Fist Of The North Star
P1, Ch2 (The Hokuto legacy arc)' Epi 23-57 "No fillers", Finale
ضرب نار .. ضرب نار .. ضرب نار .. موسم أشبه بالأنفجار .. عنف لا محدود وتشويق ليس له مثيل وإثارة ومتعة من أول لحظة وحتي أخر لقطة
علي عكس الفصل اللي فات هنا القصة ما خدتش وقت طويل علي ما أنتقلت من الصراعات العادية للصراعات الأساسية والتحديات الكبري والأهم وده كان مهم جداً عشان المشاهد ما يفصلش أو يشعر بالملل وعشان كان يلاقي إجابة وافية علي أهم سؤال غالبا بيدور في ذهنه بعد نهاية الفصل الأول .. وهو "أيه اللي كين ح يعمله بعد ما طوي صفحة شين ويوريا؟" ... أكبر أزمة بتواجه أي عمل قائم ولو بشكل جزئي علي تمية الإنتقام أنه ممكن يوصل لحارة سد بعد إنتهاء موضوع الإنتقام نفسه لأنه بكدة الشخصية الرئيسية بتفقد دافعها الأساسي وكمان القصة نفسها ما بيبقاش ليها معني .. لكن ده فخ القصة هنا تفادته بذكاء تام
أولاً الفصل الأول أنتهي بمأساة كبيرة لم تتم فيها عملية الإنتقام كما يجب والبطل لم يصل إلي السعادة وده كان قرار ذكي أوي من الكاتب لأنه بالطريقة دي فتح سكة لأستكمال القصة .. فاحنا دلوقتي أمام بطل مكسور القلب عنده فجوة كبيرة محتاج يملاها .. ثانياً تطور الشخصية كان ليه عامل مهم في فتح باب لإستكمال القصة .. كين في بداية القصة كان غاضب وباحث عن الإنتقام الا أنه مع الوقت نمي بداخله مفهوم العدالة وهو عنصر محوري أدي لتحول جذري في شخصيته وحتي تطور كبير في مهاراته فهو أصبح ما بيفكرش بمشاعره علي قد ما هو بيفكر بعقله وحس ووزاعه القيمي .. ثالثاً البناء الفريد لعالم القصة واللي بيغرق في بحر من اليأس يخلي حتي إنتصار أو إنتقام شئ لا قيمة له في وسط هذة الفوضي والبربرية التامة والدمار الشامل
بيبدأ الفصل التاني بداية ذكية جداً عبر تقديم منافس قوي لكين وهو ريي اللي بينتمي لمدرسة النجم الجنوبي المنافس التقليدي لمدرسة النجم الشمالي اللي بينتمي لها كين .. منافسة كانت ضرورية أوي لزيادة الإثارة في القصة وعمل حالة من الإثارة والتوازن بحيث ما يبقاش كين هو بس اللي بيضرب ويهاجم والقصة مش بتاعته لوحده .. كمان خلفية ريي أثرت الفصل درامياً سواء عبر الخط الدرامي بتاعه أخته أو منافسته مع غريمه يودا أو مشاعره وعواطفه .. فعلاً هو في أوقات كتير كان بيبقي شخصية محورية أو دافع للأحداث للأمام ... لكن ده مكنش طول الوقت لأن الكاتب لم يغفل فكرة أن كين هو بطل القصة وشخصيتها المحورية ولذلك أداله المساحة الأكبر نسبياً وتعمق أكتر في شخصيته وخلفيته اللي طلع منها أقوي قصص وصراعات الفصل .. ودي النقطة الأخطر في رأيي في هذا الفصل
الموضوع الرئيسي للفصل ده هو قضبة النجم الشمالي وورثتها والتراث اللي خلفته وراها ثم يجي بعديه قبضة النجم الجنوبي والتعريف بقصتها تمهيداً للفصول القادمة ... المسلسل سردياً مشي علي طريقة سباق التتابع فأحنا في خط ملئ بالأشرار وكل واحد منهم بيسلمنا للتاني وكل تحدي بيجي بعده اللي أقوي منه لحد ما بنصل لذروتين مهمتين .. أولهم "رأؤه" الشرير الأقوي علي الإطلاق الساعي لحكم العالم وتنصيب نفسه كإله وثانيهم "يودا" غريم ريي واللي بيفتح باب لعالم النجم الجنوبي ... في السكة لكل واحد فيهم بنواجه عدد من الأشرار الشرسين والشخصيات المهمة .. مش كل الأشرار شكلوا خطورة كبيرة علي أبطالنا علي قد ما مهدوا لشخصيات أكبر وأهم .. من أهم الشخصيات اللي جت بعد تمهيد طويل شوية كان "جاجي" أخو كين الحقود والشرير اللي بيكرهه وبيتمني القضاء عليه .. ثم "توكي" الأخ الثاني لكين المسالم والطيب واللي وجوده ح يكون له أهميه في مسيرة كين اللي أصبح حامي ومنقذ لهذا العالم المدمر
أخر نقطتين حابب أتكلم فيهم هي القصة اللي رغم كل هذة الإثارة والتشويق لازال فيها بعض السذاجة شوية .. لكنها مغفورة في رأيي في مقابل المجهود الخرافي المبذول في الرسم وأيضاً كم الحماس والمتعة اللي فيها .. ثانياً في الفصل ده لو حد لاحظ مدي الشبه بين المسلسل وسلسلة "مغامرات جوجو" كان كبير جداً وحتي ابتديت اخد بالي من بعض الجوانب والاشكال اللي أستفاد منها أراكي في تصميم شخصيات زي جوتارو وديو .. مش في الشكل بس لا ده كمان في بنية الشخصية وفلسفتها ورؤيتها للعدالة والخير .. وده جانب مهم في المسلسل وهو الفلسفة اللي مبني عليها .. فهو حالة درامية بتعكس أبشع ما في نفوس البشر وأزاي لو الفوضي والحرية بلا قيود ح تؤدي إلي التحوش والبربرية وسيادة الأقوي علي من لا حيلة له
فعلاً فصل في غاية الجمال .. مكملين
تعليقات
إرسال تعليق