Fist Of The North Star
P1, Ch4 (The RAOH Arc)’ Epi 83-109 "No fillers", End
وأنتهي الموسم الأول من هذا العمل الملحمي علي خير وفي جعبته الكثير والكثير من المتعة والإثارة والدراما المؤثرة والعميقة والقوية والغنية فكرياً وعاطفياً وإنسانياً
من الحاجات اللي كنت أول مرة اخد بالي منها في أخر فصل من الموسم هو بنيان القصة
رغم أن المفروض المسلسل أحداثه بتدور في العصر الحديث بل كمان قد يكون في المستقبل وأحداثه بتبدأ في ذورة التحضر وبتكمل بعد الدمار الشامل .. الا أن المسلسل كبنيان واخد شكل الأدب الأرستقراطي -زي أعمال شكسبير وألكسندر دوماس- المرتكز علي الصراع علي السلطة والمنافسة العاطفية وتحدي القوي والسيطرة والمشبع بروح الفروسية والمنافسة الرجولية الذكورية بين الأنداد علي السلطة أو الثروة أو النساء
لو ركزنا علي أول وأخر فصل في الموسم ح نلاقي أن فيهم مزيج من التيمات الأدبية الشهرية في هذا الأدب .. فح نلاقي الصراع ما بين كينشيرو وشين وكذلك راؤه واخد شكل "عطيلي" مرتكز علي المنافسة علي قلب إمراة اللي هي يوريا .. وفي ناحية تانية هو "ماكبثي" بينتزع فيه الطرف الشرير شئ مش من حقه وبيعاني بعد كدة من تداعيات هذة الخطوة .. في حالة شين فهو خطف حبيبة صديقه ودفع ثمن ده بعد كدة نفسياً قبل أن يكون فعلياً .. وكذلك راؤه اللي حاول ينتزع مكانه في وراثة قبضة النجم الشمالي وكذلك إنتزاع حبيبته ودفع ثمن الخطوتين ... أما من ناحية كينشيرو فالمسألة خدت شكل مزيج من "هاملت" و"الكونت دو مونت كريستو " .. فكانت رحلته في الإساس الدافع وراءها هو الإنتقام .. لكنها عند نقطة معينة بتطور بتاخد منحي أكبر شوية وهو الدفاع عن المستضعفين والوقوف في وجة الظلم .. وهو الشئ اللي بيحوله لأسطورة ومنقذ للعصر في عيون الناس .. ودي أيضاً من التيمات الكلاسيكية واللي ممتدة إلي الأدب الأغريقي والأساطير القديمة
فعلاً المسلسل زي ما قولنا قبل كدة متأثر وواخد من مشارب كتير ومن ثقافات متعددة قديمة وحديثة ... لكن اللي بيميزه أنه فضل محتفظ بهامش كبير من الأصالة .. فعلي الرغم من تأثراته بالأدب والتيمات الأجنبية الا أنه كان بيحمل قيم ومبادئ مستمدة من الثقافة اليابانية وتراثها زي الشرف والتضحية والموت في سبيل المعاني السامية ... وهو الشئ اللي يخليني أشوف المسلسل كعمل بيحمل روح أعمال الساموراي لكن في ثوب عصري
الفصل الأخير كان ملحمي الحقيقة .. رغم أنه عاني من بعض المط وضبابية الرؤية في البداية لكن ده شئ ممكن أغرفه شخصياً لأنه كان تمهيد جيد لأحداثه قوية للغاية ومثيرة ومفاجئات مدوية تتالت قرب النهاية
لو بصينا للمسلسل من وجهة نظر مغايرة ح نلاقي أنه كان عبارة عن رحلة "راؤه" لإكتشاف ذاته ومعني الحياة والإنسانية .. راؤه نشئ في ظروف قاسية للغاية ورسم لنفسه طريق لا مكان فيه للمشاعر ولا العواطف وخلي هدفه الوحيد هو القوة والسيطرة .. ونجح في ده بشكل كبير ووصل لأنه أصبح بيحكم العالم تقريباً .. لكنه ظل طوال الوقت حاسس بأن في شئ ناقصه وأن سيطرته مش كاملة .. في الأول اعتقد ان اللي ناقصه هو القضاء علي منافسينه زي توكي وكينشيرو .. لكنه مع الوقت ومع التقدم في الرحلة بيكتشف أن الشئ اللي ناقصه والي ما قدرش يحوزه أبداً هو الحب .. وده كان بداية لرحلة معذبة ومرهقة وصل في نهايتها لحقيقة أن القوة مش كل حاجة وان الإنسان بلا مشاعر هو إنسان ميت في ثوب الأحياء .. وأن أكتر ناس كان معتقد أنهم أعداءه كانوا في الحقيقة أكتر ناس بتحبه وتحترمه وبيعتبروه شئ مهم في حياتهم
في النهاية أقدر أقول أن "قبضة النجم الشمالي" من أهم الأعمال اللي شوفتها في عالم الأنمي .. رغم قدمه وعيوبه لكنه عمل متقن ومصنوع بدقة شديدة ومؤسس لعالم الشونين وأثر في كتير من الأعمال اللي جت بعده
لسة في موسم تاني .. الحكاية مخلصتش .. إلي الأمام
تعليقات
إرسال تعليق