Dragon Ball: Original
7- King Piccolo Saga: Epi 102-122 Finale
الفصل ده في رأيي هو اكتر فصل ذكي في السلسلة كلها .. وفي رأيي أيضاً كان يستحق يبقي نهاية المسلسل لكن الصانع كان عنده وجهة نظر أبعد وانا بأحترمها الصراحة
خلينا الأول نسأل سؤال مهم .. أيه هو الهدف الأساسي للمسلسل؟ أيه هي الفكرة اللي سلسلة دراجون بول بشكل عام قائمة عليها؟
يمكن مفيش إجابة موحدة ح نتفق عليها حولين المسألة دي .. لكن نقدر نقول أن أهم 3 إجابات ممكن نقابلهم علي السؤال ده هما "قصة تطور وصعود جوكو لمرتبة أقوي محارب في العالم، سخرية من الواقع والثقافة العامة، تجسيد للصراع ما بين الخير والشر" .. ودي الأرضية اللي ح أتكلم بناء عليها
في كل سلسلة قائمة علي ثنائية الخير والشر لازم يكون في شخصية ما عبارة تجسيد للشر الخالص والتام .. الظلام بشكله الحقيقي .. طوال أحداث المسلسل قابلنا أكتر من شخصية شريرة كل واحد فيهم كان عنده مطامع ودوافع معينة للشر .. الطمع والرغبة في تجاوز الضعف والرغبة في السيطرة وغرور القوة .. إلي أخرها من الدوافع ... لكن "كينج بيكولو" مختلف تماماً عن كل السابقين واللاحقين بالمناسبة يمكن عادا الماجين بو .. لكنه في رأيي بيتفوق علي الماجين بو في نقطة مهمة ح نقولها قدام شوية
كينج بيكولو الشر من أجل الشر .. هو مش مجرد شخص قوي عايز سطوة أو بيسعي لحكم العالم .. لا .. حتي هو بنفسه قال سيطرتي علي العالم أمر سهل ومش هي أزمتي ولذلك هو حتي ما طلبش من التنين أنه يخليه ملك أو يسيطر علي العالم .. هو الشر نفسه .. الشيطان .. نقيض الإله وهدفه الحقيقي هو الخراب والدمار وأن الشر يجتاح العالم
قدام بنعرف أن بيكولو هو تجسيد للشر اللي كان جوا "كامي-ساما" اللي بيمثل الإله الحارس للعالم في المسلسل .. وأن "كامي" –كامي بالياباني معناها الإله بالمناسبة- كان عشان يبقي حارس الأرض كان لازم يصفي نفسه ويطرد الشر من قلبه وده اللي نتج عنه ظهور بيكولو .. لذلك حرفياً بيكولو يعتبر إله الشر أو أبليس بتاع السلسلة .. وبناء عليه نقدر نفسر علاقته بالشياطين وإرتباطه بيهم وكذلك الإستراتيجية اللي أستخدمها لمحاربة الخير ونشر الشر سواء في ظهوره الأول أو الثاني .. وده جزء يبين مدي عظمة الكتابة في الفصل ده
أكيرا تورياما طول المسلسل شغال علي الإسقاطات الفلسفية والسياسية .. في الجزء ده بالذات الموضوع كان مكثف وواضح أوي .. أكيرا عايز يقول في الجزء ده فكرة مهمة وهي أن الشر مش مجرد شخص أو مجموعة بل هو فكرة ونوايا وأفعال بيقوم بيها الناس ضد بعضهم البعض .. وأن الشيطان أو تجسيد الشر تحت أي مسمي مش هو الشر الحقيقي زي ما الناس بتدعي بل ما يفعله الناس وما يخفونه من نوايا .. الفوضي اللي حصلت في العالم نتيجة إسقاط بيكولو للعدالة وفتح المجال للمجرمين كانت بإيد الناس مش بإيده هو .. هو مجرد اداهم دفعة مش أكتر وهما قاموا بالباقي
بيكمل تورياما فكرته وبيقول أن الحل الوحيد لمواجهة الشر هو بأن الخيرين يصبحوا أقوياء وقادرين علي الدفاع عن أنفسهم ومن يحبون .. وده تجسد في التطور الكبير اللي حصل لجوكو أثناء الفصل ده .. وده يعتبر من التيمات اللي بقت بتتكرر بعد كدة في الشونين بشكل دائم .. ان الخير لازم يبقي قوي وقوته صمام أمان وسد في مواجهة الشر
لكن ذكاء الفصل كان أبعد من كدة كمان .. فهو بدء أحداثه من نهاية الفصل السابق وربط الأتنين ببعض .. بدء الفصل بصدمة مدوية عشان يدي إنذار وينبه المتلقي أننا علي مشارف مواجهة قوية وخطر داهم .. ودعم ده طول الوقت بالحديث عن ماضي بيكولو وتاريخه .. وإيده أكتر وأكتر بأنه خلاه بيكولو خطر داهم ردعه مسألة شبه مستحيلة
كمان إستخدم الفصل لتطوير الشخصيات اللي ح تبقي عماد القصة فيما بعد سواء الفصل القادم أو أجزاء المسلسل بعد كدة .. بنشوف في الفصل ده رحلة "تين" لتجاوز ماضيه وبناء ذاته من أول وجديد وكمان إمكانياته اللي دايماً بتفاجئنا ... ولكن ... هنا برضو بالتوازي مع تركيز المؤلف علي قوة تين عمل إرهاصة أو إشارة يعني لمصيره فيما بعد في الأجزاء الجاية كشخصية ثانوية للغاية .. وده حصل برضو مع روشي وتشاوزو ويامتشا
أنت في نهاية الفصل بتكتشف حقيقة خطيرة وهي أن الشخصية المحورية في القصة كلها والأكثر تأثيراً واللي من الأخر في إيديها الحل الأمثل لأي أزمة بنكون بصددها هو "جوكو" .. وأن الباقيين كلهم مجرد حشو أو ناس جاية تحرق الوقت عقبال ما البطل المغوار يوصل لأرض المعركة .. وبان أوي في نهاية الفصل ده أن الهوة والفجوة بين جوكو وأقارنه عماله تتسع وعمال يكتسب مهارات ومميزات جديدة بينما الأخرين بيتطوروا بالبطئ وما بيصلوش لدرجته في الإتقان ... ودي أزمة كبيرة أوي أوي أوي في البناء الدرامي لدراجون بول كسلسلة للأسف ورثتها فيما بعد لكل سلاسل الشونين تقريباً .. حتي في دراجون بول سوبر تورياما أظهر ندمه علي النقطة دي في فصل "البطولة الكونية" وأدي كتير من الشخصيات اللي أهدر حقها زمان وضعها وأعاد لهم إعتبارهم كمحاولة لإصلاح الخطأ اللي أرتكبه في الماضي .. بس إصلاح جه متأخر أوي
الشئ الأخير اللي يبين قد ايه الفصل ده ذكي هو أنه قال بشكل واضح وصريح .. المعركة لم تنتهي بعد .. ومهد لظهور شخصية من أعظم شخصيات هذة السلسلة واللي ح يبقي ليها وضعها الخاص فيما بعد .. "بيكولو" .. طيب ده أيه فايدته الدرامية؟
أولاً هو بيفتح باب لتحدي جديد .. ثانياً بيدي رسالة غير مباشرة ان الأخطار لم تنتهي من هذا العالم والصراع بين الخير والشر ح يظل قائم دائماً وأبداً .. ثالثاً أن "كينج بيكولو" مكنش مش هو اخر ولا أقوي تحدي ح يواجهه الأبطال .. رابعأً أن لسة قدام جوكو والأبطال كتيرررر عشان يطوروه وأن كل ده هما لسة ما أكتشفوش ذاتهم بالشكل الكامل ولا العالم من حوليهم بالشكل الحقيقي
باقي علي المسلسل فصل واحد ... مستمرون
تعليقات
إرسال تعليق