Vinland Saga
S2, Epi 1-24 End
بأحب أنا أوي أي عمل ما بأكونش عارف عنه أي معلومات أو ما حرقتش لنفسي أي حاجة عنه عشان أقدر أستمتع بالتجربة كما يجب أن يكون .. ويزداد هذا الحب إذا ما كان العمل يحمل في جعبته كل ما هو غير متوقع .. كما حدث هنا
الموسم الأول كان يجع بالدراما الحربية وجو القرون الوسطي بتاع المحاربين وأوجاع الحروب والغزوات والغنائم وسفك الدماء علي صليل السيوف وصدي الأرمحة .. وده خلي بعض الناس ما تنتبهش لما وراء هذة الصورة المليئة بالأكشن من رسالة إنسانية ودراما تدور حول رحلة الإنسان في لإكتشاف قيمة الحياة .. وده خلي بعض الناس برضو تتصدم شوية من طبيعة الموسم التاني .. حيث طغت الدراما علي المشهد تماماً
العلاقة ما بين الموسم الأول والتاني أشبه بالعلاقة ما بين المخاض أو ألالام الولادة وفرحة خروج المولود إلي النور .. لولا هذا لما جاء ذاك .. زي ما بيقول المثل مفيش حلاوة من غير نار .. وده حقيقي لو لم يختبر ثورفين بطل القصة مرارة الفقدان ولون الدماء ثم عذابات العبودية لما ولد من جديد كإنسان طاهر في نهاية الموسم الثاني
ويمكن هنا مش ح أقدر أغفل حاجة مهما حيال القصة وحيال الثقافة اليابانية عامة وهو مدي تأثير البوذية فيها تحديداً في حتة رحلة الإنسان في الحياة بمراحلها ورحلة المرء نحو الإستنارة .. من طفل لقاتل لعبد لمحرر .. من النقيض للنقيض في رحلة مليئة بالألام .. برضو مش ح أغفل مدي تأثر الفصل ده من القصة بالمسيحية أوي أوي أوي .. لدرجة أن الرجل لما حب يوضحلنا أن ثورفين أتغير رسمه شبه المسيح نفسه .. هي كانت حتة زيادة حبة بس تمام يعني
فكرة الخلاص والمثالية المسيحية كانت حاضرة أوي في القصة بالذات في الجزء الأخير منها .. إشارات وخطوط كتير مجتذبة جذب من قصص الكتاب المقدس وتعاليمه .. كانوتي الذي جمع شعب من الهمج ليصنع بهم مملكة يتحدي بها الأرض جمعاء .. قصة أشبه بقصة بني إسرائيل والنبي موسي .. ثورفين الذي يرفض العنف ويريد أن يجمع المغذبين من شتي بقاع الأرض ليرحل بهم نحو أرض الميعاد .. الأرض الجديدة .. سفينة نوح من جانب ومن الجانب الأخر قصة المسيح وملكوت السماء وكذلك قصة بني إسرائيل وأرض الميعاد
كل جزئية في هذة القصة كتبت بعناية وتأني دون السماح بترسب الملل أو التكرار للأحداث .. رغم أن الجزء ده مفيوش أكشن كتير لكنه كان ممتاز جداً .. بعيد عن الرسم والتحريك اللي كان هايل الحقيقة فالقصة كانت عظيمة .. كل شخصية هي حكاية في حد ذاتها وقصة تحكي عذاب مختلف من عذابات البشر .. كيف يحي البشر في هذا العالم مُهلك .. بلا حب .. بلا أمان .. بلا حرية .. بلا قيمة .. والأجمل هو كيفية تكيف كل فرد مع واقعه ونجاته من أهوال وفظائع هذة الحياة
عجبتني رحلة ثورفين رغم أن الحل اللي توصله ما عجبنيش بصراحة وشايفه حالم ومثالي بزيادة .. الفترة اللي قاضاها مع العجوز واللي أتعلم فيها الصيد والزراعة وأكتشف أن فيه حاجات في هذة الحياة غير سفك الدماء والحرب وأعاد إكتشاف قيمة الحالة ككل .. الجزء ده جميل أوي .. تطور كانوتي كان رهيب وفخم .. حابب أشوف ح يوصل لفين .. من ولد مدلل لمحارب يريد تنصيب نفسه كإله .. تحول لولبي
رغم ان الجزء مؤلم وأن مفيهوش اي نهايات سعيدة في المطلق لكنه كان بديع .. تحفة يجب أن تقدر
في إنتظار المواسم القادمة
تعليقات
إرسال تعليق