Fist Of The North Star
P1, Ch3 (The SOUTHER & RYUUGA Arc)' Epi 58-82 "No fillers", Finale
إستمرار جبار لحالة ضرب النار .. ولكن .. وحط تحت ولكن دي خطوط كتير
قوة الفصل ده الأساسية بتكمن في أنه مبني علي أساس كويس لأنه ببساطة إمتداد درامي لخطوط اللي أتسابت مفتوحة في نهاية الفصل اللي قبله .. خط قبضة النجم الجنوبي وورثة هذا الفن القتالي اللي عرفنا منهم تلاتة ، خط الصراع ما بين ورثة قبضة النجم الشمالي اللي خدوا هدنة إستعداداً للمواجهة ما بينهم فيما بعد ، خط تطور كينشيرو سواء علي مستوي الأسلوب والقتال أو علي مستوي الشخصية كخطوة للأمام نحو تتويجه كمنقذ لهذا القرن بل العالم .. ده إلي جانب الخطوط الأساسية المستمرة من البداية زي مأساة هذا العالم ورحلة كينشيرو وصراعه مع القدر اللي بتتضح تفاصيله كل مدي
القصة بتتقدم للامام بتدفع في بداية الفصل بخط "قبضة النجم الجنوبي" للواجهة في صراع درامي شيق ومثير ما بين أتنين من ورثة هذا الفن وهما ثاوسر و شو اللي في جزء منه بيوضح أكتر طبيعة هذا الفن وكل أسلوب مه أساليبه وفي ناحية تانية صراع كلاسيكي ما بين الخير والشر وصراع قيمي ما بين الرغبة في السيطرة والقوة والحب والرغبة في نشر السلام والنرة المتفائلة للمستقبل .. و دي يمكن من النقط اللي بأحبها أوي في المسلسل ده وفي الشونين بشكل عام اللي يعتبر هو واحد من أعماله المؤسسة لجمالياته وبنيته الفنية .. أنت علي عكس الكارتون الكلاسيكي مش مجرد صراع ساذج ما بين الخير والشر أو حتي أحداث مسلية لا أنت بتشوف شخصيات من لحم ودم ليه جوانب متعددة وكل شخصية ليها فلسفتها ونظرتها الخاصة في الحياة بتطرحها علي ذهنك وبتترك الحكم ليك مع إحتفاظ الصانع بحقه في طرح رؤيته عبر الأحداث .. طول المسلسل أنت بتشوف شخصيات متعددة الأبعاد فيها جوانب تتعاطف معاها وجوانب ممكن ما تعجبكش وجوانب تصنع جدل جواك وتخليك تتأمل الشخصية والفكرة اللي بتحملها
الجانب الأهم بقي من كل ده أننا بنشوف جانب من كين غاب تقريباً من بداية القصة وهو أنه قوي لكن ليس الأقوي وما بيعتمدش بشكل كلي علي قوته بل بيستخدم عقله وقدرته علي التحليل من أجل إيجاد وسيلة للإنتصار .. ده غير أنه ممكن يهزم عادي وممكن يتأثر ويبكي وممكن يستفز لدرجة الغضب العارم زي ما ح يحصل في نهاية الفصل .. في الفصل ده الصانع بيأكد أكتر وأكتر علي طبيعة كين كرجل طبيعي لكنه بيحمل قوة وحزن دفين بيحاول يخليه دافع ليه للأمام لتحقيق العدالة والخير .. لكن في نفس الوقت لم يغفل سردية الرجل الخارق اللي هي المحور الأساسي في بناء شخصيته فهو أه إنسان وليه نقاط ولحظات ضعف ومش ملم بكل حاجة ولازال بيتعلم .. لكنه عنده قدرة علي العودة ومواجهة ضعفه وتجاوز ألامه مش موجودة عند كتير حتي من أقرانه وده بيتضح أوي في نهاية الفصل
طبعاً يجدر الإشارة في الجزء ده للتأثر الكبير بالتراث المسيحي بالذات قصة حياة المسيح في بناء الشخصيتين الأساسيتين ثاوسر و شو وإستلهام حتي رحلة الألام وبعض المشاهد منها ضمن الأحداث .. كان إستلهام ذكي جداً بالذات في فصل مبني حولين فكرة الحب ومناقشته من وجهات نظر مختلفة ومتباينة
بتستمر القصة وبنرجع تاني للصراع بين ورثة قبضة النجم الشمالي واللي كانت ثرية درامياً .. أولاً غنية بالمفاجئات والتويساتات الجامدة أوي والغير متوقعة وثانياً فيها مواجهات ومعارك كانت منتظرة كتير وثالثاً بترجعنا أكتر لجذور الصراع بين الشخصيات الثلاثة كينشيرو و راؤه وتوكي واللي بنكتشف أنه ليه جذور أعمق من قصة من يبقي وريث هذا الفن القتالي وأنه واخد كمان منحني شخصي .. يمكن ده أشار له توكي في حتة سابقة لكن الفصل ده جذر له أكتر
الشئ اللي معجبنيش شوية في الجزء ده أن الدراما وبناء جت علي حساب الأكشن ففي معركتين كدة واحدة منهم كانت مطلسقة لأسباب درامية والتانية كانت محتاجة عنف أزيد من كدة في رأيي .. اقصد مواجهة راؤه وتوكي اللي تعتبر من اعظم معارك المسلسل في رأيي ... في نقطة تانية بقي ودي ممتدة من بداية القصة وللأسف بيقع فيها كتير من صناع مانجا الشونين .. وهي أنك بتبقي باني قصة بشكل بسيط نوعاً ما في البداية وبعدين تتوسع فيه مع تقدم القصة بالذات لو السلسلة حققت نجاح كبير .. خلينا نضرب مثال حي أكتر .. في رأيي تيتسو هارا وبرونسون لما جم يكتبو القصة في البداية كان في دماغهم يدوب أنها قصة عن عالم عايش في الدمار الشامل بطلها ميكس بين بروس لي وأبطال افلام سيرجو ليوني بيحقق العدالة وعنده بعض المشاكل الشخصية والعداوات .. قصة بقي النجم الجنوبي والأساليب والحواديت دي كلها مكنتش في ذهنهم ولا نضجت غير لما القصة نجحت نجاح باهر ولما هما تعمقوا فيها أكتر وقرروا أنها تبقي سلسلة طويلة .. طيب فين المشكلة وفين الدليل علي كلامي؟
الدليل أن بعض الشخصيات والخطوط مكنش فيه ليها أي إشارة ولا ذكر في البداية وبعدين نبتت فجأة كدة بدون سابق إنذار .. كمان في نقطة خطيرة تبين ده أوي وهي كين في مواقف كتير ما بيبقاش عنده خلفية عن بعض الصراعات أو المعلومات اللي المفروض أنها بديهية بالنسبة لواحد زيه وريث لقبضة النجم الشمالي وخبير بالفنون القتالية .. زي أنه في لحظة حسيت أنه مكنش عنده أي معلومات عن الورثة الستة للنجم الجنوبي وبعض المعلومات الأخري اللي بيجيلي إنطباع وأنا بأتفرج أنه ما بيبقاش عارف عنها حاجة بينما هو المفروض يبقي علي دراية بيها .. لذلك وجود شخصية توكي في الفصل ده والسابق كان مهم أوي لسد الثغرات ودي ولتبرير عدم معرفة كين بالمسائل بأنه لسة بيتعلم وبعيد شوية عن مرحلة الكمال لو جاز التعبير
عادي .. دي "بلوت هولز" أو فجوات درامية من العادي أنها تبقي موجودة في الأعمال الطويلة وحتي بقت دراجة في ثقافة الشونين خلاص .. حتي أنا أتعودت خلاص علي المسألة دي هنا بالذات وبأرجعها لعامل الزمن وأن برضو وقتها كان لسة الأنمي والمانجا بيعاملوا علي أنهم للأطفال والمراهقين وفي نفس الوقت هو منتج تجاري فمش مطلوب أنه يبقي بناءه صلب ومتقن زي أفلام السينما مثلاً
الجزء الأخير في الفصل ده كان مشكلة كبيرة بالنسبة لي .. فعلي قد ما هو ممتع والعدو الأساسي فيه "ريوجا" شخصية فريدة من نوعها وممتعة وكان في إثارة وجدل فكري جميل حولين الخير وكيفية تطبيقه علي أرض الواقع علي قد ما هو فيه مشاكل درامية كتير
أولاً الفصل كان محتاج مساحة أكبر من كدة في الوقت .. ثانياً علي عكس كل الشخصيات اللي قابلنها في قبل كدة ريوجا هو الشخصية الوحيدة اللي ملهاش تمهيد سابق .. بمعني .. في كل الأجزاء السابقة أنت بيكون عندك خلفية الشخصية أو حتي تفصيلة خاصة بيها قبل ظهورها .. يعني قبل ظهور ورثة النجم الجنوبي المشاهد كان عارف أن في أسلوب منافس للنجم الشمالي وبعد كدة عرفت في مرحلة متقدمة أنه ليه ورثة وان القدر بيدفع بكين دايماً في طريقهم لأسباب خاصة بجذور الأساليب ودي أسباب تانية ميتافيزيقية .. كذلك الحال لورثة النجم الشمالي كنا عارفين أن كان في منافسة علي خليفة هذا الأسلوب وأن كين ليه أكتر من أخ .. ولذلك ما أتفاجئناش بيهم أوي لما ظهروا .. علي عكس ريوجا اللي مكنش في لظهوره أي تمهيد وحتي لما حاول يعمله جذر في الماضي بناه علي "بلوت هول" مش عارف أحطها في أي سياق منطقي الحقيقة غير أنه ممكن يوجد لها تفسير في الفصل اللي جاي وأنه وجوده مكنش مهم في حد ذاته علي قد ما هو تمهيد لمفاجأة ح تحصل في الفصل القادم وهو الفصل الأخير في الجزء الأول من القصة عرفتها بالصدفة عن طريق ويكيبيديا ... النقطة الأخيرة خي نهاية الفصل علي قد ما كانت حلوة أوي في جانب علي قد ما كانتش مرضية في الجانب الخاص بنهاية ريوجا ومعركته مع كين .. كانت محتاجة تفاصيل وعنف أكبر من كدة في رأيي
لكن خليني أؤكد علي أنه ممتع زي زيه الفصل كله .. تجربة ضرب نار حقيقي وتمهيد شيق للي ح يحصل بعد كدة .. كدة ملامح المشهد أكتملت وأصبح كين جاهز بشكل كبير للمواجهة الكبري المرتقبة وتوكي أدي دوره علي أكمل وجه وراؤه أصبح هو الأخر في أقصي درجات الإستعداد .. فيا تري أيه اللي ح يحصل؟! .. لنتابع
تعليقات
إرسال تعليق