة اللي بين إيديهم مما يدخل البشرية في مرحلة من البربرية الحاكم فيها هو قانون القوة
علي التيمة دي أتبنت سلسلة "ماد ماكس"
اللي أقتبس منها بعد كدة سلسلة "قبضة النجم الشمالي" .. السلسلة بنت الثمانينيات أستلهمت شكلها من أكتر من حاجة منها ماد ماكس ومنها أجواء أفلام الويسترن والسباجتي وطبعاً وأساسي أفلام الكونغ فو وتحديداً أعمال بروس لي .. التشابة ما بين بروس لي و كينشيرو واضح للغاية وباين التأثر علي شكل المعارك وأسلوب السلسلة كلها إلي جانب التأثر بشكل أفلام الأكشن الهوليودية وقتها والأفلام الرياضية زي سلسلة "روكي"
اللي بنشوف تأثيرها واضح في القصة وفي حتي في تصميم شكل البطل نفسه اللي مرسوم مفتول العضلات ووسيم علي الطريقة الهوليودية ومتصمم علي أنه رجل خارق لا يقهر
مش عاوز أطول في الكلام وح أجل بعض النقط بوستات بعد كدة بس حابب أعبر عن إستمتاعي بالسلسلة وفكرتها المحورية وهي النفس البشرية وصراعها من اجل البقاء وأزاي أن الحاجة علي قد ما بتظهر أسوأ ما في البشر علي قد ما قد تظهر أنبل ما فيهم
مستمتعين ومكملين
تعليقات
إرسال تعليق