Inuyasha - Finale Season

Inuyasha

S6, Epi 139-167 (No Fillers)’ End

وقد وصلت الرحلة إلي المنعطف قبل الأخير ..

أينوياشا سري عليه ما سري علي كثير من السلاسل في الوقت ده –بداية التسعينيات ومطلع الألفية- وهو أن المسلسل توقف سنة 2004 بسبب أنه أبتدي يزاحم المانجا وأحداثهم أبتدت تتقارب .. ولذلك ح نلاقي أن مليان فيلرات من ناحية ومن ناحية تانية لم تستكمل أحداثه الا في سنة 2009 عن طريق أوفا قوامها 26 حلقة .. لم يجي وقتها ح نتكلم عنها بالتفصيل

الفصل ده بصراحة رغم أنه ما ينفعش قفلة لمسلسل الا أنها بيحمل كل مقومات الفصل المثير واللي فيه نقلة درامية واسعة وقوية .. يمكن أكتر شئ زهقني في المواسم اللي فاتت كان فكرة أن الأبطال تطورهم بطئ في الناحية الإنسانية وشبه معدوم علي مستوي القدرات .. وده اللي حصل عكسه تماماً في الموسم ده .. إينوياشا تحديداً .. بطل القصة .. قفز قفزة جيدة علي مستوي القدرات وأصبح أقوي وقادر علي مواجهة التحديات الجديدة .. كذلك كاغومي اللي تطورت نوعاً .. بس التطور الأكبر بالنسبة لها كان علي المستوي الإنساني في علاقتها مع إينوياشا وحبها المعقد ليه

وده ياخدنا للجانب الإنساني اللي أتحرك كتير في الموسم ده ويمكن حتي علي مستوي الشخصيات الشريرة بان أوي عند شخصية زي كاجورا اللي بقت دورها في الصراع أعقد من أنها مجرد شريرة تابعة وخلاص .. ويمكن ده شئ يبين عظمة المسلسل والقصة ككل

يمكن قصة إينوياشا من الحاجات اللي حيرتني كتير .. أولاً هي مش قصة البطل الخارق اللي قادر علي مواجهة كل الصعاب ولا هي قصة صراع تقليدي بيهزم في الخير الشر دائماً .. هي رحلة طويلة أوي في عالم منسوج بإبداع من خامة خطيرة وهي الفلكلور والأساطير اليابانية القديمة تحديداً اللي بتدور حولين الشيـاطيـن والأرواح وخلافه البطل فيها محدود القدرات .. ثم ثانياً القصة تركيزها متوزع ما بين الأبطال والأشرار بشكل يخليك تشك أساساً فمين هو البطل الحقيقي للقصة .. ساعات بأشعر أن "ناركو" هو بطل القصة .. اللص المنبوذ الضعيف اللي رمي نفسه في قلب عالم الشر عشان يتخلص من ضعفه وإنسانيه وظل صراع الأساسي والأمر طوال الوقت صراعه ضد إنسانيته وضد مشاعره .. ساعات بأشعر أنها قصة الجوهرة اللي تعتبر رمز أكتر منها شئ فحد ذاته .. فهي قوة جبارة ممكن تتلوث بالنوايا السيئة وتتطهر بالحسنة

ثالثاً طبيعة المسلسل أصلاً تخليه مختلف شوية رغم أنه مش فريد من نوعه .. فكرة أن كل حلقة ليها قصة وشخصيات جديدة وبتحكي جزء بسيط من الصراع الكبير أينعم أتكررت كتير بس في مسلسل بيسرد بالطريقة اللي وضحتها قبل كدة تخليك عند لحظة معينة متلخبط ومش قادر تجمع رؤية كاملة حولين العمل .. بالذات أن في كل حلقة أو قصة من دول بيطلعلك مفاجأة جديدة وقوي وسحر وشخصيات متداخلة وبتأثر في القصة 

يمكن ده في ناحية يخلي المسلسل ذو تفاصيل كتير وصعب أنك تختصره في قصة بسيطة صغيرة .. بس في ناحية تانية يخلية عمل عظيم .. لأن عالم متكامل بشخصيات حية ومتعددة الجوانب وليها نقاط ضعف وقوة وصراعها جزء من صراعات وأزمات هذا العالم مش كل حاجة فيه ... يمكن بس مسألة المنحي العاطفي اللي واخده المسلسل تخليه لفئة الشبان الصغيرين بس كمجمل العمل يصلح للجميع وهو عمل ثري جداً .. وده بان أوي في الموسم ده

الرسم في الموسم ده كان متقن وعظيم بالذات في التحريك ومشاهد المعارك .. علي ما وصلت لأخر حلقتين شوفت تقريباً أحسن ما قدمته هذة السلسلة .. وكذلك الأحداث اللي كانت عنيفة وسريعة للغاية .. بس برضو لا تصلح كقفلة لمسلسل حتي كقفلة مؤقتة .. ما حستش أني شبعت من القصة لسة .. لذلك إكمال السلسلة مسألة حتمية وواجبة

كمجمل المسلسل ممتع للغاية بصراحة .. تجربة وإن طالت بالنسبة لي وتخللها بعض الملل الا أنها ممتعة وشيقة جداً .. رحلة سنتكملها قريباً إن شاء الله

Inuyasha S5

Inuyasha

S5, Epi 111-138 “No Fillers” Finale

يااااااااه .. من زمن الواحد ما أتكلمش عن أينوياشا وفضلت موقف فرجة ع المسلسل لأسباب مجهولة الحقيقة .. يمكن فهمت بعضها مع العودة للمشاهدة والإستمرار مرة أخري وبعضها كنت فاهمه من الأول –زي أني غاوي دايماً يبقي عندي مسلسل متعلق بدون سبب في قايمة مشاهدتي- وبعضها مش قادر افهمه إلي الأن بالذات أني حبيت الموسم ده بشكل كبير يمكن أكتر من اللي قبله

المهم ... نخش في المفيد

السبب الأساسي اللي خلاني أتوقف وأستوعبته مع الوقت كان جودة الرسم ثم رتم القصة .. مفيش شك أن مع دخول الجرافيكس للأنمي في مطلع الألفية وبداية إستخدامه في الرسم عمل نقلة نوعية في جودة الرسم وقدرته علي التعبير عن الحالة المطروحة ... لكن ده أثر علي جانب تاني وهو روح الرسم

بمعني أن في الرسم اليدوي الخالص كانت مسألة الخطوط الحادة والأشكال اللي فيها ظلامية وتدي نوع من الفخامة الرعب للأجواء والشخصيات بالذات في مسلسل بيدور حولين الكائنات الخرافية زي أينوياشا .. الجرافيك خلي الرسومات شكلها "كيوت" اكتر وللأسف أثر علي جودة الحركة والعنف في المسلسل ونادراً لما بقي فيه مشهد أو معركة بتشد الواحد أو فيها تفاصيل خاصة .. ده أثر بالسلب علي المسلسل ثم علي القصة

في الموسم الرابع القصة دخلت في نفق مظلم .. فلا الأبطال بيطوروا ولا الأحداث بتتحرك للأمام والحالة كلها وقعت في فخ أو مأزق كدة لا مفر منه .. فأنت لا عارف هو الشرير وصل لفين ولا ح يوصلوا له ولا لا .. ولا شايف أي علامة أن الجانب الخير في القصة ح تحصله طفرة تخليه يتجاوز العقبة دي .. ولا كمان التحدي الموجود قصاد الأبطال مخليك متحمس أوي يعني للي جاي .. الصراحة فريق السبعة دول من أبـضـن الأشرار اللي ظهروا في المسلسل علي الأطلاق رغم أن فيهم شخصيتين حبيتهم لكن المجموعة علي بعضها بـضـان الحقيقة

يمكن مكنش فيه غير سيشيمارو هو الوحيد اللي تطوره كشخصية جذبني في الموسم اللي فات .. غير كدة قصة كان رتمها ووضعها لا تحسد عليه ... وهو نقيض تماماً اللي حصل في الموسم الخامس اللي بنتناوله حالياً

الموسم ده واخد تيمة "أرك فريزا" .. وهي تمية مشهورة في عالم الشونين ومتسمية علي أسم أشهر وأقوس أرك في دراجون بول

التيمة دي بتمشي كالأتي .. أنك بيبقي عندك شرير أساسي قوي للغاية بس ما ظهرش من قوته غير قدر بسيط جداً وطول الوقت بتبقي في إشارات أن ما خفي كان أعظم .. في الضفة التانية بيبقي عندك فريق أبطال بيسعي للقضاء عليه .. في الوسط الفريق ده بيتشتت وكل طرف فيه بيخوض رحلة مختلفة .. بس بيبقي الهدف المحوري لكل الرحلات دي هو الوصول للشرير الأقوي والقضاء عليه .. في وسط الرحلة دي كل طرف بيواجه خطر داهم مختلف عادة بيكون حد من معاوني الشرير ... وسط الرحلة برضو كل واحد بيكتشف جزء من اللغز الأكبر وهو طبيعة الشرير واللي بيسهل مهمة القضاء عليه بعد كدة ... في النهاية الفصل بيوصل للحتة اللي الأبطال أو البطل الأساسي بيصل للشرير وتبدأ ما بينهم المعركة الملحمية

دي التيمة اللي مشي عليها الفصل الا أنه في النهاية ما أنتهاش بإنتصار الأخيار بل بتعقد الموقف أكتر تمهيداً للمعركة الأكبر ما بين الخير والشر

عجبتني أوي الطريقة اللي مشي بيها الموسم والبناء الرايق لكل رحلة خاضها الأبطال والأخطار اللي واجهوها .. حتي الأشرار اللي كنت مخنوق منهم تعاطفت معاهم في النهاية والقصة بانت أن وراها فكرة أكبر وهو الصراع ما بين الخير والشر وطبيعتهم .. وأن المسلسل واخد النظرة البوذية للإنسان علي أنه مزيج بين الخير والشر لكن عليه أنه يحاول ما يقعش فريسة للشر تماماً

برضو الشخصيات ما أتطورتش ويبدوا أن أينوياشا قواه مش ح تقفز قفزة نوعية قريب زي ما كنت متوقع علي طريقة السوبر سايان في دراجون بول .. لكن في المقابل العلاقة بين الأشرار والأخيار وحتي بين الأخيار وبعضهم تطورت وتشابكت أكثر وأكثر وده أدي الصراع أبعاد جديدة ودوافع جديدة و زق القصة للأمام بشكل أفضل

مستمرون 

Inuyasha S4

Inuyasha

S4, Epi 83-88' 102-110' Finale (Without Fillers)

كل المسلسلات الطويلة سواء أنمي أو دراما لازم تقع في كام فخ كدة أثناء سير أحداثها أشهرهم فخ توقف تطور الشخصيات لدواعي درامية وده اللي حصل في الموسم الرابع من أينوياشا .. الموسم ده اصلاً فيصل ما بين مرحلتين فيهم واحدة أنتهت الموسم اللي فات وواحدة بدأت في نهاية الموسم ده .. لذلك هو موسم تمهيدي لأحداث وتحديات جديدة فهو في حد ذاته مش مهم علي قد ما التطورات الجديدة اللي بتظهر فيه هي اللي مهمة 

يعني ح نلاحظ أن في كم كبير من الشخصيات الجديدة واللي ماكانتش موجودة قبل كدة ظهرت في الموسم ده وأتفردلها مساحة كويسة في الأحداث .. كمان في عدد من الحقائق وجوانب من القصة كنا أول مرة نعرفها الموسم ده أتفردلها مساحة كويسة .. في المقابل تطور الشخصيات توقف تقريباً بالتزامن مع إختفاء الشرير المحوري للقصة اللي يعتبر محور الأحداث في الموسم ده .. فالموسم كله عبارة عن رحلة بحث لم تنتهي عن مكان الشرير وسر أختفاءه فده عمل حالة تجمد شوية لشخصياتنا الأساسية بالمقارنة بما سبق 

كل ده العوامل دي خلت الموسم شوية مش قوي لكنه لطيف إلي جانب جودة الرسم اللي كان فيها شوية مشاكل رغم أنه كان أبتدي يظهر أثر أستخدام الجرافيكس وتطور تنكيك الرسم نفسه لكن في المقابل الريومات كانت في بعض المشاهد كان سذاجة زي برضة بعض الأحداث والحبكات اللي كانت بتعاني من بعض السذاجة واللامنطقية وفقدان الحماس أحياناً

عامة يعني موسم مش قد كدة في مقابل كذا موسم جيدين مش ح يخلينا نتوقف إلي زائد أن نهاية الموسم كانت حماسية جداً وأدتني أمل في اللي جاي

Inuyasha S3

Inuyasha

S3 , Epi 55-58' 60-67' 69-74' 80-82 Finale (No Fillers)

أينوياشا مسلسل أنمي شبابي أكشن حول مغامرة شيقة ومرعبة ودموية ودرامية ورومانسية ومثيرة في الماضي البعيد وتحديداً العصر الإقطاعي لليابان حيث الحروب والخرافات والعفاريت والفرسان والشياطين والأساطير العابرة للأزمنة

الموسم الأول كان تعريف بالمحور الأساسي للقصة وتعريف بالأبطال الأساسيين للسلسلة وتشابك للخطوط وتقاطع أدي لتجمع الأبطال وتكوينهم لفريق من المحاربين لمحاربة الشر المتمثل في "ناراكو" وتجميع أجزاء الجوهرة الزمردية التي تعطي كم كبير من القوة لمالكها .. الموسم التاني كانت تركيزه منصب علي تطور القصة وظهور شخصيات جديدة علي الجانبين الخير والشرير وبإبراز جوانب جديدة في الأبطال الأساسيين والتركيز علي قوي أينوياشا الخفية وقدراته والتحليق بيها لأفاق جديدة

الموسم الثالث كان درامي أكثر فهو ركز علي جميع الشخصيات الأساسية للمسلسل اللي تراجعت في مقابل تقدم وتصدر شخصية أينوياشا للمشهد في الموسم اللي قبله .. أدي الشخصيات دي مساحات أكبر لأظهار جوانبها المختلفة ومشاعرها وعلاقتها بمحيطها ومكامن قوتها وضعفها .. ده إلي جانب تطوير قوي أينوياشا ودفعها بقوة للأمام التعريف بقدراته الجديدة أكثر ومزاياها وعيوبها .. يمكن هو مخدش نفس مساحة الموسم الماضي لكن فضل -وده الطبيعي- شخصية محورية في جميع الأحداث والأكثر من حيث الدفعة الدرامية والتطور علي مستوي القوي .. لكن للامانة المسلسل لحد الأن ما وقعش في فخ البطل الأوحد اللي كل اللي حوليه مجرد كومبارس زي ما حصل في Naruto في الفصول الأخيرة بالذات و Dragon Ball في بعض فصوله لكن مش كلها للامانة

مكملين

Inuyasha S2

Inuyasha

S2 , Epi 28-54

بعد تعاطي أكثر من 50 حلقة من أينوياشا خدوا من وقت طويل حبتين بلورت فكرة حولين الأنمي بشكل عام والمسلسل ده بشكل خاص والدافع ورا أني أكلمه رغم أن إنطباعي الأولي والمستمر عنه أني لو كنت شفته في سن أصغر من كدة كنت ح أتعلق بيه وأنهبر أكتر من دلوقتي .. يعني ده لو كنت شوفته وأنا في إعدادي أو في ثانوي مثلاً كان خطفني وبقيت منبهر بيه أوي عكس دلوقتي أنا مستمتع وحابب أكمل لكن مش لدرجة أني أنبهر

الأنميات الأكشن علي حسب تسلسل القصة ونوعية الشر اللي بيواجهوا الأبطال بتنقسم لأكثر من نوع بس أهمهم 3 انواع .. نوع الأشرار فيه حقب ومراحل فكل ما بتخلص من شرير بتخش ع اللي بعده اللي أكثر منه ذكاء أو قوي زي دراجون بول و ناروتو غيرهم .. وفي نوع تاني مفيهوش شرير بالمعني التقليدي لكن في حالة خطرة أو غامضة الكل عايشين فيها والقصة كلها عبارة صراع من أجل البقاء وفي الوسط المفاهيم بتتبدل وطيبين بيبقوا أشرار والعكس وهكذا .. دول زي كود جياس وإيفانجليون وهجوم العمالقة غيرهم .. وفي نوع ثالث الشرير فيه شخصية محورية ما بينتهيش غير في نهاية القصة ومستمر وبيتطور وبيبتكر في ألاعيبه وأساليبه جنباً إلي جنب مع الأبطال زي ديث نوت و زي إينوياشا

دي النقطة المحورية اللي مخلياني معجب بالمسلسل وعايز أكمله .. القصة بتتطور والشخصيات كل مدي بتكتشف شئ جديد عن ذاتها وبتطور من قواها وكذلك الشرير .. في البداية أعتقدت أن الشخصيات عند مرحلة معينة ح تفضل ثابتة وعلاقاتها وقدراتها ح تثبت علي كدة .. بس المسلسل تفوق علي ظني الحقيقة ووراني قد أيه هو مسلسل مسلي ومعمول حلو مهتم بتفاصيل كتير دقيقة ممكن أعمال تانية كبيرة ما تهتمش بيها زي العلاقة ما بين شخصياته والجانب الأنساني .. طبعاً هو في مشكلة وهي الرتم البطئ للأحداث والتطور وسذاجة بعض الجوانب والحبكات الدرامية بس مش مشكلة كبيرة يعني أوي بالذات انه مسلسل للمراهقين يعني

موسم قوي .. ومكملين

Inuyasha S1

Inuyasha

S1 , Epi 1-27 Finale

زمان في الأزمنة الغابرة وتحديداً أوائل الألفية .. في عصور ما قبل ظهور ناروتو، بليتش، هجوم العمالقة، مذكرة الموت، أكاديمية الأبطال وأخواتهم كان إنتاج مسلسلات الانمي اليابانية أقل غزارة من الوقت الحالي وده بشكل ما كان منعكس علي جودة المنتوج اللي بيصدر .. بمعني أن عدد قليل بس كلها حاجات تستاهل تتشاف وممتعة بشكل أو بأخر ..أياميها كان النت لسة بيحبي وفكرة ترجمة المنتوجات الأجنبية حتي للأنجليزي ما كنتش منتشرة زي دلوقتي فلما كانت حاجة بتترجم عربي كانت بتبقي عجبة يعني وبتلفت الإنتباه

وقتها كانت الأنميات اللي مسيطرة ع المشهد هي الأتي Detective Conan طبعاً ومعاه مسلسلين تلاتة كمان أذكر منهم Kenshin إلي جانب InuYasaha مع كوكبة أخري من المسلسلات بعضها كانت من كلاسيكيات التسعينيات والثمانينيات

فاكر كويس الشهرة اللي كان واخدها أنيوياشا وقتها وقد أيه وكان مسمع وليه معجبين كتير والناس كانت بتتكلم عنه بشغف خلاني أتمني أني اتابعه يوما حين تأتي الفرصة .. للأسف ظهور وشهرة Naruto وOne Piece تحديداً غطوا علي شهرة المسلسل ده بالذات أنه ما طولش كتير وأنتهي في ٢٠٠٤ .. حتي لما رجع تاني في ٢٠٠٩ مخدش الصدي اللي يستحقه لأنه كان زمنه عدي .. ولحد دلوقتي نادراً ما بألاقي حد بيتكلم عنه غير الناس الرايقة اللي بتدعبس في الكلاسيكيات

أنيوياشا قصة بسيطة ودمها خفيف مرتكزة في الأساس علي الفلكلور الشعبي الياباني والميثيولوجيا المحلية ومعتقدات ديانة الشينتو إلي جانب تاريخ ما قبل العصر الحديث .. بتتكلم عن عالم بيعيش فيه البشر إلي جانب العفاريت أو اليوكاي وبيسطير فيه السحر والشعوذة علي المشهد .. كاجومي طالبة بترجع إلي الماضي عن طريق بئر موجود داخل الضريح اللي بتحرسه عائلتها لتخوض مغامرة شيقة مع أنيوياشا نصف البشر ونصف اليوكاي وكوكبة من الأصدقاء والأعداء الأقوياء

الموسم ده بدايته كانت طفولية وكوميدية شوية وكان فيها حبة سذاجة .. لكن زي ما توقعت الأحداث مع الوقت خدت سكة الجدية وإثارتها أشتدت أكتر وأصبحت أكثر متعة .. ينصح بيه للغاويين جو العفاريت والسحر .. مستمرين ❤

Neon Genesis Evangelion

Neon Genesis Evangelion

Epi 1-26, Death & Rebrith, The End of Evangelion

 

أنا فاكر كويس أول ما أتفرجت علي "هجوم العمالقة" أن كان اكتر سؤال داير في ذهني هو أحنا ح نفضل علي مدي الحلقات الجاية نتفرج علي عالم بسيوف عمالة تتشقلب ويدبحوا في العمالقة والعمالقة تدبح فيهم ولا أيه الكلام؟! .. علي ما وصلنا للحلقة 10 يمكن كان السؤال ده تلاشي تماماً لأني وجدت أني بأتفرج علي ما هو أعمق وأصعب من مجرد الأكشن .. المثال ده يدخلني علي نقطة كنت المفروض مأجلها أني أتكلم فيها في الأخر المفروض بس خير البر عاجله وهي العلاقة الوطيدة ما بين إيفانجيليون وأتاك أون تايتن 

دي المرة التانية اللي أشوف فيها إيفا .. المرة الأولي كان فيها مشاكل كتير .. شوفته علي فترات وكنت ناسي معظم الأحداث لما رجعت اشوفه والترجمة كانت زبالة الحقيقة وتقريباً سقطت الحلقة 24 أو السيرفر اللي حملت منه سقطها عند عمد عشان هما دواعش وحرام يترجموا الزندقة دي وأخيراً مكنتش أعرف بوجود فيلمين مكملين للأحداث .. بس كانت عجباني الحالة مع أني مكنتش فاهم منها حاجة .. ولازلت مش فاهم بعد المشاهدة التانية بس الصورة أوضح شوية .. قولت أستغل الفراغ بتاع رمضان وأعمل ماراثون لإيفا ويا لها من تجربة 

مش عارف هل إيسياما صرح بده ولا لا بس هو الموضوع واضح جداً وهو أنه في تأثر كبير بإيفا في صناعة أتاك .. أول حاجة نبهتني للحتة دي كانت تفصيلة ظريفة أوي وهي أن الطيار أو القائد لما بيركب الألي بيكون موجود في عنقه من عند الحتة بتاع النخاع الشوكي في الإنسان مش في راسه أو وشه زي ما أتعودنا في كلاسيكيات الميكا بشكل عام .. يمكن الحتة دي مش إيفا أول مسلسل يعملها فهي موجودة مثلاً في سلسلة الجاندام من زمان –الطيار بيكون في البطن- بس لفت إنتباهي حتة العنق كمكان لتواجد  القائد في العملين وإستغلال ده درامياً في سياق المسلسلس .. دي كانت بداية إنتباهي لحتة التشابه .. علي ما وصلت للنهاية أكتشفت أن لا الموضوع أعمق من كدة .. في تصريح لإيسياما بيقول فيه أن النهاية الأصلية للمانجا كانت أن الكل ح يموت لكن مع الوقت غيرت رأيي عدلت النهاية .. النهاية السابقة دي فيها شبه كبير من اللي حصل في نهاية إيفا .. حتي لو حطينا اللي حصل في نهاية المانجا بتاعة أتاك قصاد إيفا ح نلاقي أن المنطق نفسه متشابه مع إختلاف الشكل .. يعني إيرين شاف البشرية عشان تتعلم السلم وتخاف من الحرب لازم تواجه كارثة كبري وهول عظيم يخليهم يخافوا قبل ما يفكروا يرجعوا للحرب تاني والكارثة كانت أن معظمهم لازم يواجه الفناء والباقيين يعيشوا عشان يتعلموا الدرس .. كذلك شينجي في الأول كان شايف أن الحل في أنه البشر يفنوا وأنه يبقي وحيد لكن في وسط العصف الذهني اللي واجهه في النهاية واللي أتبروز أوي في النهاية البديلة بتاعة المسلسل شاف أنه "الجنة من غير ناس ما تنداس" وأنه وجوده بدون ناس كالعدم .. ورجع البشرية بشكل أخر وصيغة جديدة 

ده غير أن المسلسلين منبعهم واحد تقريباً .. أم مفتقدة ضمن مأساة بتتحول إلي دافع الطفل في الحياة وجزء أصيل من لاوعيه وأب بيوكل مهمة كبري لطفل صغير –أب علي علاقة بأكثر من أنثي- وكارثة بيجد الطفل نفسه في قلبها ومتأثر بيها دون إختيار حقيقي منه بل بيدفع نحوها دفعاً .. كذلك طريقة سرد المسلسلين واحدة معتمدة علي التشظي في طرح الأحداث والحقائق والتركيز علي الجانب الداخلي والوجداني للأبطال أكتر من الصراع والأكشن رغم وجوده الدائم .. تشظي بيصل لأنك في العملين ما بتفهمش الحقيقة الا في النهاية خالص وما بتفهمهاش بشكل كامل كمان وفي أجزاء المؤلف بيسيبها لحدسك وتكهناتك

نتجاوز الحتة دي وندخل في المهم .. المسلسل نفسه

كان في المرتين اللي شوفت فيهم المسلسل عندي حالة إستغراب في البداية من تركيز الصانع علي المشاهد الدرامية الطويلة الصامتة تماماً احياناً وطريقة إخراجه للأكشن اللي ما بتديش للمتلقي مشهد أكشن كامل ومعركة متكاملة بتنتهي بأن الشرير بيفني علي يد البطل .. حتي دي لازم يخش فيها حتة دراما طويلة .. بس مع الوقت أستوعبت الحالة بشكل كبير وقدرت أفهم في أي طريق يسير هذا العمل 

في اللحظة الحالية بأشوف إيفانجيليون من وجهة نظري كعمل إنساني عن الوحدة في الأساس أشعر أنه ذاتي بشكل كبير .. بكل تأكيد أي عمل إبداعي هو ذاتي بدرجة أو بأخري بس ده بأحسه داخل أكتر في ذات وأفكار كاتبه ودي حتة محتاجة بحث شوية بعدين .. المسلسل كله عن الوحدة والرغبة في التلاشي وعدم الوجود تماماً .. وحدة ناجمة مش عن ظروف ما أو حبس بل وحدة ناجمة عن عوامل مختلفة .. عدم قدرة علي التعاطي مع الناس أو بناء علاقات معاهم .. مشاكل في التواصل مع الأخرين .. تروما وأزمات شخصية خاصة بالنشأة أو صدمات مر بيها الأبطال في حياتهم .. كل شخصيات المسلسل مأزومة بشكل أو بأخر .. بعضهم مر بأزمات في الطفولة .. بعضهم مر بأزمات خاصة بالتربية والعلاقة مع الأهل .. بعضهم عنده ازمات خاصة بحياته العاطفية والشخصية .. بعضهم عنده أزمة مع وجوده ككل ودوره في الحياة وموقعه في العالم ده .. وده التباين والإختلاف ده بينعكس بعد كدة علي طريقتهم في التعبير عن أزماتهم والتعاطي معاها لدرجة إخفاءها بشكل يخلي صاحب الازمة نفسه مش واعي بذاته ومشاكله

المسلسل فرويدي بدرجة كبيرة ومرتكز علي أطروحات كتير من الكلاسيكيات الفرويدية زي ميكانيزم الدفاع النفسي وعقدة أوديب و"الانا والانا الاعلى والهو" .. شينجي مثلاً أحد أسباب إهتمامه بـ"راي" هي أنها فكرته بأمه بان ده أوي في مشهد عصر المنشفة لما قالها شكلك في أمومة .. في لقطة تانية واثناء حالات العصف الذهني اللي بيمر بيها نشوفه بيتخيل أسكا ومسياتو وراي في حالة عري وإغراء لكن مع ذلك هو في الحقيقة وفي أكثر من موقف لم يجرئ علي أتيان أي فعل جنسي مع أي واحدة فيهم .. جزء من ده راجع لإحساس عنده بالضعف في حتة لكن في حتة تانية بتبان في النهاية في مشهد كدة أنه بيعاني من الحرمان العاطفي اللي بيتداخل مع رغبته الجنسية وأنه في الأساس مفتقد "ثدي أمه" مصدر العطاء والحنان ولذلك هو كان متعلق بميساتو اللي قامت بدور الأم للنهاية معاه ومكنش بيحس ناحيتها بأي إنجذاب جنسي .. كذلك ميساتو اللي علاقتها بأبوها مرتبكة ومتشابكة فهي تكره تسلطه لكنها تفتقده وتبحث عنه في كل رجل .. مشهد قبلتها لشينجي في النهاية إعادة إنتاج لمشهد إنقاذ أبوها ليها بشكل أو بأخر ... وهكذا

المسلسل حقيقي في الحتة النفسية دي كان متشابك ومعقد بشكل كبير وبيغوص في حتت صعبة ومربكة زي الأوديبية والبيدوفيليا بشكل جرئ وصادم 

لكن المسلسل لو كان دراما عن ناس معقدة حقيقي محدش كان ح ينتبه له أو كان ح يمر مرور الكرام .. وهنا تأتي براعة الكاتب .. هو بني عالم المسلسل كوجبة متعددة الطبقات كل طبقة فيهم أعمق من التانية .. أولاً أحنا بنتكلم في عالم في مرحلة حرجة جداً .. عالم أبوكاليبسي بيعيش بعد كارثة كبري غيرت شكل الحياة البشرية ودي حتة دسمة جداً يطلع منها دراما كتير .. دي نقطة .. النقطة التانية أحنا في عالم علي شفي الإنهيار وفي إنتظار كارثة كبري إرهاصاتها بدأت من أول حلقة والأبطال دورهم مش مفهوم هل هما ح يضعوا حد لهذة الكارثة ولا بيعجلوا بحدوثها .. الكارثة المرتقبة والخطر الداهم دول الحتت اللي بيتغذي عليهم صنف الميكا ومسلسلات الأليين في الأنمي عامة علي طريقة مازنجر كدة .. كمان الغموض ده حتة لوحدة ممكن يبقي مسلسل مستقل

فوق كل ده المسلسل هو إعادة سرد لقصة الخلق والقيامة بس بصيغة مستقبلية مليئة بالتنكولوجيا لاعبة في القصة كلها وعملالها إعادة سرد عبقرية جداً .. وهو مش أول مسلسل يعملها بالشكل ده بس هو عملها بطريقة متقنة أوي الحقيقة

التعدد ده مخلي القصة مفتوحة وتحمل تاويلات متعددة ويمكن قراءتها من أكثر من وجه .. انا شخصياً قرأتها علي أكثر من وجهة .. هي قصة فلسفية عن الوحدة بتصل في النهاية إلي نتيجة متفائلة تتنافي شوية مع الحالة العدمية اللي سيطرت عليهم طوال الوقت وهي أن الجحيم ليس الأخرون لأن بدون الأخر سنكون بلا وجود .. علي ناحية تانية هي قصة وجودية عن حرية الإرداة وقيمة الإختيار يمكن بتفكرني أوي بـ"أسطورة سيزيف" لألبير كامو فكرة أن حتي لو الوجود ذاهب إلي وزوال وأن لا مفر من الفناء فده لا يعني أن حياتنا بلا قيمة بل أحنا اللي بندي قيمة لحياتنا القصيرة دي عن طريق الإختيار .. المسلسل في حتة نيتشاوية كدة صايعة ومهمة أوي باينة بالذات في نهاية الفيلم وهي لو حد خد باله أن الوجود وقف علي إختيار البشر اللي هو شينجي في النهاية وأصلاً فكرة الـ"إيفا" من الأول زي ما بيتم شرحها علي لسان العلماء أنها محاولة لخلق إله علي يد البشر وزي ما بتشرح أم شينجي في النهاية هي مصنوعة للخلود .. إسقاط علي فكرة موت الإله لكن بشكل مختلف ورؤية جديدة

ممكن ناس تفسر القصة بشكل ديني .. البعض مكن يفسرها بشكل سياسي أو يمكن فانتازي لكن في وجه  للقصة بأشوف أنه لازم ما نغفلوس وهو المتعلق بظرفها الزمني .. العالم في مطلع التسعينيات كان مخيف جداً وملئ بالصدمات الحضارية الكبيرة زي سقوط الكتلة الشرقية وعلي رأسها الإتحاد السوفيتي وما تبعه من تغيرات وتطورات وإختفاء لظواهر وصعود لظواهر أخري زي الإرهاب الدولي وبداية مارثون التطور التكنولوجي الذي  لم يتوقف إلي الأن .. حقبة ابتدت بتنظيرة فوكوياما الشهيرة "نهاية التاريخ" وسط مخاوف خزعبلية من الالفية الجديدة عن أنها نهاية العالم وإلي أخره .. بيتهيألي وسط الأجواء دي كان طبيعي أن عمل زي إيفانجيليون يخرج للنور 

والحمدلله أنه خرج للنور

Mobile Figher G Gundam P2

Mobile Figher G Gundam

Arc2, Epi 26-49 End

الشعور اللي دايماً بيراودني مع كل إنتهاء من مسلسل جيد هو مزيج من الحزن والترقب .. حزن علي إنتهاء تجربة رائعة وترقب إما لعودة هذة التجربة أو لتجربة مشابهة أو أفضل

هي في تفصيلة غريبة شوية بس لازم أحكيها لأنها ح تأثر في كلامي وحكمي علي الفصل التاني في المسلسل ... أنا سبب إستكمالي للمسلسل غير رغبتي في التقدم في الأحداث كان أني توقفت لسبب خارج عن إرادتي عند مشاهدة "ون بيس" .. للأسف مش كل أركات المسلسل عندي ولظروف السفر مكنش متاح تحميلها وفي عندي وقت فاضي .. فقررت أكمل المسلسل للأخر

غصب عني أبتديت أعقد مقارنة بينه وبين ون بيس رغم يعني إختلافهم البين بس في النهاية الأتنين بينتموا لنفس البوتقة .. الشونين ... والحقيقة الفرق بين الأتنين فرق السما والأرض من حيث عمق القصة وطريقة بناء الأحداث والشخصيات وقوة الحبكة ... بس ده خلاني طرحت سؤال مهم .. هل المسلسل ده حلو؟ وهل عشان مسلسل مستواه أقل من أعمال القمة أو الأكثر شعبية ده معناه أنه غير قابل للمشاهدة؟

الأجابة علي السؤال الأول هي أه المسلسل حلو جداً بالذات في الحلقات الأخيرة منه ... وأما السؤال التاني فالإجابة عليه بـ لا طبعاً ... وح نقول ليه أه وليه لا بالتفصيل 

المسلسل حلو لأنه مصنوع بشكل جيد علي قد عمل قصير بدون مواسم ... زيه زي معظم أعمال "جاندام" بيبقي الحلقات متصلة وملهوش مواسم فهو بيبقي مطلوب من الصانع انه يقول كل اللي عنده في 50 حلقة أو أقل أو أكثر قليلاً ودي مهمة مش سهلة ... هنا جودة الصناعة علي مستوي الرسم والتحريك والمعارك جت شوية علي حساب الكتابة والفكرة نفسها

زي ما قولت قبل كدة المسلسل كان أصلاً إفتكاسة أو خروج عن النمط المعتاد لأعمال الجاندام .. ما حبوا يعملوا النسخة الشونين أكشن بتاعتهم من السلسلة بشكل يجاري شوية التريند وقتها .. ففي الوقت ده كانت أيه الأعمال المنتشرة واللي شعبيتها طاغية أعمال الشونين المرتكزة علي الفنون القتالية والعنف والدراما والرومانسية وأجواء الأبطال والقوي الخارقة .. دراجون بول زد ويو يو هاكاشو وسايلر مون كمثال .. فعملوا ميكس ما بين أهم التيمات والقوالب في النمط ده وطلعوا المنتوج بتاعهم .. زائد طبعاً الأجواء الأبوكاليبسية والفضائية المعتادة بتاعة الجاندام ... فطلع من ده عمل شيق وفي ممتع في كل ما يتمناه محبي هذا النوع .. بس فضلت مشكلة صغيرة وللأسف المسلسل لم يتغلب عليها .. وهي انك طول الوقت حاسس أن المسلسل مش أصلي .. مش جايب فكرة بتاعته هو .. مقلد وتقليدي .. وده مش عيب علي قد ما هو يقلل من قيمته شوية مقارنة بالأعمال الأخري

ثانياً في مواجهة ضيق المساحة .. 49 حلقة مساحة كافية لبناء عالم متكامل .. إلي جانب طبيعة المسلسل نفسه المقسمة علي حلقات كل حلقة بموضوع ومعركة متصلة في المجمل لكن كل حلقة ليها موضوعها ... ده خلي الصانع مش قادر يبني شخصيات عميقة ولا علاقات معقدة ولا دراما مكثفة بين الشخصيات وصراع إرادات حقيقي ... لكنه الحقيقة عوض ده بانه خلي القصة علي صفيح ساخن لحد أخر لحظة .. لحد أخر حلقة أنت كمشاهد مش قادر تحدد هو مين الشرير الحقيقي والرئيسي في القصة .. وده يمكن ذكاء من الكاتب لأنه عايز يكسر شوية نمطية الشرير الأوحد ويحول الصراع لصراع بشري بين مصالح ومطامع المبشر وبعضهم البعض .. كل واحد ليه رؤية وكل واحد ليه مطمع وكل شخص مرشح بسبب مشاعره السلبية أو مطامعه يبقي شرير .. لذلك النهاية كانت جميلة بصراحة لانها أنحازت للحب كقيمة في مقابل أي مطمع أخر

يمكن الحلقات لحد 40 كانت عادية للغاية في رأيي لكن الكلام بيحلوا ويعلي بعدين مع الوقت وكل في حقيقة جديدة بتنكشف كل ما الأحداث بتزداد إثارة

المقارنة في حالة المسلسلات اللي زي كدة ظالمة الحقيقة بالذات باعمال طويلة وكبيرة ... لكن اللي أقدر أقوله أني أتبسط بمشاهدة هذا العمل الرائع وكنت أتمني أنه يستمر زي ما وعدوا في نهاية المسلسل لكن طبعاً الظروف شاءت أن دي تبقي النهاية

Gundam Fight .. Ready .. Goooooo

Mobile Fighter G Gundam P1

Mobile Figher G Gundam

Arc1, Epi 1-25

هي كانت النية أني أكتب عن المسلسل ده مرة واحدة لأنه هو كله علي بعضه 49 حلقة .. بس أنا فضلت الكتابة تبقي علي مرتين .. ده بيدي مساحة أفضل واوسع لإبداء الرأي والتحليل

سلسلة مسلسلات وأعمال الجاندام يمكن من أقدم أعمال الأنمي اللي موجودة علي الساحة والمستمرة من نهاية السبعينيات وحتي يومنا هذا .. والمؤرخين بيعتبروها سلسلة "ثورية" نقلت فكرة الروبوتس أو الـ"ميشا/ميكا" ناقلة نوعية من حيث القصة وحتي تصميم الروبوتس ودوره الدرامي وطبيعته التفاعلية .. كان أول مرة يبقي في تفاعل ما بين البطل والألة بالشكل والتعامل مع الروبوتس كألة ممكن تتدمر وتعطل وطاقتها تخلص .. مش ألة مطلقة القوي والقدرات علي طريقة مازنجر كدة وغيره

كمان خدت فكرة تطور تكنولوجيا الألات لحتة جديدة ودخلت عليها تيمات وأفكار جديدة زي البعد الفلسفي لكل شخصية والشكل الإستراتيجي الحربي للدراما كأنها صراع عروش وكذلك أفكار الدمار الشامل والمستقبل الغامض للبشرية

في ظل الشكل ده أستمرت سلسلة الجاندم لحد التسعينيات تقدم الدراما الخاصة بيها اللي بعضها كان مترابط وبعضها كان بيدور في عوالم منفصلة وتناقش أفكار زي السلام شامل والإنسانية والعدالة وغيره .. لحد ما في أوائل التسعينيات قرروا المسئولين عن السلسلة يعملوا إفتكاسة جديدة أختلفت الأراء حولها بس غريب .. انا سمعت حولين المسلسل ده أراءه متضادة لدرجة خلتني محتار أتفرج عليه ولا لا

في سنة 1995 قرر الصناع أنهم يعملوا من الجاندام نسخة "شونين أكشن" .. يعني بالمختصر عشان ما أشرحش كتير عايزين يعملوا جاندام بروح وقالب دراجون بول وقبضة النجم الشمالي .. دمج ما بين الدراما الإستراتيجية أو الحربية وعالم الشونين أكشن لأنه كان التريند الناجح وقتها .. ومنها أتولد 

MF G Gundam

أول إنطباع أثاره المسلسل في نفسي مع أول خمس حلقات أني باتفرج علي "قبضة النجم الشمالي" بحذافيره بس نسخة المستقبل الفضائي .. المسلسل محافظ علي التيمات الأساسية للجاندام .. فكرة الدمار الشامل وأن البشر هاجروا برة الأرض للقري الفضائية بس المرة دي بقي في صراع بين القري دي .. كل قرية بتمثل دول من دول العالم والصراع ده أترجم لمسابقة بقت تتعمل كل مدة .. معارك بين ألالات الجاندام الممثلة لكل دولة واللي بينتصر فيه بيبقيهو المسيطر علي العالم والحاكم بتاعه لحد المسابقة اللي بعدها .. والأرض أصبحت ساحة للمعارك دي ومكان خرب ومنتهي .. النخب بس هي اللي بتعيش في القري الفضائية

زي ما قولت المسلسل محافظ علي التيمات الاساسية للسلسلة عدي فكرة التيمة الحربية اللي أستبدلها بالمعارك المباشرة بين الروبوتات والفنون القتالية .. وده أحد الأسباب اللي خلتني أشعر بمدي تشابه المسلسل مع قبضة النجم .. لكن كمان الدراما الأساسية اللي تعتبر محور القصة .. قصة البطل نفسه "دومون" بطل الفنون القتالية وممثل اليابان وقائد الجاندام المضئ واللي عايش علي أطلال دراما إنسانية قاسية وبيخوض علي أثرها رحلة بحث غرضها الإنتقام والثأر

النص الأول للمسلسل هو تمهيد لفصل البطولة ومسابقة الجاندام ويمكن دي مسألة ذكية أوي أنه ما دخلش في البطولة عدل والا كان المسلسل كان بقي متوقع أوي وعادي

التركيز كله علي قصة "دومون" والشرير الأساسي في المسلسل "الجاندام الشيطان" إلي جانب التفاصيل والتحالفات والعلاقات المشتبكة اللي بتنشئ علي هامش القصة

عشان ما أطولش وكمان ح أوفر الكلام الكتير لنهاية المسلسل خليني أركز علي أهم ملامح المسلسل

زي ما قولت التأثر بثقافة الشونين في المسلسل طاغي بشكل كبير .. من أول شكل المنافسة لتمية القصة ومنظومة القوي والتنافس بين الشخصيات المختلفة .. لكن المسلسل برضو خد من كلاسيكيات الميكا ملامح كتير زي العلاقة بين الألة وقائدها وحتي تكوين الشرير وفكرة أن في شرير لكل حلقة وفي شرير أساسي للمسلسل .. يمكن دي ابرز نقطة تماس بين المسلسل والشكل ده

اللي عجبني أكتر في المسلسل طبعاً الرسم اللي فيه الأجواء الظلامية بتاعة التسيعينات .. ثم طبيعة القصة نفسها وأنها مليئة بالمفاجأت والتويستات غير المتوقعة .. أظن لما ح أكمل المسلسل للأخر ح يبقي في مفاجأت صاعقة أكتر مما توقعت

وده اللي مخليني مستغرب الأراء السلبية الكتير اللي علي المسلسل .. بس أنا يمكن متفهمها لأن المسلسل نسف القالب التقليدي للجاندام ووداه لبعد تاني جديد.. مش كل الناس تقبلت ده 

بس في رأيي علي الأقل التجربة كانت ناضجة وممتعة جداً وكانت تستحق تتكرر .. لكن ده ما حصلش مع الأسف

تجربة رائعة .. مستمرون

Rurouni Kenshin: S2 & S3

Rurouni Kenshin

S2 (Kyoto Arc), Epi 28-62 “No Fillers”

S3, Epi 63-95 “No Fillers” (End)

لو طرحنا سؤال جدي حولين أنهي عصر يعتبر هو العصر الذهبي للأنمي ح نلاقي إجابات مختلفة لدرجة التضارب .. ناس ح تقول الثمانينيات لأنها كانت البداية وناس ح تقول العصر الحالي وناس ح تقول من 2011 أو مطلع الألفية

أنا شخصياً أقدر أقول بكل أريحية أن التسعينيات هي درة مسيرة الأنمي عبر تاريخه .. مرحلة فارقة ومهمة ما بين عصر الظهور الحقيقي في الثمانينات وعصر الإنتشار في مطلع الألفية مع ثورة الإنترنت .. الفترة اللي أتشكلت فيها هوية هذا الفن وأبتدت ملامحه تتكون بشكل حقيقي وتيماته وأنماطه اللي شكلت المشهد بعد كدة في عصر الإنتشار ثم عصر التخمة اللي عايشين فيه حالياً

تقريباً جيلي اللي عاصر الأنمي من بداياته عاصر مرحلة التسعينيات دي كويس وشاف الأعمال بتاعتها بعدها يمكن بشوية وأحياناً في لحظتها .. وشاف قد أيه وقتها كان بيبذل مجهود كبير في رسم وتشكل الأعمال الفنية وده كان بيخلي المنتوج عامل مصنوع بعناية وبديع لدرجة أن يستمر سنين وسنين بعد كدة .. يمكن في صنف "الشونين" أغلب التيمات اللي كانت منتشرة وقتها هي الأكشن والأعمال اللي فيها مزيج لطيف كدة من الظلامية والدراما والكوميديا الساخرة بتتقدم في قوالب درامية مختلفة معظمة متأثرة أما بالقوالب بتاعة مانجا الثمانينيات بتاعة دراجون بول وقبضة النجم الشمالي وجوجو وسانت سيا وغيرهم .. أو متأثرة بالثقافة العامة والأشكال المنتشرة في الميديا .. وده كان حاصل في كينشن

كينشن بالنسبة لي كراجل عاشق للسينما وبالذات السينما اليابانية حاجة كدة ماستربيس مش سهل تقع علي حاجة زيها حديثاً .. مفيش تقريباً عمل متقن أو تقيل بالشكل ده حالياً غير مثلاً أتاك أون تايتن .. طيب ليه؟

لانه متأثر بمشارب كتير .. واخد طبعاً من سينما الساموراي والسينما التاريخية اليابانية كتير .. هو تحديداً ميكس ما بين أعمال كوروساوا وسينما الساموراي التجارية زي ثلاثية موزاشي والساموراي الأعمي من حيث الأكشن والتيمة الدرامية علي تأثر واضح أوي بالذات في الحتة الفلسفية بأعمال ميزوجوتشي .. يعني وأنا بأتفرج بالذات علي الأرك التاني حاضر في ذهني طول الوقت يوجيتسو وسانشو الحاجب .. الميلودراما اليابانية اللي بتستلهم التاريخ وبتسقط منه أفكار ودروس علي الحاضر .. علي حتة كدة من السينما المناهضة للإقطاع زي سينما كوباياشي وأعمال ماساهيرو شيندو .. مش بأقول أن الكاتب أو المخرج كان مطبق علي أفلام الناس دي لكن متأثر بيهم وده طبيعي يعني لأن دي الميديا المحيطة بيه والبيئة اللي بيتعاطي معاها .. ومعاهم تأثر بحاجات من الثقافة الغربية أشهر علي الإطلاق سينما السباجتي وتحديداً سيرجيو ليون ده باين اوي في بناء شخصية هيمورا كيkشن بطل القصة

بعيداً عن التأثرات .. كينشن في حد ذاته حتي كرواية أو كعمل فني تقيل ومن الحاجات اللي بتحط أفكار وإنطباعات المشاهد علي المحك وبتعرض الوجود قدامه من اكتر من زاوية.. طيب ازاي؟

كينشن أحداثه بتبدأ كدرس في التاريخ .. بعد ١٠ سنين من بداية حقبة ميجي وانتصار ثورة الحداثة والنهضة علي الإقطاع بنبص جزء من المشهد لم يتم التركيز عليه ابدا ً وهم حطب الثورة من الجانبين سواء رجال ميجي او رجل الشوجن .. حصلهم ايه بعد التغيرات الجذرية اللي حصلت في المجتمع وانتهاء عصر الساموراي؟ .. المدخل الضيق ده بيودينا لنقطة أخطر وهي فعلاً ثورة ميجي نجحت في القضاء علي أثار العهد البائد ولا التاريخ اعاد ذاته بطريقة او بأخري؟ .. لنخرج في نهاية الفصل التاني تحديداً بدرس مفاده أن النصر كان مجرد مرحلة لكن النصر الحقيقي بيتحقق طول ما في سعي جد لإقامة العدالة والوقوف ضد الظلم

طبعاً رسالة فيها مثالية ووعظ يتماشى الفئة العمرية الأساسية اللي بتستهدفها القصة بس هي فرأيي مجرد حيلة في الكتابة لطرح معاني وافكار أكبر .. وده بان في الفصل التاني اللي أنتهيت منه مؤخراً

الفصل الأول من القصة كان متعدد الأجزاء كل مجموعة حلقات فيه بتدور حولين تحدي مختلف وشرير او مجموعة أشرار مرتبطين بحقبة الثورة او الحرب الأهلية وعندهم موقف سلبي من دولة ميجي وحكمها .. لكن الفصل ده غير شوية .. الشرير فيه شخصية واحدة ويجمع حوليه مجموعة من الشخصيات غير السوية اللي اجتمعت علي فكرة واحدة وهي العداء مع حقبة ميجي والرغبة في الانقلاب عليها وبناء مجتمع من قلب الفوضي ذو طبيعة داروينية إجتماعية البقاء فيه للأصلح والأقوي.. حاحة أشبه بالأفكار البدائية اوي للفاشيين .. حتي انا في إعتقادي أن الفصل ده كان في إشارة غير مباشرة للحقبة الفاشية اللي جت علي إطلال دولة ميجي وأفكارها حولين المجتمع

الغريبة أن "شيشو" نفسه الشرير الرئيسي في الفصل لم يكن قوياً في المطلق .. وأن ضعفه وقلة إنتباهه أدوا لأنه تم تشويهه وتدمير جسده علي إيد رجال حكومة ميجي .. ويمكن ده اللي خلاه ناقم علي الضعف والضعفاء وبيسعي بشكل محموم للقوة ومجتمع الأقوياء

الفصل مش بس بيضع مفاهيم العدل والقوة علي المحك بل كمان بيعيد النظر في التاريخ وبيستلهم منه العبر وعلي رأسها أن التاريخ بيعيد ذاته مرة كمأساة ومرة كمسخرة وان الدول مهما إختلاف طبيعتها بتتفق في الأساليب والطرق في التعامل مع الأخطار المحدقة بيها

بعيداً عن الأفكار لأنها محتاجة مقال لوحده من كتر ثراءها وجرأتها بشكل يخليك مستغرب ازاي الكلام ده بيقال في مسلسل للمراهقين

لو بصينا للبناء الدرامي للفصل ح نلاقيه متطابق بشكل كبير مع تيمة "أرك فريزا" من دراجون بول زد .. اللي هو زي ما قولنا مراراً فصل بيبقي فيه شرير قوي بيشكل تحدي كبير الوصول إليه بيمثل رحلة بيخوضها مجموعة من الخيرين من أجل تحقيق العدالة وفي الطريق بيواجهوا تحديات صغيرة بتتصاعد كل ما بيقربوا أكتر من نقطة الوصول .. وفي السكة بيقدر مجموعة من الشخصيات الرئيسية من تطوير ذاتهم لمواكبة التحديات لكن عامة صاحب التطور الأكبر بيكون البطل الأساسي للقصة واللي بيعمل للنهاية في مواجهة الشرير ... يعي سباق هرمي إقصاءي بيظل فيه واحد بس صامد للنهاية

وده شئ ما حاولش حتي الكاتب يخبيه ولا يتنصل منه لدرجة أن في مرحلة معينة من المعركة يلأخيرة -اللي كانت ملحمية الحقيقة - كينشن هب هبة كدة أشبه بالسوبر سايان ثم دخل في الصدام الأخير مع الشرير .. وده كان شئ مطلوب ومحبب وقتها من قبل الإستديوهات وشركات الإنتاج ومحلات المانجا اللي كانت بتحاول طول الوقت تستنسخ النجاح الملحمي لدراجون بول علي هيئة أعمال أخري تسير علي خطأه

نفسي أتكلم أكتر بس مش عايز أطول عشان لو حد مهتم يقرأ ما يزهقش

كينشن من أعظم مسلسلات الأنمي في التاريخ في رأيي .. وجبة دسمة وتقيلة وظريفة عايزه حد غاوي يستمتع بالانمي كفن .. يمكن أعظم ما فيه هي المعارك تحديداً والحوارات القوية اللي تعيش في ذهنك لأعوام واعوام 

المسلسل بيلعب علي حبل .. انه عايز يقدر عمل جاد وناضج وده مخلي الحوارات والافكار فيه من اقوي ما يكون .. والحبل التاني انه عايز ما يخسرش جمهوره من المراهقين فلذلك ح نلاقي فيه خيال جامح وكوميديا ورومانسية من اللي بتحبها الفئة دي

عمل متكامل للأسف ما كملش للأخر بسبب ظروف نشر المانجا وده خلاه حتي مليان فيلرز مش بالمستوى المطلوب .. لكن القصة الرئيسية تحفة لا تضاهي

إلي اللقاء يا صديقي كينشن

Rurouni Kenshin: S1 "Tokyo Arc"

Rurouni Kenshin / Samurai X

S1 (Tokyo Arc), Epi 1-27 Finale

في غابر الزمان .. قبل عصر أتاك أون تايتن وأكاديمية الأبطال .. وقبل عهد الثلاثة الكبار "ناروتو، بليتش، ون بيس" .. قبل أن تقتحم عالمنا الألفية الثانية بكل ما حملته من ثورة في مجال الأنمي وصنف الشونين .. تحديداً في النصف الثاني من التسعينيات .. كان مشهد الشونين مختلف تماماً عما هو عليه الأن

 إنتاجات قليلة وجودة عالية .. و"التريند" تتصدره أسماء قليلة خالدة حتي يومنا هذا في عالم الأنمي .. من الثمانينيات أستمرت شعبية "دراجون بول" وأزدهرت أكثر فأكثر .. ومن أوائل الحقبة برز أسم "يويو هاكاشو" كنجم ساطع سطر تاريخاً جديداً لهذا الفن .. ومن النصف الثاني من الحقبة برز أسمان أساسيان أستمر وهجهما حتي بداية الألفية .. الأول كان "أينوياشا" وقد تحدثنا عنه مطولاً وللحديث بقية .. والثاني كان "كينشن" أو "ساموراي أكس" .. وهو مثار حديثنا اليوم

مش ح أبقي بأبالغ لو قلت أني بأبدأ في المسلسل متأخر حوالي 20 سنة .. المسلسل ده كان "تريند" بالمصطلح الحديث يعني في أوائل الألفية بين جمهور الأنمي سواء الأجنبي أو العربي عبر منتدياتهم ومواقعهم في أوائل الألفية بشكل أقرب دلوقتي مثلاً لوضع "هانتر" مثلاً .. اللي هو عمل مكتمل ما بتسمعش عنه غير أنه تحفة وليه قاعدة معجبين واسعة بتضرب بيه المثل في أي مناسبة ... ثم فجأة كل ده تلاشي .. فجأة .. بشكل غريب وملحوظ لدرجة أن فانز كتير من الجداد ح يبقوا أول مرة يسمعوا عنه .. تقريباً ما بألاقيش غير الأجانب والناس القديمة أوي واللي قربوا يبقوا عواجيز زي حالاتي هما اللي عارفينه

زيه زي كل المسلسلات الكلاسيكية اللي بأتابعها أثناء رحلتي الطويلة مع الشونين كان عامل الزمن والمصادر هما السبب الرئيسي في أني ما أقدرش أتفرج عليه في وقت شهرته .. سرعات النت كانت صعبة أوي وكمان كنت وقتها مركز مع دراجون بول وكونان والأنميات القصيرة فده خلاني أجله .. لكن طول الوقت كنت حاطه في ذهني

مش عارف أبدأ منين الحقيقة .. لأن التجربة ممتعة من أكتر من جانب .. بس خلينا نركز علي تحليل السرد وبناء الشخصيات زي ما أتعودنا

في الشونين بناء شخصية البطل أختلف من عمل للتاني .. لكن نقدر نقول أن طول الوقت في 3 طرق لبناء البطل .. الأولي والأكثر إنتشاراً وهي أن البطل بيكون أما مختار دون أو يعلم أو ذو قدرات خاصة برضو دون أن يعلم والمسلسل كله عبارة عن رحلته نحو إكتشاف ذاته وتطوير قدراته حتي الوصول إلي ما يشبه الكمال .. تقريباً ده التيمة اللي مبني عليها 90% من المسلسلات اللي وجدت من الثمانينيات وحتي الأن زي دراجون بول وبليتش وأتاك أون تايتن وغيرهم

الثانية هي أن البطل بيكون شخص عادي وبيكتسب قدرات تخليه قادر علي مواجهة تحديات العالم اللي عايش فيه .. ودي في عليها مثالين مشهورين أوي .. هانتر وأكاديمية الأبطال .. الأول القدرات أكتسبها عبر التدريب والثاني عبر نقل القوي وعادة البطل في التيمة دي بيكتشف مع الوقت أنه كان قوي أصلاً من البداية بس الموضوع كان محتاج زقة كبيرة شوية عشان يكتشف قواه

الثالثة .. ودي محور إهتمامي هنا .. وهي اللي بتبدأ من الفصل قبل الأخير في مسيرة البطل .. أو خلينا نقولها بشكل أوضح شوية .. بيكون البطل من بداية القصة أو السردية أصلاً واصل لمستوي متقدم جداً من القوة والمهارة يكاد يقارب الكمال .. والقصة كلها بتدور حولين مدي وكيفية إستخدامه وإستغلاله للقوي دي .. بأشبه دايماً النوع ده بأفلام الويسترن والسباجتي وهي للحقيقة متأثرة بيها بشكل كبير جداً راجع أصلاً لمصادر إلهام الشونين نفسه اللي كان مغرق في التأثر بالثقافة الشعبية والعامة المحيطة بيه في السينما والتلفزيون والموسيقي وغيره .. هذا النوع بينتمي له مسلسل مهم جداً وهو "قبضة النجم الشمالي" وكذلك مسلسلنا اللي بنتكلم عنه حالياً

التيمة دي كانت الأنسب لبناء وسرد هذا العمل اللي أحداثه بتدور بعد 10 سنين من بداية حقبة ميجي تحديداً سنة 1878 .. وللي مش مطلع علي التاريخ ياباني بنقوله أن حقبة ميجي هي عصر النهضة وبداية دخول اليابان للحداثة .. الأمبراطور ميجي بعد ما أنتصر في الحرب الأهلية –بيشار إليها بالثورة في المسلسل- سعي بخطوات جادة لمحو كل ملامح وبني عصر الإقطاع في اليابان –عصر إيدو- وبناء دولة مدنية حديثة علي الطراز الغربي .. من أهم الخطوات اللي أتخذها ميجي وقتها ألغي ثقافة الساموراي وأمر بتسليم السيوف وكسرها وضم كتير من المسلحين وأصحاب المهارات لقوات النظام عنده بعقلية جديدة وثقافة جديدة بعيد عن البوشيدو "تعاليم الساموراي" .. الموضوع كما هو متوقع ما مشيش بسلاسة وكان في بعض المقاومة للأمر لكنه نجح في النهاية

المسلسل أحداثه بتدور في هذا العصر .. عصر أفول شمس الساموراي وبداية عصر جديد .. عصر أتجه في الساموراي أما لعالم الجريمة وأنضمو للياكوزا أو كونوا مجموعاتهم الإجرامية الخاصة أو المناهضة لحكم ميجي .. بطل القصة "باتوساي" أو كينشن كان ساموراي سابق وقاتل محترف ذاع صيطه بين قوات ميجي الأمبراطورية وكان من العوامل اللي ساعدت علي نجاح الثورة ضد الإقطاع .. اللي أنه بعدها أختفي وقرر الإعتزال تماماً وتسخير قواه لمساعدة الناس ومحاربة الفساد دون سفك أي دماء

ليه التيمة كانت مناسبة للقصة دي؟ .. لأن ببساطة تخيل معايا أن القصة كانت عن ولد بيقرر يبقي ساموراي في عصر الساموراي فيه أنتهوا تقريباً .. كانت ح تبقي كوميدية شوية ومش جذابة .. لكن الفكرة الأساسية للمسلسل كان مناسب ليها التيمة دي .. ماذا يفعل المحاربون إذا أنتهي زمن الحرب؟ .. المسلسل فكرني أوي بـ"بيكي بيلندرز" بالذات الموسم الأول .. أن لما تومي ورفاقه رجعوا من الحرب اللي راحوها عيال ورجعوا منها رجالة كبار معندهمش أي خبرة غير في القتال .. أول شئ عملوه هو أنهم أتجهوا للجريمة المنظمة لأنها النشاط الأنسب لمهاراتهم وخبراتهم .. كذلك هنا أنت بتتكلم علي ناس كان أكل عيشها العنف والقتال قررت في يوم وليلة أنك تنهي مسيرتهم وبتقولهم أبدأوا حياة جديدة .. طبعاً مش كلهم ح يقدروا يندمجوا مع أنشطة الحياة المدنية العادية ولا كلهم ح يرحب بالإنضمام للأجهزة النظامية بالذات أنهم كتير منهم كان عنده عداء للمنظومة والحقبة .. لذلك كان طبيعي أن يبقي ده إتجاهم اللي يختاروه

المسلسل من جماله أنه بياخد القالب ده عشان يفتح نقاشات حولين فكرة الحرب والعنف والخير والشر .. نقاشات ذكية وجذابة .. ممكن تكون مباشرة أحياناً لكنها لطيفة وبتدي الأحداث طعم وإثارة وثراء .. لأن أنت مش مجرد بتشوف ناس عمالة تدب في بعض بأسلحة والسلام لا دي فلسفات ونظرات متناقضة للحياة والواقع بتتضارب وتتصارع ومفيش فيها مهزوم ولا منتصر بالمعني الحرفي .. هي مجرد إنكسارات وإنتصارات بسيطة ضمن مسار طويل أسمه التعايش مع الواقع والتعاطي معاه ... كمان المسلسل كان ذكي في أنه وجه أسهم نقده للجوانب السلبية في ثقافة الساموراي وحياتهم وكذلك أنتقد حقبة ميجي وركز علي بعض الجوانب والسلبيات اللي فعلاً في الحقيقة أدت مع الوقت إنهيارها وإنحدارها إلي ما هو أسوأ وتحول عصر النهضة والحداثة لإنجراف غير واعي نحو الفاشـيـة والهوس الإمبراطوري التوسعوي زي حصل بعد كدة

الفصل ده عبارة عن تعريف بالشخصيات الرئيسية وجوانبها والزمن اللي بتدور فيها الأحداث .. وجبة لذيذة كبداية لمسلسل طويل .. الفصل عبارة عن أحداث متصلة منفصلة وده طبيعي في الفصول الأول من أي عمل يعني وأتوقع أنه مش ح يستمر فيما بعد في الفصلين الجايين .. بس المستوي اللي قدمه المسلسل لحد الأن رائع درامياً وحتي علي مستوي التحريك والأكشن .. كنت متخوف أن ممكن ما أحبش المعارك لأنها مجرد معارك بين بشر عاديين بسيوف .. لكن لا القصة طلعت أمتع مما توقعت وتفوقت علي كل تصوراتي وأجبرتني علي أني أحترم هذا العمل وبقي من مفضلاتي خلاص

لسة المغامرة ما خلصتش .. مستمرون

Yu Yu Hakusho: S4 "Three Kings Saga"

Yu Yu Hakusho

S4 "Three Kings Saga" , Epi 95-112 (End)

أيييييييييييييه .. الواحد ح يفتقد المسلسل ده جداً والله بالذات بعد جرعة العظمة الزيادة اللي كانت في الموسم الأخير

حقيقي مش كل يوم بنقابل مسلسل تشدنا أو تكسب تعاطفنا ونحبها بالشكل ده .. لما كنت بأسمع كلام اليوتيوبرز الأجانب عن المسلسل ده كنت بأعتقد أنهم بيبالغوا خصوصاً أني عارفه من زمان وخدت فكرة عن قصتها لكن محستش أنها ح تشدني .. حتي كنت حاطه ضمن المسلسلات اللي عمري ما ح افكر أشوفها لأني كمان كنت حاسة قديم وجو دراما وكوميديا

النهاردة أنا بأعترف أني كنت غلطان بنسبة 99.9% .. فعلاً المسلسل ده يمكن من أعظم الأنمي اللي شوفته في حياتي لأسباب كتير .. أولاً أجواءه الغرائبية والحالة الغير الظلامية اللي بيصنعها .. هو لا جاي يقدم دراما ولا رومانسية ولا قصة عن ناس طيبين وناس أشرار بيدبوا في بعض لا ده أنا جاي أحكيلك عن عالم مشوه وغارق في الفساد والشر حتي النخاع ومفيهوش لا خير مطلق ولا شر مطلق .. حتي شخصيات العمل الرئيسية كلها عندها جانب ظلامي في شخصيتها وعندها شغف بالقتال والمعارك كبير

ده ياخدنا لثانياً وهي مسألة الدموية والوحشية اللي أتسمت بيهم أحداث المسلسل واللي ما بقوش يتقدموا دلوقتي نظراً لأعتبارات كتير منها توجهات الحكومة اليابانية .. فعلاً وجبة دموية ممتعة ومرعبة

ثالثاً القصة والدراما رغم عيوب الكتير الا أنهم كانوا متماسكين وفيهم متعة كبيرة بالذات فيما يخص الجانب الإنساني وقصص شخصيات المسلسل .. تقريباً حتي أعتي أشرار المسلسل أنت تعاطفت معاه ولمسته جانبه الإنساني أو المأساة اللي خلقت هذا الوحش .. يمكن القصة كانت محتاجة مساحات أكبر وتحديات أكتر وتفاصيل أكتر وفصول أكتر لكن تبقي دي وجهة نظر الكاتب وله كل الإحترام الحقيقة

يمكن عيب المسلسل الأبرز انه المعارك اللي مش كلها كانت بالشكل القوي المناسب لكن كتير منها كان ممتع .. كمان قوي وقدرات الابطال والأشرار وبالذات البطل "يوسكي" كانت محتاجة شوية تفاصيل أكتر لكن لو بصنالها في النهاية ح نلاقي أن تصميم الشخصية بالشكل ده خدم علي القصة وعلي الفكرة نفسها وهي ان البطل مجرد شخص يحب التحدي ولا شئ أخر

كلام كتير يتقال وحكاوي كتير لا حصر لها ولا عدد .. بالذات الموسم الأخير ده كان مستواه عالي أوي .. اينعم في نهايته الأحداث جريت بسرعة شوية لكنه كان رائع 

يو يو هاكاشو سعيد الحظ اللي ح يشوفوا ح يلاحظ شئ مهم وهو اللي ح أختم بيه كلامي عنه .. اولاً طبعاً وبديهي في تشابهات بالجملة في القصة وتصميم الشخصيات بينه وبين Hunter X Hunter نظراً لأن المؤلف واحد وده شئ يفجر ماسورة نظريات في ذهني حولين العلاقة بين المسلسلين بس مش وقتها ... ثانياً المسلسل متأثر بالكلاسيكيات اللي سبقته علي رأسها Dragon Ball Z وده باين في تصميم شخصية البطل بالذات .. كذلك كان مؤثر في كتير من أعمال الألفية زي Naruto و My Hero Academia و Bleach بالذات اللي تقريباً واخد القصة بالشخصيات بالحرف تقريباً مع إجراء بعض التعديلات ونسج قصة أطول وأكثر تماسكاً يمكن لأن مدة يو يو وطريقة سير أحداثه ما أديتش برضو الفرصة الكافية لتعريف المشاهد بكل تفاصيل العالم بتاعة عكس بليتش

تبدأ القصة بموت الطالب "يوراميشي يوسكي" أثناء إنقاذه لحياة طفل صغير لكي تبدا علي أثر ذلك مغامرة مثيرة بين الأرواح والشياطين وإرادة البشر

Yu Yu Hakusho .. شكراً ❤️

Yu Yu Hakusho: S3 "Chapter Black Saga"

Yu Yu Hakusho

Chapter Black Saga "S3", Epi 67-94

المسلسل ده كل مدي بيثبت لي قد أيه هو مثير ومُلهم ومن النوع اللي ممكن يبقي ليك عليه مأخذ وتشوف فيه عيوب بس حابب أنك تكمل مع الحالة وتشوف الأحداث دي ح تنتهي علي أيه  أو القصة دي رايحة لفين

فكرة الفصل ده أتكررت بعد كدة في أنميات تانية فاكر منهم كويس "ناروتو" والفصل الأخير في أنمي "بليتش" -الأنمي مش المانجا- اللي هي قصة بتدور حولين شخص قوي كان في الجانب الخير في وقت ما ثم حصله تحول درامي نتيجة حدث ما خلاه تحول مش إلي مجرد شرير بل معادي للبشر .. هنا تم طرح الفكرة بس بشكل أكثر عنفاً الحقيقة من أي نسخة شوفتها قبل كدة .. الشرير مش شرير أكتر منه رجل صاحب وجهة نظر وفلسفة خاصة وفهم مغاير للصراع ما بين الخير والشر والبشرية ووجودها ككل وبيعمل علي قدم وساق علي تنفيذ هذة الفلسفة 

طبعاً جرعة العنف والرعب وسلاسة القصة والأحداث اللي بتصل لدرجة البساطة بتدي المسلسل روح خاصة وشكل مميز .. فوق كدة المفاجئات اللي عماله تنفجر بالتدريج ودون أي إنذار بما فيها النهاية اللي جت مختلفة عن النهايات التقليدية واللي بتمهد لما هو قادم كل دي عوامل مميزات ونقط تخلي الموسم والمسلسل في نظري مميزين ومثيرين للإهتمام

فعلاً حالة غريبة .. رغم مشاكل القصة وبعض السذاجة في الحبكة الا أني لا أستطيع سوي أن أبدي اعجابي وحبي للمسلسل ده وقد أيه هو لمسني وأثار أهتمامي .. فعلاً مش كل يوم بنقابل حالة مثيرة بالشكل ده

Yu Yu Hakusho: S2 "Dark Tournament Saga"

Yu Yu Hakusho

S2 (Dark Tournament Saga) , Epi 26 - 66

نرجع ونقول شكراً لعمو اليوتيوب علي هذة التوصيات الرائعة الحقيقة .. فعلاً الموسم ده والمسلسل بشكل عام كل مدي بيتجاوز إنطباعتي وأفكاري المسبقة وبيديني دافع أني أستمر في المشاهدة

بغض النظر عن التطورات والأحداث الخاصة بالموسم ده اللي بدأت فيها نوع من عدم الإتزان والتخبط وحبة حلو وحبة شغال وحبة رائع لحد ما المسلسل عند مرحلة معينة بقي بيزايد علي نفسه في الأثارة والروعة ووصل للذورة في النهاية .. بغض النظر عن كل ده  المسلسل فيه شئ جميل وعظيم هو ده اللي مديني الدافع أني مكمله وقلب إرتيابي منه لحماس كبير وهو أنه دايماً أحداثه متروسة مفاجئات غير متوقعة وأنه بيزود في جرعة الغرائبية والجنون كل مدي لحد بشكل ح يخليك تنبهر .. سواء علي مستوي المعارك بقي أو الدراما أو حتة تحولات وتطورات الشخصيات أو حتي علي مستوي الرسومات .. يعني في لحظة ممكن يخليك تتعاطف مع الشرير وفي لحظة يخليك تشوف الطيب وهو بينهزم ويحزن في عز إنتصاره وفي لحظة يخليك تغير رأيك وإنطباعك تجاه شخصيات المسلسل وفي لحظة ممكن يصنع شئ عظيم من حاجة عبيطة وصغيرة جداً .. ده غير أنه منطقي بالذات في بناء الشخصيات ومحجم أبطاله كويس ومش مبالغ في تصميمهم وصياغة قدراتهم زي ما بيحصل

بشكل عام .. أتفرجوا عليه ومش ح تندموا

Yu Yu Hakusho: S1 "Spirit Detective Saga"

Yu Yu Hakusho

S1 "Spirit Detective Saga" , Epi 1-25

موسم أول جميل وخفيف وشيق ومثير من مسلسل يو يو هاكاشو أو ملفات الأشباح والمقتبس عن مانجا بنفس الأسم من تأليف "يوشيهيرو توغاشي" من أشهر وأعلق -جاية من علق- مؤلفي المانجا في التاريخ وصاحب السلسلة والأشهر واللي مش عايزة بسبب مرقعته

Hunter X Hunter

المسلسل أحداثه بتدور في زمن مجهول لكنه يحمل ملامح تسعينيات القرن الماضي .. عن "يوسكي" الطالب الجامح اللي بيدفع حياته ثمناً لحماية طفل صغير من الموت .. بتتوالي الأحداث بنشوف رحلة كشبح نحو العالم الأخر والفرصة الإستثنائية اللي بيحصل عليها من أجل العودة إلي عالم الأحياء مرة أخري

المسلسل في ملامح كتير من HxH باينة أوي في بناء الشخصيات بالذات شكلياً .. يعني تحس أن ده كان الأختبار الأول لتوغاشي في عالم الأنمي اللي كان بيحضر بيه نفسه للقنبلة اللي ح تيجي بعد كدة .. طبعاً وبديهياً المسلسل متأثر بأعمال سبقته علي رأسها Dragon Ball وده باين أوي في شوية تفاصيل خاصة ببناء الشخصيات درامياً وقصة المسلسل والتفاصيل الخاصة بالطاقة والقوة وغيره .. المسلسل نفسه أثره واضح وباين علي بعض المسلسل اللي جت بعده وأول حاجة جت في ذهني وأنا بأشوف حلقاته الأولي هي Bleach .. فعلاً بليتش بالذات في فصوله الأولي متأثر بالمسلسل ده وبكتير من تفاصيله .. ده مش غريب لأن الأتنين بيتكلموا عن العالم الأخر والأشباح والموت بشكل عام فتأثرهم ببعض طبيعي .. الملوحظة دي مش من عندي بل دي كانت ملحوظة المسئولين علي مجلة Shonen Jump لما أتعرضت عليهم مانجا Bleach عشان ينشروها في البداية خالصرفضوها وقالوا أنها محاولة لتقليد يو يو وكانت غلطة لا تغتفر الحقيقة

نتكلم عن طبيعة المسلسل نفسه .. المسلسل شبابي ، أكشن ودرامي من نوع المسلسلات اللي قراءتك وإنطباعك عنه ح يختلفوا كل ما ح تستمر وتكمل مشاهدة .. في البداية ح تحسه انه فلسفي وكوميدي وبعدين الفلسفة ح تتلاشي مع تالت أو خامس حلقة وح نبتدي في سكة الدراما الشبابية والكوميديا ح تستمر .. الموضوع ح يطول شوية لكنه ح يختلف مع تطور الأحداث .. المعارك والقصص في الموسم ده فيها حبة سذاجة وعشوائية شوية في تفاصيل القصة والحبكة ورتمها أسرع من اللي أتعودنا عليه في المسلسلات التانية .. ودي مسألة خلتني خدت موقف شوية من المسلسل بس قولت أستمر يمكن الوضع يتحسن واللي شجعني علي ده وعود وكلام Fans المسلسل .. وقد كان .. القصة والمعارك والرسومات أتحسنوا في أخر 5 حلقات والموضوع والقصة بقي فيهم جدية وحماس وإثارة أكتر وعنف ظلامية أكتر وأكتر .. لذلك ح أكمل المسلسل بقلب جامد

المسلسل شبه إينوياشا في مسألة أن حلقاته الأولي كانت شبابية وساذجة لكن الحماس زاد والجدية والقوة مع الوقت .. القصة واعدة وتحمسك أنك تكلم .. وهو ما سيحدث

Sailor Moon S1

Sailor Moon

S1, Epi 1-46 “No Filler” Finale

 

يمكن مفيش رحلة نحو هدف معين ما بيكونش فيها محطات رئيسية لازم الواحد يقف عندها ويتعاطي معاها ويتأملها .. بالذات لو كانت هي مش مجرد نقطة وقوف بل محور ونقطة تحول ومنبع تأثيره أمتد طويلاً

ده يمكن اللي أقدر أقوله علي رحلتي مع الأنمي وتوقفي عند نقطة فيه وهي سلسلة "سايلر مون" .. يمكن هنا في العالم العربي سايلر مون ما أتعرفش غير متأخر مع إنتشار الأنترنت تحديداً ومعاه إنتشار الأنمي وتوسع مجتمع الفانز والأوتاوكوز .. لكن مع بعض الدعبسة والبحث عبر الإنترنت وشظايا من ذكريات الطفولة في التسعينات .. بتكتشف أنه ذو شعبية طاغية سواء في اليابان أو في أمريكا وأوروبا .. كان حتي بعض المنتوجات بتاعة المسلسل بتوصل هنا مصر بس طبعاً من غير ما حد يعرف أي معلومة عن المسلسل

ويمكن أنا مستغرب أن سبيبس تون ومركز الزهرة ما سعوش لدبلجته رغم شعبيته الكبيرة .. بس يمكن لإعتبارات محافظة شوية ما فضلوش أنهم يدبلجوه للعربية

يمكن مش بس الشعبية كانت السبب في أني أبدأ معاه .. كمان التأثير زي ما أشرت في البداية .. في التأريخ لفن الأنمي بيعتبر سايلر مون عمل محوري ومؤثر في أعمال الـ"شوجو" –المقابل النسائي للشونين- الدراما الشبابية والأكشن .. فهو بيعتبر من الأعمال الرائدة في حتة الإرتكاز علي البطولة النسائية بعيد عن قوالب الدراما والرومانسية التقليدية اللي المرأة فيها يا ضحية يا مضحية يا بتصارع الأقدار .. لا دي بطلة وذات قدرات خاصة تقدر تغير الواقع وتدافع عن المستضعفين زيها زي الرجل وأكثر 

يمكن أنا شخصياً بأرجع ظهور اللون ده وقتها نظراً للتطور الضخم اللي حصل علي الضفة الأخري في الـ"شونين" في الثمانينيات وتبلور فكرة البطل اللي بيتطور بشكل دائم وبيتصدي للشر عبر المثابرة والتعاون وأنه بيدأ ضعيف لكنه بينتصر في النهاية بالجهد والصداقة والتعاون والرغبة الحثيثة في التغيير وبناء عالم أفضل .. ده كان رد فعل لده .. زي ما في بطل ذكر في بطلة أنثي .. بالذات أن في إتهام دائم للشونين لحد الأن بإهمال الشخصيات النسائية وتعمد وصمها بالضعف وأنها بتيجي في المرتبة الثانية بعد البطولة الذكورية .. فكان ده رد فعل لده وكان قوي الحقيقة .. رغم أني بأشوف أن المسلسل متأثر بالثقافة الذكورية نوعاً ما .. بس ده موضوع ممكن نتكلم فيه بعدين

يمكن اللي مخليني بأؤمن بأن اللون ده كان رد فعل علي تطور الشونين بنية وشكل المسلسل نفسه بالذات الشخصيات الرئيسية وشكل الصراع وسردية المسلسل ... أي حد متفرج كويس علي مسلسلات الحقبة دي ح يلاحظ تأثر المسلسل بأعمال "شونين" كتير من اللي سبقته .. تحديداً أتنين من الكبار ذوي الشعبية الطاغية وقتها .. "دراجون بول" و"سان سيا" .. يمكن تأثير سانت سيا أكبر بالذات في شكل الصراع بين الخير وشكل القوي بتاعة الأبطل اللي معتمده علي الأدوات ومرتبطة بالمشاعر وبتراث وماضي سابق بيروثه الأبطال من عصور قديمة أكتر منها قوي داخلية ناتجة عن تدريب زي ما في معظم المسلسلات

لكن تأثير دراجون بول باين أوي في بناء الأبطال وشخصياتهم بالذات "أوساجي" .. الشخصية الرئيسية .. بروحها المرحة وتصرفاتها الحمقاء وقدرتها غير طبيعية علي إكتساب الأصدقاء .. هي مزيج من كوجو وبولما .. واخده من جوكو الجانب الساذج والطيب ومن بولما النفعية والخوف والرغبة العاطفية الجياشة

عشان ما أسرحش كتير في الكلام عن المسلسل بشكل عام وجذوره يمكن خليني أركز علي الموسم ده .. في ظني ده غالباً ح يبقي أقل المواسم جودة .. أقرب للـ"بايلوت" .. موسم تجريبي لو نجح السلسلة ح تستمر لو ما نجحش ح يكتفوا بيه وشكراً علي كدة .. حي ده باين أوي في أخر حلقة اللي نقدر نقول كان فيها خاتمة مثالية أوي للسلسلة كلها وفيها برضو إشارة لطيفة لأن القصة لسة ما أنتهتش .. بس من الجيد أنهم خدوا قرار بإستمرار القصة لآنها تستحق الحقيقة

طيب ليه ده يعتبر أقل موسم غالباً؟

لأنه ببساطة بدائي أوي سواء في تتابع الأحداث أو الحبكة أو حتي القصة .. هي قصته جيدة ومكتوبة كويس كقصة لكن كدراما فيها بعض المشاكل وتطور وتتابع الأحداث من حلقة لحلقة في سقطات خلت المسلسل أقل إتزاناً .. كمان تداخل الفيلرات مع الأحداث الرئيسية عمل شوية ربكة بالذات لحد زيي بيفوت الفيلرات ففجأة شخصيات تختفي وفجأة أحداث وتطورات تحصل مش فاهم جت أزاي فاقول يمكن دي فيلر أساساً .. بس أهي ماشية ... يمكن بالذات مع إقتراب النهاية القصة بقت منتظمة ومتماسكة أكتر لكن في النص الواحد كان حاسس بعدم إتزان شوية

كمان الصراع هنا بسيط خالص ومش معقد ويمكن دي ميزة مش عيب .. بس عند درجة معينة .. أنا حبيت أوي فكرة ان القصة مفيهاش اي فذلكة ولا تفاصيل تلخبط .. القصة بظهور الشخصيات بالتتابع بالماضي والفلاش باك وطبيعة الصراع والعلاقة مع الأشرار كله كان واضح ومفيهوش تعقيد ومش محتاج مجهود .. لكن في تطور الأحداث بالذات نهايات الأشرار كانت البساطة زايدة عن الحد شوية لكن يمكن أتظبطت حبة في النهاية بالذات أنها كانت متداخلة مع دراما مكتوبة بشكل جيد ومقنعة

وده يمكن من الجوانب اللي حبيتها أوي في المسلسل ومخلياني حابب أكمله هي فكرة الدراما وعلاقتها بالواقع .. عالم "سايلر مون" تعبير فانتازي عن مخاوف وطموحات وتحديات المرأة في المجتمع وقتها ويمكن لحد الأن .. يمكن ده أنا لاحظته من حاجتين .. تكرر مسائل زي الإختطاف والتلاعب بمشاعر البنات وقصص الحب المعقدة في المسلسل علي مدي حلقاته .. الكاتبة في رأيي كانت بتحكي عن مخاوفها وطموحاتها كشابة وقتها ومن وراءها جيل بيتشارك معاها في نفس الواقع .. مخاوفها من العالم وحاجات زي إستغلال المرأة والعنف ضد .. موقفها من المشاعر والرومانسية والبحث عن شريك .. دي بالذات في رأيي كانت مسألة ذاتية أوي بالذات أن من المعروف أنها وقت نشر وكتابة السلسلة دي كانت المؤلفة "ناوكو تاكويتشي" بتبدأ علاقتها بـ"يوشيهيرو توغاشي" –مؤلف هانتر ويويو هاكاشو- اللي أصبح زوجها فيما بعد والمعروف بانه شخص غير مستقر وتصرفاته غير طبيعية

كذلك طموحاتها وتطلعات جيلها حولين وضع المرأة في المجتمع والحياة بشكل عام .. يمكن ده من جوانب القوة اللي مخلياني متعلق أوي بالمسلسل

لكن لو في عامل أساسي مخليني فعلاً حابب المسلسل بجد .. فهو الرسم والشغل الخرافي في مزج وتناسق الألوان واللي في رأيي كان سابق لعصره أوي .. بالذات إستخدام ألوان زي الوردي والأزرق والأصفر في معظم مشاهد ولوحات العمل اللي مدي إحساس الأنوثة العذراء والأحلام البريئة اللي بتعكس طبيعة شخصيات العمل

يمكن حاجة أخيرة من الحاجات اللي شدتني للمسلسل جرأته في تناول الرومانسية المثلية بشكل خالي من الإتهام وفي إحترام تام وتوقير لرغبات وميول كل فرد .. يمكن ده ح يزيد علي حد علمي في المواسم الجاية وده محمسني أكتر لأن ده وقتها في الإعلام بشكل عام كان خطاب مش طبيعي وغير مرحب بيه .. هو يمكن متلائم مع الخطاب العصري ويمكن عشان كدة كتير من المدونين والمهتمين بالحقوق المدنية بيشوفوا في المسلسل ده عمل إيجابي وناضج وتقدمي في نظرته للقضية المثلية

بشكل عام المسلسل جميل جداً .. ومستمرون

Saint Seiya: Hades

Saint Seiya: Hades

Epi 1-31 End

من أكتر الحالات المتكررة في عالم الأنمي مسألة أن سلسلة المانجا تتحول لأنمي قبل توصل لنهايتها فده يؤدي لأن المسلسل يتعمل عن الجزء اللي تم نشره بس ثم لما تخلص السلسلة بعديها بسنين يرجعوا يكملوها سواء بمسلسل مكمل أو OVA ... يمكن أشهر مثال علي ده حاصل مؤخراً هو بليتش المتوقف في 2012 ومتوقع أنه يرجع 2021

مش دايماً المسألة دي بتنجح بالذات لما الفجوة الزمنية بين الجزأين بتبقي كبيرة .. لأن ده بيخلي في فروق في جودة الرسم وحتي في تعاطي الجمهور وإهتمامه بالسلسلة .. وده اللي حصل هنا

سانت سيا من أشهر سلاسل المانجا في الثمانينيات وكان بتعتبر في مصاف الكبار جنب قبضة النجم ودراجون بول .. تم تحويلها لمسلسل في منتصف الثمانينيات ولاقي نجاح كاسح وكبير .. لكن المسلسل توقف قبل أن يتم القصة ليتم إستكمالها في مطلع الألفية

أول فرق حسيته بين الجزء ده والمسلسل القديم كان طبعاً جودة الرسم ودخول الجرافيك علي الخط .. فعلأً التكنولوجيا فرقت كتير في جودة المسلسل .. لكن للأسف أفقدته الستايل والروح اللي كانت بتميزه .. الأسلوب الحاد والعنيف في الرسم والتحريك

بس المسألة ما وقفتش عند كدة .. هي لو كانت علي الرسم أو فرق الزمن كان سهلة .. فعلاً الموضوع ده بينمحي من ذاكرة الواحد مع الوقت بالذات لما الأحداث بتتسارع والإثارة بتعلي ... لكن هي المشكلة الأساسية واللي فضلت دايرة في ذهني طول ما أنا بأتفرج هي سؤال جوهري ما رضيش يخرج من راسي .. وهو "أيه لازمة الجزء ده أساساً؟"

فعلاً أنا مش شايف أي لازمة لوجود الجزء ده .. يعني أي حد أكتفي بالجزء الأول أظن كدة ح يبقي مرضي .. ورغم أنهم حاولوا طول الوقت يقنعوا المشاهد بأنه فصل مهم في القصة وأنه المعركة الأخيرة والحاسمة .. الا أنهم في المقابل أفشلوا كل المحاولات دي .. طيب أزاي؟

أولاً أحداث المسلسل هي تكرار لنفس أحداث وتيمات أخر فصلين في الجزء الأول .. تيمة "أرك فريزا" بتاعة أن في شرير محوري قوي والأبطال بيخوضوا رحلة شبه البطولة الإقصائية بيواجهوا فيها درزينة من الخصوم الأقوياء عشان في الأخر يحسموا الصراع بمعركة فاصلة بين الخير والشر ... هي نفس الأحداث مع تغيير التفاصيل بل وأحياناً كانت بعض التفاصيل بتتكرر بحذافيرها وده ياخدني لثانياً

ثانياً المسلسل بيعاني من الكتابة الكسولة للغاية .. زي ما قولنا الكاتب ما تعبش نفسه وقام واخد الأحداث بالمسطرة و مجرد زود عليها حبة تفاصيل لا قيمة لها .. ثم أبتدي يحشر ويحشي الأحداث بتفاصيل وإنقلابات درامية غير مبهرة في معظمها .. وهي حتي إنقلابات درامية مش غرضها أنها توزد الإثارة .. لا هي الحقيقة جاية تحل مشاكل الكتابة والعطلة اللي بيوصلها الكاتب عند كل معضلة بتقابله .. يعني كل ما الأبطال يعطلوا في حتة فجأة من تحت الأرض بيظهرلهم حل من برة المقرر وعادة بيكون حاجة خارقة للطبيعة وقوي جديدة كانت مستخبية وما يعرفوش عنها حاجة مهمتها أنها تحل الأزمة الحالية ثم بعد كدة بتبقي عديمة النفع لأن في حاجة ح تظهر بعدين أقوي منها للمعضلة اللي بعد كدة 

حتي الشخصيات بالذات الشريرة أغراضها غير مفهومة وغير مبلوعة وكنت بأحس أحياناً أنهم أشرار من باب الـبـضـان مش أكتر ..رغم أنه حاول يفلسف الموضوع في النهاية وأن صراع هو صراع ما بين الأمل واليأس الا أن الموضوع مكنش مبلوع أوي 

ثالثاً كل ده أثر علي النهاية .. فعلاً واحدة من أسوأ النهايات اللي شوفتها في حياتي رغم كونها منطقية الا أنها ما أتعملتش ولا أتبروزت بالشكل اللي كان يليق بيها .. حسيتها متطلسقة ومستفزة وأتقلبت كدة بشكل مش ظريف .. حسيتها مبتورة ولا تليق بنهاية سلسلة مشهورة زي دي

لكن علي الجهة المقابلة المسلسل كانت ليه جوانب إيجابية مهمة .. منها إستلهامة الشيق والجميل للميثيولوجيا ولكوميديا دانتي ورحلته في العالم الأخر .. يمكن دي أكتر تفصيلة رايقة وجميلة والمسلسل قدر يوظف ويحط كم كبير من الأساطير من مختلف الحضارات والثقافات في سياق درامي جيد جسد بيها روح الججيم والعالم الأخر بشكل رائع الحقيقة

يعني كان للأمر جان مشرق في النهاية .. لكنه مكنش كبير .. لكن في المجمل جزء متوسط القيمة وما يضرش أن الواحد يشوفه

Saint Seiya: Poseidon saga

Saint Seiya

Poseidon saga, Epi 100-114 "End"

الواحد دايماً بيصعب عليه نفسه في اللحظة اللي بيخلص فيها المسلسلات اللي بيحبها .. بيحس بعدها أنه مش عارف ح يعمل أيه ولا عارف يروح فين تاني ولا ح يقضي وقته أزاي بعده .. بس ده أنا مش حاسه هنا مع المسلسل ده رغم حبي ليه ولأحداثه .. يمكن لأن لسة ليه تكملة أو يمكن لأنه بأتعامل معاه كحالة أكتر منه مسلسل وحاسس أنها ح تعيش معايا بعد ما أخلصه أكتر ما عاشت وقت ما أتفرجت عليه

فعلاً سانت سيا حالة خاصة .. الثمانينيات بكل بقي جمالها ورسوماها وألوانها ومزيكتها وأجواءها العنيفة والدراما القوية .. الحاجات اللي أسست للأشكال الحديثة واللي بنفتقد روحها بعد دخول الكومبيوتر والـ سي جي أي في القصة والقوانين الأسرية اللي حجمت من جموح الأنمي محافظة علي المش عارف ايه والبتاع أيه .. نهايته

المهم .. يمكن الأرك ده مش أقوي من اللي قبله نظراً لعدد الحلقات اللي خلت أحداث اللي فات ملحمية أكتر ولأن التاني أتمهدله بشكل أكبر طبعاً .. لكنه يبقي قوي وممتع أوي .. برضو نفس الأجواء الأسطورية في تصميم الشخصيات وأختيار الأسماء والقدرات وطبعاً أجواء الشونين في المعارك وتطوير الشخصية .. فوق كدة الأرك ده فكرني شوية بأرك "فريزا" في دراجون بول .. أحنا في رحلة من أجل هدف بعينه والأبطال كل واحد فيهم في أتجاه بيحارب معركة شكل وفي مفاجأت غير متوقعة وظهور لشخصيات وعودة أخري من خارج السياق والخطوط كلها بتتقاطع في النهاية من أجل المعركة الكبري ضد الشر .. بناء نموذجي لفصل أخير في مسلسل شونين .. معركة نفس طويل ملحمية تنتهي بصدام مباشر بين قطبي الدراما .. شكل مثالي ومتقن أوي

في المجمل Saint Seiya كانت تجربة ممتعة وجذابة أوي رغم أنها طفولية في البداية شوية لكن كل ما بتقرب النهاية كل ما بيقي أنضج حتي علي مستوي الرسم والدراما .. روعة الحقيقة ❤️

#Anime

Saint Seiya: "Sanctuary Saga" Arc 2

Saint Seiya: Knights of the Zodiac

Sanctuary Saga, Epi 10-73 “No Filler”

والله الواحد كل ما يضرب غطس كدة في الكلاسيكيات بينبهر ويلاقي درر .. طبعاً هي مش قاعدة وطبعاً في فرق واضح في جودة الحبكات والقصص وحتي الرسم لكن الأعمال القديمة تبقي ذات روح ورونق خاص حتي لو كانت أقل في تماسك الحبكة أو جودة الرسم من الأعمال الحديثة لأنها وبكل بساطة الرحم اللي خرج منه ما هو حديث والمرحلة ضرورية ومهمة أدت بينا للي وصلنا ليه دلوقتي

حكيت قبل كدة قصتي مع "سيا" وأنه أزاي كان مشهور في مطلع التسعينيات برة ورسوماته موجودة علي شنط وأدوات الأطفال الصغيرين رغم أنه ما أترجمش غير حديثاً وعبر الأنترنت .. بس هنا يجي السؤال "هو ليه ما أترجمش أو أتدبلج وقتها؟!" .. في ظني الشخصي بسبب القصة والفلسفة اللي مبني عليها العمل .. هو عمل بسيط عن مجموعة شبان الأقدار بتختارهم عشان يحملوا لواء الخير ضد قوي الشر بمساعدة الدروع المستلهمة من المثيولوجيا والأساطير القديمة المختلفة من الشرق والغرب سواء من اليابان أو الأغريق أو الصين والهند أو غيرهم .. إلي جانب بعض التأثر بالتراث المسيحي فح نلاقي أن مفهوم الأستشهاد والتضحية موجود بشكل دائم ضمن الأحداث ده غير قصة "أثينا" وأتباعها اللي بيرمزوا للخير المطلق والفرسان الـ12 اللي بيحموها وشبها بقصة المسيح .. الكلام عن الأساطير والألهة شوية كان دايماً بيعمل أزمة للمعرب اللي كان مش مجرد مترجم وناقل لا ده كمان رقيب بيذيع وبيحذف ويضيف ما يتناسب مع الثقافة العامة وما لا يخالف الشرع ولا العرف .. وده في ظني كان السبب الرئيسي في أن مسلسل ناجح بالشكل ده ما أتدبلجش أبداً .. فهو إلي جانب خوضه في مسألة الأساطير والديانات القديمة شوية في كم من العنف والدموية مكانوش ملائمين للمشاهد العربي في رأي الرقيب .. ده إلي جانب شئ مهم جداً وهو أن المسلسل فيه بعد مهم بيتم لمسه بقوة عبر الأحداث وهو البعد الجنساني وأن أكتر من شخصية من شخصياته الجانب الخاص بالهوية الجنسية عندها في تفاصيل معقدة فبنشوف شخصيات رجالية بيغلب عليها الشكل الأنثوي وبنشوف تلميحات ذكية لمثلية بعض الشخصيات وتناول غيرمباشر لشخصيات أنثوية ذات طابع ذكوري .. كل دي حاجات تخلي عرض المسلسل في التسعينيات في العالم العربي كان مسالة مستحيلة تقريباً

بعيداً بقي عن كل ده المسلسل فعلاً ثري وشيق للغاية .. من المزيكا للقصة للأكشن للأجواء الثمانينياتية .. تفاصيله كلها بتبعث في ذاتي حنين جارف للطفولة .. المسلسل نقدر نقول تجميعة موزونة للعديد من القصص

 والأساطير القديمة في قالب شبابي أكشن كلاسيكي بيدور حولين فكرة الصراع ما بين الخير والشر والقوي الخارقة اللي بيدفعها القدر لصف الأخيار لمعاونتهم علي دحر الشر .. تكوينة لذيذة ومثيرة بتعاني من بعض المشاكل في الدراما بس ده عادي لأن بالنسبة لزمانها ده كان السائد وكان التعامل وقتها مع الأنمي لازال متأثر بفكرة أنه فن للاطفال مش فن إنساني للجميع .. حتي ده واضح أوي في فلسفة المسلسل اللي بتتكلم عن أن الأمل في الأجيال القادمة اللي ح تبني غد أفضل بلا حروب ولا كراهية .. فكرة مثالية بتداعب مشاعر الصغار والأسر

أخيراً اللي ح يتفرج علي المسلسل ح ياخد باله أن فكرة الطاقة والتقنيات القتالية في المسلسل كانت بدائية أوي بتتكلم عن أنها إلي جانب أنها شئ بيكتسب مع التدريب هي هبة وشئ قادم من خارج الكينونة البشرة .. وقتها كان لسة "دراجون بول" لم يصنع بعد ثورته في عالم الشونين ومكنش لسة دخل مفهوم الطاقة الداخلية اللي ح ينقل الدراما والأكشن في النوع ده من الأعمال لمستوي أخر تماماً .. لذلك بنشوف هنا شكل بدائي شوية من دراما الشونين بشكل مختلف عن اللي معتادينه حديثاً

وإلي اللقاء في تكلمة المسلسل

Saint Seiya: "Sanctuary Saga" - Arc 1

Saint Seiya

Sanctuary Saga: Arc1 "Galaxian Wars", Epi 1-8

من يجي 25 سنة كدة -في مطلع التسعينيات- أو يمكن أكتر لما كنت لسة في الحضانة كان ده يعتبر بداية غزو الأنمي للثقافة العامة علي المستوي العالمي بعد ما كان خد وضعه في الثقافة المحلية في اليابان .. وقتها كانت بتيجي مصر منتوجات كتير عليها صور ورسومات خاصة بالأنمي كتير بعضها حاجات مكانتش أترجمت عربي لسة وقتها وبعضها حاجات ما أتذاعتش علي التلفزيون خالص ... اللي فاكره كويس أن كان في مسلسل فضل مزاولي لوقت طويل لأني كنت بأشوف رسوماته علي شنط ومقالم وحاجات للأطفال كتير بس ما أعرفش أسمه ولا بيتذاع وكان بيطبعوا أسمه بالياباني فده خلاه بالنسبة لي لغز عويص ووقتها كان أخرنا في المعلومات الـ Nile T.V ولا في نت ولا في كومبيوتر من الأساس ومصادر المعلومات محدودة وشبه منعدمة .. حتي جاء عصر الأنترنت وعرفت أوصله أخيراً وفضلت حاطط Target أني أشوفه يوم ما .. وها قد جاء اليوم الموعود

خلينا ندي نبذة عامة عن المسلسل .. هو مسلسل فانتازي أكشن متأثر بشكل كبير بالمثيولوجيا الأغريقية واليابانية وبيحكي عن مجموعة من الأطفال اليتامي كان بيتم تدريب بشكل قاسي داخل أحد الملاجئ ثم تم إرسال كل واحد فيهم لبلد مختلف لتعلم الفنون القتالية والحصول علي قوي أسطورية تسمي "الدروع" مرتبطة بكائنات أسطورية وبتدي مستخدمها مستوي غير طبيعي من القوة .. القصة بتبدأ بعودة "سايا" بطل السلسلة لليابان بعد حصوله علي درع بيجاسوس والمحمل بكم كبير من الكراهية والنقمة علي مسئولي الملجئ اللي عاملوه بقسوة وارسلوه في هذة المهمة القاتلة .. ومن هنا بتبدأ الأحداث

المسلسل في الكام حلقة اللي شفتهم بيحمل مميزات كتير وجذاب شكلاً وموضوعاً ومثير للتأمل والتحليل .. مش لأنه عميق فهو في النهاية مجرد سلسلة شونين قتالية الغرض منها التسلية أولاً قبل أي شئ .. لكن التأمل بيجي في السياق الزمني اللي صُنع فيه المسلسل واللي أقدر اقول أنه نموذج جيد ومثالي علي الرؤي والأفكار اللي سيطرت علي الثقافة العامة في الثمانينيات وأهم سمات المرحلة بالذات علي مستوي صناعة الأنمي

ح أركز علي 3 نقط بالظبط هنا وح أسيب الباقي لبوستات تانية إن شاء المولي 

الأولي التأثر بموجة أو خلينا نقول بالمفهوم العصري "تريند" الفنون القتالية اللي بدأ زحفة من السبعينيات مع أفلام "بروس لي" ثم تألق في الثمانينيات لما تلقفت السينما العالمية الطعم وبدأ الموضوع يخرج برة نطاق هونج كونج وأصبح ظاهرة عالمية .. المسلسل هنا جاي ضمن هذا السياق فهو مسلسل قتالي المعارك والحركات فيه متأثرة بشكل كبير بأسلوب القتال الموجود في أفلام الكونغ فو وحتي القصة نفسها فيها سمات كتير من الأفلام دي أشهرها أنها متبنية تيمة "البطل العائد" و"البطل بالفطرة" اللي مبنية عليها كتير من الأفلام دي وحتي الفانتازيا نفسها فيها تاثر ولمسات من هذا النوع

ثانياً المسلسل واخد نفس الشكل السوداوي اللي كان منتشر وقتها في الفن عامة وفي الأنمي خاصة وبيحمل كثير من الدموية والعنف مش موجودين في أعمال كتير دلوقتي وبيتم نبذهم .. إنتشار الشكل ده وقتها بيرجع لأسباب كتير خاصة بطبيعة العصر والافكار اللي كانت منتشرة نفسها حولين مصير البشرية ومخاوف البشر من التنكولوجيا والحروب إلي جانب أنه وقتها كان معدل الجريمة والعنف في اليابان كان تصاعد بشكل كبير -علي حد ما أطلعت- وبعض التفسيرات بتقول أن أنتشار الشكل ده من المنتوج الثقافي كان رد فعل علي ده 

أخيراً ودي حاجة الناس السميعة ح تاخد بالها منها أوي .. المسلسلات بتاعة الحقبة دي كان عندها إهتمام كبير بالموسيقي يختلف تماماً عن اللي موجود دلوقتي .. لو تدي ودنك لأي OST من مسلسل من الحقبة دي ح تلاقي أنك بتسمع مقطوعات موسيقية جذابة ومتقنة ومتماشية مع أجواء العمل وبتحمل روح العصر فكلها مقطوعات روك وميتال وsynthwave مش مجرد أي مزيكا أوفر وخلاص .. حاجة معمولة بحرفية .. طبعاً ده تأثر واضح بصعود الروك وابناءه في الحقبة دي وغزوه للثقافة الشعبية وإنعكاس لروح العصر علي المسلسل وعلي الأعمال وقتها ككل

وإلي اللقاء في حلقات أخري

Monster

Monster

Epi 1-74 End

مش بالعادة اني أتكلم عن مسلسلات الأنمي بس أحياناً الواحد بتستوقفه تجارب فريدة من نوعها وغريبة نوعاً ما .. من المسلسل ده ... الكلام اللي كنت بأسمعه بشكل دائم عن المسلسل ده أنه المنافس الأقوي ل Death Note اللي بيعتبر أعلي قمة عالم الأنمي بل البعض قال أنه يتفوق عليه وده مان سبب أنه أتفرج عليه بشغف كبير ولولا أنه يعيبه بعض المط وطول مدة الأحداث كنت أنجزته في فترة وجيزة .. لكن رغم كل ده لازلت مقتنع بأنه تجربة عظيمة وفريدة من نوعها

القصة بتبدأ بمعضلة أخلاقية غير معتادة .. جراح ياباني شاب شهير وناجح بيعيش حياة هادئة وهانئة في ألمانيا .. بيضع مستقبله علي المحك بعد إنحيازه لضميره الإنساني وتفضليه لأنه يجري عملية جراحية حرجة طفل أصيب بعيار ناري في دماغه علي أنه يجري عملية لشخصية ذات مكانة إجتماعية مرموقة .. العملية بتنجح والطفل بيعيش بينما الشخصية المشهورة بتتوفي أثناء العملية الجراحية .. فيما بعد ومع تتابع الاحداث ومع مرور السنين بيكتشف أنه أعاد إلي الحياة شيطان وأنه إختياره ترتب عليه كارثة ستودي بحياة الكثيرين .. ووراء هذة الكارثة ملحمة من العذابات والألام

عجبتني مسألة أن المسلسل بيقوم في بداية علي فلسفة الإختيارات والعواقب .. فهو في البداية طرح معضلة أخلاقية ظريفة وهي هل الفعل الإنساني بيكتسب أخلاقيته من إتساقه مع المثل العليا زي المساواة وإعلاء قيمة الحياة ولا بيكتسب أخلاقيته من العواقب المترتبة عليه؟ .. بيظل هذا السؤال مطروح حتي المشهد الأخير من المسلسل واللي بيعتمد في سير أحداث علي اسلوب أثر الفراشة في احيان كتير لدرجة أني أعتقد أننا في النهاية ح نكتشف أن كل ده كان حلم وأن دكتور تينما بطل المسلسل ح يعيد النظر في إختياره الاول من تاني ويعدل عنه .. ده محصلش بس حصل شئ شبيه بيه ... المسلسل كمان بيتناول أفكار حولين الخير والشر والضمير وحرية الاختيار ووجدان البشر وأزاي انهم تحت ظروف معينة يمكن أن يفقدوا إنسانيتهم ويتحولوا لوحوش 

المسلسل أعتمد علي أحداث كتير حقيقة زي هدم جدار برلين وربيع براغ وممارسات الأنظمة الشمولية في اوروبا الشرقية وكمان اشار بشكل غير مباشر لبعض الظواهر اللي كانت ولازالت موجودة في الواقع الأوروبي زي صعود اليمين المتطرف وتجارب اليوجينيا والصفاء العرقي ومدارس إعداد الكوادر السياسية ومعسكرات تدريب الأطفال وغيرها

المسلسل نهايته زي بدايته محيرة وبتطرح علي الذهن تساؤلات كتير .. أهمها في رأيي هل كل الاشياء اللي بتظهرلنا جيدة هي حقيقة كدة ولا ليها جانب اخر مظلم؟ 

التجربة عظيمة الحقيقة بكل المقاييس بالذات الرسم والقصة رغم المط والتعقيد ووجود بعض المشاكل في الحبكة

تجربة عظيمة للغاية

Cowboy Bebop

Cowboy Bebop

Epi 1- 26

وبعد عناء ومشاهدة متقطعة ونوم أثناء المشاهدة -مش عارف ليه الحقيقة- ورحلة سعيدة جميلة حزينة دموية مثيرة وشيقة ... أخيراً خلصت كاوبوي بيبوب

أول شئ شدني في المسلسل الحقيقة هو طريقة سرده .. مسلسل ما بعد حداثي للغاية بيدور في عالم مستقبلي مخيف وغريب الناس فيه عايشة علي أكتر من كوكب والأرض فيه مدمرة والألات فيه متصدرة المشهد اللي ما بنعرفش عن سر تكوينه ولا عن السبب وراءه أو تاريخه أي شئ الا شظايا متناثرة صغيرة بتسرد علي مر المسلسل بعضها بيتكتب في تتر البداية والفواصل .. ودي بصراحة طريقة جديدة وغريبة كنت أول مرة أشوفها الحقيقة في حياتي .. أنك تحكي جذور القصة في التتر وحتي مش بتتحكي دي مجرد مكتوبة في الخلفية بالأنجليزي ويا لقطها يا ملقطهاش .. وكأن المخرج مش مهتم أوي بأنك تعرف العالم ده جه منين ولا رايح فين علي قد ما هو عايزك تركز مع الدراما الحلقية اللي دايرة اللي مركزها سفينة الفضاء اللي بيعيش علي متنها أبطالنا وبتبقي نقطة تجمعهم وإنطلاقهم

علي نفس النهج بنبتدي نفهم ونشوف أبطالنا .. شخصيات متعددة الجوانب جذورها بتسرد بتشظي وبشكل غير منتظم .. بيجمع ما بينهم أنهم شخصيات من خارج السياق العادي وغريبي الأطوار وجذورهم بتحمل دراما عميقة ومؤلمة

طريقة السرد دي أدت للمسلسل روح مختلفة فحلقاته عبارة عن إستكشاف لجوانب هذا العالم الغريب وإستكشاف لطبائع وجوانب أبطالنا المختلفة .. ومع كل حلقة بتشوف جانب جديد ومختلف في الأبطال وعلاقتهم ببعض وماضيهم ورؤيتهم للحياة .. لكن في ذات الوقت شكلت عيب يمكن هو الأهم في المسلسل وهو أنه كان في حلقات مملة أو مش قوية غرضها أنها تركز أو تبين جانب بسيط من الشخصية لكن للأسف وهي بتبينه كان القالب اللي تم فيه ده مش خفيف وكان محتاج يبقي في أهتمام بحبكة الدراما نفسها حتي لو علي حساب الفكرة أو السرد اللي بيستكشف الشخصيات

مش ح اطول في الكلام لكن خليني أقول شئ مهم وهو أن المسلسل فيه قطعاً تأثر كبير بالسينما والثقافة الغربية تحديداَ رعاة البقر اللي أشتق منهم أسم المسلسل وده باين في جوانب كتير ومش غريب علي أعمال المخرج "شينتشيرو واتانابي" اللي ليه مسلسل تاني رائع وعبقري ماشي علي ذات الأسلوب وهو Samurai Champloo واللي بأرشحه لأي حد عجبه المسلسل وحابب يشوف حاجة شبهه

وفي النهاية نراك لاحقاً أيها الكاوبوي

Dragon Ball Super: Universe Survival Saga

Dragon Ball Super

Universe Survival Saga, Epi 77 - 131 End

من قيمة سنة كدة كنت قابلت رجل طيب كان جاي Training في مكتبة ألف بس مع الأسف ما كملش .. ولأني بأؤمن بالألاعيب الغريبة لهذة الحياة فأنا لازلت مؤمن أن الرجل ده كان جاي المكان ده مخصوص في مهمة زمنية هو نفسه مش مستوعبها هدفها أنه يقابل العبدلله ويقنعه أنه يكمل Dragon Ball Super .. والنهاردة باعلن للرجل الطيب ده -اللي مع أسف ما عرفتش أتواصل معاه فيما بعد- أن المهمة نجحت وأني خلصت المسلسل وشوفت الفيلم بتاعه كمان ❤️

أنا رأيي أتغير 180 فعلاً لأن أول فصلين من المسلسل كان فيهم مشاكل كتير أولها أنهم تكرار لأحداث الفيلمين اللي قبل المسلسل وأن الرسومات مكنتش قد كدة وكمان المسلسل أختلف من حيث قوة أحداثه وطريقه رسمه كتيييير عن أيام Dragon Ball Z اللي كان مشوق وعنيف وفكاهي ودرامي وخيالي بشكل أسطوري .. لكن المسلسل بعدها بدأ يتحسن وأحداثه تبقي أقوي وممتعة أكثر فأكثر لحد ما وصلنا للفصل الأخير

أحداث بطولة الأكوان هي الأقوي في تاريخ السلسلة ويمكن مش لاقيلها مثيل غير يمكن أحداث المعارك الأخيرة في Frieza Saga و Cell Games و Majin Buu .. لا بجد شئ عظيم وأحداث مثيرة وتطورات رهيبة وشخصيات ممكن تكون فيها شوية سخرية وفكاهة في التصميم بس مثيرة وتشدك وتحمسك تتاعب وتتفرج .. أنا أتفرجت في يومين بس علي أكتر من 30 حلقة وده معدل جنوني ما عملتوش من زمان .. بس فعلاً مكنتش قادر أوقف .. كل شخصية وكل كون حكاية ولغز وقصة وكل بطل أبرز أهم جوانبه ومميزاته وقدراته .. حتي المعلم روشي وتيان اللي مع الوقت دورهم بقي قمة في الهامشية جوا السلسلة مع صعود أبطال زي فيجيتا وجوهان بقدراتهم العالية .. حتي دول كان ليهم دور مميز ومتبروز كويس أوي بالذات روشي اللي عمل حاجات فاقت توقعاتي 

من غير حرق المسلسل ككل وكالعادة عظيم وخرافي بالذات الفصل ده .. رسوماته ومعاركه شئ جنوني

دراجون بول في القلب مهم مر الزمن ❤️😍

Dragon Ball Super: Future Trunks Saga

Dragon Ball Super 

Future Trunks Saga , Epi 47-67 Finale

فصل عظيم وقوي للغاية .. عودة شخصية ترانكس المستقبلية كان شئ عبقري أوي وأثري عالم دراجون بول أكتر .. دلوقتي أحنا قدام عالم مبني علي نظرية الأكوان المتوازية والأبعاد الزمنية .. والتفصيلة دي أدت لإثارة عاصفة من النظريات حولين دراجون بول وسير الأحداث فيه وهل ترانكس المستقبلي اللي ظهر في الجزء ده هو هو اللي ظهر في Z ولا شخصية مختلفة .. وده إن يدل فيدل علي الرضا اللي تلقي بيه المتاعبين للسلسلة الفصل ده

رسومات أفضل؟ أه .. معارك أفضل؟ أه .. أحداث متماسكة؟ أه .. قصة مثيرة أكثر؟ برضو أه

لكن الفصل كان في عيب في القصة الا وهو أنه كرر فكرة السفر عبر الزمن كذا مرة بشكل أفقدها بريقها .. ده غير أن الأحداث كان فيها شوية مط وتكرار والشخصيات ما أتطورتش بالشكل المنتظر وظهرتلهم قدرات جديدة غير في الأخر خالص .. وده شئ مش أي متفرج يتعاطي معاه .. بس قوة المعارك والأحداث عوضت عن الحتة دي

فصل جميل .. مكملين 

Dragon Bal Super: Universe 6 Saga

Dragon Bal Super 

Universe 6 Saga , Epi 28-41(No Fillers)

كنت واخد القرار من بعد إشادة زميل محترم كانت مهمته أنه يحفزني أني أكمل المسلسل ده بعد توقف متعمد بسبب إعتقادي أنه مستواه مش قد كدة ومفيهوش جديد .. لكن الصراحة الرجل قدر يغير وجهة نظري تماماً .. الحسم كان بعد مشاهدة الفيلم الماستربيس "Broly" والإشارات اللي بتقول أن غالباً السلسلة راجعة من جديد باحداث أقوي وأفشخ

لو حد حابب يشوف المسلسل بدون مط ممكن يشوف الفيلمين 

Dragon Ball Z: Battle of Gods ، Dragon Ball Z: Resurrection 'F'

 وبعد كدة يخش عدل علي الحلقة ال28 .. لأن أول فصلين من المسلسل هما هما أحداث الفيلمين بس مع شوية مط وبرسومات أضعف شوية .. ودي يمكن أول نقطة باخدها علي المسلسل .. ضغف الرسومات في مواطن كتير بشكل أحياناً بأحسه بيضعف حتي قوة الأحداث وبيفسد متعتها .. ثانياً في حبة مط .. بس ده مقبول في مسلسل .. عادي .. ثالثاً تصميم الشخصيات اللي حاسس أنه مش مبذول في مجهود زي اللي كان حاصل في زد .. بس بصراحة المسلسل معاركه حلوة وقصته لطيفة

لو حد Fan لسلسلة أنصحة يشوف المسلسل ده .. لطيف جداً

Dragon Ball Z: Saga 1 - Saiyans Saga

Dragon Ball Z

1- Saiyans Saga: Epi 1-35 “No Fillers” Finale

قبل ما بس ما نخوض في أي حديث تحليلي عن المسلسل حابب أقول حاجة صغيرة .. أنا ليه بأتفرج علي المسلسل دلوقتي تاني رغم أني شوفته من حوالي 17 سنة فاتوا؟

لـ4 أسباب أساسية .. أولاً لأني شفت المسلسل ناقص زمان .. يا ناقص حلقات يا ناقص فصول وده لأسباب مختلفة منها عوامل الزمن .. وقتها كنت في إعدادي وكانت الدروس المذاكرة بيمنعوني من مشاهدة المسلسل ع التلفزيون بشكل منتظم ده غير أني قفزت للأمام في الأحداث لما بعد كدة دخلنا في عصر الأنترنت لأني كنت مستعجل وعايز أعرف أيه اللي ح يحصل بعد كدة .. وقتها أساساً ما كانتش فكرة التحميل منتشرة والسرعات كانت أسـوأ مما أي حد يتخيل .. كانت أقصي سرعة في مصر نص ميجا وأساساً كان لسة البلوراي ما ظهرش وقتها ولا أنتشر .. فكانت مشاهدة المسلسل بالشكل ده وقتها بطولة

ثانياً لأني باحب السلسلة بشكل لا يوصف وتعتبر من الأعمال اللي أثرت فيا بشكل كبير وفي ذوقي وشخصيتي بشكل عامر .. وده يدخلني علي ثالثاً .. دايماً لما تحب شئ لازم تنقده وتجدد علاقتك بيه وتحطه علي الميزان عشان علاقتك بيه تبقي واقعية وعقلانية .. أنا شوفت علاقتي بالمسلسل كانت عاطفية أكتر ومتعلقة بالنوستالجيا .. وده طبيعي لأن أكيد كطفل مكنتش ح أقدر أحكم عليه ولا أنقده بشكل ناضج عكس دلوقتي .. ولذلك قولت لازم نضعه في الغربال مش بس عشان أجدد علاقتي بيه كمان عشان أقدر أقيمه وسط المستجدات اللي طرأت علي الفن حالياً والأعمال الحديثة وبنظره هذا العصر .. رابعاً ويمكن ده سبب مش مهم أوي بس وجب ذكره وهو الرد علي العـبـط اللي بيقولوا بعض المحدثين يعني عن أن الأعمال القديمة كان رديـئـة وأن الوضع الحالي أفضل .. مش كدة والله خالص يا شباب بل مش عاوز أقول أن العكس صحيح .. ما علينا يعني

تجربة أنك تتفرج علي دراجون بول زد بعد الإنتهاء من الجزء الأول بعيداً عن أنها ممتعة كمان بتخليك تشوف القصة من منظور جديد وتشوف فيها أبعاد يمكن غابت عن اللي شاف زد علي طول

الجزء الأول كله بيدور حولين أسطورة "جوكو" الولد ذو القدرات الهائلة غير المبررة وذو القلب الطيب اللي أنحيازه للخير وحبه للقتال والمنافسة بيدفعوه دائماً نحو الأمام للتطور لدرجة بتصل أنه بيبقي مرشح أنه يبقي "إله" في نهاية الجزء لكنه بيرفض .. في المقابل بنشوف شخصية "بيكولو" التجسيد الحي للشر وذو القدرات الفريدة من نوعها .. وعلي الطرف الأخر بنشوف أصدقاء جوكو "كيريلين، يامتشا، تين، تشاوزو" اللي بيحاولوا يجاروه في القوة لكنه بيسبقهم دايماً .. حلو الكلام .. تمام أوي .. الجزء بينتهي بإرساء حقائق لكن من غير ما يكشف أي شئ أو يشرح أي شئ .. بمعني أحنا بقينا عارفين أن جوكو وبيكولو الأقوي .. لكن ليه والقوة دي مصدرها أيه ده ما أتشرحش .. وده كان مهم لأنه ده الخيط اللي ح يمتد عشان تتبني عليه الأحداث الأولي من الجزء التاني

قولنا أن جوكو وبيكولو هما الأقوي .. واحد طيب والتاني شرير .. تمام؟ .. طيب ما تيجي أضرب ثوابتك شوية وأقولك أنهم مش الأقوي .. لا وتعالي كمان أقولك أن الموضوع مش زي ما أنت فاهم .. وأن الطيب مش طيب في المطلق والشرير أساساً مش شرير؟ .. يعني أيه؟ وأزاي؟

الأجابة هي شخصية "راديتس" .. أخو كوجو –أو كاكاروتو- الأكبر .. الرجل اللي بيجي يقلب الموازين .. أول شئ بيقلبه أنه بيشرح الجزء اللي غاب خالص عن الشرح في الجزء الأول وهو جذور جوكو .. وبنعرف منه أن جوكو زي ما تم الإشارة بخبث قبل كدة كائن فضائي بينتمي متقدمة علمياً من المقاتلين أسمهم السايانز .. وأنه كان جاي الأرض عشان يدمرها وهو طفل

صدمة مدوية .. أنا شخصياً فاكر لما شوفت الحلقة دي أول مرة دماغي لفت .. طبعاً باين أوي أن القصة متأثرة بقصة "سوبرمان" بس جايباها بشكل عكسي كعادة السلسلة اللي تقريباً ما سابتش حاجة مشهورة ما سخرتش منها أو قلبتها ... لكن خلينا هنا نركز علي حاجة .. أيه أهمية الحدث ده بالذات أنه يتقدم في البداية؟

في رأيي الحدث ليه أكتر من أهمية .. منها أنك تشعلل الدراما وتلعب بأعصاب الجمهور وتخليه يشك في كل الثوابت اللي بنتها له في البداية .. علي الناحية التانية ده كانت بداية لتغير تيمة وشكل المسلسل من السخرية والكوميديا للجدية والظلامية والعنف واللي ح تزداد حدتها مع الوقت بالذات بعد الموت الدرامي لجوكو في الحلقة الرابعة .. ثم أنت بتعيد بناء القاعدة اللي بنيت عليها المسلسل من جديد فالسلسلة تحولت من إكتشاف قوي وموهبة كوغو لتطور جوكو ورفاقه لمواكبة التحديات والمخاطر اللي بيواجهوها .. للأمانة كل تيمة في دول كانت موجودة قبل كدة بس واحدة فيهم صوتها علي عن التانية

البداية برضو بنت للتطور كبير اللي ح يحصل لشخصية بيكولو .. كان مهم أن المؤلف يؤكد علي بيكولو مش مجرد إستنساخ لأبوه "كينج بيكولو" بل شخصية أقوي ومستقلة عنه تماماً .. جزء مهم من الإستقلال ده بان في التحول اللي حصله نفسياً من شخص قاسي وشرير لشخص نبيل .. الحتة دي مهمة أوي في رأيي .. هنا المؤلف "تورياما" بيؤكد معني مهم جداً وهو أنه مفيش خير مطلق ولا شر مطلق .. وشوفنا جوكو الطيب أزاي أتضح أنه ليه جذور شريرة بينما بيكولو الشرير بنشوفه وهو بيعتني بجوهان وبيضحي بحياته لحمايته .. المؤلف بيؤكد علي حقيقة أن الشر والخير إختيار مش غريزة وإلي الأختيار هما ظروف بيتحط فيها كل شخص .. قالها بيكولو لجوهان أنه ضحي بحياته عشانه لأنه أول حد ما أتعامل معاه بود وما خافش منه .. يمكن لو كان بيكولو نشئ في ظروف شبيهة بجوكو كان مصيره أختلف تماماً .. ودي نقطة مهمة تودينا للشخصية الأكثر أهمية في الفصل ده .. فيجيتا

باين أوي في البداية أن المؤلف مكنش مهتم أوي بشخصية فيجيتا –باين من الرسم تحديداً- ويبدو أنه كان ح يموت في البداية .. لكن لسبب ما غير رأيه وأبتدي يضيف له تفاصيل وعمق ويهتم بتصميمه .. برضو يمكن لحد نهاية الفصل حسيت مكنش قادر يحدد هو ح يعمل بيه أيه بالظبط بس علي الأقل كان حاسس أنه يستحق يستمر .. وكان أعظم قرار خده الرجل الحقيقة

فيجيتا تكرار لفكرة بيكولو لكن من منظور تاني .. برضو أزمة النشأة والظروف اللي بتخليك شرير رغم عن أنفك .. لكن متضاف عليها حاجة كمان وهو الغرور الناتج عن إعتقادك أنك مميز اللي بيخليك دايماً بتعامل الأخرين بإحتقار تشعر أنه مستحق .. حتي تصطدم بحقيقة أن تميزك ده وهم وأنك قدامك كتيييير علي ما تبقي متميز بالشكل الحقيقي اللي متصوره

فيجيتا وجد في المسلسل عشان يبقي المنافس المباشر لجوكو اللي بيكسر الفكرة المملة بتاعة أن جوكو هو دايماً الحل الوحيد لأي أزمة .. جوهان كان أحد أبواب الخروج من النمطية دي بس مكنش مناسب أنه يبقي منافس لجوكو نظراً لسنه ولأن تطوره ح ياخد وقت طويل فكان لازم يبقي في شخص يثري الدراما والمنافسة ويبقي خطر دائم بيتهدد البطل بعيد عن الأخطار المعتادة .. فكان فيجيتا هو الأختيار المناسب .. الأمير الباحث عن ملكه الضائع والواهم بأنه أفضل محارب في جنسه اللي بيصطدم بحقيقة انه مش الأفضل وأن في مقاتل "اقل منه في الدرجة" تغلب عليه وفاقه في القوة .. وهو ما يشعل الصراع بينهم اللي ح يؤدي بشكل مباشر لتطور الشخصيتين مع الوقت

مش دايماً جوكو هو الحل الوحيد ودائماً هناك من يقاربه في القوة اللي بيسانده بيقف إلي جانبه في وجه الأخطار وبينافسه .. وده أهميته بانت أوي مع نهاية الفصل ده .. لأن فارق القوة بين جوكو ورفاقه بقي كبير أوي وبقي صعب عليهم يحصلوه .. فكان لازم يبقي في حد قادر يحصله أو يتفوق عليه عشان الدراما تشتعل أكتر

طبعاً الفصل في مشاكل كتير منها البلوت هولز أو المغالطات الدرامية .. زي سبب فناء السايانز والدافع وراء بحث فيجيتا والسايانز عن جوكو ثم الدراجون بولز .. ده كله مرجعه لأن الكاتب بيبقي حاطط تصور للقصة وبعدين بيغير رأيه وأحياناً لأنه بيسد بعض الفجوات غير المنطقية في القصة .. هي مشكلة المسلسل بيعاني منها بشكل عام بس أنا ما بأقفش عندها كتير وبأعذرهم بصراحة لأنها سلسلة كبيرة وشهيرة ومعمولة تحت ضغط أستديدوهات الإنتاج والناشرين فده بيخلي الكتابة مستعجلة ومطلوب أنها تبقي سريعة وعلي مدي طويل وهو ما يسبب كل هذة الأزمات ... أنها الرأسمالية يا سادة

لكن المجمل جميل جداً .. تقريباً ده والفصل اللي بعده –فصل ناميك/فريزا- من أعظم فصول الشونين أكشن في التاريخ وأسس لكتير من أنماط وقوالب الشونين فيما بعد 

وعند هذة النقطة يتوقف قطار رحلتنا مع دراجون بول إلي حين العودة إليه في المستقبل إن شاء الله .. تحياتي

#Anime