Dragon Ball: Original
6- 22nd Tenkaichi Budokai Saga: Epi 83-101 Finale “No Fillers”
قولنا قبل كدة أن الجزء من دراجون بول سن سنة سارت عليها فيما بعد كل سلاسل الشونين حتي يومنا هذا وقد يكون إلي الأبد وهي "البطولة القتالية" وأتكلمنا عن فايدتها الدرامية والأقتصادية اللي نقدر نلخصها في الأتي: "زيادة نسب المشاهدة، تسليط الضوء بشكل أكبر علي الجوانب المختلفة لكل شخصية، طرح شخصيات وتحديات جديدة للأبطال، صنع مواجهات مباشرة بين الشخصيات لإظهار مدي تطورها، إستخدام المعارك لتمرير بعض التحولات الجذرية للشخصيات الرئيسية"
في الجزء ده التيمة دي أتكررت مش مرة ولا أتنين لا دي أتكررت 4 مرات فيهم مرة كانت الفصل التاني ومرة في الفصل الأخير والمرة تانية في الفصل الخامس ومرة ثالثة هي اللي ح نتكلم عليها هنا وهي الأطار اللي بتدور فيه أحداث الفصل السادس من القصة
في سردية كدة بتتكرر بالتوازي مع تيمة البطولة وهي (رحلة/مغامرة –بطولة وبينهم تدريب) .. بمعني قبل أي فصل في بطولة لازم تكون في رحلة أو مغامرة شاقة الأبطال لاقوا فيها تحديات صعبة ونجوا بأعجوبة ثم يعقبها فصل بطولة وبينهم أو خلال البطولة لازم يكون فيه فصل فيه تدريب لتطوير مهارات الأبطال ... مثلاً في "هانتر×هانتر" قبل فصل البطولة كان في أرك أختبار الصيادين وبينهم كان في الأرك بتاع إنقاذ كيلوا من أهله والتدريب علي إستخدام "النين" .. في "ناروتو" قبل البطولة كان الرحلة بتاعة زابوزا وإختبار التشونين بتاع الغابة وبين التدريب اللي قابل فيه ناروتو المعلم "جيرايا" .. في "اكاديمية الأبطال" البطولة جت بعد هجوم الأشرار في نهاية الموسم الأول وأختبار الأكاديمية وكان فيه تدريب في النص .. وهكذا
وده ليه سبب .. الرحلة أو المغامرة بتكون تجربة كاشفة للبطل .. بتوريه أنه لازال الطريق قصاده طويل حتي يصل للـ"كمال" وبتبرز قدامه عيوبه .. وعادة بتكون دافع ليه لأنه يطور مهاراته ويصقلها عشان يوصل لمستوي أعلي .. وده بيكون دور أرك التدريب اللي عادة بيكون قصير .. ثم تأتي البطولة اللي بتكون فرصة لإظهار مدي تطور الشخصيات من جانب وحلقة فاصلة في مسيرة بعضها من جانب أخر وفرصة لمكاشفة الذات ومراجعتها في حالة وجود أي عيوب أو أخطاء من جانب أخر
هنا ده حصل بالظبط .. وللأمانة لو حابين نقول أن في شكل مثالي لأرك البطولة ففرأيي المتواضع ح يكون الأرك ده أرك البطولة النموذجي .. الفصل بيجي بعض فصلين شاقين للغاية الأبطال خاضوا فيهم مغامرات في غاية الخطورة وطوروا من نفسهم كتير أثناء وما بين الفصول وبعضها ... في بداية الفصل بنقابل "تيهايشين" و"تشوزو" ومعلمهم اللي بشكل مباشر كدة بيطرحوا نفسهم كأشرار لهذا الفصل والخطر اللي بيداهم أبطالنا بناء علي عداء قديم بين معلمهم والمعلم روشي وثأر شخصي بينهم وبين جوكو بيكتشفوه بالصدفة
البطولة بتبتدي "تين" بيثبت نفسه كقوة لا تقهر وخطر كبير .. في المقابل "جوكو" بيفاجئ الجميع كالعادة بمدي التطور اللي وصله لدرجة بتبهر الشرير نفسه لتبني عداء متأني وهادئ بينهم بيتصاعد حتي يصل إلي ذروته في النهاية .. لحد ما بتحصل المواجهة الخطيرة والمرتقبة بينهم واللي بيحصل معاها شئ كان إبتكار وقتها لكنه بعد كدة برضو أصبح تيمة بتتكرر علي طول
لو حد شاف مباراة "ميدوريا" و"تودوروكي" في "أكاديمية الأبطال" ح ياخد باله بمدي تأثرها بالفصل ده أوي .. هنا المباراة أو البطولة مش جاية بس عشان تزود المشاهدة وتخلق تحدي جديد للبطل بل كمان تبين جانب مهم فيه بيدعم قيمة مهمة في الشونين وهي "القدرة علي التغيير" .. الإنتصار الحقيقي في الفصل هو أنك بتكسب حليف جديد وصديق بتنقله من جانب الشر للخير .. وهو ده اللي حصل مع تين ثم مع تودوروكي بعدها بـ30 سنة .. وبناء عليه إنتصار البطل في المباراة أو البطولة من عدمه بيبقي مش مهم لأنه كدة كدة أنتصر في المعركة الأكبر والأهم وهي معركة الخير .. المعركة المحورية للمسلسل وللنوع ده عامة
ده يودينا للي بعد كدة .. طيب ليه؟ .. عادة بيجي الأرك اللي بياخد السردية دي قبل معركة كبيرة بين الخير والشر .. والأبطال بيحتاجوا فيها لحلفاء أقوياء .. فبيبقي ده عادة تقديم جيد لهؤلاء الحلفاء .. وده اللي حصل هنا .. لأن الفصل اللي بعده ح يتقدم فيه الشرير الأضخم والأكبر في المسلسل "كينج بيكولو"
كمان حسيت أنه هنا حب يكافئ المشاهدين علي صبرهم معاه في الفصل الطويل اللي سبقه ويقدملهم وجبة كانت لذيذة ودسمة الصراحة .. فعلاً الفصل ده من أحلي فصول دراجون بول عامة .. يتحط جنب فصل فريزا والسايانز والبطولة الكونية ... وشخصية تين بصراحة أتقدمت فيه بأجمل وأفضل ما يجب .. للأسف هو بعد كدة حقه ح يتهضم في "زد" ودي من عيوب السلسلة الحقيقة .. بس عزاءي أنه أترد له جزء من إعتباره بعد كدة في "سوبر"
مستمرون
تعليقات
إرسال تعليق