Dragon Ball: Original
3- 21st Tenkaichi Budokai Saga: Epi 19-28 Finale
زي ما قولت قبل كدة .. أحد الحاجات الأساسية اللي مبني عليها دراجون بول هو السخرية والتهكم علي الثقافة العامة والمواد الإعلامية .. تحديداً سينما الأكشن وبالذات بالذات أفلام الفنون القتالية .. الفصل د بيوضح ويؤكد اللي كنت بأقوله قبل كدة .. لكن الموضوع كمان واخد مدي أبعد .. خلينا نشوف
فيلم "دخول التنين" لبورس لي إنتاج 1973 كان من الأفلام اللي بروزت فكرة وتيمة "بطولات الفنون القتالية" كقالب درامي جاهز تقدر تقدم عبرة جرعة دراما وإثارة حلوة وجرعة أكشن مكثفة وكبيرة ومنطقية مش مجرد تكسير وضرب والسلام .. وهي التيمة اللي خدتها كتير من أفلام الأكشن بعد كدة زي كيك بوكسر كمثال وألعاب زي تيكن، مورتال كومبات، ستريت فايتر، كينج أوف فايتر، فيترال فايتر وغيرها وغيرها وغيرها .. حتي أفلام زي سلسلة روكي خدت بعد كدة فكرة أن المنافسة القتالية تبقي المحور الأساسي للقصة وبنت عليها السلسلة
هنا المسلسل خد التيمة وأبتدي يتناولها بشكل ساخر .. أولاً شال منها الحتة بتاعة أن البطولة عملها شخص شرير لأغراض شريرة وخلاها حاجة أقرب كدة لمونديال قتالي .. ثانياً الشكل الأصلي للتيمة المنافسات فيه كلها قتالية جادة وعنيفة للغاية وده اللي حصل عكسه تماماً في المسلسل فالقتال رغم أنه كان شيق ومثير بس لم يخلوا من الكوميديا والمواقف الطريفة والأساليب الغريبة في إخضاع الخصم وقتاله .. اشهرهم مباراة كيرلين وباكتريان اللي كانت قائمة علي مين يقرف التاني أكتر .. أخيراً طبعاً نهاية البطولة ومسيرة بطل القصة فيها .. الغرض من البطولة دي كانت تطوير شخصية البطل وأنك تبين مدي اللي وصلتله واللي ممكن توصله في المستقبل وده اللي حصل وح يبان أكتر في الفصول الجاية .. وده ياخدنا لحتة مهمة جداً
اللي شاف دراجون بول قبل كدة يعرف قد أيه الفصل ده اثر علي مسار القصة وأدها دفعة للأمام تقريباً مستمرة لحد الأن .. فهو خرج من حيز المغامرات والسخرية الصرفة لتيمة المنافسة والقتالات وتطوير مهارات سواء الأبطال أو الاشرار والتحديات اللي بتزداد صعوبة كل مدي ... التيمة دي ح تاخد مساحة أكبر مع نهاية المسلسل وبعد كدة في زد وسوبر ح تبقي هي التيمة الأساسية بل الوحيدة أحياناً
طيب هل التأثير وقف لحد هنا؟ .. لا .. الفصل ده كان بداية لتيمة تقريباً بقت مسيطرة علي كل أنمي الشونين من وقتها في منتصف الثمانينيات لحد وقت كتابتي للكلام ده في 2020 والمستقبل كمان .. أي أنمي شونين أكشن لازم تلاقي فيه مسابقة قتالية إقصائية بتتلقي فيها أهم شخصيات المسلسل سواء أبطال أو أشرار أو أبطال-مضادين
المسابقة دي موجودة تقريباً في 90% من أنيمات الشونين من الثمانينيات لحد دلوقتي .. في سانت سيا، يويو هاكاشو، هانتر، ناروتو، ماي هيرو أكاديميا، فياري تيل، بلاك كلوفر، يوجي يو، بوكيمون وغيره وغيره .. ولو مش موجودة تيمة المنافسة واللقاء المنتظر بين غريمين أو البطل وأكبر شرير ومنافس بيبقي موجود بس من غير مسابقة ... والسبب في تكرارها ووجودها بكل بساطة أنها بتبقي فرصة سهلة ومنطقية لإستعراض مدي تطور الشخصيات وأعطاءهم دفعات للأمام وعمل مواجهات أحلام بين الشخصيات المميزة في المسلسل وبعضها .. علي رأي حتي اليوتيوبرز الأجانب بتبقي فرصة لإنقاذ نسب المشاهدة بتاعة كل مسلسل
كان فضل ممتع أوي والأمتع أنه بداية لفصول أخري مشابهة .. مستمرون
تعليقات
إرسال تعليق